რა საიდუმლოს ინახავს ლაშა შუშანაშვილის საქმე?! (ნაწილი V)

გაგრძელება

ფარული ჩანაწერი, საიდანაც ამონარიდებს გაგაცნობთ, ისე, რომ არ დაირღვეს შინაარსი და არ დაემსგავსოს ბადრი პატარკაციშვილისა და ერეკლე-ირაკლი კოდუას ჩანაწერებს, არ ასცდეს სინამდვილეს, დევს ე.წ. კანონიერი ქურდის ლაშა შუშანაშვილის სისხლის სამართლის საქმე #090060045-ში. ამ საქმეში არსებულ სხვა დოკუმენტებს “პრემიერი” უკვე თვეზე მეტია აქვეყნებს. საქმის გამოძიება დაიწყო 2006 წლის 18 იანვარს და 2011 წლის 12 ოქტომბერს დასრულდა. გამოძიება დაიწყო ლაშა შუშანაშვილის, კახა შუშანაშვილისა და გელა ლოლიაშვილის მიმართ, ქურდული სამყაროს წევრობის, კანონიერი ქურდობისა და დიდი ოდენობით ფულადი თანხის ორგანიზებული ჯგუფის მიერ გამოძალვის ფაქტზე შსს-ს სპეციალურ ოპერატიულ დეპარტამენტში (სოდ-ი). მიუხედავად იმისა, რომ ამ ეტაპისთვის “პრემიერმა” საქმის მასალების 103 გვერდი გამოაქვეყნა, ისეთი მნიშვნელოვანი დოკუმენტები, როგორიცაა მოწმეთა ჩვენებები, ინტერპოლისა და იუსტიციის სამინისტროს მიმოწერები და ა.შ., ჯერჯერობით ვერ შევხვდით ვერც ერთ დოკუმენტს, რომელიც დაადასტურებდა ქურდული სამყაროს წევრობის, კანონიერი ქურდობისა და დიდი ოდენობით ფულადი თანხის ორგანიზებულ, ჯგუფის მიერ გამოძალვის ფაქტს. მიუხედავად იმისა, რომ საქმეში დაკითხულები არიან მაღალი რანგის ყოფილი თუ მოქმედი ჩინოსნები, მათ შორის გენერლები, ვერავინ ადასტურებს ინფორმაციას ლაშა შუშანაშვილის დანაშაულის შესახებ. შეიძლება ეს ვინმეს სასაცილოდ მოეჩვენოს, მაგრამ ეს ფაქტია და საქმეში შავით თეთრზე ჩანს...

ამ საქმეში არის ბევრი ისეთი დეტალი, რაშიც ეშმაკები კი არ იმალებიან, ეშმაკები “იავნად” ჩანან და საფუძვლიანი ვარაუდი იმისა, რომ სოდ-ში გამოძიების დაწყება პირდაპირ უკავშირდება ქონების “ახევას”, არცთუ ისე დაუდასტურებელი შეიძლება ყოფილიყო, თუკი ვინმე ლაშა შუშანაშვილის ასევე დაუდასტურებელ (მისთვის არავის უკითხავს და არც სასამართლოს კანონიერ ძალაში შესული განაჩენი არსებობს, რომელიც დაადგენდა (უფრო სწორი იქნებოდა, თუ ვიტყოდი, “მონათლავდა”) “სტატუსს” ე.წ. კანონიერი ქურდობის შესახებ, ცოტა ხნით მაინც დაივიწყებდა. ერთადერთი მოწმე, რომელიც ირაკლი კოდუას (ის ხელმძღვანელობდა სოდ-ს ამ პერიოდში) ჰყავს ამ საქმეში, ვინც ხაზგასმით და ცალსახად აცხადებდა, რომ შუშანაშვილი კანონიერი ქურდია, არის აწ გარდაცვლილი მერაბ კალანდაძე. შეგახსენებთ ფაქტს: შემთხვევა 2013 წლის 25 ნოემბერს,  სადახლოს სასაზღვრო-გამშვებ პუნქტთან, სასაზღვრო ზონაში მოხდა. იმ პერიოდში გავრცელებული ვერსიით, მერაბ კალანდაძე მეგობრებს, გიორგი ფირალიშვილსა და დილარ მუკბანიანს სომხეთის ტერიტორიაზე აცილებდა. სროლის შედეგად დაიღუპნენ მერაბ კალანდაძე და გიორგი ფირალიშვილი, ხოლო დილარ მუკბანიანი მსუბუქად დაიჭრა.  

