ბიზნესი ქართულად - გურჯაანელი „რესპუბლიკელებისა“ და „ნაციონალების“ „პადდელნიკობა“ გრძელდება

ყველაფერი დაიწყო ძალიან უწყინარი და იმედისმომცემი ფოტოებით და ფოტოებზე ასახული “პროცესის” შესაბამისი ახსნით. ეს ფოტოები პარლამენტის აგრარულ საკითხთა კომიტეტის თავმჯდომარემ, გიგლა აგულაშვილმა, “ფეისბუკის” საკუთარ გვერდზე ატვირთა და განმარტა: “რამდენიმე დღის წინ დაგპირდით, რომ ერთ ჩემს კოლეგას (აი, საწარმოს რომ “ეძებდა”, ვერ “იპოვა” და ქილიკობდა) პასუხს გავცემდი.

მართალია, პირადად ვერ მოვახერხე გურჯაანში ჩასვლა, მაგრამ მეგობრები მომეხმარნენ და აი, რა გაირკვა: ქ. გურჯაანში, თელავის ქუჩა #5-ში რეგისტრირებულია შპს “შატო გურჯაანი”. ფაქტობრივად, საწარმო მდებარეობს ე.წ. “რცხილიანას ღელესთან” (გურჯაანიდან 2 კილომეტრში).  ეს იყო ძველი საწარმო, რომელმაც შეღავათიანი აგროკრედიტის ფარგლებში გადაიარაღებისა და გაფართოებისთვის $45 000 მიიღო. ამ თანხითა და საკუთარი რესურსებით მესაკუთრემ, შოთა უტიაშვილმა ააშენა შენობა და შეიძინა 220 ტონა ტევადობის ავზები. საწარმო ფლობს 9 ჰა მიწას; აქედან 3 ჰა ვენახია და 6 ჰა ხეხილის ბაღი (ატამი, ბალი, ბროწეული, ვაშლატამა და ა.შ). საწარმო მზადაა, რომ მიიღოს და გადაამუშაოს 200 ტონა ყურძენი. P.S. ფოტოებისთვის სპეციალური მადლობა ზვიად ყვირალაშვილს”.

იურისტების თვისებაა (და გიგლა აგულაშვილი იურისტია პროფესიით) დაზუსტება, პროკურორების (და გიგლა აგულაშვილი ყოფილი პროკურორია, ერთი ტერაქტის საქმეც აქვს გამოძიებული) თვისებაც დაზუსტებაა, მაგრამ, როცა “მისტერ პიტკინი პროფესიას იცვლის”, მას შეიძლება ახალმა ძველი გადაავიწყოს, ან ძველი შე-მო-ავიწყდეს, ნებსით თუ უნებლიეთ ეს სხვა თემაა, მაგრამ რასაც ვამბობ, ფაქტი რომ არის, ამას ქვემოთ წაიკითხავთ. მოკლედ, აგრარული კომიტეტის თავმჯდომარემ მართლა კარგი საქმის შესახებ გვამცნო და მართლა კარგია, რომ საწარმო გაიხსნა, მართლა კარგია, რომ კახელი გლეხი ყურძენს ჩააბარებს და მოსავლის გაფუჭების შიში არ ექნება, ისიც კარგია (და ვიტყოდი, მთავარია) რომ ამ საწარმოში ადამიანების გარკვეული ჯგუფი (“შინაური” თუ “გარეული”, რა მნიშვნელობა აქვს) დასაქმდება, მაგრამ გიგლა აგულაშვილს, ყოფილ პროკურორს, რომელიც კახეთს “უყურებდა” ერთ დროს, ალბათ, დაავიწყდა, რომ ხალხს მახსოვრობა აქვს და მას თუ არა (ალბათ, პროფესიის შეცვლის გამო კახეთში მომუშავე კოლეგებთან გაწყვიტა კავშირი), სხვებს მაინც ახსოვთ, რა “საგმირო საქმეებითაა” ცნობილი დღეს “დიდ მეწარმედ” გამოცხადებული პერსონა. საქმე ისაა, რომ ძველს არც კი გავიხსენებდი, რომ არა ერთი “უმნიშვნელო დეტალი”: როცა გიგლა აგულაშვილმა სურათები გამოაქვეყნა, დავსვი კითხვა, _ ეს უტიაშვილი ყვირალაშვილის კლასელი ხომ არაა? მაგრამ ეს კითხვა რამდენიმე წამში წავშალე, უბრალოდ, პერსონები ამერია იმ მომენტში, მაგრამ მოხდა ისე, რომ ბატონმა გიგლამ მოასწრო პასუხის გაცემა. ბატონ გიგლას უპასუხა ხალხის მეორე რჩეულმა, ცოტა უფრო “დაბალ რანგში”, დავით ზურაბიშვილმა, _ ისიც თქვი, ეს უტიაშვილი ის უტიაშვილი (შსს-ს ყოფილი ჩინოსანი. _ დ.მ.) რომ არააო... მოკლედ, იქ რა ითქვა და რა დაიწერა, ამას სტატიაზე თანდართული სურათებით გაიგებთ და კარგად თუ დაფიქრდებით, იმასაც მიხვდებით, რომ ნაცების ლოზუნგი _ ვინც ჩვენთან არაა, ჩვენი მტერია, რესპებშიც კარგად მუშაობს! და აქვე გაფრთხილებთ: ერიდეთ ინტელექტუალურ “ჯენტლმენებს”, მე ამაში დავით ზურაბიშვილის ჩემთვის “მოძღვნილმა” კომენტარმა დამარწმუნა (რაც, დასურათებული, თან ერთვის სტატიას). ახლა რაც შეეხება დეტალებს, მე მხოლოდ ფაქტებს მოვიყვან და მკითხველმა თავად განსაჯოს, რასთან გვაქვს საქმე. მოკლედ, ბიზნესმენი, რომლის ბიზნესის შესახებაც დიდი სიხარულით გვამცნო აგულაშვილმა, ნაციონალური სინამდვილის ყოფილი გამგებელია. კიდევ ვიმეორებ, ამ თემით შეიძლება არც დავინტერესებულიყავი, მით უმეტეს აგულაშვილის კომიტეტი, არც თავად აგულაშვილი, არაფერ შუაშია, აქ სესხის გამცემის “შერჩევითობის პრინციპი” უფროა საინტერესო (აგულაშვილს სესხის გაცემასთან არავითარი კავშირი არ აქვს), ვიდრე სხვა რამ და სწორედ ეს პრობლემა წამოვჭერი დეპუტატის “ფეისბუკის” გვერდზე, თუმცა “გასაგები მიზეზების” გამო, ჩემი არცთუ ისე უსაფუძვლო გონივრული ეჭვი ხალხის რჩეულებმა მშვიდად გაატარეს... ჰოდა, იმას ვამბობდი, ბიზნესმენი ყოფილი გამგებელია-მეთქი და ამ პირის შესახებ არსებულ მასალებს რომ ვათვალიერებდი, მოულოდნელად გადავაწყდი განცხადებას, რომელსაც ყოფილი რესპუბლიკელი აწერს ხელს და რომლითაც ის თინა ხიდაშელს მიმართავს, განცხადების შინაარსი იმდენად საინტერესოა, რომ გადავწყვიტე, ამ განცხადებით “გავხსნა” სტატია, გთავაზობთ ამონარიდს:

