ვის კარში გაიტანს გოლს ადგილობრივი თვითმმართველობის არჩევნები, აუხდება თუ არა ოცნება საქართველოს პრემიერ-მინისტრს და "ჩაირეცხება" თუ არა "ნაციონალური მოძრაობა"? მთავარი - ვინ იქნება პირველი და ვინ იქნება მეორე, მესამეზე და მეოთხეზე უკვე საუბარი აღარაა, ისე როგორც არ იყო საპარლამენტო არჩევნების დროს. ნაციონალები მარნეულიდან წალენჯიხით იმუქრებიან, კანდიდატები უბან-უბან დადიან და დაპირებებს უხვად აფრქვევენ, "ფაბერჟეს კვერცხი" ისევ "მთავარი ოპოზიციური ძალის" ზურგზე იმსხვრევა, არჩევნებამდე კი რამდენიმე დღით ადრე საერთაშორისო ორგანიზაციები ამომრჩევლებზე ზემოქმედებაზე თავის შეკავებისკენ მოუწოდებენ მხარეებს. ამ აბურდულ ფონზე ირაკლი ღარიბაშვილს არ სჯერა, რომ მისი პარტია ნაციონალებითა და ათას პარტიაგამოვლილი, გაურკვეველი წარსულის მქონე ადამიანებითაა სავსე, რომელთაც თავის დროზე კარგად მორგებული პოლიტიკოსის იმიჯით საკუთარ თავს გარანტირებულად მშვიდი მომავალი გამოუჭედეს. რჩება შთაბეჭდილება, რომ კადრების სანთლით ძებნისას "ქართულ ოცნებას" სანთელი ჩაუქრა და ეს სიბნელე რეგიონებზე, განსაკუთრებით კი, ახალაიების სამეფოდ ცნობილ, სამეგრელოზე აისახა.
"დროა, ყველაფერს მისი სახელი დავარქვათ, დარწმუნებული ვარ, თითოეულმა თქვენგანმა ეს იცის, მაგრამ მოდით, ყველაფერი სააშკარაოზე გამოვიტანოთ. მინდა ვისაუბრო და შეძლებისდაგვარად გაგაცნოთ დღევანდელ სენაკში შექმნილი ვითარება და მინდა ვისაუბრო ამ, XXI საუკუნის ე.წ "ფეოდალებზე", რომლებსაც ჰგონიათ, რომ სენაკის მიწა მათთვის ქალამანია, სენაკის ცა კი - ქუდი... იქნებ სახელი მოვუძებნოთ ცხრა პარტიაგამოცვლილ პიროვნებებს, რომლებიც მიგვიძღოდნენ წინ, კომუნიზმისკენ, მიგვიძღოდნენ წინ, შევარდნაძისკენ, მიგვიძღოდნენ წინ, "ნაცებისკენ" და ახლაც ცდილობენ, გაგვიძღვნენ წინ, "ოცნებისკენ", - ასე იწყებს ჩვენთან საუბარს აქვსენტი (ალეკო) პაპავა:
- კოალიცია "ქართული ოცნების" საარჩევნო შტაბის ხელმძღვანელის დემურ გადელიას პოლიტიკური კარიერის გახსენებით დავიწყოთ, კომუნისტური პარტიიდან დაწყებული, "მოქალაქეთა კავშირით" გაგრძელებული და "ოცნებით" დამთავრებული. სენაკელებს არ ახსოვთ შევარდნაძის პარლამენტში ერთი ხმამაღალი სიტყვაც მის მიერ წარმოთქმული... ამის შემდეგ ბატონი დემური იყო ნაციონალური პარტიის და "ყვარყვარეს" საარჩევნო კამპანიის ასეთი აქტიური დამფინანსებელი: 14.10.2007 წელი შპს "არქეოპოლისის" მიერ "ნაციონალური მოძრაობისადმი" ჩარიცხულია 50 000 ლარი; 12.02.2008 წელი შპს "არქეოპოლისის" მიერ "ნაციონალური მოძრაობისადმი" ჩარიცხულია 50 000 ლარი; 16.02.2010 წელი შპს "არქეოპოლისის" მიერ "ნაციონალური მოძრაობის" ანგარიშზე ჩარიცხულია 100 000 ლარი; 12.03.2010 წელი შპს "ინდიკოს" მიერ "ნაციონალური მოძრაობის" ანგარიშზე ჩარიცხულია 50 000 ლარი; 13.09.2012 წელი დემურ გადელიას მიერ "ნაციონალური მოძრაობისადმი" ჩარიცხულია 60 000 ლარი. ამ ფონზე არ არის სამართლიანი, რომ ვიკითხო, იქნებ ბატონმა დემურმა ბიზნესს მიხედოს და დაანებოს თავი პოლიტიკას? იზარდი წოწონავა - კოალიცია "ქართული ოცნების" შტაბის ხელმძღვანელის (დემურ გადელია) მოადგილე, ყოფილი კომპარტიის ერთ-ერთი ნომენკლატურა. თუმცა ეს ყველაფერი რა გასაკვირია, მით უფრო, იმ პირობებში, რომ ერთ-ერთი ბოლო მოლხენის დროს ბატონმა გადელიამ სუფრის წევრებს თავისი ძმისშვილი სოსო გადელია მომავალ პარლამენტარად წარუდგინა. არის ერთი მეტად მნიშვნელოვანი მომენტიც, გადელია და „ოცნება” სენაკში ზოგიერთ უბნებზე ფარულად “ნაციონალების” ეხმარებიან საკუთარი კანიდატების საზიანოდ. მაგრამ ალბათ არც ეს არის უცხო ამ პოლიტიკური გუნდისთვის, რომელსაც გუნდის გარდა, ყველაფერი შეიძლება უწოდო.
