ქართული ოცნების" წევრი არჩევნებში სხვა პარტიის კანდიდატს ღიად უჭერს მხარს და ამის ისეთ მიზეზს ასახელებს, წესით, ეს თემა "იქ, ზემოთ" შეშფოთებას უნდა იწვევდეს!
ქარელში "ქართულმა ოცნებამ" გამგებლის კანდიდატად წარსულში ძებნილი და სოფელში "ჩლიქოსნის" მეტსახელით ცნობილი ადამიანის კანდიდატურა წამოაყენა. ქარელში მიმდინარე პროცესებით გაზეთის დაინტერესება, ამ ინტერვიუს ავტორთან, ჩემთან, ჩემს კუთვნილ მობილურზე შემოსულმა "ესემეს"-შეტყობინებამ გამოიწვია. იმან, რასაც ქვემოთ წაიკითხავთ, ყოველგვარ მოლოდინს გადააჭარბა.
ემიკო ფეიქრიშვილი, "ქართული ოცნების" წევრი:
- "ქართული ოცნების" დეპუტატობის კანდიდატი ზაზა გულიაშვილი "ოცნების" შეცდომაა, თუ რატომ, ამის დასაბუთება ძალიან ადვილია.
- მაგრამ თქვენ მის შტაბში ხართ...
- არა, მე დღეს აქტიურად და ძალიან თამამად ვუჭერ მხარს პაატა ღვინიაშვილს, რომელიც არის გულიაშვილის კონკურენტი სალომე ზურაბიშვილის პარტიიდან.
- და ეს იციან "ქართული ოცნების" შტაბში?
- შტაბში? წესდებით ასეა, სადაც ვარ ჩაწერილი და იურიდიული მისამართი სადაც მაქვს, იქ ვარ გაწევრიანებული. მე ვარ დიდუბის შტაბში გაწევრიანებული, მაქვს ინფორმაცია, რომ წერილი გაგზავნეს დიდუბის შტაბში, რომ მე დავუპირისპირდი "ოცნების" კანდიდატს და როგორც ვიცი, მისწერეს შტაბს, რომ თითქოს მე ასევე პარტიული სიით ვიყრი კენჭს. დავრეკე დიდუბის ორგანიზაციაში, სადაც მითხრეს, რომ წერილი ჯერ არ მიუღიათ, თუმცა პარტიიდან გარიცხვის მოთხოვნა არის და ისიც მითხრეს, რომ ახსნა-განმარტების გარეშე პარტიიდან ჩემი გარიცხვა არ მოხდება.
- წერილი მიიღეს თუ არა, ამას პრინციპში არც არანაირი მნიშვნელობა არ ჰქონია...
- დიახ. რამ გამოიწვია ის მდგომარეობა, რაც ახლაა: 2013 წლის 29 აგვისტომდე გამგებლის მოვალეობას ვასრულებდი ქარელში, ჩემი განთავისუფლება მოხდა 29-ში. ორი კვირით ადრე, 14 აგვისტოს ზაზა გულიაშვილი მოვიდა ჩემთან, ამ დროს ის იყო პოლიციის უფროსის მოადგილე.
- სად მოვიდა?
- სამუშაო ოთახში და შემომთავაზა ასეთი სქემა - უნდა დამენიშნა ჩემს მოადგილედ, შემდეგ მომეხსნა უფლება-მოვალეობა, ის გახდებოდა გამგებელი და მე დამნიშნავდა ამის შემდეგ მოადგილედ. მიზეზი ვკითხე, რამეს ვერ ვასრულებ-მეთქი? ზემოთაა გადაწყვეტილიო. ამ დროს თავად მოქმედი პოლიციელი იყო, მაღალჩინოსანი! რატომ აპირებდა წამოსვლას? ზაზა გულიაშვილს აქვს კომპლექსი, დღეს ქარელის პოლიციაში მუშაობენ ის ადამიანები, რომელთაც თავის დროზე გულიაშვილი ბათუმში დაიჭირეს და აჭარიდან მოახდინეს ქარელში მისი გადმოყვანა.
- დაიჭირეს?