“გამარჯობა, ქალბატონო თინა. გურჯაანიდან გწერთ, ზურაბ დანელიშვილი, თქვენი პარტიის ყოფილი წევრი 2008 წლიდან 2012 წლის დეკემბრამდე. შეგახსენებთ ჩემ მიერ პარტიის დატოვების მიზეზს. 2012 წლის ნოემბერში, არჩევნებში გამარჯვების შემდეგ სხვა წყაროებიდან ჩემთვის ცნობილი გახდა, რომ პარტიის რაიონული ორგანიზაციის თავმჯდომარე ზვიად ყვირალაშვილი საკრებულოში მყოფ “ნაციონალური მოძრაობის” ოდიოზურ წევრებთან მოლაპარაკებებს აწარმოებდა მათი “პორტირების” მიზნით და რომ ამისთვის გურჯაანში ორჯერ საიდუმლოდ იმყოფებოდა ბატონი დავით ბერძენიშვილი. ეს ჩემთვის სრულიად მოულოდნელი იყო, მით უმეტეს, რომ ვიყავი პარტიის რაიონული ორგანიზაციის თავმჯდომარის მოადგილე, არჩევნების დროს კი “ქართული ოცნების” რაიონული შტაბის წევრი. ჩემი კატეგორიული მოთხოვნის შემდეგ ყვირალაშვილმა აღიარა: “ახლა ასეა საჭიროო” და რომ საკრებულოში იქმნებოდა “რესპუბლიკელების” ფრაქცია ისეთი ოდიოზური “ნაციონალების” შემადგენლობით, როგორებიც არიან: 1. ავთანდილ ზარდიაშვილი, რომელიც 2012 წლის 25 სექტემბერს ორგანიზებას უწევდა გურჯაანში ბიძინა ივანიშვილისთვის “სირცხვილის კორიდორის” მოწყობას და როგორც ვეტერინარული სამსახურის უფროსი, ოპოზიციურად განწყობილ მოსახლეობას ძროხების აცრაზე უარს ეუბნებოდა! 2. ალექსანდრე ინანაშვილი და კიდევ ბევრი სხვა. ჩემს წინადადებაზე, რომ მე ასეთ უზნეო გარიგებას ვერ შევეგუებოდი და თუ ისინი რესპუბლიკელები გახდებოდნენ, მე პარტიას დავტოვებდი, ყვირალაშვილმა ცინიკურად მიპასუხა: “ეგ შენი საქმეაო”. მცირე ხნის შემდეგ, დავრწმუნდი რა, რომ ეს გადაწყვეტილება მოწონებული და მხარდაჭერილი იყო პარტიის ხელმძღვანელობის მიერ, მე დავტოვე პარტია პროტესტის ნიშნად, ხოლო ბატონი ზარდიაშვილი ამავე ხელმძღვანელობის მხარდაჭერით საკრებულოს თავმჯდომარედ აირჩიეს. მიუხედავად ბატონი კახი კალაძის კატეგორიული განცხადებისა, რომ არც ერთი ოდიოზური “ნაციონალი” ჩვენს სიაში არ იქნებაო, ისევ რესპუბლიკური პარტიის სახელით და მისი ხელმძღვანელების მხარდაჭერით ბატონი ზარდიაშვილი სიაშიც იყო, ყვირალაშვილთან ერთად საკრებულოშიც ამოყო თავი და ახლა ისინი მათთვის დამახასიათებელი “ჩალიჩისა” და საკრებულოს სხვა წევრებთან ბინძური ვაჭრობა-გარიგების გზით ცდილობენ, დაიკავონ თავმჯდომარისა და სხვა მაღალი თანამდებობები. ისინი ყველას არწმუნებენ, რომ ამაში მათ აქვთ პირადად თქვენი და ბატონ დავით უსუფაშვილის სრული მხარდაჭერა (“რომლებიც ყველაფერს მოაგვარებენ”). გამოცდილებამ დამარწმუნა, რომ შეიძლება ეს გაზვიადებულია, მაგრამ ნაწილობრივ მაინც შეიძლება სიმართლე იყოს. მოვლენების ასეთი განვითარება და ყვირალაშვილისა და ზარდიაშვილის მიერ საკრებულოს ლიდერობის ხელში ჩაგდება ჩემთვის, და დამერწმუნეთ, გურჯაანელების უმრავლესობისთვის ზნეობრივად და პოლიტიკურად ყოვლად მიუღებელია! სურათი თქვენთვის სრულიად ნათელი რომ გახდეს, დამატებით ინფორმაციას მოგაწვდით ყვირალაშვილის შესახებ: 2010 წლის არჩევნების დროს მე ვიყავი ბლოკ “ალიანსი საქართველოსთვის” წარმომადგენელი საოლქო საარჩევნო კომისიაში. როდესაც ყვირალაშვილს რამდენჯერმე მოვკითხე წარმომადგენლის მოწმობა, რომ დროზე დამეწყო მუშაობა, ის მპასუხობდა, ჯერ არ გამოუგზავნიათო. მე დავეჭვდი და სამი კვირის შემდეგ დავრეკე პარტიის ოფისში და ცენტრალურ შტაბში, სადაც გაკვირვებით მიპასუხეს, რომ მოწმობა ერთი თვის წინ გამოგზავნეს. ამის შემდეგ ყვირალაშვილმა დაიწყო მტკიცება, რომ გამოგზავნეს, მაგრამ დაიკარგა და ვერ ვპოულობო. ჩემი თხოვნით ცენტრალურმა შტაბმა ახალი მოწმობის დასამზადებლად მიმართა ცესკოს, მაგრამ რადგან ეჭვი გამიჩნდა, რომ ყვირალაშვილი კიდევ რამეს მოიმიზეზებდა, დავიწყე სხვა, ალტერნატიული გზების მოძიება. ამ მიზნით მივმართე “კახეთის საინფორმაციო ცენტრის” ხელმძღვანელ გელა მთივლიშვილს. მას არ გაჰკვირვებია ჩემი მონაყოლი. პირიქით, დაადასტურა, რომ, მისი ინფორმაციით, ხელისუფლება, კერძოდ, გუბერნატორის მოადგილე გიორგი სიბაშვილი, იცოდნენ რა ჩემი შესაძლებლობა, აღმომეჩინა გაყალბებისა და დარღვევების ფაქტები არჩევნების დროს და ის, რომ მე მათთან გარიგებაზე არ წავიდოდი, ამ მიზნით გარიგებაში შევიდნენ ზვიად ყვირალაშვილთან: თუ ის შეძლებდა