მამუკა არეშიძე: ომის დროს, ვაჟა ლელუაშვილმა, სულ მცირე, უკანონო ბრძანება გასცა

 “გარდაბნის რაიონის მიწების 25-30% საერთოდ “დამალულია”, ვითომ ბუნებაში არც არსებობს”

“როცა პრემიერი ნახავს, რომ გარდაბნის რაიონის მიწების დიდი ნაწილი თემურ ფეიქრიშვილის დედას, ქალბატონ “მანეჟას” ეკუთვნის, მაშინ მიხვდება, რაშიც არის საქმე”

შპს “მედგრუპ ჯორჯიას” ადვოკატი დიმიტრი გაბუნია პრემიერ-მინისტრ ირაკლი ღარიბაშვილს მიმართავს, ეფექტური რეაგირება მოახდინოს პარლამენტარ თემურ ფეიქრიშვილისა და მისი კლანის დანაშაულებრივ საქმიანობასთან დაკავშირებით. ადვოკატი, ასევე, მიმართავს მთავარ პროკურატურასა და შესაბამის ორგანოებს, სასწრაფოდ იქნას გამოძიებული წავკისსა და გარდაბანში მოქმედი ორგანიზებული ჯგუფის დანაშაულებრივი საქმიანობა, რომლის შესახებაც სერიოზული დოკუმენტაცია არსებობს. დიმიტრი გაბუნიას განცხადებით, პარლამენტარ თემურ ფეიქრიშვილის საქმიანობის შესწავლის მიზნით დავალების გაცემაზე, პრემიერ-მინისტრმა განცხადება ორი წლის წინათ გააკეთა და დღემდე არანაირი გამოძიება არ მიმდინარეობს.

“ჩვენ გვაქვს ყველა მასალა გადაცემული პროკურატურისთვის და ასევე, ვფლობთ ძალიან სერიოზულ დოკუმენტაციას. დაინტერესდნენ და დავამტკიცებთ, რა დანაშაულებრივ კლანთან გვაქვს საქმე. წავკისი და გარდაბნის რაიონი იმართება ამ კლანის მეშვეობით. ასევე, მივმართავთ მთავარ პროკურატურას და შესაბამის ორგანოებს, სასწრაფო წესით იქნას გამოძიებული ამ ორგანიზებული ჯგუფის უკანონო მოქმედებები. არსებობს მტკიცებულებები, მოწმეები, არსებობს კონკრეტული ჩანაწერები ამ ჯგუფის დანაშაულებრივ მოქმედებებთან დაკავშირებით და სამწუხაროდ, პროკურატურა დუმს”, - განაცხადა ადვოკატმა.

“მედგრუპ ჯორჯიას” ადვოკატის განცხადებით, საინვესტიციო კომპანიას, რომელიც 2007 წლიდან მოქმედებს საქართველოში და ეწევა ველნეს სპა კურორტების განვითარებას (ჯანსაღი ცხოვრების წესის დამკვიდრება) წავკისში, საკმაოდ დიდი ტერიტორია აქვს ნაყიდი, სადაც 25-მილიონიანი ინვესტიციის განხორციელება იგეგმება.
მისი განმარტებით, ინვესტორის მხრიდან დღევანდელი მდგომარეობით, უკვე 7 მილიონ დოლარამდეა დახარჯული, ჩატარებულია საკმაოდ სერიოზული სამუშაოები, მაგრამ ხდება ის, რომ კონკრეტული თანამდებობის პირების ინტერესების სფეროში მოექცევა ხოლმე მსგავსი ტიპის პროექტები და ინვესტორის დანახვაზე საკუთარი მატერიალური და კორუფციული მიზნები უღვივდებათ.