- დიახ, ძებნაზე ჰყავდათ დასმული. გულიაშვილს დღემდე მეტსახელად აქვს "ჩლიქოსანი". სამწუხაროდ, წაშალეს წარწერა მის საარჩევნო პლაკატზე, სადაც ეწერა - იძებნება ძროხის ქურდობაზე! მისავე სოფელში იყო ეს წარწერა... მოკლედ, მოვიდა ჩემთან და რა პირობაც წამომიყენა, გითხარით. მე ვუთხარი, ამისთვის დღეს არ ვარ მზად-მეთქი. ზემოთ არ იცდიანო, - მიპასუხა, ასე ზოგადად თქვა. ზემოთ გადაწყვიტეს ასე, მე ჩემს თავს გამგებლად ვხედავ და ეს ასე უნდა მოხდესო. მე არ მიკითხავს, რატომ უნდოდა პოლიციიდან წამოსვლა. მიუხედავად მისი კატეგორიული მოთხოვნისა, პასუხი იმწუთას მეთქვა, მე მაინც დრო მოვითხოვე. წავიდა გულიაშვილი და ზუსტად ნახევარ საათში უკან დაბრუნდა, საკრებულოს მაშინდელ თავმჯდომარე პაატა ღვინიაშვილთან ერთად.
- ერთი წამით, გულიაშვილი "ქართული ოცნების" წევრი იყო ამ დროს?
- გულიაშვილი არის წარუმატებელი მოჭიდავე, თუ არ ჩავთვლით პოლიციაში მისი მუშაობის დროს ირლანდიაში ვეტერანების შეხვედრაზე ერთადერთ მოგებას, სხვა რამე აღსანიშნავი და დასამახსოვრებელი სპორტში არაფერი გაუკეთებია, ირლანდიიდან ჩამოსული ორდენით დააჯილდოვა მაშინდელმა შს მინისტრმა ირაკლი ღარიბაშვილმა... მოკლედ, მოვიდნენ და მეუბნება, "ის ხალხი არ იცდის და პასუხს ელოდებიან". კარგი, მიზეზს არ მეუბნები, რატომ წავიდე, ან რას ემსახურება ეს ცვლილება, ის მაინც მითხარი, ვინაა ამით დაინტერესებული-მეთქი. ჩამოთვალა: ირაკლი მელაშვილი (რეგიონებს კურირებდა მაშინ), არმაზ ახვლედიანი (იმჟამინდელი გენერალური მდივანი), ანზორ ჩუბინიძე (ივანიშვილის დაცვის მაშინდელი უფროსი) და ირაკლი ღარიბაშვილი (შს მინისტრი იყო იმ დროს). დღესაც და მაშინაც დარწმუნებული ვიყავი, რომ ჩემზე ზემოქმედების მოსახდენად დაასახელეს ირაკლი ღარიბაშვილი, ეს მათი ფანტაზიის ნაყოფი იყო! წარმოგიდგენიათ, რა მდგომარეობაში უნდა აღმოვჩენილიყავი, როცა მითხრეს, შს მინისტრს ასე უნდა და ასე იქნებაო...
- წინა ხელისუფლებაგამოვლილი...
- მოვაწყვე ბრიფინგი და ეგრევე დავაფიქსირე ყველაფერი! სამი კანდიდატი ჰყავს ქარელს - "ოცნების", ნაციონალებისა და "საქართველოს გზის". გუშინ გადაცემა იყო ადგილობრივი ტელევიზიით და ისე შელამაზებული იყო გულიაშვილის ბიოგრაფია, გამეცინა. 90-იან წლებში ძებნაზე რომ იყო ეს პიროვნება გამორჩათ, როგორც ჩანს, ბიოგრაფიიდან. უკრაინაში რომ იხდიდა სასჯელს, ესეც გამორჩათ.
- ბრალდებაა ეს, ხომ იცით?
- გასაგებია, მაგრამ, რაც იყო, ეგაა! არ ვიცი, როგორ მოხდა, მაგრამ ასევე იყო რამდენიმე სლოტ-კლუბისა და საუნის დაცვის სამსახურში. ეს ყველაფერი გამორჩათ... 2012 წლის საპარლამენტო არჩევნების შემდეგ, 41 წლის ასაკში გახდა პოლიციის უფროსის მოადგილე და ამ ყველაფერში ჩართული იყო ანზორ ჩუბინიძე. სირცხვილია, ქარელის გამგებელი კვირიდან კვირამდე ისე იქცეოდეს, ვანო ჯავახიშვილისა და ვასიკო ოდიშვილის გადაცემის მასალა იყოს! გავაგრძელებ თემას: მოვიდა გულიაშვილი საკრებულოს თავმჯდომარესთან ერთად, მითხრეს, არ იცდიან ეს ადამიანებიო. ამ ჩვენს საუბარს პაატა ღვინიაშვილი ისმენდა. კიდევ ერთხელ ვუთხარი უარი, გავიდნენ კაბინეტიდან, უკან მობრუნდა პაატა და მითხრა, რომ გულიაშვილმა თქვა, არ მინდა, რომ დაიჭირონო. შემდეგ როცა მე ეს ყველაფერი გავახმაურე, ღვინიაშვილმა ეს საუბარი უარყო.