ახლა დავაკვირდეთ სენაკის "ოცნების" ირგვლივ შექმნილ გუნდს: ფრიდონ ადანაია - თეკლათის თემის გამგებელი, "კგბ"-ს უფროსის გურამ ადანაიას მძღოლი, სახელმწიფო გადატრიალების დროს ავადსახსენებელი მხედრიონელის, შალვა კეკელიას დაცვის უფროსი, საინტერესოა რისთვის დააჯილდოვა შევარდნაძემ?!. აი, შევარდნაძის ბრძანება:
ბრძანებულება #524, 1997 წლის 19 სექტემბერი, ქ. თბილისი
საქართველოს შინაგან საქმეთა სამინისტროს თანამშრომელთა მედლით "მხედრული მამაცობისთვის" დაჯილდოების შესახებ
შეიარაღებულ ბოროტმოქმედთა დაკავებისა და განიარაღებისას გამოჩენილი მამაცობისა და მხედრული ვალის მოხდისთვის საქართველოს შინაგან საქმეთა სამინისტროს თანამშრომლები დაჯილდოვდნენ მედლით "მხედრული მამაცობისთვის":
ფრიდონ ადანაია – სენაკის შინაგან საქმეთა რაიონული განყოფილების კრიმინალური პოლიციის სისხლის სამართლის სამძებროს ქვეგანყოფილების ინსპექტორი, პოლიციის ლეიტენანტი;
ნაპო გეგენავა – ფოთის შინაგან საქმეთა სამმართველოს საპატრულო-საგუშაგო სამსახურის ასეულის პოლიციელი, პოლიციის ზემდეგი;
ჯემალ იზორია – ზუგდიდის შინაგან საქმეთა სამმართველოს კრიმინალური პოლიციის სისხლის სამართლის სამძებრო განყოფილების ინსპექტორი, პოლიციის უმცროსი ლეიტენანტი;
თამაზ ნადარაია – აფხაზეთის ავტონომიური რესპუბლიკის გაგრის შინაგან საქმეთა სამმართველოს საპატრულო საგუშაგო სამსახურის ათეულის მეთაური, პოლიციის ზემდეგი.
ამ ფონზე საინტერესოა, რატომ მალავს ადანაიასთან ნათესაურ კავშირს გოჩა დგებუაძე – სენაკის გამგებლობის კანდიდატი, რომელიც აცხადებს: "ფრიდონ ადანაია "ოცნების" პარტიის დამფუძნებელია პირველი დღიდან და ჩართულია ამ საქმეში. მთელმა ქალაქმა იცის, რა წესიერი ადამიანიცაა და სწორედ "ოცნების" წარდგინებით დაინიშნა. წინა ვინც იყო, იყო მოვალეობის შემსრულებელი. რაც შეეხება იმას, არის თუ არა ჩემი ნათესავი, ტყუილია. ის დედაჩემის მოგვარეა და აქედან გამომდინარე ამბობენ, ნათესავიაო. არანაირი ნათესაური კავშირი არ გვაქვს". ან კიდევ: ადგილობრივების განცხადებით, "ფრიდრიხა" ყოფილი მხედრიონელი და ამავე დროს ყოფილი პოლიციელია, რომელმაც თავი გაითქვა "ზვიადისტებისადმი" არაადამიანური მოპყრობით. გავრცელებული ინფორმაციის თანახმად, "ფრიდრიხა" არის ნასამართლევიც. როგორც ირკვევა, მას ნარკოტიკებთან ჰქონდა კავშირში". აქ უკვე გასაგები ხდება მედლის რაობა "მხედრული მამაცობისთვის"?!. ჰოო, ეს ღირსეული ადამიანი, მონაწილეობდა "ქართული ოცნების" დაფუძნებაში.!
- მაგრამ ადამიანებს თავისი წარსულის გამო ვერ აუკრძალავ პოლიტიკურ აქტიურობას.