ჩემს ჩამოცილებას არჩევნებიდან, მის საკრებულოში არჩევას და ამ მიზნით საჭირო ხმების მოგროვებას ხელისუფლება უზრუნველყოფდა. იმ პერიოდში არჩევნების მონიტორინგს ახდენდა “ადამიანის უფლებათა ცენტრიც” (უჩა ნანუაშვილი). მთივლიშვილმა ასევე იცოდა რა ჩემი შესაძლებლობა, მომეპოვებინა დარღვევების ფაქტები, რამდენიმე დღეში გადმომცა “ადამიანის უფლებათა ცენტრისა” და თავისი ჟურნალისტის სააკრედიტაციო მოწმობები. როდესაც არჩევნებამდე სამი დღით ადრე მე ამის შესახებ ვუთხარი ყვირალაშვილს და ის მიხვდა, რომ ჩემი განეიტრალება უკვე შეუძლებელი იყო, მეორე დღეს მოწმობა გამოაჩინა: “მაგიდის უკან ჩავარდნილაო”! ამასობაში ცესკოში შეკვეთილი ახალი მოწმობაც ჩამოვიდა. ყვირალაშვილის მიერ ხელისუფლებასთან ბინძურ გარიგებაში შესვლაზე კიდევ უფრო დავრწმუნდი არჩევნების დღეს. მიუხედავად იმისა, რომ ის რაიონული შტაბის ხელმძღვანელი იყო, მან ადგილზე დარჩენასა და პროცესის ხელმძღვანელობას რატომღაც ჩემთან ერთად მთელი დღე უბნებზე სიარული არჩია, უბნიდან გამოსვლისას კი დეტალურად მეკითხებოდა, რა დარღვევები აღმოვაჩინე. სხვა უბნებზე მისვლისას მსგავსი დარღვევები უკვე გამოსწორებული მხვდებოდა! როდესაც საღამოს “კახეთის საინფორმაციო ცენტრში” მივედი დარღვევების შესახებ მოკლე ინფორმაციის სასწრაფოდ გასავრცელებლად, იგი ცოტა ხანში მოვიდა, ცალკე გამიყვანა და დამწუხრებული სახით მთხოვა, ანგარიშში არ მეხსენებინა სოფელ ჩალაუბანში აღმოჩენილი დარღვევები და, აგრეთვე, უბანზე მყოფი გუბერნატორის მოადგილე ალეკო კახიძე. შეგახსენებთ, რომ ჩალაუბანი მაშინდელი გუბერნატორის, გიორგი ღვინიაშვილის მშობლიური სოფელია, კახიძე კი _ მისივე ნათესავი. არჩევნებიდან მცირე ხანში, მიხვდა რა, რომ მე უკვე ყველაფერი ვიცოდი, ყვირალაშვილმა აღიარა, რომ მოწმობას სპეციალურად მიმალავდა, თუმცა ეს მისთვის დამახასიათებელი ორპირობითა და სიცბიერით მაშინდელი ცენტრალური შტაბის ხელმძღვანელს, ბატონ ზურაბ აბაშიძეს გადააბრალა: “მაგან დამირეკა და დამავალა, დანელიშვილი საქმეს გვიფუჭებს და ჩამოაცილეო. ეგ და სიბაშვილი იყვნენ გარიგებულებიო”. როდესაც შემატყო, რომ მე ეს არ დავიჯერე და შეიძლებოდა გადამემოწმებინა, გადააკეთა: “მე ასე მითხრა ტელეფონში, ზურა აბაშიძე ვარ, იქნებ სულაც ის არ იყო და მომატყუესო”! ჩემი მონათხრობის სიმართლის დამადასტურებელი დოკუმენტები, მათ შორის “ალიანსის წარმომადგენლის” ორი, სხვადასხვა თარიღით გაცემული მოწმობა ჩემს არქივს შემორჩა! ხოლო დარღვევების შესახებ მაშინ მოპოვებული მეტად მნიშვნელოვანი მასალები, ფოტო და ვიდეოდოკუმენტები “ადამიანის უფლებათა ცენტრის” ანგარიშში აისახა და ადვილად შეგიძლიათ მოიძიოთ. ამავეს დაადასტურებს გელა მთივლიშვილი. ჩემს ამ წერილს მე კეთილგანწყობილ შეტყობინებად ვთვლი. ვინარჩუნებ რა პირადად თქვენდამი და ბატონ დავით უსუფაშვილისადმი პატივისცემას, აგრეთვე, გარკვეულ თავდაჭერილობას პარტიის მიმართ, მიუხედავად პარტიის მხრიდან 2012 წელს საპირისპიროდ გამოვლენილი ცინიკური დამოკიდებულებისა, ვითვალისწინებ რა შესაძლო ზიანს, არ მსურს, რომ ჩემი მონათხრობი საჯარო გახდეს. ვიმედოვნებ, რომ მიიღებთ სათანადო ზომებს, ყვირალაშვილისა და ზარდიაშვილის დაუოკებელ მადას მოთოკავთ და ეს მათ საქციელსაც შეეტყობა უახლოეს დღეებში (ფრაქცია მშვიდობაში მოახმაროთ). მაგრამ თუ ისინი გააგრძელებენ თქვენი სახელის გამოყენებით და მათთვის დამახასიათებელი ცბიერებით “ჩალიჩს”, მეც თავს ვალმოხდილად ჩავთვლი! მგონი, სასაყვედურო აღარაფერი იქნება! P.S. 1. გთხოვთ, ეს წერილი ბატონ დავითსაც გააცნოთ. 2. ასევე გააცანით ბატონ დავით ბერძენიშვილს. 3. შეგიძლიათ გააცნოთ ბატონ ზვიად ყვირალაშვილს. როგორ სჯობს, ეგ თქვენ გადაწყვიტეთ. მე “ჩალიჩი” და დამალულად მოქმედება არ მჩვევია. აქ უკვე ბევრმა იცის, რომ წერილით მოგმართეთ, მაგრამ კონკრეტული ფაქტები არ გამიხმაურებია. 4. თუ შეკითხვა გაგიჩნდათ, რატომ არ გაცნობეთ 2010 წელს მომხდარი ამბები მაშინვე და ამას ჩემს გამამტყუნებელ არგუმენტად გამოიყენებთ, გიპასუხებთ, რომ პარტიის ხელმძღვანელობის მხრიდან ადეკვატური და სამართლიანი რეაგირება მაეჭვებდა. ჩემი ეჭვი რომ უსაფუძვლო არ იყო, 2012 წლის შემოდგომის მოვლენებმა დაადასტურა”.

