ირაკლი ლექვინაძე: “საჭიროა “საგადასახადო კოდექსის” გამარტივება, რაც პირველადი და მეორადი პროდუქტების დიფერენცირებას გულისხმობს”

სამთავრობო პროგრამა “აწარმოე საქართველოში” 1-ლი ივნისიდან ამუშავდება. პროგრამის მიზანი საქართველოში მეწარმეობის განვითარება, მეწარმე-სუბიექტების მხარდაჭერა, ახალი საწარმოების შექმნის ხელშეწყობაა. როგორც ხელისუფლებაში აცხადებენ, პროგრამის ფარგლებში მოხდება წარმოებაზე ორიენტირებული ინდუსტრიების განვითარების ხელშეწყობა, რომელიც შერჩეულია შემდეგი კრიტერიუმებით: იმპორტის მოცულობა და წარმოების ადგილობრივი პოტენციალი. “აწარმოე საქართველოში”-ს ბიუჯეტი 46 მლნ ლარია, საიდანაც სასოფლო-სამეურნეო პროდუქციის წარმოება-გადამუშავებაზე დაიხარჯება 30 მლნ ლარი, ინდუსტრიული პროდუქციის წარმოებაზე კი 16 მლნ ლარი. პროგრამის განმახორციელებელია საქართველოს ეკონომიკისა და მდგრადი განვითარების სამინისტრო და სოფლის მეურნეობის სამინისტრო. პროგრამის მიზანია, საქართველოში მეწარმეობის განვითარება, მეწარმე-სუბიექტების მხარდაჭერა, ახალი საწარმოების შექმნის ხელშეწყობა და კერძო სექტორის კონკურენტუნარიანობისა და საექსპორტო პოტენციალის ზრდა ფინანსებზე, უძრავ ქონებასა და თანამედროვე ტექნოლოგიებზე ხელმისაწვდომობისა და ტექნიკური დახმარების საშუალებით. პროგრამა მოიცავს სამ კომპონენტს: ფინანსებზე ხელმისაწვდომობა; ინფრასტრუქტურაზე (უძრავი ქონება) ხელმისაწვდომობა; საკონსულტაციო მომსახურება.

პროგრამის ფარგლებში კომპონენტები მეწარმე სუბიექტებისთვის ხელმისაწვდომია როგორც ერთდროულად, ისე ცალ-ცალკე. პროგრამის ფარგლებში მოხდება წარმოებაზე ორიენტირებული ინდუსტრიების განვითარების ხელშეწყობა, რომელიც შერჩეულია შემდეგი კრიტერიუმებით: იმპორტის მოცულობა და წარმოების ადგილობრივი პოტენციალი. პროგრამის მიმართულებების განსაზღვრა მოხდა მთავრობის მიერ ჩატარებული კვლევების საფუძველზე, რომელიც ითვალისწინებდა მონაცემთა ანალიზს, მეწარმეების გამოკითხვას და ექსპერტების ჩართულობას. ექსპერტი ეკონომიკის საკითხებში ირაკლი ლექვინაძე სამთავრობო პროგრამას “აწარმოე საქართველოში” დადებითად აფასებს და მიიჩნევს, რომ ინფრასტრუქტურულ ნაწილში მნიშვნელოვანია, ინვესტირება მოხდეს სამაცივრე, ლაბორატორიების, საირიგაციო და ენერგომატარებლებზე წვდომის მიმართულებით. უფრო დეტალურად ახალი სამთავრობო პროგრამის შესახებ “პრემიერი” ექსპერტს ეკონომიკის საკითხებში ირაკლი ლექვინაძეს ესაუბრა.

- ირაკლი, იმისთვის, რომ პროგრამა წარმატებული იყოს, ალბათ, მიწების ინვენტარიზაციის ბოლომდე მიყვანა აუცილებელი ფაქტორია.

- ვფიქრობ, მნიშვნელოვანია მიწების ინვენტარიზაცია, მისი ხარისხისა და მოსავლიანობის კვლევები, ერთგვარი მიწის რუკის შექმნა, სადაც აღწერილი იქნება სხვადასხვა კულტურების მოყვანის შესაძლებლობები.

აუცილებლად უნდა მოხდეს იმპორტირებული პროდუქციის ხარისხის კონტროლი, ამის ფონზე ქართული პროდუქციის წვდომის გაზრდა რეგიონის ბაზრებზე (აზერბაიჯანი, უკრაინა, რუსეთი, სომხეთი, თურქეთი, ყაზახეთი). ამ ქვეყნებიდან პროდუქცია შეზღუდვის გარეშე შემოდის, ქართველი ექსპორტიორები კი პრობლემებს აწყდებიან ბაზარზე ექსპორტის განხორციელებისას.