- კარგით, გადავხედოთ სენაკის "ქართული ოცნების" საარჩევნო სიას:
დამირი კუჭავა, სიის პირველი ნომერი, პენსიონერი, ყოფილი ძალოვანი (გეგეჭკორის, ახლა მარტვილი) მილიციის ხელმძღვანელი; ბადრი ხურცია - სიით მეორე. აქ შევჩერდები და სენაკის კოალიცია "ქართული ოცნების" შტაბის განცხადებას გავიხსენებ, რომ მათ "ღირსეული და რაიონისთვის სასიკეთო საქმეების მკეთებელი კანდიდატები ჰყავთ"... რა ქნას თევზმა, რომელსაც პირში წყალი აქვს ჩაგუბებული და ხმას ვერ იღებს?!. აი, ამ ფოტოზე რას იტყვით, სადაც დაუფრთიანებელი ხოხბის წიწილებჩამოკიდებული ამაყი "მონადირე" თავს იწონებს (ამის გამო დაჯარიმდა კიდეც, თუ არ ვცდები, 2000 ლარით)?! მოვითხოვ, სენაკის "ქართული ოცნების" კოალიციის შტაბიდან პასუხს კითხვაზე: თქვენ სენაკის ამომრჩეველი ბრმა ან ყრუ ხომ არ გგონიათ და რა ესაქმებოდა "ბუნების ქომაგს" ამ საარჩევნო პარტიულ სიაში?!. შემდეგი: ხვიჩა ჯიშკარიანი, პარტიული სიით მესამე, სენაკის უშიშროების სამსახურის უფროსის მოადგილე, სამხედრო პოლიციის უფროსი, "სუს"-ის ხელმძღვანელი, გუბერნატორის მოადგილე, მისი საარჩევნო შტაბის ხელმძღვანელობისას სენაკში "ქართულმა ოცნებამ" ყველაზე ცუდი შედეგი დადო; ჯუმბერ ლაშქარავა, სიით მეხუთე წევრი, სრული კოაბიტაციაა სენაკში და ამაზე ის სურათი მეტყველებს, რომელიც გადმოგეცით. შემდეგი: ნატალია ხუბუა, სიის მეექვსე წევრი, სენაკის საკრებულოს ფრაქცია "ერთიანი ნაციონალური მოძრაობის" წევრი; გიორგი გაბედავა, პარტიული სიით მერვე, "ნაციონალური მოძრაობის" აქტივისტი და პარლამენტარი, გურამ მისაბიშვილის სენაკის ბიუროს ხელმძღვანელი; ავთანდილ ფოცხვერია - სიით მე-10 წევრი, ყოფილი "ობეხეესის" ხელმძღვანელი; სერგო ლაშქარავა - სიით მე-11 წევრი, ნასამართლევი, საწვავის უკანონო რეალიზაციასთან დაკავშირებით; მაგალითისთვის იხილეთ საკრებულოს ყოფილი ფრაქცია "ერთიანი ნაციონალური მოძრაობა":
თავმჯდომარე - მერაბ გეგელია;
წევრები - გურამ ადანაია;
კობა კილასონია - დღეს "ბურჯანაძე - გაერთიანებული ოპოზიცია", ყოფილი გამგებელი.
ნატალია ხუბუა - დღეს "მრეწველები", კოალიცია "ქართული ოცნების" პარტიული სიის მე-6 წევრი;
გია ადამია;
სოსო მიქავა, დღეს კოალიცია "ქართული ოცნების" პარტიული სიის მე-14 წევრი;
შოთა ეჯიბია;
ბესიკ ნარმანია, დღეს "ოცნების" სიის მე-20 წევრი და მაჟორიტარობის კანდიდატი ნოსირის თემში;
რომეო ჟვანია; როლანდ ბჟალავა; ზურაბ აფაქიძე; ლიმორა არდია; დათო გოგია; ტარიელი ერაგია;
იური ქორიძე; პაატა ნინუა; თამილა სორდია - დღეს კოალიცია "ქართული ოცნების" მაჟორიტარობის კანდიდატი უშაფათის თემში; ზურაბ ხაბურზანია; ლევან ჯინორია; ბორის გვასალია. ბესიკ ოდიშარია - სიით 27-ე ნომერი, ასევე ამ სიაშია მისი მეუღლე ნინო ფარულავა (მე-15 ნომრით), მუშაობდა ქართული არმიის ინფრასტრუქტურის სამსახურში, საიდანაც განთავისუფლებული იქნა ფინანსური დარღვევებისთვის, თავის დროზე იყო "ნაციონალური მოძრაობის" დასაყრდენი აქტივისტი, მუშაობს ქალაქის მერიაში. კოკა ოდიშარიას ძმა (ცნობისთვის, მოხუცთა და მიუსაფართა თავშესაფრიდან გაიფლანგა თანხები და ადგილობრივი გამგეობიდან ოთხი მაღალჩინოსანი დააპატიმრეს კორუფციის ბრალდებით: გამგებლის მოადგილე კოკა ოდიშარია, საფინანსო სამსახურის უფროსი ბუთხუზ გვარამია, გამგეობის თანამშრომლები ზაზა მურღულია და მანანა ბაღათურია. მათ მოხუცთა და მიუსაფართა სახლის თანხების მითვისება ედებათ ბრალად), თავად კოკა ოდიშარია 2012 წელს მონაწილეობდა საპარლამენტო არჩევნებში, გასაგებია რატომაც გურამ (მირიანე) ოდიშარიას წინააღმდეგ, მაგრამ მიუხედავად ამისა, "ოცნების" გამარჯვებისთანავე დაინიშნა საპასუხისმგებლო თანამდებობაზე.