საინტერესო შინაარსის წერილია, არა? არ ვიცი, ამ წერილს რა გაგრძელება და როგორი გამოხმაურება მოჰყვა, მაგრამ დანელიშვილის მიერ “ფეისბუკის” საკუთარ გვერდზე გამოქვეყნებული წერილის რამდენიმე კომენტარი ნამდვილად საინტერესოა. აი, ისინიც:

ამურიხარტონიშვილი: სისულელეა, რასაც თქვენ ამბობთ, ბატონო ზურა... ყვირალაშვილმა საკმაოდ დიდი გზა განვლო, რომ თავისი ბრძოლის შედეგი მოემკა და დამსახურებულად... აი, თქვენ კი ბრძოლას თავი დაანებეთ და გამგებლის მოადგილის სავარძელი მოირგეთ... მან გააგრძელა აქტიური პოლიტიკური მოღვაწეობა და საზოგადოებამ დაუფასა... რატომ უნდა დაგიჯეროთ თქვენ და არა 6000 გურჯაანელს, რომელმაც სიხარულით აირჩია ზვიად ყვირალაშვილი? და მეორე, სად იყავით აქამდე? ახლა, როცა სამსახურს ჰკარგავთ თუ დაკარგეთ, უკვე არ ვიცი, ახლა რატომ ღაღადებთ ამ უნამუსობებს? ერთად როცა მუშაობდით, მაშინ კარგი ზვიადი იყო ხო... წავიდა გარდამავალი, დროებითი თანამდებობის პირების დრო... თქვენი ერთადერთი გზაა ნაციონალების ბანაკში გადაბარგება... ასეთი ნახტომები კარგად გეხერხებათ... პატივისცემით თქვენგან და თქვენნაირებისგან სამსახურზე დაბლოკილი ამური ხარტონიშვილი.