როგორც გაბუნია აცხადებს, კონკრეტული კლანის ასეთი მიდგომით “მედგრუპ ჯორჯია” არის ძალიან შეწუხებული და ინვესტორი უკვე ფიქრობს, გააგრძელოს თუ არა თავისი საქმიანობა. საქმე ეხება ქართველ ბიზნესმენს თამაზ მჭედლიძეს, რომელიც უცხოეთში მოღვაწეობდა და გადაწყვიტა, საკუთარ ქვეყანაში საკმაოდ სერიოზული ინვესტიცია ჩაედო ჯანსაღი ცხოვრების წესის განმტკიცების სფეროში.

“ძალიან სამწუხაროა, რომ ხელისუფლების შეცვლის შემდეგ ეს ადამიანები მოერგნენ ახალ მთავრობას. გვაქვს საფუძვლიანი ეჭვი, რომ მათ კონკრეტული ლობისტები და მფარველები ჰყავთ უკვე ახალ ხელისუფლებაში და შესაბამისად, ეს ადამიანებიც აგრძელებენ თავიანთ საქმიანობას, რომელსაც მანამდე ახორციელებდნენ”, - განაცხადა გაბუნიამ.

მისივე თქმით, ამ ჯგუფს ხელმძღვანელობს პარლამენტარი თემურ ფეიქრიშვილი, რომელიც იყო ტაბახმელასა და წავკისის გამგებელი და მან ჯერ კიდევ 1994 წლიდან დაიწყო მიწების დაპრივატება. 
“უკვე დიდი ხანია, მის კლანურ ჯგუფში შედიან მისივე ოჯახის წევრები: შვილი გიორგი ფეიქრიშვილი, რომელიც კუდ-ის ყოფილი თანამშრომელია, ასევე ქოროღლიშვილები და ჯაფიაშვილები, რომლებიც წავკისისა და ტაბახმელას საჯარო რეესტრის ყოფილი უფროსები არიან და ამ წლებიდან მოყოლებული დღემდე 227 ათასი კვადრატული მეტრი მიწის ნაკვეთი გაიფორმეს პირად საკუთრებაში. მათ მიწის ნაკვეთები კუნძულოვნად აქვთ ხელში ჩაგდებული, რომელსაც ძალიან ძვირად ყიდიან”, - განაცხადა ადვოკატმა.

ამ კონკრეტულ შემთხვევაში “მედგრუპ ჯორჯიას” ინვესტირების განხორციელებაში ხელშეშლა გამოიხატება იმაში, რომ ინვესტორს პრაქტიკულად სძალავენ თანხას პატარ-პატარა მიწის ნაკვეთებით. “მათ სურთ, რომ 5-ლარიანი მიწა 100 დოლარად გაიყიდოს და დღეის მდგომარეობით ამას წარმატებით ახორციელებენ. ყველაზე ცუდი ის არის, რომ ამ ჯგუფის ტვინია ვაჟა ლელუაშვილი, კუდ-ის ყოფილი უფროსის, დათა ახალაიას ყოფილი მოადგილე და ჩვენ გვაქვს ინფორმაცია, რომ ცნობილ ჩანაწერებთან დაკავშირებით ეს ადამიანი უშუალოდ კურირებდა ამ თემებს”, - აღნიშნა მან.

 ჩამოთვლილი არგუმენტებიდან გამომდინარე, ინვესტორი ფიქრობს, რომ დღევანდელი ხელისუფლება ხელს უწყობს პარლამენტარ თემურ ფეიქრიშვილსა და მის ბანდას, რათა ინვესტორს ფული გამოსძალონ.

ინვესტორ თამაზ მჭედლიძეს, რომელიც არის შპს “მედგრუპ ჯორჯიას” დამფუძნებელი”, პეტერბურგში, მოსკოვსა და პრაღაში აქვს 21 კლინიკა და საქართველოში არანაირი ოფშორული კომპანიების მეშვეობით არ არის წარმოდგენილი.

