

|
“ეს არის კრიმინალი, სახელმწიფო ქონებისა თუ ბიუჯეტის გაჩანაგება”
“ამის შემოწმება არც პროკურატურისთვის არის პრობლემა და არც ჯანდაცვის სამინისტროს სამედიცინო საქმიანობის რეგულირების სააგენტოსთვის”
ამ წერილით, სასჯელაღსრულებისა და პრობაციის მინისტრი სოზარ სუბარი კიდევ ერთ სკანდალში გაეხვევა. ბოლო ერთი კვირაა მას ისედაც შავი დღე ადგას. ჯერ იყო და დეპარტამენტში, თანამდებობის პირებისთვის დარიგებული გრანდიოზული პრემიებისთვის სთხოვდნენ პასუხს, მას ამ დაწესებულებაში არსებული მდგომარეობის ირგვლივ ლალი მოროშკინას გაკეთებული მამხილებელი განცხადებებიც დაემატა. ჩვენ მიერ მოპოვებული ინფორმაცია კი, ამ ამბებზე მეტი თუ არა, სიმძაფრით ნაკლები ნამდვილად არ არის, ამიტომ წინდაწინვე ვთხოვთ სამართალდამცავ უწყებებს, კონკრეტულად კი პროკურატურას, დაინტერესდეს, რა ხდებოდა და ხდება სასჯელაღსრულების დეპარტამენტის ციხის საავადმყოფოში.
წყაროს პირადად ვესაუბრე. ვერ დავმალავ, რომ ის სასჯელაღსრულების დაწესებულების თანამშრომელია, სხვანაირად ეს ამბები, ალბათ, არ ეცოდინებოდა, თუმცა რიგი მიზეზების გამო მისი ვინაობის გამხელისგან თავს ვიკავებ. რაც მისგან შევიტყვე, ისიც საკმარისია იმისთვის, პირადად მე რომ ვთქვა: პროკურატურა საქმეში სასწრაფოდ უნდა ჩაერთოს, ჯანდაცვის სამინისტროს სამედიცინო საქმიანობის რეგულირების სააგენტომ კი, ამ ინფორმაციებზე დაყრდნობით გამოიკვლიოს იქ არსებული დანაშაულების სიმძაფრე. საქმე ეხება ციხის საავადმყოფოში არაერთჯერადად, სახელმწიფო ბიუჯეტის გაფლანგვისა და სახელმწიფო ქონების უდიერად მოპყრობის ფაქტებს. ალბათ, დამეთანხმებით, რომ ორივე საკმაოდ მძიმე დანაშაულია და რაც მთავარია, მკაცრად დასჯადი. როგორც ყველამ ვიცოდით, ნაციონალებმა სახელმწიფო ბიუჯეტი სწორედ პრემიებით ძარცვეს. ხელისუფლებაში მოსულმა `ოცნებამ~, რომელიც წინა ხელისუფლებას ამის გამო მკაცრად აკრიტიკებდა, არათუ მოსპო სახელმწიფოს წინააღმდეგ მიმართული ეს ვანდალობა, მისი მასშტაბები კიდევ უფრო გაზარდა. გამოვიდა ის, რომ ოცნებისტები ქვეყნის ბიუჯეტს პრემიების მეშვეობით იმაზე მეტი თანხებით ძარცვავენ, ვიდრე ამას ნაციონალები აკეთებდნენ. ფაქტებს, რომელიც უკვე გახმაურდა, ჩვენ ახალ მტკიცებულებებს შევძენთ.