- როგორ გაგათავისუფლეს?
- სანამ ამას ვიტყვი, გეტყვით, რომ ეს საუბარი შედგა 2013 წლის 14 აგვისტოს. 15 აგვისტოს, მაჟორიტარ დეპუტატთან ერთად, შეკვეთილში წავედი, სადაც პრემიერ-მინისტრი ივანიშვილი იმყოფებოდა, შევხვდი მას და დაახლოებით 10 წუთი ვისაუბრეთ. ჩვენს შეხვედრამდე დეპუტატი ლერი ხაბელოვი ესაუბრა ივანიშვილს და ამის შემდეგ გაუჩნდა მას ჩემი ნახვის სურვილი. ბატონმა ბიძინამ მითხრა, თუ ასეთი რამ ხდება, ატეხე განგაში, გაახმაურეო. ამ საუბარს ასევე ესწრებოდა საკრებულოს თავმჯდომარის მოადგილე სოსო საზანდრიშვილი. ბატონმა ბიძინამ თქვა, აგერაა საკრებულო და მათ გადაწყვიტონო.
- დეტალებზე ცოტა ქვემოთ ვისაუბროთ, მაინტერესებს, არჩევნებამდე სად მუშაობდით?
- არც ერთ პარტიაში არასდროს ვყოფილვარ, ხაზგასმით ვამბობ ამას, 1998 წლიდან ვმუშაობ სხვადასხვა სამსახურებში, სხვადასხვა თანამდებობებზე, მაგრამ არც ერთ პარტიაში არ ვყოფილვარ. საპარლამენტო არჩევნების წინ დამიბარეს და მითხრეს, რომ ხელმოწერები უნდა მიმეტანა, ეს გავაპროტესტე და სამსახურიდან წამოვედი. ბატონი ბიძინა ჩავაყენე საქმის კურსში და ვუთხარი, რაც იყო რეალობა, ანუ: 54 ათასი ამომრჩეველი ცხოვრობს ქარელში და არაფერი არაა აქ გაკეთებული, კი ხედავთ თავადაც. იმ დროს, როცა ინფრასტრუქტურის სამინისტრომ პრიორიტეტი განგვისაზღვრა, გეგმაში იყო სასმელი წყალი, გზა და კომუნიკაციის სხვა ტიპის სამუშაოები. ყველაფერი გავაკეთე იმისთვის, რომ 1 მლნ 200 ათასი კულტურის სახლის მშენებლობისთვის მომეტანა რაიონში, ყველა მეუბნებოდა, ამას არ დაგიმტკიცებენო, მაგრამ დაამტკიცეს. პროექტი დავდეთ, თანხა მოვიტანეთ, მაისში უნდა დასრულებულიყო კულტურის სახლი და დღემდე არავის არაფერი გაუკეთებია. არადა თანხაცაა და პროექტიც, მაგრამ სურვილი ხომ უნდა ჰქონოდა გამგეობას, ეს რომ გაეკეთებინა? 1 მლნ 700 ათასით კი ისეთ ადგილებში დავაგეთ გზა, სადაც ადრე არასდროს ყოფილა და ეს მოხდა იმ პერიოდში, როცა მე ვიყავი გამგებლის მოვალეობის შემსრულებელი. მოკლედ, წამოვედი ქარელში, ამ დროს მაჟორიტარი დეპუტატი მსოფლიო ჩემპიონატზე წავიდა ბრაზილიაში, მე ბათუმში წავედი მივლინებით, 28 აგვისტოს ბათუმში ჩამოვიდა ჩემი მეგობარი და მითხრა, ხვალ პაატა ღვინიაშვილი ბრძანებას წერს შენი გამგებლის მოვალეობის შემსრულებლობიდან გადაყენების შესახებ და 30 აგვისტოს საკრებულო ზაზა გულიაშვილს აირჩევსო.
- მიზეზი?
