ივანიშვილის "შვილობილები" ერთმანეთს დაერივნენ

დაჭერების ახალი ტალღის პირველი ეტაპი _ 15 ივნისის შემდეგ, მეორე კი 27 ივნისის მერე დაიწყება

ზურაბ ჭიაბერაშვილსა და ნოდარ ლადარიაზე თავდასხმამ პრეზიდენტ გიორგი მარგველაშვილის მიერ ევროსაბჭოს ასოცირების ხელშეკრულებაზე პრემიერისთვის ხელმოწერის უფლების ერთჯერადი დელეგირება თითქოს გადაფარა, მაგრამ მარგველაშვილის მოწყალებამ ირაკლი ღარიბაშვილი, რომელსაც "ნაციონალები" დიდი ხანია, "ჰაკიმ ფაშას" ეძახიან, როგორც ჩანს, ზომაზე მეტად გააღიზიანა. ყოველ შემთხვევაში, პრემიერმა ქოში სულ უკუღმა ყარა, მარგველაშვილის ნებართვა რა ჯანდაბად მინდა, ხელი ისედაც მე უნდა მომეწერაო.

მართალია, რამდენიმე კვირის წინ პრეზიდენტმა და პრემიერმა, იმის დასამტკიცებლად, რომ ერთმანეთზე მზე და მთვარე ამოსდით, "პურის სახლში" ერთობლივი ვახშმობის ფოტოები სოციალურ ქსელში გაავრცელეს, მაგრამ ზემოხსენებულმა "ქოშის უკუღმა ყრამ" კიდევ ერთხელ ნათელყო, რომ მარგველაშვილი და ღარიბაშვილი ქართული პოლიტიკის ტომი და ჯერი არიან.

საერთოდ, თუ "პრემიერის" სამთავრობო მსტოვრებს დავუჯერებთ, მმართველ კოალიციაში ორი ადამიანის მოძებნაც გაჭირდება, რომელიც ერთმანეთის პოზიციას ამაგრებს.

"ყველა ყველას წინააღმდეგ არის ჩასაფრებული და ერთი სული აქვთ, რა კომპრომატები გამოაქვეყნონ. სიმართლე გითხრათ, ეს არც მიკვირს, რადგან თვითონ ბიძინას ტვინია ასე მოწყობილი _ მხოლოდ საკუთარ თავს ენდობა. იყო დრო, როცა ივანიშვილი თვლიდა, რომ ღარიბაშვილში მისი სული იყო რეინკარნირებული, მაგრამ მას შემდეგ, რაც ერთ-ერთ სამედიცინო დაწესებულებაში ზვიად ჯანყარაშვილი მივარდა და "პრემიეროვიჩის" სიმამრის გამო ექიმები ლამის დახვრიტა, ბიძინამ გადაწყვიტა, რომ ღარიბაშვილს ცოტა ყური აუწიოს", _ ამბობს "პრემიერთან" პრივატული საუბრისას კოალიცია "ქართულ ოცნებასთან" დაახლოებული პერსონა.

მისივე ვერსიით, მართალია, შსს-ს გენინსპექციის უფროსის სავარძელი თამაზ თამაზაშვილის დისშვილმა ოფიციალურად დატოვა, მაგრამ ზვიად ჯანყარაშვილი არსად წასულა, ისევ კაბინეტში ზის და საკუთარ მოვალეობას ასრულებს.

წყაროს ვერსიით, ღარიბაშვილი ჯანყარაშვილს არ მოიშორებს, მით უმეტეს, ახლა, როცა კლანური ბრძოლა გადამწყვეტ ფაზაში შედის.

