

|
“პრემიერი” “ნაციონალური მოძრაობის” ერთ-ერთ ლიდერს გივი თარგამაძეს ესაუბრა:
მოგესალმებით,
- თქვენს მეზობლად, პრემიერ-მინისტრის სახლთან გამართული ბოლო აქცია დესტრუქციული ძალების აქციად შეფასდა. ამბობენ იმასაც, რომ ეს ყველაფერი “ნაციონალურ მოძრაობას” საერთაშორისო საზოგადოებისთვის სჭირდება. ასეთი სახის აქციების შედეგი ხშირ შემთხვევაში თქვენი მომხრეების მიერ “კაპეზეში” გატარებული ერთი ან ორი ღამე და ადმინისტრაციული სახდელია. რატომ იმეტებენ ეს ადამიანები საკუთარ თავს?
- ეს შემთხვევა კიდევ უფრო უარესია, ვიდრე სხვა. იმიტომ რომ ადამიანი ამ ფაქტის შეფასებისას ლაპარაკობდა საკუთარ თავზე სიტყვით - ჩვენ და სახელმწიფო. ერთი სახელმწიფოს გამოჩენილი ხელმძღვანელები არ იგივდებოდნენ სახელმწიფოსთან, ჰაკიმ ფაშა მით უმეტეს, ხომ? აქ არის სუფთა შიზოფრენიის გაგრძელება. ამას ჩვენ ყოველდღიურად ვაკვირდებით ტელევიზიით. ჩემთან, ჩემს ქუჩაზე ბევრად უფრო გამწვავებულია ყოველდღიურ რეჟიმში, მარტო ამას არ ეხება.
საკმაოდ ციოდა, შესაძლოა, ის ადამიანები კიდევ 15-20 წუთი ყოფილიყვნენ იქ და დაიშლებოდნენ. მაგრამ უბრალოდ ვერ დაუშვა მან, რომ მისი სახლის წინ ვინმემ ასეთი რამ გაბედოს. პოლიციის გაძლიერება იყო არაადეკვატური, გარდა იმისა, რომ ჩვენი ქუჩა იყო სავსე, კიდევ ფალიაშვილი იყო სავსე მიკროავტობუსებით, პოლიციელებით. აქციაზე კი 100 კაცზე ცოტა მეტი იყო. მით უმეტეს, თუ გავიხსენებთ, რომ იგივე ამ ხელისუფლების პირობებში, თვითონ ჰაკიმ ფაშას მიერ ჩემს სახლთან, რომელიც მისი კორპუსის გვერდზეა, იყო ორგანიზებული მისი დედოფლისწყაროელი ტიტუშკების რამდენიმე აქცია და მსგავსი არაფერი არ ხდებოდა მაშინ. ისინი იქცეოდნენ ისე, როგორც უნდოდათ და ხელს არ ვუშლიდით. უფრო ადრინდელიც შემიძლია გავიხსენო, როდესაც ჩვენ ვიყავით ხელისუფლებაში, ისინი - ოპოზიციაში, ასევე ჩემს სახლთან მართავდნენ აქციებს. მიუხედავად ამისა, არც ერთი პოლიციელი ახლოს არ მისულა. ამდენად, ღარიბაშვილის გამო რომ ამხელა წივილ-კივილი რატომ უნდა ხდებოდეს, გაუგებარია.
ნიშანდობლივია, როგორ ცდილობენ ამ ყველაფრის გამართლებას - გამოიყვანეს ქალბატონი, დააწერეს მეზობელი და მან თქვა ყველაფერი, რაც შეიძლებოდა აქციის დაშლის გასამართლებლად გამომდგარიყო - მოვიდნენ, უზრდელობდნენ, მერე ერთმანეთში იჩხუბეს. ამ დროს ამ ქალბატონს გაახსენდა, რომ თურმე ბავშვი ჰყავდა ცუდად და სასწრაფო გამოიძახა და მათ სასწრაფო არ გაატარეს. ასეთი რაღაცებით შეეცადნენ გამართლებას. პროვოკატორები როგორ შეიყვანეს, ეს ჩანდა კიდეც. ამიტომ სრულიად არანორმალური სიტუაციაა. შემდეგ კი განცხადებები - ჰაკიმ ფაშაა თუ რაც არ უნდა იყოს, პრემიერ-მინისტრი ჰქვია მას და როდესაც ასე თავხედურად აცხადებს, რომ არ დაუშვებს ასეთ რაღაცებს, ეს არის დესტრუქცია. ფაქტობრივად, ამით იწყებს პირდაპირ სიტყვის თავისუფლებაზე და თითოეული ამ ქვეყნის მოქალაქის დემოკრატიულ უფლებებზე შეტევას.