აღსანიშნავია, რომ 2012 წლის საპარლამენტო არჩევნების შემდეგ, თემურ ფეიქრიშვილისა და ვაჟა ლელუაშვილის დანაშაულებრივი საქმიანობის წინააღმდეგ პროკურატურაში არაერთი სარჩელი შეიტანა კონფლიქტოლოგმა მამუკა არეშიძემ, რომელიც გარდაბნის რაიონში მაჟორიტარი დეპუტატობისთვის იბრძოდა და არჩევნებში მიღებული ხმების რაოდენობის მიუხედავად, დეპუტატის მანდატის გარეშე დარჩა. პროკურატურაში შეტანილი რამდენიმე სარჩელი და თანმხლები დოკუმენტაცია დღემდე თაროზე ინახება.

“პრემიერი” მამუკა არეშიძეს ესაუბრა:

- წავკისსა და გარდაბანში არსებული კლანური მმართველობის მხილება ბიზნესჯგუფმაც დაიწყო, რომელიც გამაჯანსაღებელი კომპლექსის მშენებლობისას სწორედ იმ ადამიანებს შეეჯახა, რომელთა უკანონო საქმიანობაზე თქვენ დიდი ხანია, საუბრობთ. რა იცით ამ საქმის დეტალებზე?

- ვიცი, რომ ამ ჯგუფს დღეს პარლამენტარი თემურ ფეიქრიშვილი ებრძვის. პროექტის არსი თავიდან ბოლომდე არ ვიცი, მაგრამ საფუძველი არ მაქვს, ვივარაუდო, რომ ეს არის ცუდი პროექტი. მე ვიცი იმ ჯგუფის ხელწერა, ვინც მათ წინააღმდეგ მოქმედებს. ჩემთვის ცნობილია იმ აუდიოჩანაწერის შესახებ, რომელიც თქვენმა გაზეთმა გამოაქვეყნა და მიმაჩნია, რომ ეს ზუსტად ასახავს მის ხელწერას. დღეს წინა პლანზე დგას თემურ ფეიქრიშვილი, საქართველოს პარლამენტის დეპუტატი, რომელიც თავის დროზე ძალიან დაიახლოვა და ჩაიხუტა “კონსერვატიულმა პარტიამ”. ჩემი და ჩემი თანამოაზრეების მიერ ატეხილი აურზაურის შემდეგ, არ მოხდა მისი გაწევრიანება “კონსერვატიულ პარტიაში”, ასევე არც იმ ზონდერების, რომლებიც მათ ჰყავდათ გარდაბნის რაიონში  და მათ შორის, გარდაბნის ყოფილ უბანზე, სადაც შედის წავკისიც, ტაბახმელაც, კოჯორიც. სინამდვილეში თემურ ფეიქრიშვილის უკან დგას კუდ-ის ყოფილი უფროსის ყოფილი მოადგილე ვაჟა ლელუაშვილი, რომელმაც, შეიძლება ითქვას, ეს ადამიანი შექმნა. ეს არის კაცი, რომელიც გარდაბნის რაიონში სიტუაციას სრულად ფლობს. წარმოშობით ორივე იქიდან არის. თავის დროზე ვაჟა ლელუაშვილი იყო ლევან მამალაძესთან დაახლოებული პიროვნება. როგორც ამბობენ, მისი “მეჯინიბე”, მაგრამ მისთვის დამახასიათებელია პატრონების ხშირი ცვლა და საითაც ქარი დაუბერავს, იქით დაჰყვება. თავის დროზე ლევან მამალაძემ დააწინაურა, გარდაბნის რაიონის დონეზე ხან რა თანამდებობა ეკავა, ხან - რა და როგორც კი ლევან მამალაძე დევნილობაში აღმოჩნდა, ვაჟა ლელუაშვილმა მაშინვე შეიცვალა პატრონი და 2003 წლიდან “ნაციონალურ მოძრაობას” ჩაეხუტა. მას აქვს უნარი, სიტუაციას მოერგოს და საჭირო იყოს ამა თუ იმ ხელმძღვანელისთვის. ამ გზით, ბოლოს და ბოლოს, მიაღწია კუდ-ის უფროსის მოადგილის თანამდებობას.