"ჯერჯერობით სააშკარაოზე მხოლოდ პრეზიდენტისა და პრემიერის კინკლაობაა გამოტანილი. სინამდვილეში კი საქმე უფრო დრამატულადაა. დეტალებს, რასაკვირველია, ვერ გეტყვით, მაგრამ მაქვს ინფორმაცია, რომ "ოცნების" გარკვეული გუნდი შეტევის მიტანას მთავარ პროკურატურაზე აპირებს. ასევე, ვიცი, რომ დარტყმის ქვეშ მხოლოდ მოქმედი მთავარი პროკურორი კი არა, სკანდალურად ცნობილი ოთარ ფარცხალაძეც დადგება. საერთოდ, ფარცხალაძეც და ბადაშვილიც უშუალოდ ბიძინას კადრები არიან. მაგალითად, ეკონომიკის მინისტრი და, ამავდროულად, ვიცე-პრემიერი კვირიკაშვილიც ბიძინას ერთგულია, მაგრამ, როგორც ჩანს, ბიჭები ერთმანეთს ვერ იტანენ _ ალბათ, ეშინიათ, რომ "მამა-მარჩენალის" კარზე გავლენას დაკარგავენ. ამიტომ ერთმანეთისთვის კვანტის დადებას ცდილობენ. ჩემი ინფორმაციით, ბოლო დროს, გარკვეულ ადამიანებს, ვისაც "ნაციონალების" დროს ქონება წაართვეს, "ზევით" იბარებენ და სთავაზობენ, რომ პროკურატურის წინააღმდეგ გააქტიურდნენ. ეს გააქტიურება კი იმას ნიშნავს, რომ პრესკონფერენციები მოაწყონ და ბადაშვილის უწყება უმოქმედობაში დაადანაშაულონ", _ ამბობს "პრემიერის" წყარო.

ერთი სიტყვით, "პრემიერის" ინკოგნიტო რესპონდენტების მონაცემებით, ივანიშვილის "შვილობილები" ერთმანეთს დაერივნენ.

"ოლიგარქი ამ კინკლაობას ჯერ შორიდან უყურებს და ერთობა, მაგრამ თუ დაინახავს, რომ ყველაფერი შეიძლება, ფატალურად დამთავრდეს, იმის მხარეს დადგება, ვინც ყველაზე მორჩილია", _ ეჭვობს წყარო.

მაინც, ვინ არიან ოლიგარქის შვილობილები? _ ირაკლი ღარიბაშვილი, გიორგი კვირიკაშვილი, ოთარ ფარცხალაძე, თუმცა ამათგან, როგორც "პრემიერის" ინკოგნიტო რესპონდენტები ამბობენ, ივანიშვილს გამორჩეულად ღარიბაშვილი უყვარს. ფარცხალაძე კი იმიტომ "იშვილა", რომ ყოფილი გენერალური პროკურორი ბერას მეგობრის მამაა, ანუ, გავრცელებული ინფორმაციით, ფარცხალაძის შვილი ბერას ტელევიზიაში მნიშვნელოვან პოზიციაზე მუშაობს. იმასაც ამბობენ, რომ თავის დროზე ფარცხალაძე მთავარ პროკურორად სწორედ ბერას დაჟინებული მოთხოვნით დანიშნეს, თორემ ღარიბაშვილი მის კანდიდატურას თურმე არც განიხილავდა.

კიდევ ერთი თემა, რომელსაც ბოლო დროს აქტიურად განიხილავენ, რეპრესიების ახალი ტალღაა. "პრემიერის" სხვადასხვა ინფორმატორი, პრაქტიკულად, ერთხმად აცხადებს, რომ დაჭერების ახალი ტალღის პირველი ეტაპი _ 15 ივნისის შემდეგ, მეორე კი 27 ივნისის, ანუ ევროკავშირთან ასოცირების ხელშეკრულების მერე დაიწყება. ამასთანავე, ინკოგნიტო რესპონდენტები არც იმას გამორიცხავენ, რომ პირველი, ვინც ბადაშვილის უწყებამ შეიძლება, დაკითხვაზე დაიბაროს და უკან არ გამოუშვას, კახა ბენდუქიძე იყოს.

"დანამდვილებით გეუბნებით, რომ თავის დროზე კახა ბენდუქიძის დაჭერის წინააღმდეგ თავად ბიძინა ივანიშვილმა გაილაშქრა. მეტიც, ალბათ, გახსოვთ, განათლების მინისტრი რომ იყო, გიორგი მარგველაშვილმა "სასოფლოს" გარკვეული პრობლემები შეუქმნა. მაშინ ითქვა, რომ მარგველაშვილს უკან "ნაციონალებისა" და სტუდენტების აქტიურობამ დაახევინა, მაგრამ სინამდვილეში, საქმეში ივანიშვილი ჩაერია. ახლა დეტალების გამხელა არ მომთხოვოთ, მაგრამ გეტყვით, რომ ივანიშვილი და ბენდუქიძე ერთმანეთს დიდი ხანია, ჯერ კიდევ იმ დროიდან იცნობენ, როცა ორივე რუსეთში ცხოვრობდა და მოღვაწეობდა. ეს იცით, დაახლოებით, როგორი ვარიანტია? _ აი, ბიძინას სააკაშვილის განათლების ყოფილი მინისტრი, კახა ლომაია ერთხელაც რომ არ უხსენებია, ან რატომ ახსენებდა, როცა ლომაიას ძმა, როგორც ვიცი, ბოლო წუთამდე ბიძინას რუსული ბიზნესის მთავარი მენეჯერი იყო", _ ამბობს "პრემიერთან" პრივატული საუბრისას წყარო, რომელიც ეჭვობს, რომ კახა ბენდუქიძის დაჭერით, "ბიჭები" "მამა-მარჩენალს" მიანიშნებენ, შენი რჩევა-დარიგებები ფეხზე გვკიდია. ახლა ძალაუფლება ჩვენს ხელშია და თუ ჭკუით არ იქნები, გარკვეულ პრობლემებს შენც შეგიქმნითო.