მეორე მხრივ, თქვენს კითხვაში რაც იყო - რისთვის გამოდიან ეს ადამიანები და რისთვის მიდიან ასეთ დაპირისპირებაზე, ანუ იგდებენ თავს იმ საფრთხის წინაშე, რომ ან ღამე გაატარონ “კაპეზეში” ან მით უმეტეს, რომ მათ წინააღმდეგ სისხლის სამართლის საქმე აღიძრას - რა თქმა უნდა, იდეის გამო, რა თქმა უნდა, თავისუფლების გამო, რა თქმა უნდა, ქვეყნის სიყვარულის გამო. კონკრეტულად ამ აქციას თუ განვიხილავთ, ნახეთ, რამხელა ზეწოლა იყო მოსამართლეზე. სასამართლოს ეზოში, რასაც ამ ახალგაზრდებს ნამდვილად არ დააშვებინებდნენ, მაგრამ ხელისუფლებისგან გამოგზავნილი ხალხის მიერ ზეწოლა ხორციელდებოდა. ასე რომ, გარკვეულწილად დაბალანსება მოახდინეს. ამ კონკრეტულ შემთხვევაში თუნდაც იგივე მოსამართლემ იცოდეს, რომ სხვა აზრიც არსებობს ამ ქვეყანაში.
- ბოლო წლების განმავლობაში ჩვენ არაერთი აქცია გვინახავს. აქციები, რომლებიც რადიკალური დაპირისპირებით დასრულებულა და იყო თუნდაც “საკნების ქალაქის” აქციაც. როდესაც თქვენმა ხელისუფლებამ, ფაქტობრივად, საკმაოდ ორგანიზებული აქციების სრული იგნორირება მოახდინა და არ შევიდა ოპოზიციასთან კონფრონტაციაში. როგორ ფიქრობთ, ხომ არ აჯობებდა, ხელისუფლებასაც თუნდაც ამ კონკრეტულ შემთხვევაში აერჩია ეს ტაქტიკა და რატომ აქცია ეს 100-კაციანი აქცია დღის ნიუსად?
- ეს გამომდინარეობს ადამიანების განწყობიდან, მსოფლმხედველობიდან, თუნდაც იქიდან, როგორც დადის ადამიანი, რომელსაც პრემიერ-მინისტრი ჰქვია - ლამისაა გადატყდეს ამ გაჯგიმულობისგან. პირდაპირ შეგვიძლია ვთქვათ, რომ ამ გაჯგიმულმა ადამიანმა ვერ დაუშვა, რომ მის სახლთან ვინმემ გაბედოს, რომ რაიმე დაიძახოს. ესაა თორემ, ზუსტად იგივეს ვამბობ, რასაც თქვენ - აქ იგნორირებაც არ უნდოდა, უბრალოდ, ელემენტარულად ამოწურული იყო თითქმის აქცია და 10 წუთში თუ 15 წუთში ის დაიშლებოდა. მან მიზანმიმართულად არ მისცა ამის საშუალება და დაშალა, დაარბია, გამომდინარე იქიდან, რომ, ასე ვთქვათ, სამაგიერო მიუზღო. კიდევ ერთხელ ვამბობ - კომენტარში ადამიანი საკუთარ თავს აიგივებდა სახელმწიფოსთან.
- თქვენ არ მიეკუთვნებით თანაპარტიელების იმ ფრთას, რომელიც საკუთარ განცხადებებში, ასე თუ ისე, მოზომილია. თქვენ მუდამ რადიკალური ხართ. არის თუნდაც ერთი საკითხი, რომლის გამოც შეგიძლიათ, ხელისუფლება შეაქოთ?