- ფეიქრიშვილ-ლელუაშვილთან დაპირისპირებული ჯგუფის ადვოკატიც აცხადებს, რომ ცნობილ ჩანაწერების თემას ეს ადამიანი უშუალოდ კურირებდა. ამის მიუხედავად, ფაქტია, რომ ვაჟა ლელუაშვილის ადგილი დღევანდელ ხელისუფლებაშიც გამოჩნდა. თქვენი აზრით, როგორ მოახერხა ეს?  

- მე არ ვიცი, ვაჟა ლელუაშვილს სხვამ უთხრა, თუ თვითონ მოიგონა სქემა, რომლითაც სახელი გაითქვა. ისიც უნდა ითქვას, რომ ის არა მხოლოდ ოპოზიციისა და საზოგადოების სხვადასხვა ტიპის წარმომადგენლებს იწერდა, იღებდა, უთვალთვალებდა, არამედ “ნაციონალური მოძრაობის” წარმომადგენლებსაც და ვიცი, რომ მისი ეს “ნამუშევარი” დიდ აღტაცებას იწვევდა “ნაციონალური მოძრაობის” უზენაეს ხელმძღვანელობაში. არაერთ აქტივობაში მიიღო მან მონაწილეობდა არაერთ ბანკთან და ფინანსურ ჯგუფებთან ერთად. მის ავტორობას შეიძლება მივაწეროთ, მაგალითად, კოჯრის ტყეების გაჩეხა. საწყის ეტაპზე თემურ ფეიქრიშვილი არაფერს წარმოადგენდა, იყო მანქანების ჩვეულებრივი მექანიკოსი - “ჟეშტიანჩიკი”, რომელიც ლელუაშვილმა გაქაჩა. ამ ორმა ადამიანმა შეიმუშავა საინტერესო სქემა, რამდენიმე ნათესავთან ერთად, რაც გულისხმობდა იმას, რომ მათ პრაქტიკულად დაისაკუთრეს მთელი ტაბახმელისა და გარშემო ტერიტორიის მიწები. იმ ადამიანებზე, ვისაც ეს მიწები ეკუთვნოდათ, ანუ სოფლის მოსახლეობაზე, კანონიერად აფორმებდნენ და შემდეგ, როცა საქმე საქმეზე მიდგებოდა, ისევ ჩამოართმევდნენ ხოლმე. ასეთი ბევრი შემთხვევაა დაფიქსირებული. ისინი ამ მიწებით “პატივს სცემდნენ” სხვადასხვა დონის ჩინოვნიკებს, როგორც წინა ხელისუფლებაში, ისე ახალ ხელისუფლებაში.

- იქნებ, დააკონკრეტოთ, რომელ ჩინოვნიკებთან არის ამჟამად ყველაზე მეტად დაახლოებული?