`სასჯელაღსრულების სამინისტროში `ოცნების~ დანიშნული ადამიანები აცხადებდნენ, რომ ციხის სამედიცინო დაწესებულებაში მომუშავე კადრები არიან დაბალი კვალიფიკაციის, ამიტომ დაავადებულ მსჯავრდადებულებს ციხის საავადმყოფოში კი არა, ქალაქის საავადმყოფოებში უნდა ვუმკურნალოთო. ასეც მოიქცნენ, არადა მათი განკურნება ციხის საავადმყოფოში არანაკლებ შესაძლებელი იყო. ციხის საავადმყოფო გლდანში, მე-8 დაწესებულების ეზოში მდებარეობს და ერთდროულად 230-240 ავადმყოფს იტევს. იმ პერიოდისთვის საავადმყოფო იყო მწყობრში, მაგრამ ერთი შეხედვით უვიცი მედპერსონალის მიმართ აგრესიული დამოკიდებულების გამო მოიქცნენ ასე. დედაქალაქის კერძო კლინიკებში, მსჯავრდადებული პაციენტების სამკურნალოდ, სახელმწიფო ბიუჯეტიდან, ანუ სასჯელაღსრულების სამინისტროდან ირიცხებოდა თანხები. რამდენიმე საავადმყოფო ჰქონდათ შერჩეული, სადაც მათ მკურნალობდნენ და იქ იცით, რას ამბობდნენ? _ ღმერთმა დალოცოს სასჯელაღსრულების მინისტრი, მედპერსონალს ხელფასები ამ მსჯავრდადებულების მკურნალობის ხარჯზე გაგვეზარდაო~, _ გვითხრა წყარომ.
ყველას კარგად გვახსოვს, რომ `ოცნების~ ხელისუფლებაში მოსვლას სწორედ პატიმართა წამების გახმაურებული ჩანაწერების გამოქვეყნებამ შეუწყო ხელი, რასაც, ცხადია, იქ მომუშავე მედპერსონალის მიმართ გარკვეული მითქმა-მოთქმა მოჰყვა. ამბობდნენ, პატიმრებს ექიმებიც აწამებდნენო, ამიტომ წყაროს მიერ მოტანილი ეს ამბავიც ამით ავხსენი, თუმცა ის მიმტკიცებდა, რომ ესეც განგებ, ოცნებისტების აგორებული ჭორი იყო. `მედპერსონალი პატიმრების ე.წ. წამებებში არ მონაწილეობდა და რაც თქვეს, იყო ტყუილი. ერთი მძიმე ავადმყოფის მკურნალობა სახელმწიფოს ქალაქის კერძო კლინიკებში 60-70 ათასი ლარი უჯდებოდა, როცა საკუთარ საავადმყოფოში მხოლოდ მედიკამენტებისა და მომსახურების თანხების გადახდა უწევდა. გაუგონარი რამ გააკეთეს, ციხის საავადმყოფოს მედპერსონალიდან ყველა თავის ადგილზე დატოვეს და ხელფასსაც უხდიდნენ, მაგრამ ავადმყოფები მაინც სხვაგან მიჰყავდათ სამკურნალოდ. ორმაგად იხარჯებოდა ფული, _ სასჯელაღსრულებას თავისი ექიმები დაუსაქმებელი, მაგრამ ხელფასით უზრუნველყოფილი ჰყავდა. არ გამოვრიცხავ, რომ ქალაქის კლინიკებში იქიდან გადარიცხული თანხების `ატკატები~ ხდებოდა და რაღაც ნაწილი უკან ბრუნდებოდა. ეს ყველაფერი კი იმ სასჯელაღსრულების სამინისტროს გადაწყვეტილებით ხორციელდებოდა, რომელსაც სოზარ სუბარი ხელმძღვანელობს~. როგორც წყარო ამტკიცებს, ამ ამბების მერე, სასჯელაღსრულებაში მიიღეს გადაწყვეტილება, რომ საავადმყოფო არ შეესაბამებოდა თანამედროვე სტანდარტებს და იქ რემონტი უნდა დაწყებულიყო. არადა ციხის საავადმყოფო ამ დროს ქალაქში ერთ-ერთი თანამედროვედ მოწყობილი კლინიკა გახლდათ. ის 2008 წლის გვიან შემოდგომით გაიხსნა და 2012 წლის ბოლოს ვერც რემონტი და ვერც იქ არსებული ტექნიკა დაძველებული ვერ იქნებოდა. საავადმყოფოს ყველა სახის ტექნიკა ჰქონდა _ სუნთქვის თანამედროვე აპარატები, საოპერაციო და ა.შ. რემონტამდე რეორგანიზაცია დაუწყიათ. მედპერსონალის გადანაწილება კი ისე მომხდარა, მათი ხელფასები არ შეცვლილა. `ერთი ფტიზიატრი (ტუბერკულოზის ექიმი. – ა.