- სამწუხაროდ, არ არის ნამდვილად, ამას ჯიბრის გამო არ ვაკეთებ, და არც ნიშნის მოგების. სამწუხარო არის ის, რომ ამ ხელისუფლებამ მოახერხა და ნებისმიერი მიმართულებით სისტემები ჩამოანგრია. ყველა სისტემა ჩამონგრეულია ახლა. სრული სტაგნაციაა. მეტსაც გეტყვით, მე პირადად არ მაქვს არანაირი იმედი, რომ ამ ხელისუფლების პირობებში, რომელიმე სისტემა ამუშავდება. ვერ ამუშავდება. თუნდაც ავიღოთ ინფრასტრუქტურა. გარანტიას გაძლევთ, რომ საერთოდ ვერაფერს გააკეთებენ. თვითონ გამოაცხადეს - გზატკეცილის მშენებლობა გვირაბამდე ვეღარ მივა 2019 წლამდე, როცა წელს უნდა მისულიყო. თვითონვე აღიარებენ - მოსპეს ყველაფერი, რითიც საქმე უნდა გაკეთებულიყო. წარმოდგენა არ აქვთ, როგორ უნდა გააკეთონ ეს ახლიდან. კონსტატაცია გვიწევს იმისა, რომ პირველი შემთხვევაა, როდესაც ხელისუფლებაში არის ხალხი, რომელთაც არაფერი არ იციან. სრული უვიცობაა. ამ ხელისუფლებას ამაზე მეტად მართლა არც ერთი სიტყვა არ უხდება. სად შეიძლება შეაქო? დაწყებული საგარეო პოლიტიკით, დამთავრებული ყველა შიდა სისტემური პრობლემით. პრობლემები, რომელიც თითოეულ დღეს მოსდევს, მეტყველებს თავის თავზე. რით შეიძლება იამაყო? რითიც იამაყეს, შეიძლება თითზე ჩამოვთვალოთ - ერთ-ერთ საავადმყოფოში გახსნილი ტრანსფორმატორით და ჩვეულებრივი პანდუსით კანცელარიის შენობასთან - ეს არის და ეს. რაც შეეხება ევროკავშირთან ასოცირებას - რამდენიც არ უნდა იამაყონ, ყველამ იცის, როდის იყო ყველაფერი გაკეთებული. უბრალოდ, ხელმოწერა თავისთავად საამაყო არ არის. ეს რომ იყოს წარმატების ნიშანი, მაშინ ჰაკიმ ფაშა ყველაზე წარმატებული პრემიერ-მინისტრი იქნებოდა, რადგანაც ყველაფერზე მოაწერა ხელი, რაზეც შეეძლო და რაზეც არ შეძლო. კიდევ ერთხელ ვამბობ - ყოველგვარი დაცინვისა და ყოველგვარი ნიშნის მოგების გარეშე - სამწუხაროდ, კატასტროფული მდგომარეობაა ყველა მიმართულებით.
- შეიძლება ეს კითხვა თქვენ არ უნდა დაგისვათ, მაგრამ მაინც გკითხავთ, როგორც ყოფილ ჟურნალისტსა და პიარტექნოლოგიებში გარკვეულ ადამიანს, ხომ არ ფიქრობთ, რომ ხელისუფლების პრობლემა სწორედ იმაში მდგომარეობს, რომ ისინი სწორ და გასაგებ მესიჯებს ვერ აწვდიან საზოგადოებას? ვფიქრობ, მუდმივად განვლილ ცხრა წელზე - უკუნსა და ბნელზე აპელირება, პირიქით, თქვენს წისქვილზე ასხამს წყალს. მიმაჩნია, ხომ ჩემთვის, მოქალაქისთვის, უფრო პოზიტიური იქნებოდა მესიჯი, მათ ააშენეს 9-სართულიანი სახლი - ჩვენ ავაშენეთ 19-სართულიანი...