- დადასტურებულად არ შემიძლია ზუსტად გითხრათ, რომელ ჩინოვნიკებზეა საუბარი, მაგრამ ეს ინფორმაცია მყარად არის გავრცელებული. ხომ შეიძლება, სხვა ინფორმაცია ყოფილიყო გავრცელებული? არ შემიძლია, დოკუმენტური მასალა წარმოვადგინო, რა ხდებოდა ტაბახმელაში, წავკისსა და კოჯორში, მაგრამ შემიძლია, წარმოვადგინო დოკუმენტაცია, რა მდგომარეობაში ჩააგდეს გარდაბნის რაიონი. როგორ გადაანაწილეს გარდაბნის რაიონის ასობით ჰექტარი მიწა “თავისიანებზე” და საკუთარ ნათესავებზე. უნდა ითქვას საინტერესო ფაქტიც, რომ გარდაბნის რაიონის მიწების 25-30% საერთოდ “დამალულია”, ვითომ ბუნებაში არც არსებობს. მაშინ მათი სანათესაოს ერთი წარმომადგენელი დანიშნული იყო ოფიციალურად მიწის კადასტრის ხელმძღვანელად, მეორე - ადგილობრივი რეესტრის ხელმძღვანელად და ამ საქმეებს ისე აგვარებდნენ, როგორც უნდოდათ. უნდა ითქვას, რომ წინა ხელისუფლებამ რამდენჯერმე წამოიწყო ძიება ამ მიმართულებით, მაგრამ რასაკვირველია, არც ერთი საქმე ფინალამდე არ მივიდა, დიდი ფული დაიხარჯა და, საბოლოო ჯამში, ორივე გამართლდა. 2012 წელს გარდაბანში, როცა საპარლამენტო არჩევნები ჩატარდა, სადაც მე ვიყავი მაჟორიტარი კანდიდატი “ქართული ოცნებიდან”, მაშინ ფეიქრიშვილ-ლელუაშვილმა გაშლილი ბრძოლა გამოაცხადეს ჩემს წინააღმდეგ. თემურ ფეიქრიშვილი გადეპუტატებისთვის იბრძოდა და ბუნებრივია, ლელუაშვილი ყველანაირად ეხმარებოდა. ძალიან კარგად მახსოვს, არჩევნების დღეს ლელუაშვილი, კუდ-ის გარემოცვასთან ერთად, გარდაბნის რაიონში როგორ მოძრაობდა, ვის ხვდებოდა და ა.შ. დღეს ბევრს რომ ლაპარაკობს “ნაციონალური მოძრაობის” ზოგიერთი წარმომადგენელი პოლიტიზებაზე, გაიხსენონ, თვითონ რას აკეთებდნენ იმ წლებში. მათ შორის, გარდაბნის რაიონში. საბოლოო ჯამში, ყველაზე ცინიკური გამოხატულება იყო გარდაბნის ერთ-ერთი აზერბაიჯანული სკოლის ეზოში დაყრილი უამრავი დანომრილი ბიულეტენი, რომელიც წინასწარ ჰქონდათ გამზადებული. როცა არჩევნები დამთავრდა, რამდენადაც მე ვიცი, პირველი, რაც ლელუაშვილმა გააკეთა, შესაბამისი ფირებით ჩემოდნები გაავსო და ახალ ხელისუფლებას მიადგა. ის შეეცადა, ახალ ხელისუფლებაში მოეძებნა ახლობლები. მე როგორც ვიცი, მოძებნა კიდეც.

- ვინ არიან ეს ახლობლები, არ იცით?

- მე ის ვიცი, რომ საპარლამენტო არჩევნების დასრულებიდან ერთი კვირის თავზე დავით საგანელიძემ ვაჟა ლელუაშვილი არ მიიღო. ვინ მიიღო, არ ვიცი, მაგრამ რომ მიიღეს, ეს ფაქტია. მან ახალ ხელისუფლებაში “მავანი” თავის საჭიროებაში დაარწმუნა. ახალ ხელისუფლებას პირობითად ვამბობ, რადგან ვხედავ, რომ მეორე-მესამე რგოლში თანამდებობებზე ის ადამიანები სხედან, ვინც დავალებულნი არიან მისგან, ან ლელუაშვილს მათზე კომპრომატები აქვს, ან მას შეუძლია, რომ ეს ადამიანები სხვა რამით აშანტაჟოს, პროკურატურა იქნება ეს თუ შინაგან საქმეთა სამინისტრო.

- ხომ არ ფიქრობთ, რომ ეს არის მიზეზი, რის გამოც “მედგრუპის” ინვესტორთან დაკავშირებული საქმეც პროკურატურაშია დაბლოკილი?

- დარწმუნებული ვარ, რომ თამაზ მჭედლიძის საქმე კიდევ დიდხანს გაგრძელდება, რადგან მის წინააღმდეგ სერიოზული ძალები იბრძვიან და სხვათა შორის, ძალიან სერიოზული ფულიც, იმის მიუხედავად, რომ არც თამაზ მჭედლიძეა მაინცდამაინც ღარიბი. რამდენადაც ვიცი, ადრე ეკონომიკის მინისტრი გიორგი კვირიკაშვილი დაუდგა გვერდით.