ბ.) გააფორმეს გასტროენტეროლოგად, ანუ კუჭ-ნაწლავის ექიმად, მეორე ფტიზიატრი _ უროლოგად, მესამე _ პროქტოლოგად. განმარტება კი ასეთი მოაყოლეს, ამდენი ფტიზიატრი საჭირო არ არის, მაგრამ ამ ადამიანებს უხელფასოდ ვერ დავტოვებთო. მიუხედავად იმისა, რომ ამბობდნენ, ციხის საავადმყოფოს კადრები არაკვალიფიციურიაო და პაციენტებს ციხიდან ქალაქის კლინიკებში დაარბენინებდნენ, სამსახურიდან მაინც არავინ გაუშვიათ. პატიმრებისთვის ტუბერკულოზის საავადმყოფო ქსანშია, ციხის საავადმყოფოში კი მხოლოდ ერთი განყოფილება იყო და ეს განყოფილებაც გააუქმეს, არადა ის აქაც საჭირო გახლდათ. ამ შემთხვევაში პრობლემა უფრო სხვა რამეა, ფტიზიატრი უროლოგად ან გასტროენტეროლოგად ვერანაირად ვერ იმუშავებს, თანაც ეს არის კანონის უხეში დარღვევა. არც ერთ ექიმს არ დაუტოვებია ციხის საავადმყოფო იმ დროს. მერე დაიწყეს შენობის რემონტიც. 2013 წლის სექტემბერში, საავადმყოფო პრაქტიკულად მთლიანად პარალიზებული გახდა. მედპერსონალიდან ზოგი თუ მაინც მიდიოდა სამსახურში, ზოგი სახლში იჯდა და ისე იღებდა ხელფასს. ციხის საავადმყოფოს 60-70 თანამშრომელი მაინც ჰყავს, რომელთა ხელფასიც 750-დან იწყება და 2 ათასამდე ადის. ისინი ამ ხელფასებს რემონტის მთელი პერიოდი იღებენ. არ დადიან სამსახურში, ერთ პაციენტსაც არ მკურნალობენ და ხელფასებს მაინც ჭამენ~.
როგორც გავარკვიეთ, ციხის საავადმყოფოს მედპერსონალს, სასჯელაღსრულების დაწესებულებამ გამოცდებიც ჩაუტარა, რაზეც, ცხადია, გარკვეული თანხები გამოიყო და დაიხარჯა. თუმცა ე.წ. დაბალკვალიფიციური მედპერსონალიდან არც ამჯერად გაუთავისუფლებიათ ვინმე და ყველა კვლავ დატოვეს არსებულ სამსახურებში. სწორედ ამ დროს, ტელეკომპანია `მაესტროზე~ სოზარ სუბარი მიიწვიეს, რომელმაც საქვეყნოდ განაცხადა, გამოცდების შემდგომ ძალიან მაღალკვალიფიციური კადრებით მოხდა საავადმყოფოს დაკომპლექტებაო, არადა, წყაროს ინფორმაციით, დღემდე იგივე გვარ-სახელის ადამიანები მუშაობენ ამ დაწესებულებაში. `მთელ საავადმყოფოში ახალი მხოლოდ 7-8 ექიმია, ორიოდე სანიტარი და დამხმარე ექთანი, დანარჩენი კვლავ ძველი კადრია. ვინმეს თუ არ სჯერა ეს ყველაფერი, მივიდეს და შეამოწმოს. ახალი თანამშრომლებიდან, ვინც კი ამ გამოცდების შედეგად მიიღეს, ბევრი არ დადის სამსახურში. ხელფასები კი სახლში მისდით. იქ მომუშავე სასჯელაღსრულების დაწესებულების მაღალჩინოსნების ახლობლებს კი ხშირად პრემიებსაც აძლევენ. ერთ ფაქტს გეტყვით: საახალწლოდ, ყველა ექიმს დაურიცხეს ხელფასის ოდენობის პრემია, არადა ეს ადამიანები, ფაქტობრივად, არაფერს არ აკეთებენ და საავადმყოფოც არ ფუნქციონირებს. რემონტის დაწყების პერიოდში, სამედიცინო, ძვირადღირებული აპარატურა მედპერსონალს მოახსნევინეს. ტექნიკა იყო ახალი, 2008 წელს შემოტანილი. საქართველოს კანონმდებლობით, 2002 წლის აპარატურაც კი დაშვებულია და ეს უფრო ახალი იყო. გარდა ამისა, იქ იყო რბილი ავეჯი, კარადები, მაგიდები და სხვა საჭირო ინვენტარი, რომელიც რამდენიმე ოთახში შეყარეს. როცა რემონტი იმ ოთახებამდე მივიდა, მუშებმა ღია ცისქვეშ გამოიტანეს და თოვლში, წვიმასა და უბედურებაში დაყარეს. მოქმედი აპარატურაც მუშებმა გადაიტანეს მეორე მხარეს სათანადო წესების დაუცველად, რამაც მისი დაზიანება გამოიწვია. საბოლოოდ კი, აპარატურა ჩამოწერეს და გადაყარეს. ინვენტარიც, ცხადია, გაფუჭდა და ეს არის მავნებლობა.