 მაქსიმე გიგაური: ამურიკო, ის როგორ იყო, რესპუბლიკური პარტიიდან უცებ შსს-ში რო გადასკუპდი და მანდატურად გაგიშვეს? ეხლა გადმოსკუპდი უკან, ცუნცულ? წადი სონი ითამაშე ბიჯოო :)))

ამურიხარტონიშვილი: სიტყვები შეარჩიე... ჩემი თავი არავის არსად გაუშვია... თუ რამეს მივაღწიე ჩემი ცოდნით და სწავლით, ზოგიერთებივით პარტიულობა არ გამომიყენებია სამსახურის მოსაპოვებლად, 15 ადგილზე დამბლოკა “ნაცმოძრაობამ”, მაგრამ მაინც მოვახერხე, დამეწყო მუშაობა. პატიოსანი შრომა და განათლება ყველგან ფასდებოდა... მანდატურის სამსახურიდან ჯგუფის უფროსად, მერე კიდევ წინ, მერე დირექტორად, ახლა დეპუტატი ვარ და შენ შორიდან უცქირე, სადამდე წავალ... თქვენ კი იხტუნავეთ ერთი პარტიიდან მეორე პარტიაში... მერე მესამეში და მერე აღარ დავამთავრებ საად... P.S. ვერავინ მაჩვენებს ჩემს შევსებულ სივს, სადაც რესპუბლიკური პარტია არ მაქვს მითითებული... მე ყოველთვის ვამაყობდი და ვამაყობ, რომ ვარ ამ პარტიის წევრი და ბატონი ყვირალაშვილის თანამებრძოლი...

მაქსიმე გიგაური: რამ აგანერვიულა, კაცო, დამშვიდდი. თუ ვერ მშვიდდები, “სონი აძინს” ჩაუჯექი, გული გადააყოლე. მე ეხლა ნაღდად პირველად გავიგე ოპოზიციური პარტიის წევრებს ნაციონალები თუ პატიოსანი შრომის გამო ნიშნავდნენ თანამდებობებზე, მე სხვანაირად ვიცოდი, ნაციონალების დროს ჯიგარო  საქმეც ეგ არი რო მოახერხე, და ოპოზიციური პარტიების მუშაკები ნაცების დროს როგორ ახერხებდნენ მაგეებს კი ვიცით :))))

ყვირალაშვილი როდის იბრძოდა, ნაციონალებმა რო დაასაქმეს და დღე და ღამე იმათთან ერთად იყო და დაქეიფობდა, თუ საპარლამენტო არჩევნების წინ ბიჯების დამრიგებლად და ყავის მომდუღებლად რო ყავდათ ოფისში. ბრტყელ-ბრტყელი სიტყვების სროლა გეხერხება, ღმერთმანი

P.S. მე სად დავხტივარ, კაცო, მშვენიერ ცივ ყავასა ვსვამ ეხლა და ცხოვრებაში არც ერთ პარტიაში არა ვყოფილვარ.

მაქსიმეგიგაური: ამურ, ჯიგარო, მაიტა აბა შემახსენე რომელი რესპუბლიკელი ებრძოდა ნაცმოძრაობას. ინანაშვილი, უკვე სხვაგან გადაბარგებული სირბილაშვილი თუ ავთო ზარდიაშვილი? 

