ლევან ბერძენიშვილი: “საფრთხე, რომ მიხეილ სააკაშვილს დააპატიმრებენ, უბრალოდ, არ დგას”

“ქართველმა ხალხმა ხმა მისცა სწორედ იმ პროცესს, რომელიც ახლა მიმდინარეობს”

მიმდინარე კვირის ხმაურიანი თემა ყოფილი მაღალჩინოსნების წინააღმდეგ მიმდინარე სამართლებრივი დევნის პროცესთან დაკავშირებით ამერიკელ სენატორთა მხრიდან გამოთქმული პროტესტი და მასზე საქართველოს მთავრობის საპასუხო წერილი იყო, რომელსაც არაერთგვაროვანი შეფასებები მოჰყვა. ამერიკელი სენატორები წინა ხელისუფლების წარმომადგენლების გასამართლებასთან დაკავშირებულ საფრთხეზე საუბრობენ და კანონის უზენაესობის დაცვის აუცილებლობას უსვამენ ხაზს. პრემიერ-მინისტრი ირაკლი ღარიბაშვილი კი, თავის მხრივ, ითხოვს, ჩამობრძანდნენ საქართველოში  და სასამართლო პროცესებს უშუალოდ დაესწრონ. “მოგიწოდებთ, შეისწავლოთ მიმდინარე სასამართლო პროცესები, რომლებმაც აქამდე საერთაშორისო დამკვირვებლების მხრიდან მაღალი შეფასება მიიღო, რათა თავად დარწმუნდეთ, რომ ბრალდებულთა სასამართლომ კანონის დაცვით ჩაიარა. პროკურორმა უნდა მოახერხოს საქმის სამართლიანად წარმოება და დამაჯერებელი მტკიცებულებების წარდგენა. და თუ ის ამას ვერ შეძლებს, ბრალდებული გამართლდება”, - წერს ირაკლი ღარიბაშვილი სენატორებს.
ირაკლი ღარიბაშვილის განცხადებით,  საქართველოს მთავრობა პასუხს აგებს ქართველი ხალხის წინაშე იმისთვის, რომ უზრუნველყოს ქართული სახელმწიფოს წინსვლა კონსოლიდირებული დემოკრატიის შენების შეუქცევად გზაზე, რაც, მისივე აზრით, მიუღწევადია, თუ არ ვაღიარებთ იმას, რომ არავინ დგას კანონზე მაღლა.
“ჩვენ პასუხს ვაგებთ ქართველი ხალხის წინაშე იმისთვის, რომ უზრუნველვყოთ ქართული სახელმწიფოს წინსვლა კონსოლიდირებული დემოკრატიის შენების შეუქცევად გზაზე, რაც მიუღწევადია, თუ არ ვაღიარებთ იმას, რომ არავინ დგას კანონზე მაღლა. ჩვენ გვჯერა იმის, რომ დრო გვიჩვენებს - ჩვენი ძალისხმევა მიმართული დაუსჯელობის პოლიტიკის აღკვეთისკენ, საქართველოს აქცევს უფრო ძლიერ ქვეყნად და მოკავშირედ.

ბოლოდროინდელი მოვლენების შეფასების მიზნით “პრემიერი” საპარლამენტო უმრავლესობის ერთ-ერთ ლიდერს, ლევან ბერძენიშვილს ესაუბრა:

 - ამერიკელ სენატორთა მხრიდან საქართველოს ხელისუფლებისადმი კრიტიკა იმეორებს “ნაციონალური მოძრაობის” ლიდერებისა და თავად ყოფილი პრეზიდენტის პოზიციას, რომ ქვეყანაში სინამდვილეში პოლიტიკური ნიშნით დევნა მიმდინარეობს, რასაც სამართლიანობის აღდგენასთან კავშირი არ აქვს. ხომ არ ფიქრობთ, რომ პარტნიორი ქვეყნების წარმომადგენლების ასეთი დამოკიდებულება საქართველოს საერთაშორისო რეიტინგს სერიოზულად აზარალებს?