- სავსებით გეთანხმებით, აქ არ არის პრობლემა მესიჯის ჩამოყალიბებაში, თუმცა ესეც პრობლემაა, რადგან ელემენტარული წერა-კითხვა არ იციან. ამის მაგალითია არცთუ ხელწამოსაკრავი ბოსი - შს მინისტრი, რომელიც ვერ მეტყველებს. თუმცა, თუ ვერტიკალზე გავყვებით - მეტყველება არ იცის, თავისავე აღიარებით, ივანიშვილმა. მან თქვა, მეც ვერ ვმეტყველებ კარგად და ჭიკაიძეს რას სთხოვთო. ღარიბაშვილი საერთოდ როგორ მეტყველებს, არავინ არ იცის. ეს ერთი სახის პრობლემაა. მაგრამ რეალური პრობლემაა ის, რომ არაფერი აქვთ სათქმელი. ზუსტად ის, რომ ლაპარაკია გაუთავებელ 9 წელზე, წასული ხელისუფლების შეცდომებსა თუ დანაშაულზე, როგორც ორჯერ ორი, ისე ლაპარაკობენ ადამიანები, რომელთაც სათქმელი არაფერი აქვთ. ესეც იმაზე მეტყველებს, რომ ყველა მიმართულებით ერთნაირი პრობლემა აქვთ. მათი მხრიდან ნებისმიერი მიმართულებით საუბარი თავდება 9 წელზე ლაპარაკით. თქვენ მართალი ბრძანეთ - მე ჟურნალისტი ვიყავი. მათ შორის შევარდნაძის პერიოდში და ასეთი კატასტროფა, მე მგონი, მაშინაც არ იყო.
- ხშირად მომისმენია, რომ ამჟამად “ნაციონალური მოძრაობის” ინტერესებში არ არის მოვლენების რევოლუციური გზით განვითარება. თუმცა ხელისუფლება აცხადებს, რომ დესტრუქციული ძალა ხართ და სახელმწიფო გადატრიალებისთვის ემზადებით. რატომ არ გაწყობთ ან რატომ გაწყობთ რევოლუცია და გაქვთ თუ არა არგუმენტები რომელიც თქვენი პარტიის დესტრუქციულობას გააქარწყლებს?
- პირველ რიგში, ამის რაიმე ნიშანი მაინც უნდა არსებობდეს, იმ ბოდვების მიღმა, რაც ღამღამობით ჭიკაიძეს ესიზმრება - საბურავები და ასე შემდეგ. ერთი ფაქტი რომ ვინმეს წარედგინა, რაიმე მსგავსი, ამაზე მაინც იქნებოდა ლაპარაკი. როცა არანაირი მსგავსი მოძრაობა, არც ფაქტი არ არსებობს, რა თქმა უნდა, თითიდან გამოწოვილია ეს ლაპარაკი. ერთს გეტყვით, ჩვენ თუ რევოლუციური გზების მომხრე ვიქნებოდით ამას არჩევნების მერე გავაკეთებდით. ჩვენ გადავდგით, ჩვენი აზრით, ჩვენთვის საამაყო, ამ ქვეყნისთვის ძალიან მნიშვნელოვანი ნაბიჯი - მშვიდობიანად, არჩევნების გადავეცით ხელისუფლება ხალხის მიერ არჩეულ ახალ ძალას. ამის მერე, ჩვენი მხრიდან რევოლუციის ინიცირება, ალბათ, გაუგებარი იქნებოდა, როგორც მინიმუმ, და არათანმიმდევრული. მიგვაჩნია, რომ ქვეყანა გადავიყვანეთ თვისობრივად ახალ ეტაპზე. ჩვენს ქვეყანას და იმ მონაპოვარს, რაც გვაქვს, ვუფრთხილდებით. რუსული ფაქტორიც ძალიან გასათვალისწინებელია ამ სიტუაციაში. არსებობს წითელი ხაზებიც და თუ პირდაპირ აბარებს ხელისუფლება რუსეთს ქვეყანას, ამ შემთხვევაში ეს არ იქნება მხოლოდ ჩვენი საქმე და ეს იქნება საერთო ეროვნული საქმე.