ვიდრე ფარულ ჩანაწერსა და ამ ჩანაწერის შემდეგ გამოძიებისთვის კალანდაძის მიერ მიცემულ ჩვენებას გაგაცნობთ, რამდენიმე ფაქტის შესახებ მინდა გავამახვილო თქვენი ყურადღება: მერაბ კალანდაძე გამოძიებამ ფარული ჩანაწერის გაკეთებამდე ორჯერ დაკითხა. ორივე ჩვენებაში კალანდაძე ხაზგასმით აცხადებდა, რომ ის იყო კანონიერი ქურდების მეგობარი. ამ მეგობრობის “მოწმეებად” მოჰყავდა თავად მეგობრების გვარები _ შუშანაშვილი, კალაშოვი. დამეთანხმებით, რომ მსგავსი ჩვენება 2006 წლისთვის აღიარების ტოლფასი იყო. ანუ, ამ პერიოდში უკვე მოქმედებდა სსკ-ში შეტანილი ახალი 223-ე პრიმა მუხლი. მეტი სიცხადისთვის, ვიდრე დეტალებზე გადავალ, 223-ე პრიმა მუხლი, ქურდული სამყაროს წევრობა, კანონიერი ქურდობა (ძალაში შევიდა 2006 წლის, 28 აპრილს): “1. ქურდული სამყაროს წევრობა ისჯება თავისუფლების აღკვეთით ვადით ხუთიდან რვა წლამდე, ჯარიმით ან უმისოდ; 2. კანონიერი ქურდობა, ისჯება თავისუფლების აღკვეთით ვადით შვიდიდან ათ წლამდე, ჯარიმით ან უმისოდ”. ამ მუხლის შემდეგ შემოღებული და დამკვიდრებული ტენდენცია, ალბათ,  ყველას გვახსოვს, თუმცა მაინც შეგახსენებთ: დაკავებულს ეკითხებიან, არის თუ არა ის კანონიერი ქურდი, თუ დაკავებული ეთანხმება მას, 10-წლიანი პატიმრობა ელის, თუ არ ეთანხმება, ფაქტობრივად, ქურდული ჟარგონით რომ ვთქვათ, ჩარტყმულია ან შეჩერებული, მაგრამ ამ შემთხვევაში მას ჩაარტყეს არა “კოლეგებმა”, არამედ კანონმა, სახელმწიფომ. თუ დაკავებული აცხადებს, რომ ის იცნობს ე.წ. კანონიერ ქურდებს, მაშინ ის “პადელნიკია” და ზემომოყვანილი მუხლის პირველი ნაწილი ესადაგება, ანუ ქურდული სამყაროს წევრია და რა რანგში, ამას მნიშვნელობა არ აქვს. ყველას კარგად გვახსოვს ფეხბურთელი დემეტრაძე, ვატო ყიფიანთან მეგობრობის გამო რომ ჩასვეს, ეს იმ დროს, როცა თავად ყიფიანი თავის დროზე ნაციონალური ხელისუფლების პირობებში განთავისუფლდა პატიმრობიდან და როგორც მაშინ ამბობდნენ, სახელისუფლებო ჩინებმა საქართველოს საზღვრამდეც კი მიაცილეს. მეტიც, კიდევ ერთი ფაქტი: ერთ-ერთი პატიმრის ცოლი დააკავეს იმის გამო (და ამის შესახებ ადვოკატი გელა ნიკოლაიშვილი ღიად საუბრობდა), რომ მისი შვილის თანამოსაკნეების ოჯახის წევრებმა ფული შეკრიბეს და საკანს, სადაც სასჯელს მათი ახლობლები იხდიდნენ, ვენტილატორი უყიდეს. ეს შენაძენი ერთ-ერთი პატიმრის ცოლმა მიიტანა ციხეზე, ქალბატონი დააკავეს და ბრალად ქურდული სამყაროს წევრობა წაუყენეს, “ობშიაკის” ფულით იყიდა ვენტილატორიო. რატომ გავიხსენე ეს ორი (და გახსენება ბევრი ფაქტის შეიძლება) შემთხვევა? საქმე ისაა, რომ კალანდაძემ ოფიციალურად დაუდასტურა გამოძიებას 2007 წელს მიცემულ ჩვენებებშიც და ფარულ ჩანაწერშიც, რომ ის ახლოს იცნობდა ე.წ. კანონიერ ქურდებს, მეგობრობდა მათთან, ამიტომ ცოტა უცნაურია, მაგრამ ფაქტია, რომელსაც ვერ გავექცევით, რომ კალანდაძე არავის დაუკავებია 223-ე პრიმა მუხლის პირველი ნაწილით. კარგით, ჩავთვალოთ რომ კოდუას უწყებამ ამას ყურადღება არ მიაქცია და თავად კოდუასაც მხედველობიდან გამორჩა კალანდაძის აღიარებითი ჩვენება, პასუხს დასმულ კითხვაზე კალანდაძის ქვემომოყვანილ ფარულ ჩანაწერში თავად ამოიკითხავს მკითხველი, ისე, რომ სულ არ დაჭირდება ჩემგან რაიმე დეტალის დამატებით განმარტება. ფარულ ჩანაწერში კარგად ჩანს, რომ მერაბ კალანდაძე სოდ-ის ხშირი სტუმარი იყო და “ვიღაცებთან” მეგობრობდა სოდ-ში. ისიც კარგად ჩანს, რომ კალანდაძემ არ იცოდა, მას თუ იწერდნენ, ეტყობა, ვერ წარმოიდგინა, “მეგობრები” თუ გაწირავდნენ, და ისიც კარგად ჩანს, რომ ზომაზე მეტს ლაპარაკობს. ამ ჩანაწერით კალანდაძემ ბევრი რამ დაადასტურა თავისდა უნებურად, გარდა იმისა, რომ ლაშა და კახა შუშანაშვილები კანონიერი ქურდები არიან თურმე. კიდევ ერთხელ გავუსწრებ მოვლენებს და ჩანაწერის გამოქვეყნებამდე ვიტყვი: თუ არა “დავერბოვკებული” ადამიანი, სხვას მსგავსი ჩვენების მიცემისთვის აუცილებლად დააკავებდნენ და შვიდი თუ არა, ხუთი წლით მაინც ჩასვამდნენ. ხაზგასმით ვამბობ, კალანდაძე 223-ე პრიმა მუხლის პირველი ნაწილით არავის დაუკავებია და ამდენად, მასთან არც საპროცესო გაუფორმებია ვინმეს, შემდეგ სანაცვლოდ ჩვენება რომ მიეცა შუშანაშვილის კანონიერი ქურდობის დადასტურების მიზნით და ესეც რომ არა, ცოტა უცნაურია, “მეგობარი” ვინმეს “კორონაციაზე” “მიეწვია” მოწმის სტატუსით, მით უმეტეს, რომ, როგორც კალანდაძე თავის ჩვენებაში ამბობს, შუშანაშვილი როცა გაიცნო, ლაშა უკვე “ხარისხში” იყო, ანუ კანონით დადგენილი პროცედურული მომენტი (თანამშრომლობის შესახებ, რაც ერთგვარ იძულებასაც ნიშნავდა იმ პერიოდში) აქ, ამ შემთხვევაში გამორიცხულია...