- თუ ვინმეს ეგონა და დღესაც ჰგონია, რომ უკანონობა, რომელსაც წინა ხელისუფლების წარმომადგენლები წლების მანძილზე სჩადიოდნენ, დაუსჯელი დარჩება, მას ვერ გაუგია, რას მისცა ხმა ქართველმა ხალხმა კოალიცია “ქართული ოცნების” ხელისუფლებაში მოყვანით. ქვეყანას ძალიან სჭირდება იმ დაპირებების შესრულება, რომელიც “ქართულმა ოცნებამ” ამომრჩეველს პენსიებთან, განათლებასთან და სოფლის მეურნეობასთან დაკავშირებით მისცა, მაგრამ ქართველმა ხალხმა მხარი დაუჭირა სწორედ იმ პროცესს, რომელიც ახლა მიმდინარეობს. ეს გახლავთ უსამართლობის ალაგმვა და სამართლიანობის დამყარება.  “ნაციონალური მოძრაობის” წარმომადგენელთა მხრიდან პოლიტიკურ დევნაზე განცხადებები იმ პირების მხრიდან კეთდება, ვისაც ახლა აპატიმრებენ და მათი შეშფოთება ჩემთვის გასაგებია. იქ არიან ადამიანები, რომლებიც პოლიტიკური ფიგურები იყვნენ და რჩებიან, მაგრამ არიან ადამიანები, რომლებიც კრიმინალებთან კავშირში იყვნენ შემჩნეული.

- პარტნიორი ქვეყნების წარმომადგენლების მხრიდან არაერთხელ გამოითქვა მინიშნება, რომ ამჟამინდელ და ყოფილ ხელისუფლებას შორის გარკვეული მოლაპარაკების წარმოება სახელმწიფოს დემოკრატიულობის მეტი ხარისხის მაჩვენებელი იქნებოდა. ამასთანავე, საქართველოში  ჩამოყალიბდა ტენდენცია, რომ სამართლიანობის აღდგენის პროცესი დაზარალებულთა უფლებების აღდგენას არ ითვალისწინებს, რაც მოქმედი ხელისუფლებისადმი საზოგადოებრივ უკმაყოფილებას ბუნებრივად ზრდის. იქნებ, ქონებრივი დავებისა და შელახული უფლებების აღდგენა მოლაპარაკების გზით უფრო შესაძლებელი იყო?

- ქართველი ხალხის არჩევანი არ ყოფილა მოლაპარაკება კრიმინალებთან. ქართველი ხალხის არჩევანი  წესრიგის დამყარება იყო. მე მაქვს შეხვედრები მოსახლეობასთან როგორც ქუთაისში, ისე თბილისში, სადაც მათი უდიდესი ნაწილი ამბობს, არ გვინდა არც პენსია, არც დანაპირები, ოღონდ თქვენ წესრიგი დაამყარეთ და ოღონდ ყველა დამნაშავე დაიჭირეთო. ჩემი აზრით, ვერავის ვერაფერი უშველის, პოლიტიკურად მოტივირებული ეს პროცესები არ უნდა იყოს და არც არის.  პოლიტიკას ხედავენ ცოცხში, წამებაში და არ მესმის, ეს ყველაფერი პოლიტიკასთან რა კავშირშია. ყველამ ვიცით, გირგვლიანი ვინ მოკლა და ახლა რომ დავიჭერთ, ესენი გვეტყვიან პოლიტიკური დევნა იყოო. რა პოლიტიკური დევნა უნდა იყოს ვანო მერაბიშვილის მეუღლეზე, გამაგებინოს ვინმემ, ან რა პოლიტიკოსი იყო  ვანო მერაბიშვილი. მოთხოვნა ასეთია და სამართლიანობა აღდგება!  მასობრივად, ასიათასობით ადამიანი გამოვდიოდით ქუჩაში, ცხვირ-პირს გვამტვრევდნენ და გინდათ, რომ ამის ჩამდენებს დღესაც უსმინოს ქართველმა ხალხმა?

- გირგვლიანის საქმე პოლიტიკასთან კავშირში იმთავითვე იყო, მასთან დაკავშირებით ოლეგ მელნიკოვის ჩვენებამ ვანო მერაბიშვილის მეუღლისა და სხვა ყოფილი მაღალჩინოსნების სახელებიც გააჟღერა. ფიქრობთ, რომ ამ პირების სისხლის სამართლის პასუხისმგებლობის საკითხიც დადგება?