- რევოლუციური პროცესების შემთხვევაში პუტინს, არა იმიტომ, რომ ძალიან უყვარს “ქართული ოცნება”, არამედ მისთვის სასურველი მიზეზის გამოსაძერწად, შეუძლია თქვას - საქართველოში იყო ჩვენ მიმართ კონსტრუქციულად განწყობილი ხელისუფლება და ახლა ძალაუფლების რევოლუციური გზით ხელში ჩაგდებას ლამობენ ძალები, რომლებმაც შესაძლოა, ხვალ რუსეთს ომი დაუწყონ. დეკლარირების დონეზე შეაყაროს თვალში ნაცარი საერთაშორისო საზოგადოებას და დაძრას თბილისისკენ 40 კმ-ში მდგარი ტანკები. ამიტომ არც ერთ ჭკუათმყოფელ პოლიტიკურ ძალას საქართველოში, რევოლუცია არ უნდა აწყობდეს...
- ბუნებრივია, ჩვენ ამასაც ანგარიშს ვუწევთ. მაგრამ კიდევ ერთხელ ვამბობ - ქვეყანა ჩვენ სხვა ეტაპზე გავიყვანეთ ამ მშვიდობიანი გადაბარებით, ამიტომ საუბარი ჩვენს დესტრუქციულობაზე მიუღებელია. მოდით, ჩვენი ქმედებები შევადაროთ მთელი იმ 9 წლის განმავლობაში, მაშინდელი ოპოზიციის მოქმედებებს, რომელიც იყო თავიდან ბოლომდე მართლა დესტრუქციული და მტრული, ქვეყნის მიმართ. გავაანალიზოთ ეს ქმედებები და ყველაფერი გასაგები გახდება. დარწმუნებული ვართ იმაში, რომ ჩვენ არჩევნების გზით დავბრუნდებით ხელისუფლებაში და აღვადგენთ იმ სახელმწიფო ინსტიტუციებს, რომელიც ესოდენ დააზიანა ამ უმეცარმა ხელისუფლებამ.
- თქვენ ახსენეთ მაშინდელი ოპოზიციის დესტრუქციული ქმედებები, მაგრამ არ მახსოვს, რომ რომელიმე პოლიტიკური ლიდერი ამის გამო გისოსებს მიღმა აღმოჩენილიყოს - არ ვგულისხმობ გიორგაძის მომხრეების საქმეს. შესაბამისად, გაუგებარია, იყო დესტრუქცია და სისხლის სამართლის დანაშაულის ნიშნები პოლიტიკური ლიდერების ქმედებებში, რატომ არ ტარდებოდა შესაბამისი ღონისძიებები?
- და ესეც არის სერიოზული განსხვავება ჩვენსა და ამათ შორის. ჩვენ გვქონდა პრინციპული პოზიცია, რომ არ გადაგვედგა არც ერთი ნაბიჯი, რომელიც გამოიწვევდა პოლიტიკური ოპონენტების პოლიტიკური დევნის თუნდაც ეჭვს. აქედან გამომდინარე ჩვენ ყოველთვის მივდიოდით პოლიტიკური შეთანხმებების გზით, გარკვეული მოლაპარაკებების გზით, რაც სწორედ ასეთ ნაბიჯებს გამორიცხავდა. აქედან გამომდინარე, შევინარჩუნეთ კიდეც ქვეყნის იმიჯი იმ ცივილიზაციის დონეზე, რაც არის მისაღები. ამ ხელისუფლებას ზუსტად ამ ნაბიჯების შედეგად, სწორედ ქვეყნის იმიჯი აქვს საგრძნობლად შელახული. თუნდაც ექსტრადიციებზე უარის თქმა, თუნდაც ევროსაბჭოს რეზოლუცია, თუნდაც სახელმწიფო დეპარტამენტის განცხადება, და ასე შემდეგ ამაზე მეტყველებს. ქვეყნის იმიჯი საფრთხის ქვეშაა და ძალიან შელახულია. ეს სწორედ პოლიტიკური დევნის შედეგია. ჩვენ ამის თავიდან აცილებას ვცდილობდით ყველანაირად და გამოგვდიოდა კიდეც.
- ამ თემასთან დაკავშირებით, რა თქმა უნდა, შეიძლება საკმაოდ საფუძვლიანი პოლემიკა, თუმცა არ შემიძლია, არ გკითხოთ რუსეთ-საქართველოს ურთიერთობაზე. ფაქტია, რომ კონსტრუქციული დიალოგის გეგმა არ მუშაობს. ახლა არ არის ნიშნის მოგების დრო. შესაბამისად, ძალიან პრაგმატულად, რას ურჩევდით ხელისუფლებას ამ ვითარებაში, რა ნაბიჯები უნდა გადაიდგას, რომ ვითარება საბოლოოდ არ შევიდეს ჩიხში, ანუ სად არის გამოსავალი?