- პაატა დაიბარა გოგა ხუხუამ. დღეს შიდა ქართლის სუს-ის უფროსია, დააშანტაჟა იმით, რომ პაატას ოჯახს წაართმევდნენ ბიზნესს, დააკავებენ სიძეს, შვილს და ასე შემდეგ და ამ გზით აიძულეს. ჩამოვედი ქარელში და ზაზამ მითხრა, ადამიანურად გამიგე, სხვა გზა არ მაქვსო. მე ვუთხარი მას, მესმის ეს ყველაფერი, მაგრამ როგორ სამართლებრივ ჩარჩოში უნდა მოაქციო ეს ყველაფერი? ეს დარღვევაა, არაფრის ფულისთვის როგორ გადამაყენებთ-მეთქი? კანონში არის მუხლი, რომელიც იმპერატიულად განსაზღვრავს, რა შემთხვევაში შეიძლება საკრებულომ გადააყენოს გამგებელი, ბრძანებაში მითითებულია მუხლი, მაგრამ არც ერთი პუნქტი. 30-ში დილით მივიღე ბრძანება, საკრებულოს სხდომას საია-ს იურისტი დაესწრო და განაცხადა, თუ ემიკო ფეიქრიშვილი არაა კარგი გამგებელი და ამ მუხლით უნდა გაათავისუფლოთ, მიუთითეთ, რომელი პუნქტი დაარღვიაო. ესეც რომ არა, მე მყავდა მოადგილე, რომელსაც, კანონით, ჩემი გადაყენების შემთხვევაში გამგებლის მოვალეობა უნდა შეესრულებინა. მაინც დაიწერა გამგებლობიდან ჩემი გადაყენების ბრძანება და მე ავტომატურად გადავედი მოადგილედ.
- და, ზოგადად, როგორ მოხვდით გამგებლად?
- მანამდე ვიყავი მოადგილე. მოკლედ, ზაზას ვუთხარი, ვერ ვიმუშავებ შენთან-მეთქი და ვთქვი, რომ შვებულებას ავიღებდი და შვებულების ვადის გასვლის შემდეგ აღარ დავბრუნდებოდი, მაგრამ კანონით შვებულება არ მეკუთვნოდა და ამიტომ ვერ გავედი. ვანო მერაბიშვილი და დათა ახალაია რომ აკონტროლებდნენ ქარელს, მაშინ არ შემეშინდა წამოსვლა და ახლა რის უნდა შემშინებოდა? მოკლედ, შვებულება ვერ ავიღე, 8 სექტემბერს საია-მ მოაწყო ბრიფინგი, სადაც ვილაპარაკე იმ ზეწოლაზე, რაც ჩემს მიმართ ხორციელდებოდა. ხაშურის რაიონულ სასამართლოს მივმართე და მოვითხოვე კანონთან შეუსაბამო გადაწყვეტილება. სასამართლომ არ დააკმაყოფილა ჩემი სარჩელი, როცა სააპელაციოში გავასაჩივრე, მოადგილე უკვე აღარ ვიყავი და მოკლედ, შევწყვიტე დავა. სასამართლომ განაცხადა დღეს, თქვენ ვინა ხართ, უკვე აღარ ხართ საჯარო მოხელეო. მოკლედ, შევწყვიტე დავა, ამის შემდეგ რა ხდება? არაფერი...
- ასეთი ხმაურის ფონზე თქვენს ბრალდებებს არავინ გამოეხმაურა?
- ყველამ გაიგო, რაც მოხდა და ხდებოდა, პირდაპირ დავადე ხელი სუს-ის უფროსს და არამხოლოდ მას, მაგრამ ამით არავინ დაინტერესდა. ეგებ ტყუილს ვამბობ, არ უნდა გაარკვიონ სიმართლე? არავის უკითხავს, რატომ ამბობ ამას, ეს მართალია, ტყუილია, არსაიდან რეაქცია არაა.
- თავად ასეთი სუფთა ხართ?