შემდეგი საკითხი: მერაბ კალანდაძე 2007 წელს დაკითხეს და ჩაწერეს შუშანაშვილის საქმეზე, დაახლოებით ორი წლის შემდეგ კი დააკავეს 260-ე (ნარკოტიკები) მუხლით ფაქტზე, შედეგად მას მის მფლობელობაში არსებული ავტოგაზი დაათმობინეს (ავტოგაზი ბეჟუაშვილების ხელში გადავიდა) და ზედ კიდევ 5 მილიონი დაადებინეს. ამის შემდეგ კალანდაძე კიდევ ერთხელ დააკავეს, თავის მძღოლთან ბალიაურთან ერთად, და ამჯერად ჯგუფური ხულიგნობა წაუყენეს ბრალად. შემდეგ კი უცნაური რამ ხდება, კალანდაძე კარგავს ერთ-ერთი ბიზნესიდან შემოსავალს. როგორც ამბობენ, ეს იყო მისი და ირაკლი კოდუას არაოფიციალური ბიზნესი, რომლის არსი მანქანების სომხეთში გაყვანა-გაყიდვაში მდგომარეობდა. სომხეთში მათ ჰყავდათ პარტნიორი, რომელიც გადაყვანილ მანქანებს ყიდდა და ანგარიშსწორებას შემდეგ “დამკვეთთან” ახდენდა. ერთხელაც დამკვეთს გადამხდელმა ფული არ გადაუხადა, საქმეში ჩაერთო კოდუა, სომეხი “პარტნიორი” დააკავა და თავისი ფული ამ გზით ამოიღო, კალანდაძე კი მშრალზე დარჩა. სხვათა შორის, მაშინ ეს საქმე ლამის საერთაშორისო სკანდალად იქცა, იმდენად რამდენადაც, როგორც მაშინ ამბობდნენ, საქმეში სომხეთის ელჩიც კი იყო ჩართული, ვის სასარგებლოდ, ეს მე რომ არ ვთქვა, თავადაც მიხვდებით, ალბათ...