- პროექტის ფარგლებში წარმოებული პროდუქცია უკეთ უნდა გაყიდო, მთავრობა მეწარმეებს მარკეტინგის წარმოებაშიც ხომ არ უნდა დაეხმაროს?

- ვფიქრობ, მნიშვნელოვანია გააქტიურება საერთაშორისო გამოფენებში ქართული პროდუქციის უკეთ წარმოჩენის მიზნით და ქართული კომპანიების ჩართულობის გაზრდა სამიზნე ბაზრებზე, ადგილობრივ ბაზარზე ქართული პროდუქციის ფესტივალებისა თუ გამოფენების ორგანიზების მხარდაჭერა. სახელმწიფო შესყიდვების ნაწილში ქართული პროდუქციის ჩართულობა, ვგულისხმობ, ოფიციალურ მიღებებზე, სადღესასწაულო სასაჩუქრე პაკეტებში თუ სახელმწიფო სტრუქტურების მიერ ორგანიზებულ ღონისძიებებზე ქართული პროდუქციისთვის უპირატესობის მინიჭებას. გარდა ამისა, მნიშვნელოვანია პროგრამის ფარგლებში მხარდაჭერილი იქნეს ისეთი პროექტები, რომლებიც ხელს შეუწყობს ქართული პროდუქციის გაყიდვების ზრდას, ახალი სავაჭრო ქსელების შექმნის თუ არსებულ ქსელებში ქართული სტენდების ორგანიზების კუთხით, ასევე, შესაძლებელია სამიზნე ბაზრებზე ,,ქართული სახლების” პროექტის რეალიზაცია. ასევე, მნიშვნელოვანია პროგრამის ფარგლებში შეიქმნას ვებრესურსი, სადაც წარმოდგენილი იქნება სიახლეების, ტენდენციებისა და სხვადასხვა ბაზრებზე მოთხოვნის ანალიზები, შეღწევის სტრატეგიები, შესაძლებელი იქნება ონლაინ შეკვეთებისა და ვაჭრობის განხორციელება, იქნება პროდუქციის ონლაინ კატალოგი, ეს გაზრდიდა ადგილობრივი მეწარმეების ინფორმირების ხარისხს, რისი დეფიციტიც იგრძნობა. შესაძლებელია, ერთიანი ქართული სავაჭრო ნიშნის პოპულარიზაციაც, რომელიც ადგილობრივ ბაზარზე ხელს შეუწყობდა ადგილობრივი პროდუქციის პოპულარიზაციას.

- როგორც პროგრამის პრეზენტაციაზე პრემიერ-მინისტრმა განმარტა, არსებობს მზაობა, რომ კანონმდებლობის მორგება მოხდეს პროექტზე. თქვენი აზრით, სად ან რა მიმართულებითაა ცვლილებები განსახორციელებელი?

- ვფიქრობ, საჭიროა საგადასახადო კოდექსის გამარტივება, რაც გულისხმობს მკვეთრ დიფერენცირებას პირველადი და მეორადი პროდუქტების, რომ არ იყოს ინტერპრეტირების შესაძლებლობები”, - ამბობს ექსპერტი.

ექსპერტი გარკვეულ რისკებზეც ამახვილებს ყურადღებას და განმარტავს, რომ გარკვეული რისკები არსებობს დაფინანსების გაცემის წესთან დაკავშირებით, თუმცა, ამ მხრივ, მნიშვნელოვანი იქნება გასული წლების გამოცდილების გაზიარება და პროექტები შეფასდება ობიექტურად.

- როგორია თქვენი მოლოდინი, გაამართლებს თუ არა “აწარმოე საქართველოში” და ხომ არ გაიზიარებს ის სხვა სამთავრობო პროგრამების ბედს?

- საბოლოო ჯამში, ჩემი მოლოდინები ახალი პროგრამის მიმართ არის პოზიტიური, დროული და საჭირო, რადგან მხარდაჭერა სტარტაპებსა და ახალ საინტერესო იდეებს ნამდვილად სჭირდება. კარგი იქნება, პროგრამა განიცდიდეს მუდმივ სრულყოფას და ამ მიზნით იყოს აქტიური კომუნიკაცია პოტენციურ ბენეფიციარებს შორის, რომ უკეთ იქნას დანახული პროგრამის ძლიერი და სუსტი მხარეები.

ლაშა ნოდია, გაზეთი „პრემიერი“

FaceBook