ავთო ზარდიაშვილს ხო ყველანი ვიცნობთ, შოტა უტიაშვილის გამგებლობის დროს პოვრად ჰყავდათ და მერე აცრებზე რო დადიოდა “ქართული ოცნების” წევრების ძროხებს არ ცრიდა, მარტო ნაციონალებისას. ერთმა ჟურნალისტმა ვიდეო მომცა და არ მინდა დადება, თორე ვიდეოში ჩანს ეგ თქვენი დიდი რესპუბლიკელი ავთო ზარდიაშვილი, როგორ მიერეკება ხალხს ივანიშვილის საგინებლად, ნაციონალებმა რო ლანძღეს გურჯაანში მაშინ. ასე რომ, ეხლა ჩემო ამურიკო, ტაკუნა დააყენე და შეირგეთ მაგ ნაციონალ-რესპუბლიკელებმა, სადაც შეძვერით, თორემ იმ ვიდეოსაც დავდებ! იმ ჟურნალისტს ეშინია, თორემ აქამდე დავდებდი. 

P.S. რა ჩემგან განსხვავებით? მე არც პარტიაში ვყოფილვარ და არც საჯარო სამსახურში არასდროს.

ამურიხარტონიშვილი: წესივრად ილაპარაკე რამე არ გამომტყუო. თუ რამე გაქვს სათქმელი, ჩემს ნომერს მოგცემ და დამირეკე. მე ჩემს თავზე ვარ პასუხისმგებელი... ყველამ თავის თავზე აგოს პასუხი.

არც ამ მიმოწერის გაგრძელება არ ვიცი. უბრალოდ, ფაქტი დავაფიქსირე და მკითხველმა თავად განსაზღვროს “ვისი ვისაშია”. ახლა რაც შეეხება “დიდ ბიზნესმენს”. “კახეთის საინფორმაციო ცენტრმა” თავის დროზე არა ერთი საკმაოდ საინტერესო მასალა გამოაქვეყნა გამგებლის ბიზნესინტერესებზე. საქმე ისაა, რომ ჟურნალისტებმა მაშინ გურჯაანის მუნიციპალიტეტის გამგებელს დეკლარაციის გარეთ დარჩენილი ქონება აღმოუჩინეს, გამგებელს პირველი ქონებრივი დეკლარაცია 2010 წლის 13 აგვისტოს აქვს შევსებული. დეკლარაციის მიხედვით, მის საკუთრებაში იყო 30 000 კვ.მ ფართობი (3 ჰა) გურჯაანში. მამის, ელგუჯა უტიაშვილის საკუთრებაში იყო 7000 კვ.მ ფართობი (0,7 ჰა) და საცხოვრებელი სახლი გურჯაანში, თელავის ქუჩა #5-ში. 2009 წლის 1-ლი იანვრიდან 31 დეკემბრის ჩათვლით, შოთა უტიაშვილისა და მისი ოჯახის წევრების საკუთრებაში არ ყოფილა ფასიანი ქაღალდები, არ ჰქონიათ ანგარიში ბანკში. ნაღდი ფულის სახით შოთა უტიაშვილს 12 000 ლარი ჰქონდა, მის მეუღლეს ეკა ბერუკაშვილს _ 4 500 ლარი, მამას ელგუჯა უტიაშვილს კი _ 180 ლარი. არც შოთა უტიაშვილი და არც მისი ოჯახის წევრები არ მონაწილეობდნენ სამეწარმეო საქმიანობაში. არც ერთ მათგანს არ მიუღია 500 ლარზე მეტი ღირებულების საჩუქარი. 2009 წლის 1-ელი იანვრიდან 31 დეკემბრის ჩათვლით, შოთა უტიაშვილის შემოსავალმა გურჯაანის მუნიციპალიტეტის გამგეობის მთავარი სპეციალისტის თანამდებობიდან _ 1 600 ლარი, გამგებლის მოადგილის თანამდებობიდან კი 720 ლარი შეადგინა. მისი მეუღლის შემოსავალი, რომელიც გურჯაანის პოლიკლინიკაში ექიმ-ენდოკრინოლოგად მუშაობდა 8 000 ლარი იყო. ქონებრივი დეკლარაციის მიხედვით, ოჯახის შემოსავალმა სოფლის მეურნეობიდან 27 000 ლარი შეადგინა. 10 000 ლარი უტიაშვილმა საცხოვრებელი სახლის რემონტზე დახარჯა. მომდევნო ქონებრივი დეკლარაცია 2011 წლის 19 აგვისტოს შეავსო. დეკლარაციის მიხედვით, მის მფლობელობაში არსებული 30 000 კვ.მ ფართობი 100 000 კვ.მ-მდე გაიზარდა. ოჯახის არც ერთ წევრს ფასიანი ქაღალდები არ ჰქონია. შოთა უტიაშვილს ჰქონდა 4 000-ლარიანი სესხი “საქართველოს ბანკში”, კრედიტი 802 ლარის ოდენობით და საკრედიტო დებეტი _ 3 198 ლარი. დეკლარაციის შევსების დროს უტიაშვილს ნაღდი ფულის სახით 11 000 ლარი ჰქონდა. საანგარიშო პერიოდში, ანუ 2010 წლის 01 იანვრიდან 31 დეკემბრის ჩათვლით, გამგებლის მამა ელგუჯა უტიაშვილი შპს “ოქროს ველში” წილის მფლობელი გახდა. 2010 წლის პირველი იანვრიდან 31 დეკემბრის ჩათვლით, შოთა უტიაშვილის შემოსავალმა გურჯაანის მუნიციპალიტეტის გამგებლის თანამდებობაზე მუშაობიდან 16 680 ლარი შეადგინა, მისი მეუღლის შემოსავალმა კი, რომელიც ამ პერიოდში დიაგნოსტიკურ ცენტრ “კახეთი იონში” მუშაობდა _ 6 560 ლარი. შოთა უტიაშვილი ქონებრივ დეკლარაციაში აღნიშნავს, რომ 2010 წელს სასოფლო-სამეურნეო პროდუქციის რეალიზაციიდან 40 000 ლარი მიიღო.