- რაში გამოიხატება მინისტრის გვერდით დადგომა, როცა ინვესტორიც და “მედგრუპის” დირექტორიც აცხადებენ, რომ იანვრიდან მოყოლებული სამი სასამართლო პროცესი წააგეს?

- ყოველ შემთხვევაში, კვირიკაშვილი იქ იყო ასული და თავისი დამოკიდებულება გამოხატა. იმის მიუხედავად, რომ თამაზ მჭედლიძეს ჰქონდა აქტიური და ნაყოფიერი შეხვედრები პარლამენტარებსა და აღმასრულებელ ხელისუფლებაში, საქმეს მაინც ძვრა არ აქვს. მის წინააღმდეგ ღიად იბრძვის კარგად ორგანიზებული ძალა, დაფარულად კი - ხელისუფლებაში ჩაბუდებული მე-5 კოლონა, რომელიც ვაჟა ლელუაშვილის ბრძანებების უსიტყვო შემსრულებელია.  სატირალი რომ არ იყოს, სასაცილო იქნებოდა - თუ მჭედლიძე რამეში არასწორია, მაშინ ამდენი ხნის განმავლობაში ინვესტორი უნდა დასჯილიყო, თუ მართალია, მაშინ მისი ვიზავი უნდა დაიჭირონ. ეს მდგომარეობა არის ჩვენი ყოფის დამახასიათებელი, როდესაც საკითხი არ წყდება და დიდი ხნის განმავლობაში რჩება ჰაერში გამოკიდებული. არ ვიცი, ხვალ რა მოხდება, მაგრამ ეს საკითხი ერთი ხელის დაკვრით შეიძლება გადაწყვიტოს პროკურატურამაც და აღმასრულებელმა ხელისუფლებამაც. აქ მხოლოდ სასამართლოშიც არ არის საქმე, მაგრამ მიმაჩნია, რომ ფეიქრიშვილ-ლელუაშვილს მფარველები პარლამენტშიც ჰყავთ, რომლებიც ამ საქმეს სპეციალურად აჯანჯლებენ. მათ იციან, რომ თამაზ მჭედლიძემ ერთ დღეს შეიძლება ფეხი დაჰკრას და საერთოდ წავიდეს საქართველოდან.  ამაზეც იყო საუბარი.

- აღმასრულებელ ხელისუფლებაში რომ ვინმემ მოინდომოს ამ პრობლემის მოგვარება, არ ჩაეთვლება სასამართლოზე გავლენის მოხდენად?

- არავითარ შემთხვევაში, იქ სხვა საქმეებიც არის, სასამართლოს საერთოდ რომ არ ეხება და სწორედ იმ საქმეებით შეუძლიათ, ისეთი ზეწოლა განახორციელონ ფეიქრიშვილ-ლელუაშვილზე, რომ თამაზ მჭედლიძე ორივეს დაავიწყდება. იმდენი დარღვევა აქვთ, რომ... ჩემ მიერ შეტანილი ოთხი სარჩელიდან არც ერთს ყური არ გაუპარტყუნა პროკურატურამ, რომელიც საპარლამენტო არჩევნების შემდეგ სწორედ ფეიქრიშვილ-ლალუაშვილის წინააღმდეგ იყო. თავად ფეიქრიშვილის ნებისმიერ საჩივარზე კი რაღაც ძალიან ნერვიული რეაგირება აქვს სასამართლოსაც და პროკურატურასაც.

- ირაკლი ღარიბაშვილს ორი წლის წინათ აქვს გაცემული დავალება, რომ აღნიშნული საკითხი შეესწავლათ, მაგრამ დღემდე რეაგირება არ მოჰყოლია. ფიქრობთ, რომ პრემიერ-მინისტრს ამის რეალური უნარი აქვს?