- ვერაფერს ვიტყვი, ძალიან შთამბეჭდავია.
- ახლა სენაკის "ბურჯანაძე - გაერთიანებული ოპოზიციის" პარტიული სიის პირველ ნომერზე და სენაკის მაჟორიტარობის კანდიდატზე კობა კილასონიაზე ვისაუბროთ. კითხვა მაქვს მასთან: ბატონო კობა, როცა ჩვენი "ყვარყვარე" მე-7 მოწვევის პარლამენტის წევრი გახდა, თქვენ ხომ იყავით მისი რჩეული სენაკის გამგებელი და შემდგომ გამგებლის მოადგილეც?! შემდეგ კი ასეთი ამბები განვითარდა, რომელსაც "ღია ბოქლომი" აქვეყნებს და სადაც ვკითხულობთ: "რამდენიმე დღის წინ დააკავეს სენაკის მუნიციპალიტეტის თანამშრომელი - ზაზა მურღულია, რომელიც სააკაშვილის სასადილოს ხელმძღვანელობდა, მას თანხების გაფლანგვაში სდებენ ბრალს. როგორც შევიტყვეთ, 100 ათასი ლარი მიითვისეს გამგებელმა (კობა კილასონიამ), მისმა მოადგილემ (შოთა ოდიშარიამ) და მურღულიამ. უახლოეს ხანებში პროკურატურა სხვა პიროვნებების დაკავებასაც გეგმავს. ესენი ჩვენნაირ საწყლებს ლუკმას ჰპარავდნენ. სააკაშვილი კი გამოდის ტელევიზიით და გაიძახის, რომ მსგავსი ფაქტები აღარ ხდება... სენაკში, სახელმწიფო მოხელეები იმ თანხებით, რომლითაც მოხუცებისთვის საჭმელი უნდა ეყიდათ, ფუფუნებაში ცხოვრობენ". იქნებ ახლა მაინც გაგვცენ პასუხი, რა მოხდა და რატომ იქნენ ზემოხსენებული პირები დაკავებულნი?!. ყველაზე მთავარი, იქნებ გვიპასუხოს ბატონმა კობამ, 2007 წლის 7 ნოემბრის მოვლენების, შემდგომი კარვების აქციების, 26 მაისის ტრაგიკული მოვლენების ფონზე რაიმე პროტესტის გრძნობა არ გაუჩნდა, თუ ისევ ერთგულად ემსახურებოდა "ყვარყვარეს" 2012 წლის საპარლამენტო არჩევნებში გამარჯვებისთვის?!. საინტერესოა ისიც, როგორ აღმოჩნდა "ნაციონალური მოძრაობიდან" რესპუბლიკური პარტიის მე-15 ყრილობის დელეგატად 2013 წლის 9 ოქტომბერს და შემდგომ უეცრად ბურჯანაძის პარტიაში?!. ისე, მართლა მიკვირს, როგორ არიან ერთ გუნდში ამ პარტიის მიერ დასახელებული პირები, რომლებიც ერთმანეთის წინააღმდეგ იბრძოდნენ?! თუმცა რა გასაკვირია, სიას რომ გადახედავ, პარტიაგამოცვლილების გამოფენაა. ისე, მართლა თქვენ გეკითხებით, ამ პარტიებს ნიფხავივით რომ იცვლით, სანამ რომელიმე პარტიაში გაწევრიანდებით, იქნებ წაიკითხოთ პარტიის იდეოლოგია და გადაწყვეტილებაც შესაბამისად მიიღოთ?! თავად მისაბიშვილზე არაფერს ვიტყვი, მასზე ძალიან ბევრი რამ ითქვა და დაიწერა. აი, ასეთი მდგომარეობაა დღეს და ხვალ ეს ფონი სამართლიანობას აღადგენს?
დარეჯან მეფარიშვილი, გაზეთი "პრემიერი"
1 - USD - 2.416
1 - EUR - 2.981
100 - RUB - 3.922
4711