“კახეთის საინფორმაციო ცენტრი” მაშინ წერდა: “შოთა უტიაშვილს არც ერთ დეკლარაციაში არ აქვს შეტანილი ე.წ. “ფაზენდა”, რომელიც მან გურჯაანში, “რცხილიაანთ ღელეში” გამგებლად მუშაობის პერიოდში ააშენა. “ფაზენდა” ერთსართულიან კაპიტალურ საცხოვრებელ სახლს, საქეიფოს, დამხმარე სათავსებს, ეზოს, საქონლისა და ფრინველის სადგომებს მოიცავს. “ფაზენდის” წინ რამდენიმე ჰექტარზე ატმის ბაღი და ვენახია გაშენებული. ვენახი რკინის სარებით არის გაწყობილი. მიუხედავად იმისა, რომ “ფაზენდა” დასახლებულ პუნქტს რამდენიმე კილომეტრით არის დაშორებული, ელექტროენერგიით უზრუნველყოფილია. “ფაზენდას” საკუთარი “ელექტროტრანსფორმატორიც” აქვს, კაპიტალურად არის გაყვანილი ელექტროენერგია. ეზოში ახლად გაკეთებული ჭაბურღილიცაა, გზა მოხრეშილია. ეს ყველაფერი შოთა უტიაშვილმა მას შემდეგ გააკეთა, რაც გამგებელი გახდა. გამგებლის კუთვნილ რამდენიმე ძროხასა და ფრინველს აზერბაიჯანელი მწყემსი უვლის. მწყემსის ოჯახი საცხოვრებელი სახლის ერთ-ერთ ოთახში ცხოვრობს, მათ სამი მცირეწლოვანი ბავშვი (12-13 წლის) ჰყავთ. მომვლელებს ჩვენ მაინც ვკითხეთ, ვინ იყო “ფაზენდისა” და მეურნეობის პატრონი”.

ანუ რა გამოდის ახლა? გიგლა აგულაშვილი შეცდომაში შეიყვანა თანაპარტიელმა, რომელმაც “ფაზენდას” სურათები გადაუღო და ახარა როგორც ქვემდგომმა ზემდგომს, რომ “ფაზენდა” ააშენეს? მეტიც, “კახეთის საინფორმაციო ცენტრს” მაშინ “ფაზენდაში” მომუშავე მწყემსმა დაუდასტურა, ეს ქონება გამგებლის რომ იყო და ის აშენებდა: “იქით საქონლის ფერმა, აქ საქეიფო, იქ საცხოვრებელი ოთახები და საყარაულო”. კიდევ უფრო მეტი, ჟურნალისტებმა დაადგინეს და დაადასტურეს, რომ გამგებელი არასრულწლოვნების შრომას იყენებდა, ჟურნალისტებმა ამ მწყემსის შვილი ჩაწერეს:

“რამდენიმე კითხვით მშობლის თანდასწრებით ბავშვებსაც მივმართეთ:

_ სკოლას აცდენთ?

_ კი.

_ დადიოდით სკოლაში?

_ კი, ბადიაურში.

_ დიდი ხანია, აღარ დადიხართ?

_ თვეზე მეტია.

_ რამდენს გიხდით შოთა?

_ სულ 400 ლარს”.

მე ვფიქრობ, აქ კომენტარი ზედმეტია, ძალიან ზედმეტიც კი... თუ ნაცებისა და დავით ზურაბიშვილის პოზიციას გავითვალისწინებთ _ ვინც ჩვენთან არაა, ჩვენი მტერია, მაშინ, მინდა გითხრათ, რომ ეს სტატია მაშინ დაიწერა, როცა რესპები ე.წ. ოპოზიციაში იყვნენ და იმაზე, ვინც ნაცებთან არ იყო, ზურაბიშვილი დღეს ვერ იტყვის, რომ “დაკვეთით” დაწერა სტატია (მერე რა, რომ მასალა არქივიდანაა ამოღებული, ინტელექტუალური “ჯენტლმენისთვის” მიუღწეველი არაფერია). ჰო, ლამის დამავიწყდა, საინტერესოა, რას ამბობდა მაშინ, როცა ჩემი კოლეგები სტატიას წერდნენ, თავად გამგებელი შოთა უტიაშვილი: “მე და ჩემი ძმა ერთობლივად ვაშენებთ ამ “ფაზენდას”. ჩემს ძმას დედოფლისწყაროში საქონელი ჰყავს და უნდა, რომ ნაწილი აქ გადმოიყვანოს. “ფაზენდასთან” მიწის ნაკვეთი გვაქვს, სულ 9 ჰექტარი. აქედან ნაწილი მამაჩემისაა, ნაწილი _ ჩემი ძმის, ჩემი კი 4 ჰექტარზე მეტია, დანარჩენი სხვა ადგილზე მაქვს. მეურნეობიდან მიღებული შემოსავლით ვაშენებთ “ფაზენდასაც”.