- რასაკვირველია, ირაკლი ღარიბაშვილმა, ძალიან მარტივად, კონტროლზე უნდა აიყვანოს ერთი საკითხი - რა მდგომარეობაშია გარდაბნის მიწები და რამდენად კანონიერადაა გასხვისებული ეს მიწები წინა წლების განმავლობაში. როცა პრემიერი ნახავს, რომ გარდაბნის რაიონის მიწების დიდი ნაწილი, მათ შორის, წავკისი-ტაბახმელას ტერიტორიაზე თემურ  ფეიქრიშვილის დედას, ქალბატონ “მანეჟას” ეკუთვნის, მაშინ მიხვდება, რაშიც არის საქმე. მინდა გითხრათ, რომ არსებობს წერილი, რომელიც დაწერილი იყო 2012 წლის საპარლამენტო არჩევნების შემდეგ შინაგან საქმეთა მინისტრის სახელზე, რომელსაც ხელს აწერს კუდ-ის თანამშრომელი აბაშიძე. იმ წერილში მოთხრობილია, რომ 2008 წლის 12 აგვისტოს კუდ-ის თანამშრომელთა ჯგუფი, რომელშიც შედიოდა თავად ეს აბაშიძე, იცავდა ნორიოს სპეცდანიშნულების რაზმის ბაზას, რადგან თავად რაზმი იმ მომენტში რუსეთ-საქართველოს ომში მონაწილეობდა. სწორედ ამ დღეს მივიდა ბრძანება, რომ ამ ჯგუფს ბაზა დაეტოვებინა. ბუნებრივია, კუდ-ის თანამშრომლებს გაუჩნდათ შეკითხვა, როგორ დაეტოვებინათ ბაზა, რომელიც სავსე იყო იარაღით და მისი მიმხედავი აღარავინ დარჩებოდა. ამის მიუხედავად, მაინც მიიღეს ბრძანება, რომ იქიდან გამოსულიყვნენ და იძულებული გახდნენ, ბრძანებას დამორჩილებოდნენ.  მხოლოდ ერთს მოუვიდა თავში აზრად, ავიაციისთვის მიმზიდველი რომ არ ყოფილიყო, სინათლე ჩაექრო. მეორე დღეს გაირკვა, რომ ადგილიდან გაქრა 20 ათასი დოლარის ღირებულების საჭურველი. ეს არის პირდაპირ მანიშნებელი იმისა, რომ ომის დროს, ვაჟა ლელუაშვილმა, სულ მცირე, უკანონო ბრძანება გასცა.

- გამოდის, პრემიერ-მინისტრის დაინტერესების შემთხვევაში, ამ ჯგუფის მიერ წლების განმავლობაში ჩადენილი ქმედებები კონკრეტული პირების პასუხისმგებლობის საკითხს გამოკვეთს...

- ამ ადამიანის საკითხის შესწავლა უფრო ღრმად შეიძლება არა მხოლოდ მიწებთან, არამედ იმ ფარულ ჩანაწერებთან დაკავშირებითაც, რომელიც არსებობს. ლელუაშვილის კადრი იყო გიორგი ყავლაშვილი, რომელიც ახლახან პრემიების გამოწერასთან დაკავშირებით სასაჯელაღსრულების დეპარტამენტში მომხდარ სკანდალში ფიგურირებს. ეს ის გიორგი ყავლაშვილია, რომელმაც აღიარა, რომ ვაჟა ლელუაშვილის დავალებითა და თავისი აგენტი გიორგი სიბაშვილის მეშვეობით ჩემი ჩაწერა მოახდინა. ამდენს ვლაპარაკობთ და სხვა რა გავაკეთოთ. ყველაფერი ყველასთვის ცნობილია, მაგრამ პროცესი ჯერჯერობით ადგილიდან არ იძვრის. ანალოგიურ მდგომარეობაშია ინვესტორ თამაზ მჭედლიძის საქმეც.

ხათუნა ხატიაშვილი, გაზეთი „პრემიერი“

FaceBook