- გამოსავალი არის ისევ იქ - სადაც იყო. რა თქმა უნდა, ძალიან დიდი დაგვიანებით მაგრამ ხელისუფლებამ უნდა განახორციელოს ეროვნული პოლიტიკა, რომელიც არ ხორციელდებოდა. მოდით, ასე ვთქვათ, ახლა რეაგირება, რომ რაღაც შეიცვალა და ამიტომ უნდა შეიცვალოს პოლიტიკა - არის ტყუილი. იმიტომ, რომ ეს პროცესი უწყვეტია და მწვანილების გაყიდვის პოლიტიკის დროსაც, დაყვავების პოლიტიკის დროსაც ეს პროცესი არ შეჩერებულა. კონკრეტულად ის, რაც ახლა ხდება, დაიწყო მაშინ, როცა ხაჯიმბა ინიშნებოდა ძალისმიერად მთავარ მარიონეტად. მაშინ ჩვენ ამაზე მივუთითებდით - ეს ხდება იმისთვის, რომ ანექსიის პროცესი დაასრულონ. ზაქარეიშვილი და ასე შემდეგ ამბობდნენ, რომ არაფერი მსგავსი არ არის, რომ ეს არაფერს გამოიწვევს. გახსოვთ, ალბათ, ივანიშვილის განცხადება, რომელსაც სჯეროდა რუსეთის, ან იგივე ჰაკიმ ფაშას ინტერვიუ “ბი-ბი-სი”-ზე, რომ თურმე ყირიმი სულ სხვა პროცესია და აფხაზეთს არანაირად არ ეხება. მისი თავხედური რეკომენდაცია, რომ ჩვენსავით მოქცეულიყო უკრაინა. შემდეგ ამას მიყვება მთავრობაში ყველაზე მავნებელი ადამიანის - პაატა ზაქარეიშვილის ფორმულები. დარწმუნებული ვარ, სწორედ მისი ფორმულა იყო, რაც ჰაკიმ ფაშამ გაახმოვანა თვითგამორკვევასთან დაკავშირებით.
მოკლედ, რუსეთში ნებისმიერი დაყვავება, ნებისმიერი შემხვედრი ნაბიჯი ესმით, როგორც შენი სისუსტე და ცდილობენ, მაშინვე ტანკით გადაგიარონ. აუცილებელია მაქსიმალურად პროაქტიური პოზიცია ჩვენს პარტნიორებთან. ნებისმიერ შესაძლო ფორმატში უნდა ფიგურირებდეს ჩაბმა მოლდოვასთან და უკრაინასთან ერთად, რა თქმა უნდა, სანქციების შემოღება ჩვენი მხრიდან და უარის თქმა იგივე მწვანილის თუ ღვინის გატანაზე. მთელი რიგი სხვა საკითხები, რომელიც არაერთხელ გაგვიჟღერებია. ამიტომ ჩვენ გავაგრძელებთ ზეწოლას ყველა ჩვენს ხელთ არსებული საშუალებით იმისთვის, რომ ვაიძულოთ ეს ხელისუფლება, შეცვალოს საგარეო პოლიტიკა და ქვეყნისთვის სასარგებლო ეროვნული პოლიტიკა აწარმოოს.
გაზეთი „პრემიერი“, გეგა სილაგავა
![]() |
04-01-2016, 16:00
ლია მუხაშავრია: მურუსიძის სასამართლოში დარჩენა პირადად ბიძინა ივანიშვილთან იყო შეთანხმებული |
![]() |
14-12-2015, 17:00
თამარ კორძაია: „რესპუბლიკურ პარტიას“ საკუთარი ძალის და წონის შესაბამისი მოთხოვნები ექნება |
![]() |
22-12-2015, 17:00
ზურაბ აბაშიძე: რაც ვლადიმერ პუტინმა განაცხადა, ვფიქრობ, საყურადღებოა |
სხვა |