დაჭერების ახალი ტალღის კონტექსტში, როგორც "პრემიერის" კონფიდენტები ამბობენ, შესაძლოა, ერეკლე კოდუას თემა ისევ გააქტიურდეს, ანუ კოდუა, შესაძლოა, საქართველოში ჩამოვიდეს და სამართალდამცავებთან ითანამშრომლოს. სხვათა შორის, კოდუასა და "ოცნების" სამართალდამცავების შესაძლო თანამშრომლობის შესახებ ხმა პირველად არ ვრცელდება. მართალია, კოდუების გარემოცვა ამას კატეგორიულად გამორიცხავს, მაგრამ პოლიტიკურ წრეებში, დიდი ხანია, მუსირებს აზრი, რომ ერეკლე კოდუა და ვანო მერაბიშვილი ერთმანეთს ვერ იტანენ. მეტიც, იმასაც ამბობენ, რომ 2012 წლის პირველი ოქტომბრის არჩევნების შემდეგ, კოდუამ მერაბიშვილის "მარჯვენა ხელს", ამირან მესხელს თითქოს ერთ-ერთ ევროპულ ქვეყანაში ჩააკითხა და სცემა.

რაც შეეხება არჩევნებს, "პრემიერის" ზოგი წყარო ამბობს, რომ დედაქალაქში, მიუხედავად იმისა, რომ სიები გაყალბებულია, არჩევნები მშვიდად ჩაივლის და მხოლოდ "ნაციონალები" კი არა, მთელი ოპოზიციური სპექტრი შეგუებულია, რომ თბილისის მერი დავით ნარმანია გახდება. სამაგიეროდ, 15-ში თურმე დიდი ბატალიებია მოსალოდნელი რეგიონებში.

"15 ივნისი განსაკუთრებით ნინო ბურჯანაძისთვის იქნება გადამწყვეტი, რადგან, თუ ბურჯანაძე მეორე ადგილზე ამ არჩევნებშიც ვერ გავიდა, ეს იმას ნიშნავს, რომ მისი პოლიტიკური კარიერა სერიოზული კითხვის ნიშნის ქვეშ დადგება, რადგან, სხვა თუ არაფერი, დამფინანსებლები სერიოზულად გაუნაწყენდებიან. რასაკვირველია, დანამდვილებით ვერ გეტყვით, მაგრამ არსებობს ალბათობა, რომ ნინოს ფულს უკრაინაში მოღვაწე შალვა ბრეუსი აძლევდეს. ასევე, არც იმის გამორიცხვა შეიძლება, რომ ცოტა თანხას ლევან ვასაძეც ხარჯავდეს. სხვათა შორის, ნუ გგონიათ, რომ "ოცნებას" ფულს ივანიშვილი აძლევს _ მილიარდერს მეტი საქმე არ აქვს, რომ ნარმანიას კამპანიაში თავისი ფული ჩადოს. "ოცნების" ყულაბა ძირითადად შემოწირულობებით ივსება, ანუ "ნაციონალებისდროინდელი" პრაქტიკა, რომ ბიზნესმენებს მმართველი პარტიისთვის ფულის შეწირვის სურვილი თითქოს დამოუკიდებლად უჩნდებოდათ, დღესაც აპრობირებულია", _ აღნიშნავს "პრემიერთან" პრივატული საუბრისას კონფიდენტი.

გეგა სილაგავა, გაზეთი "პრემიერი"

FaceBook