- ზაზა გულიაშვილივით ჩემთან ვერ მოვა დაზარალებული. თუ ახალგაზრდობაში რამე გამიფუჭებია, მხოლოდ საკუთარი თავისთვის. ზაზა გულიაშვილისგან განსხვავებით, არ მიცემია მწყემსი, რომელსაც ცხვრები მოვპარე, არ მომიპარავს და არც არავისთვის არაფერი წამირთმევია. ააგორეს თემა, რომ ჩემი წინამორბედი გამგებლის ხელშეწყობით ლერი ხაბელოვმა იყიდა შოთას წყარო, შეისყიდა ხე-ტყე და ასე შემდეგ, არადა, ყველაფერი დიდი ტყუილი იყო, ააგორეს თემა, რომ მე ვარ კანონდამრღვევი და ა.შ. აბა, იმას ხომ არ იტყოდნენ, რომ ზაზა გულიაშვილი დედის გვარზეა და სინამდვილეში არის თურმანოვი, რომ მას ქარელში იცნობენ, როგორც "ჩლიქოსანს" და არის კრიმინალი და ა.შ.
- არჩევნების შემდეგ, ალბათ, თქვენც მოგადგებიან, მაგრამ...
- ვერც მირეკავენ, რომ გაარკვიონ, რა ხდება, რა უნდა მითხრან? ძალიან მინდა, მკითხონ, რატომ ვარ პაატა ღვინიაშვილის მხარდამჭერი, როცა "ქართული ოცნების" წევრი ვარ, ხომ უნდა მკითხოს ეს ვინმემ? არავინ მეკითხება. მე გითხარით, იმ პროექტების შესახებ რაშიც ჩართული ვიყავი 9-თვიანი გამგებლობის პერიოდში, ჩემს შემდეგ, მიუხედავად იმისა, რომ ფული ანგარიშზე დევს, არაფერი გაკეთებულა, სამწუხარო არაა ეს? ყველა პროექტი გაჩერდა, რატომ? როგორ შეიძლება გულიაშვილს ამ ფონზე მხარი დავუჭირო? თქვენ მეკითხებით, ვინ "კრიშავს"? გიორგი თორთლაძე, გუბერნატორის მოადგილე. 2012 წლის წინასაარჩევნოდ გიორგი თორთლაძე, რომელსაც საკმაოდ დიდი რეიტინგი აქვს ქარელში (მოჭიდავეა), ნაციონალების დროს იყო გამგებლის მოადგილე, აქ ნაციონალების გამგებელი იყო ილო ბურჯანაძე. მოხდა ისე, რომ არსოშვილის ხალხს ჩაენაცვლა მერაბიშვილის კადრი, ილო "ძლიერი" გახდა და გიორგი გაუშვა სამსახურიდან. მოკლედ, არჩევნების წინ გიორგის შეუთვალა "ქართულმა ოცნებამ", მოდი, ჩვენ გვერდით დადექიო, თორთლაძემ უარით უპასუხა. მისი მოყვარე შსს-ს მაღალჩინოსანი მიშა კანდელაკი იყო, ოჯახში ყველა მუშაობდა. მოკლედ, უარი თქვა და დატოვა საქართველო, მოსკოვში წავიდა, რაღაც კერძო ბიზნესი აქვს.
- ამ დროს თქვენ მუშაობდით, ხომ?
- კი და სწორედ ამ დროს დავტოვე ხმაურით სამსახური. ჩემი მეუღლე მუშაობდა, სიდედრ-სიმამრსაც კარგი საქმე აქვთ... პრობლემები შევუქმენი მათ ჩემი გადაწყვეტილებით, ბოლოს და ბოლოს თავად დასაქმებული ვიყავი და უმუშევარი დავრჩი. მოკლედ, ჩაიარა არჩევნებმა და თორთლაძე შეეცადა "ოცნებაში" შემოსვლას. ზაზა გულიაშვილს უნდოდა გამგებლობა და რაკი ვერ მოახერხა, პოლიციაში მიიყვანეს. თორთლაძესაც ჰქონდა სურვილი გამგებლობის, მას უთხრეს, როცა დაგიძახეთ, სად იყავიო და ჯგუფი შეიქმნა მაჟორიტარი დეპუტატის წინააღმდეგ - თორთლაძე, გულიაშვილი (არ შეიძლება გამოვტოვოთ ის, რომ ამ დროს გულიაშვილი "ქართული ოცნების" მხარეს იყო და იბრძოდა) და სხვები. მე რომ დავტოვე სამსახური, სულაც არ ვაპირებდი ხმაურს, დამირეკეს და მითხრეს, რომ შეიძლება პრობლემები შემქმნოდა ნაციონალებისგან და მივსულიყავი "ქართული ოცნების" შტაბში. მაშინ ზაზა გულიაშვილმა "მეცხრე არხის" მანქანაში ჩამსვა და თბილისში ჩამომიყვანეს, სადაც განცხადება გავაკეთე.