ახლა თუ ვიმსჯელებთ იმხანად დამკვიდრებული სტანდარტით მტკიცებულებათა ერთობლიობის შესახებ, ასევე გავიხსენებთ გაურკვეველი შინაარსის გამოთქმებს _ გონივრული ეჭვის მიღმა, ალბათობის მაღალი ხარისხით დასაბუთებული ვარაუდი, რომლითაც ადეიშვილის პროკურატურა საქმეებს სასამართლოში უშვებდა, ხოლო მოსამართლე ბრალდებულებს პატიმრობის ხანგრძლივ “საგზურს” უწერდა, ჩვენც მივალთ “ალბათობის მაღალი ხარისხით დასაბუთებულ ვერსიამდე” და ვიტყვით, რომ კალანდაძესა და კოდუას შორის “გრიზნია” იყო, რაც სხვათა შორის, 2012 წლის ოქტომბრის არჩევნების შემდეგ აშკარა გახდა, როცა კალანდაძემ პროკურატურას კოდუას წინააღმდეგ საჩივრით მიმართა. ამ საჩივრისა და კიდევ რაღაცების დასაბუთებული ვარაუდის მტკიცებულებად გამოდგება ბალიაურის სასამართლოსთვის მიცემული ჩვენება, კალანდაძის მკვლელობის საქმის განხილვისას, როცა მან ოფიციალურად დაადასტურა, რომ კალანდაძე კოდუას პროკურატურაში უჩიოდა და არ მალავდა რომ ქონების დაბრუნებისთვის სერიოზულ დავას აპირებდა. ამ ფონზე გონივრული ეჭვის საფუძველზე, ალბათ, არავის გაუკვირდება კალანდაძის მკვლელობა, რომელსაც, სამწუხაროდ, უპატიოსნესი, მე ვიტყოდი, ბავშვის (ის იმდენად ახალგაზრდა იყო) სიცოცხლე ემსხვერპლა. მკითხველისთვის, ალბათ, საინტერესო იქნება სადახლოს მკვლელობის დეტალური მასალების გაცნობა, რასაც, შეძლებისდაგვარად, ალბათ, მოვახერხებთ კიდეც... ახლა რაც შეეხება დაპირებულ ფარულ ჩანაწერს, რომელიც მართალია, ასე ვთქვათ, სანქცირებული არ ყოფილა, მაგრამ შუშანაშვილის საქმეში მაინც დევს. და კიდევ ერთი დეტალი, თუ დაუკვირდით, მე მხოლობით ფორმაში ვამბობ _ შუშანაშვილის საქმე _ მიუხედავად იმისა, საქმე სამი პირის მიმართ იქნა დაწყებული. საქმე ისაა, რომ საქმეში მხოლოდ ლაშა შუშანაშვილის ირგვლივ ტრიალებს გამოძიება, ისე თითქოს ორი პირი ბუნებაში არ არსებობს.

ფარული ჩანაწერის გაშიფრული ტექსტი 13 ფურცელზეა განთავსებული და მასში მონაწილეობს “მ” (კალანდაძე), “მ2”, ვინმე პაატა და ა.შ. გთავაზობთ ამონარიდებს:

ისმის მ2-ის ხმა: მობრძანდით, მობრძანდით. შემოდის მამაკაცი, ხელის ჩამორთმევით ესალმება მ2-ს.

მ2 _ დაჯექით (მიუთითებს სკამზე, მამაკაცი ჯდება), ხოდა რა საკითხზეც ხართ დაბარებული, იცით.