_ მცირეწლოვანი ბავშვებიც გყავთ იქ, რომლებიც სკოლაში არ დადიან. მიგაჩნიათ თუ არა, რომ ბავშვის უფლებებს არღვევთ?

_ არა, დარღვევა როგორ... ეგენი ველისციხეში ცხოვრობდნენ, ფერმაში მუშაობდნენ და უბინაოდ რჩებოდნენ. სამუშაოს ეძებდნენ. ჩვენთან მოვიდნენ და “ფაზენდაში”  დასახლდნენ. როგორც ამბობენ, იმაზე უკეთეს პირობებში, ვიდრე მანამდე ცხოვრობდნენ. მანდ ბავშვები არ მუშაობენ, არაფერს აკეთებენ”. კახეთის საინფორმაციო ცენტრის თხოვნით, შოთა უტიაშვილის “ფაზენდასა” და მეურნეობაში ერთ-ერთი ფერმერიც იმყოფებოდა, რომელმაც იქ არსებული უძრავ-მოძრავი ქონება, საბაზრო ფასების მიხედვით, ზედაპირულად შეაფასა. მისი თქმით, ბოლო 2 წლის განმავლობაში შესრულებული სამუშაოების (სახლი, ფაზენდა, ჭაბურღილი, ელექტროენერგიის მიყვანა, ეზოს კეთილმოწყობა, ღობე, ვენახის და ატმის ბაღების გაშენება) და ქონების სავარაუდო ფასი 250 ათას ლარს აღემატება”.

გასაგებია ხომ ყველაფერი? ახლა მთავარი კითხვა, უკაცრავად და რა ააშენა ამჯერად ბიზნესმენმა უტიაშვილმა? რისთვის აიღო სესხი? თუ ვინმეს სჯერა, რომ ცისტერნები იმ ფასად იყიდა, რა სესხიც აიღო, დაიჯეროს, მაგრამ ბევრმა თუ არა, ცოტამ ხომ მაინც იცის ცისტერნების რეალური ფასი და ეს ცისტერნები ადრეც იქ რომ იდგა, ახლა სადაც დგას? რა გამოდის, ზვიად ყვირალაშვილმა სხვა რაკურსით გადაუღო “ფაზენდას” სურათები და შეგნებულად შეიყვანა გიგლა აგულაშვილი შეცდომაში? ეეჰ, არადა აგულაშვილს პროკურორობის დროს ეს “უმნიშვნელო” დეტალი, დარწმუნებული ვარ, არ გამორჩებოდა... და კიდევ ერთი, როგორც ამბობენ, თავის დროზე ამ ბიზნესში უტიაშვილს ყვირალაშვილიც ჰყავდა ჩართული და ახლა ხელმა ხელი რომ დაბანოს და ორივემ ერთად პირი, რაა ამაში გასაკვირი ვითომ? დროისა და ვითარების შესაბამისად ასეა, დომენტი ხან ზევითაა, ხან ქვევით, შედეგი ორივე ვარიანტში გარანტირებულია.

დაბოლოს, “ყვირალაშვილი და უტიაშვილი “პადელნიკები” არიან, კომერციაშიც და პოლიტიკაშიც. 2010 წელს, ჩემს წერილში მოყვანილი ბინძური გარიგების შემდეგ, ღვინიაშვილმა, სიბაშვილმა და უტიაშვილმა სპეციალურად ყვირალაშვილისთვის შექმნეს აიპ “კეთილმოწყობა” და მის დირექტორად დანიშნეს. შეთავსებით ყვირალაშვილი უტიაშვილის “ფაზენდაში” გურჯაანელი ნაციონალებისთვის მწვადების შემწველად მუშაობდა. ასე რომ, გურჯაანელი “რესპუბლიკელებისა” და “ნაციონალების” “პადელნიკობა” გრძელდება! ყვირალაშვილს უტიაშვილის მოსაძებნად დიდი ჯაფა არ დასდგომია. ხშირად გადაუხადეთ მადლობა, ხაზგასმით ვამბობ, შეთავსებით ყვირალაშვილი უტიაშვილის “ფაზენდაში” გურჯაანელი ნაციონალებისთვის მწვადების შემწველად მუშაობდა და ეს ყველამ იცის გურჯაანში, _ აცხადებს ჩვენთან საუბრისას ზურაბ დანელიშვილი.

ესაა სულ...

დარეჯან მეფარიშვილი, გაზეთი „პრემიერი“

FaceBook