- ამაგი ჰქონია.
- როგორ შეიძლება დავუკარგო, რასაც აკეთებდა. მოხდა ისე, რომ გიორგი თორთლაძე დაინიშნა "ქართული ოცნების" პარტიის თავმჯდომარედ და დღეს ამ სტატუსს გუბერნატორის მოადგილის თანამდებობას უთავსებს. მიშა კანდელაკი არის მისი მოყვარე, გიორგის ვალდებულებები აქვს უკვე ზაზასთან, რომელმაც უშუამდგომლა "ქართულ ოცნებაში"... ორი დღის წინ გიორგი თორთლაძე მოვიდა ჩემთან სახლში, არჩევნები ჩაივლის და ჩვენ მეგობრებად უნდა დავრჩეთო... მე ვუთხარი მას, რომ ეს უკვე შეუძლებელია...
- კარგით, მაგრამ ერთი რამ მაოცებს ძალიან, დღეს პაატა ღვინიაშვილს უჭერთ მხარს და როგორაა ეს ამბავი?
- პარადოქსია კი, გეთანხმებით...
- კაცმა ზეწოლას ვერ გაუძლო და თქვენს წინააღმდეგ გამოვიდა... რაიონის ინტერესებს თუ გავითვალისწინებთ...
- როცა ორ კანდიდატს შორისაა საუბარი, ღვინიაშვილი საუკეთესო კანდიდატია, იცის მუშაობა და ვერანაირად ვერ შევადარებ გულიაშვილს.
- თქვენ რას მიიღებთ ამაში?
- მაქსიმუმ გამგებლის მოადგილეობა შემომთავაზოს, ხომ? თქვენ ასე ფიქრობთ? მე დღეს მაქვს კარგი ხელფასი, ვარ ჩემთვის, ძალიან კარგი წრე და ა.შ. მე ვერ ვიტყვი, რომ ღვინიაშვილი ცუდი ადამიანია, არაა ასე და იმიტომ. რასაც მე ვლაპარაკობ, ყველაფერზე პასუხისმგებელი ვარ.
- ნაციონალებით გაივსო "ქართული ოცნების" სიები. მართალია, ეს პრემიერ-მინისტრს არ სჯერა, მაგრამ...
- ქარელში იმაზე აქვთ აქცენტი გაკეთებული, რომ პაატა გულიაშვილი ნაციონალების დროსაც საკრებულოს თავმჯდომარე იყო, ამ დროს შემიძლია ჩამოვთვალო საკრებულოსა და მაჟორიტარობის სიით "ქართული ოცნების" სახელით არჩევნებში მონაწილე ნაციონალების გვარები: მსოფლიო ჩემპიონი ჯემალი მჭედლიშვილი, რომელიც მაჟორიტარობაზე იყრის კენჭს, ბოლო დღემდე იდგა და იცავდა "ნაციონალური მოძრაობის" ხმებს, თუმცა შემდეგ პირველმა შექმნა ქარელის საკრებულოში ფრაქცია "ქართული ოცნება". მასაც უთხრეს თავის დროზე, მხარი დაეჭირა "ქართული ოცნებისთვის" და უარი თქვა, არადა, როგორც ჩემპიონი, 2000 ლარს იღებდა ბიძინას ფონდიდან დახმარებას. როდესაც უთხრეს, ბიძინას დახმარებას იღებ და ეგ როგორააო, არ ვიცოდი, ბიძინას ფული რუსული რომ იყო და ამიტომ ვიღებდიო, - განაცხადა. ახლა "ქართული ოცნების" წევრია! გიორგი თორთლაძე "ნაციონალური მოძრაობიდან" არაა? ვანო არდემანაშვილი ნაციონალების დამფინანსებელი იყო, ლევან რამიშვილი ნაციონალია, სპარტაკ ეკალაძე და რა ვიცი, რომელი ერთი ვთქვა, ნაციონალები იყვნენ ყველა და დღეს ეს ხალხი ჰყავს "ოცნებას" საყრდენი. აქტიურადაა დაწყებული კომისიის წევრების შეცვლა, ნაციონალების დროს ვინც იყვნენ, ისინი მოაბრუნეს, მეტი რა ვთქვა?!
დარეჯან მეფარიშვილი, გაზეთი "პრემიერი"
1 - USD - 2.416
1 - EUR - 2.981
100 - RUB - 3.922
5014