მ _ კი, ვიცი.

მ2 _ თქვენი აზრი?

მ _ ძალიან ცუდი.

მ2 _ რატო?

მ _ სწორად გამიგეთ რა, მე პატარა ბიჭი არა ვარ. არც არავისი არ მეშინია, იქით...

მ2 _ რო არ გეშინია, ვიცი. რამდენი წელია გიცნობ(?).

მ _ ხოდა მაგარ უხერხულ მდგომარეობაში ვარ რა, ისეთ უხერხულ მდგომარეობაში, ცხოვრებაში რო არ ვყოფილვარ რა...

მ2 _ რატო?

მ _ მაშინ არ უნდა დავლაპარაკებოდი ლაშას საერთოდ რა...

მ2 _ ლაშას...

მ _ არ უნდა დავლაპარაკებოდი ამ თემაზე საერთოდ. იმიტომ რომ იყო დავალება ესეთი: მთხოვეს, რო მოდი და დაელაპარაკე და რომ მაგისთვის უკეთესი იქნება ეს და სახელმწიფოზე გადმოაფორმოს ეს ყველაფერი და დავამთავროთ ამით ყველაფერი. მაგრამ თუ უნდა გამოიტანონ, დაუსწრებლად გამოუტანონ 10 წელი. აქ იქნება 5 წელი ან რაღაცა, რადგან ეს თავისი სურვილით ხდება. მე რო დავურეკე, ვუთხარი ეს, “მე რაზე მირეკავო, _ მე მეუბნება, _ მე რაზე მირეკავო? ვისიც არისო, მივიდნენ და უნდა მიუციათ, უნდა სულ უჩუქებიათო”. ეხლა სწორად გამიგეთ რა: მე მაშინდელი, ესეც უხერხული იყო ჩემგან მარა ისე მთოვეს, რო სხვანაირად არ გამოვიდოდა მაგის ქურდობის სიტუაცია, მე ვთქვი რო ვიცნობდი, როგორც კანონიერ ქურდს. ამაზე იყო მაშინ ლაპარაკი, ეხლა მე რო დავწერო და ვთქვა, დავადო ხელი ამ კაცს, რო ვიცი რო ეს სახლი იყო მისი, მე კისერზე დამედება მილიონნახევრიანი ვალი, რა.

მ2 _ რატო?

მ _ მე თუნდაც მარტო იმიტო რო “მე შენ ტელეფონზე რო მელაპარაკები, _ მეტყვის, _ მე შენ ხო გითხარი რო ეს სახლი ჩემი არააო, ეგ სახლი ვისიც არი, მივიდნენ და გამოართვან იმასო”, აი, ეს ჩვენი ლაპარაკი. ეხლა მე გადასარევად ვიცნობ მაგ სისტემას და მაგ ცხოვრებას და იქიდან გამოვდივარ მე ყველაფერს, რა. იმიტომ რომ ეხლა მოიძებნება ალტერნატიული ვარიანტი, ალტერნატიული ვარიანტი მოიძებნება, გადასარევად იცის თვითონაც, რო ეგ სახლი დაკარგულია და წაღებულია. უკვე შეგუებულია მაგას სუყველა, მარტო მაგი კი არა, უკვე სუყველა. იციან, რო გოგოლაძესაც ჩამოართვეს, იმასაც, იმასაც. მაგასაც ჩამოართმევენ და ამიტომ მომიბრუნდება ეს კაცი და მეტყვის, რომ “მე და შენ ხო ვილაპარაკეთ ტელეფონზე, მე ხო გითხარი, რო ეს სახლი ჩემი არაა შენ იღებ და ამბობ, რო კი, ეს არის ლაშა შუშანაშვილის სახლი და შენი ჩვენებით წაიღეს სახლი და კეთილი ინებეო, ძმაო, და გადაიხადე ეს ფულიო”. ეს ლაპარაკი ისე იქნება, როგორც მე თქვენ გიყურებთ. ხოდა მე ისეთ ცუდ სიტუაციაში აღმოვჩნდი, რო, მე ჩემიც მეყო უკვე რო ბევრად მეტი მაქვს მე ახლა საფიქრალი, აი, ეს შარი რო არ დავადო ზევიდან. პლუს მაგას არის ხალხი, ვინც ამას დაადასტურებს კიდევაც და ვინც ამაზე იმენნა მუშაობენ.