- შესაძლოა, დადგეს კიდეც, კიდევ ერთხელ გეუბნებით, პოლიტიკური პარტიის წევრობა და რომელიმე პოლიტიკურ გუნდში ყოფნა არ ნიშნავს იმას, რომ ვიღაცა ჩადენილი დანაშაულისთვის პასუხს არ აგებს. იმ გუნდში არიან დამნაშავეებიც და არადამნაშავეებიც,  ჩვენს რიგებშიც თუ იქნებიან ასეთები, ყველა უნდა დაისაჯოს. გირგვლიანის საქმე იმიტომ არის განხილვის საგანი, რომ ყველა, ვინც მასთან არის დაკავშირებული, უნდა მოხვდეს ჩვეულებრივი სამართლებრივი დევნის ქვეშ და პოლიტიკა აქ არაფერ შუაშია. მასობრივად ვათავისუფლებთ ციხეებს, პატიმართა რაოდენობა განახევრებულია, მაგრამ ეს იმას არ ნიშნავს, რომ დამნაშავეები იქ არ იქნებიან და ქალაქში დღისით, მზისით ვიღაც არამზადებს შეეძლებათ მოკლან ადამიანი, რომლებსაც პრეზიდენტი  სამ წელიწადში ერთხელ შეიწყალებს. ძალიან კარგად მესმის, რა აღელვებს ამ ხალხს, მაგრამ ლაპარაკი იმაზე, რომ თურმე, საქართველოში მარტო “ნაციონალური მოძრაობის” წევრების დაპატიმრება არ შეიძლება, საფუძველს მოკლებულია. 2012 წლის არჩევნების წინა დღეს პოლიციელები ურეკავდნენ ჩვენს მომხრეებს, ხვალ გამოცხადდებით, ყველანი დაპატიმრებულები ხართო, იმ ხალხს ეს არასდროს დაავიწყდება. ამიტომაც მიმაჩნია, რომ ჩვეულებრივი, ნორმალური პროცესი მიმდინარეობს და მიდის იმ ტემპით, რა ტემპითაც ის უნდა მიმდინარეობდეს. პოლიტიკოსების დევნას რომ ჰქონდეს ადგილი, პირველი დაკავებული ის იქნებოდა, ვისაც ბაჩო ახალაია პოლიტიკოსი და საზოგადო მოღვაწე ჰგონია. ბაჩო ახალაია მანამდეა უდანაშაულო, სანამ სასამართლო არ იტყვის, რომ დამნაშავეა, მაგრამ მასზე ჩემი და აშშ-ის სახელმწიფო დეპარტამენტის ყველა ჩინოსნის აზრი ერთნაირია - ეს კაცი არის მანიაკი.  ცალკე საკითხია, მანიაკი როგორ აღმოჩნდა სახელმწიფოს მმართველობაში და ვისი ბრალია, მაგრამ მანიაკი რომ არის, ამას სასამართლო არ სჭირდება. პოლიტიკური დევნა არ ჰქვია იმას,  პარლამენტის წევრს რომ აგენტად გამოაცხადებ და მერე იმდენ მასალას ვერ შეკრებ, პროკურატურაში ერთხელ მაინც რომ დამიბარონ?  მე მესმის მათი აღშფოთება. ესენიც მოემზადონ, ისე როგორც მე ვემზადებოდი თავის დროზე, როდესაც ვიცოდი, რომ დამაპატიმრებდნენ. ვემზადებოდი იმისთვის, რომ სიცივისა და შიმშილისთვის უნდა გამეძლო და ამათ ასეთი პრობლემა არ აქვთ.

- თქვენ სახელისუფლებო კოალიციის ის წარმომადგენელი ხართ, რომელიც ამბობდით, რომ მიხეილ სააკაშვილის სისხლის სამართლებრივ დევნას მსოფლიო არ მოიწონებდა და თუ საქართველოს მომავალზე მეტად მნიშვნელოვანი ეს საკითხი იყო, მაშინ შეიძლებოდა ამის გაკეთება. ამჟამად, უკვე ბრალი აქვს წაყენებული ყოფილ პრეზიდენტს, მიხეილ სააკაშვილს, რომელიც თავადვე აცხადებს, რომ საქართველოს ხელისუფლება საერთაშორისო თანამეგობრობის წინაშე თავს იჭრის. როგორ ფიქრობთ, არც ეს საკითხია პოლიტიკური?