მ2 _ სახლზე?

მ _ სახლზე, აშენებაზე, შრომაზეც, დაცვა, აჭარიდან ვინც იყო ჩამოსული, დაიკითხება ის ხალხი და სუყველა იტყვის.

მ2 _ მაგისი როა, ხო იცით?

მ _ იცით, რა არის?! დავუშვათ, მე ვიცი, რო მაგან იყიდა ეს სახლი, დავუშვათ, შინაურულად ვილაპარაკოთ და არა ისე, რო მე დაკითხვაზე და რამე, მე აღმოვჩნდები ძალიან ცუდ სიტუაციაში რა. მაშინ, როცა ამ თემის ცოტა სხვანაირად მოგვარებაც შეიძლებოდა.

მ2 _ უკვე მშენებელიც, ისინი ყველა...

მ _ მშენებლებიც, კაცო, ვინც აყიდინა ის სახლი, დღეს არ გყავდათ, კაცო? ვინს აყიდინა ეგ სახლი. მე მანდ არაფერში მაქვს საერთოდ მონაწილეობა მიღებული, არანაირი! ვინც იყო ეხლა გარეული, ვინც აყიდინა, ვინც ააშენა, ვისაც მუშები მოჰყავდა და რემონტს აკეთებდა, ვინც ავეჯი გაიტანა, ეს ხალხი ხო ყველა აქ არის, კაცო. ეს დაიკითხება და დამთავრდება მაგით. მეც უბრალოდ აი, მე რასაც ვამბობ, რო ის სახლი ჩემს კისერზე დაიწერება-მეთქი, ეს ორჯერ ორი ოთხია რა და ამას მერე მოყვება ძალიან ცუდი ლაპარაკები და პლუს ამას, ესა თუ ისეა დასამალი რა არი, ურთიერთობა გვქონდა რა, ჩვენ მართლა ძმაკაცური ურთიერთობა გვქონდა ერთმანეთთან და სწორად გამიგეთ რა, არ გამოდის ჩემგან ეგეთი სიტუაცია რა. “სუგუბად” კაცური გადმოსახედიდანაც არანაირად, არანაირ ჩარჩოებში არ ჯდება. მაშინ გამოუვალი სიტუაცია იყო, არ შეიძლებოდა ამის სხვაგვარად შემობრუნება, კიდე რაღაცას იფიქრებ კაცი და იტყვი, რო კედელთან დავდექი და სხვა გზა არ იყო, მარა აქ 5-6 კაცი...

(ერთვება პაატა)

პ _ კედელთან დადგომა რა შუაშია ახლა, რეალურად რო ვიმსჯელოთ, რეალურად.

მ _ არა, ბატონო პაატა, მე ეხლა ისეთი რაღაცები ვიცი კიდე ბევრი, ეს მე ვიცი, ხო? იმას ხო ყველაფერს ვერ ვეტყვი, რაც ვიცი აი, ეს არის და ფაქტი მაგას რაც მოჰყვება, ეს არი ულაპარაკო ვარიანტი და პლუს არი ისეთი ვარიანტი, რომელიც დაჟე ეხლა რომ არც ყოფილა (არც ვთვლი?) რა.

მ2 _ მაგას?

მ _ რა თქმა უნდა. მე თქვენ ვერ დამისახელებთ ვერც ერთ კანონიერ ქურდს, რომელიც მეგობრები... მეგობრებად დარჩნენ ძმაკაცები, არ არსებობს ბუნებაში ეგეთი რამე. სცილდებიან ჩხუბით, ყიყინით, ყველგან შუაში ფულია გარეული ხო?

მ2 _ კი.

მ _ ერთ ამხელა მაგალითს ვერ მეტყვით ვერავინ, რო ვინმე ძმაკაცობდა 10 წელი და დარჩნენ ძმაკაცებად, ისევეა აქაც ეს ჩვენი ამხელა ხნის ძმაკაცობა, ყველაფერი, ფულის გულისთვის გაიწევა გვერდში და მოჰყვება ამას ძალიან ცუდი ლაპარაკი. მე დამადებენ მაგ მილიონ-ნახევარს. აი, რატომ ვამბობ, მე თავს კი არ ვიზღვევ, მაშინ არ უნდა დამერეკა საერთოდ და მეორე ვარიანტია კიდევ მანდ ცუდი, შაქროზე იყო, შაქროზეც მე დამავალეს, ჩავედი დუბაიში...  მთხოვეს, ჩავედი, ველაპარაკე, დავწვავ და არ მივცემო. აქაც ეხლა ისევ მე. მომიბრუნდა იმ დრეს ტელეფონში შენ მაკლერი ხარო თუ ვინა ხარ, ძმაოო? რას დადიხარ? რა შენი საქმეა მაგ სახლების სიტუაცია, თვითონ მიხედავენ ყველაფერსო. აი, აქედან გამომდინარე, თორე ახლა კი არ დაიხვრიტება აქ ვინმე და ვინმე კი არ მოკვდება. მე შემექმნება მომავალში ისეთი სერიოზული პრობლემები, რო არაფრად რო არ მიღირს რა. აი, არანაირად არ მიღირს ეგ პრობლემა და ვნახოთ ახლა გამოსავალი, მანდ, მგონი, ბევრია და... დამდების მეტი რა არის? ხო გეუბნები, მე ვარ მაგისთვის ახლა “ნაულუჩში” ვარიანტი, ალტერნატიულ ვარიანტში, რა. იქ დანარჩენი ვინც რა უნდა თქვას, ვერავის ვერაფერს მოსთხოვენ.

მ2 _ დაცვა ვინ იყო მაშინ?

მ _ ნუ, აჭარის დაცვა რა.

პ _ შენ დიდი ხანია იცნობ?

მ _ ლაშას? მე ლაშას ვიცნობ 85 წლიდან, 85 წლიდან ვიცნობ, ძალიან დიდი ხანია.

პ _ კაი დროა 20 წელიწადი.

მ _ კი, ძალიან დიდი ხანია ვიცნობ და, სხვათა შორის, ურთიერთობაც ისეთი... ეხლა ამ ქურდებისგანაც ხო ვერ გაიგებ.

მ2 _ მაგი მაგ სახლს რო ყიდულობდა და იმასშვრებოდა, მაშინ უკვე იცნობდი და მეგობრობდი იმ პერიოდში მაგასთან, ხო?

მ _ ეხლა მე წეღან დათოს ვეუბნებოდი, როგორ იყო, იცით? მაგან ეს სახლი... ეგ სახლი რო მაგისი გახდა, მე გავიგე ძალიან გვიან რა, იმიტო რო იქ ისე გასაიდუმლოებულად კეთდებოდა ყველაფერი, იმიტომ რომ, მე როგორც მახსოვს, ეგ სახლი იყო ორი კაცის, ორ-ორი კაციც მოუძებნა იმან, ვინც იყო... აქ მერე აირია დაირია...

მ2 _ მანამდე იყო, სანამ მაგი იყიდდა, ორი კაცის?

მ _ მანამდე იყო ორი კაცის, ერთი ყიდდა, მეორე არ აძლევდა. წავიდა რაღაცა “ვალაკიტა”, დაანებეს თავი და ეძებდნენ სხვა სახლს, თუ არ ვცდები, მგონი, ბაგრატიონების სახლი იყო, სადაც ადრე ჩამოდიოდნენ და ჩერდებოდნენ, მაგრამ მერე იმან აღარ იყიდა, ამ სახლს მოუბრუნდნენ, ამ სახლს და ისეთი “ვალაკიტა” მიდიოდა რა... ხან ნახევარი იყიდებოდა, ნახევარი არ იყიდებოდა, მერე ნახევარი იყიდეს, ნახევარი იდგა, არ გაყიდეს თუ...

მ2 _ მეორე პატრონის...

მ _ მეორე, ხო.

მ2 _ გააფორმეს იმ პატრონზე.

მ _ გააფორმეს, მე მგონი, სიდედრი ჩემულობდა ბოლოს მაგას რა. სიდედრიც ჩემულობდა ბოლოს, ჩემია ესო.

მ2 _ საიდან იყიდა სიდედრმა?

მ _ რა ვიცი? ჩემს ქმარს... მოვწევ რა...

მ2 _ მოწიე.

მ _ ხო, ჩემს ქმარს ჰქონდაო ფული შენახულიო, იმ ფულით ვიყიდეო, მე კაი ხანი ვიცოდი, რო ეგ მაგ სახლს ქირაობდა.

გაზეთი „პრემიერი“,დარეჯან მეფარიშვილი

გაგრძელება იქნება

FaceBook