- უაზრო დაპატიმრების მომხრე არავინ არის, მაგრამ საქმეების გახსნისა და ბრალის წაყენების წინააღმდეგი არასდროს ვყოფილვარ.  არა მგონია, პროკურატურა იმის მიხედვით მოქმედებდეს, ლევან ბერძენიშვილმა რა თქვა. ვფიქრობ, მაშინაც არასწორად გაიგეს ჩემი ნათქვამი. საქართველოს რეიტინგზე მაღალი რეიტინგი შეიძლება მოიპოვო დროებით, მთელი ცხოვრება ის გარანტირებული ვერ გექნება. ცალკეული პირები უფრო ცნობილნი არიან, ვიდრე ცალკეული ქვეყნები, ეს ჩვეულებრივი ამბავია და ამ შემთხვევაშიც ასე იყო. მიხეილ სააკაშვილის დაკავებაზე კი არ არის საუბარი, არამედ იმ დანაშაულზე, რომელიც გაიხსნა. 2007 წლის 7 ნოემბერს რომ დანაშაული მოხდა, საქართველოში თუ ვინმესთვის დიდი საიდუმლოა, ჩემთვის ეს საიდუმლო არ იყო. ეს დანაშაული გაიხსნა და აჩვენა სავარაუდო დამნაშავეები. ვინმეს რომ ეთქვა, მიხეილ სააკაშვილი უდანაშაულო იყო ამაში, ეს გამიკვირდებოდა. 2007 წლის მოვლენების შეფასებისას, მაშინვე, ევროპის საბჭოში სიტყვით გამოსვლისას ვთქვი, რომ არ ვიცი, რამდენი წელი გავა, მაგრამ ქართველი ხალხი მიხეილ სააკაშვილს 2007 წლის 7 ნოემბერს არასდროს აპატიებს. მასობრივად დაირღვა ადამიანის უფლებები, საქართველოს ხელისუფლებამ ძალას გადაამეტა, ცალკეულმა პირებმა ჩაიდინეს დანაშაული კაცობრიობის წინააღმდეგ. ჩემი აზრით, პარლამენტის დანაშაულიც იკვეთება. 2007 წელთან დაკავშირებით მიხეილ სააკაშვილის ბრალი ჩემთვის ნათელია, დანარჩენი არის სასამართლოს ხელში. მე არ ვარ მომხრე, რომ გამოვალპოთ ციხეში, მაგრამ მომხრე ვარ, ყველა დანაშაული გამოძიებულ იქნას, ყველა დამნაშავე გამოვლინდეს და მერე ხელისუფლება როგორ მოექცევა, ვის შეიწყალებენ და ვის აპატიებენ, სხვა საკითხია. მე პირადად მგონია, რომ რადგან ეს კაცი არ ჩამოდის, ის საფრთხე, რომ მიხეილ სააკაშვილს დააპატიმრებენ, უბრალოდ არ დგას. რაც შეეხება დანაშაულში მხილებას, ჩვენ წარვუდგენთ მსოფლიოს, რა მასალებიც გვაქვს და თუ ვინმე გვეტყვის, რომ პრეზიდენტები უნდა შევარდნენ ხოლმე ტელევიზიებში, ქალებს სცემონ, ყველა  სატელევიზიო პროგრამა დახურონ და ამისთვის ტაში უნდა დავუკრათ, ჩვენ მსოფლიოს ყურადღებით მოვუსმინეთ, მაგრამ ამას ხომ არავინ არ გვეტყვის. საქართველოს პრეზიდენტმა რომ გასცა ბრძანება, ხელი არ აგიკანკალდეთ, ესროლეთ, ყველანი ციხეში და ნულოვანი ტოლერანტობაო, მეორე დღეს რომ გამოვარდნენ ჩვენი პოლიციელები და ქუჩაში დაიწყეს ხალხის ხოცვა, იმ მოტივით, რომ ისინი დანაშაულის ჩასადენად მიდიოდნენ, ასეთი რამ არ მომხდარა არსად მსოფლიოში. მე არ ვიცნობ არც ერთ მოქალაქეს, გარდა “ნაციონალური მოძრაობის” თავგადაკლული ადამიანებისა, რომლებიც შეიძლება კიდევ დარჩნენ, მაგრამ მე ვისაც ვიცნობ, იმ ადამიანებში ერთი არ არის ისეთი, ვისაც არ ჰგონია, რომ მიხეილ სააკაშვილი დამნაშავე არ არის.  მან დაარღვია საქართველოს ყველა კანონი და კონსტიტუცია, ის მრავალ ასეულ მილიონს ფანტავდა, ის 300-400-მილიონიანი შენობა, რომელიც უნდა დავაკონსერვოთ და უნდა მივატოვოთ ქუთაისში, მის სინდისზეა, ვინც ნახევარი მილიარდი ჰაერში გადაყარა.

ხათუნა ხატიაშვილი, გაზეთი „პრემიერი“ 

FaceBook