ახლა ციხის საავადმყოფოში შეიტანეს თანამედროვე, ძალიან ძვირადღირებული, ელექტრიფიცირებული საწოლები, რომელიც პულტით იმართება, ასევე ძვირადღირებული აპარატურა. კარადები არაფრით არ განსხვავდება იმ კარადებისგან, რომელიც ღია ცისქვეშ გდებით შეგნებულად გააფუჭეს. ეს ყველაფერი მოხდა მედპერსონალის, ციხის ადმინისტრაციის, ასევე მსჯავრდადებულების თვალწინ. ყველა ექიმმა, ექთანმა თუ სანიტარმა იცის ეს ამბები, მაგრამ ჩუმად არიან, რადგან მუქთა ხელფასი ყველას აწყობს. ამ დანაშაულზე პასუხისმგებელი, ცხადია, სასჯელაღსრულების სამინისტროს პირველი პირია. თუ მასზე დაქვემდებარებულ დაწესებულებაში ეს ხდება და სოზარ სუბარმა არ იცის, ეს არის დანაშაული, თუ იცის და არაფერს აკეთებს, ეს კიდევ უარესია. ყველა გზა მასთან მიდის და სუბარის პასუხისმგებლობის საკითხიც, ალბათ, უნდა დადგეს. ციხისსაავადმყოფოში რემონტი ერთი წელია მიმდინარეობს, ჯერაც არ გახსნილა საავადმყოფო, ამდენი ხნის განმავლობაში ხდება იქ დანაშაული და წარმოუდგენელია, რომ ეს სუბარმა არ იცოდეს. რაც მოგიყევით, ეს არის კრიმინალი, სახელმწიფო ქონებისა თუ ბიუჯეტის გაჩანაგება. სახელმწიფოს შეგნებულად მიაყენეს უდიდესი ზარალი გაცემული ხელფასებით, პრემიებით, პატიმარი პაციენტების ქალაქის კლინიკებში მკურნალობით, მედიკამენტების უაზრო ხარჯვით, საავადმყოფოს გაუგებარი რემონტით, იქ არსებული ქონების განადგურებით და ა.შ. ამის შესახებ თუ ვინმე იტყვის, არ ვიცოდიო, ეს არ იქნება გამართლება. არის შემთხვევები, როცა არცოდნაც კრიმინალია. განვითარებულ ქვეყნებში უმაღლეს სასჯელს აძლევენ ასეთი დანაშაულისთვის და აქ კორუმპირებული მინისტრები ერთმანეთს მხარში უდგებიან და ამართლებენ. ასე იმიტომ იქცევიან, რომ მათ საკუთარი `ქუდი ეწვით~, რადგან ყველა სამინისტროში იგივე საშინელებები ხდება. როგორ შეიძლება არაფერში ადამიანი ხელფასს იღებდეს და მას პრემიასაც აძლევდნენ?! ეს არის უზნეოდ, უნამუსოდ მითვისებული ფული. სათანადო უწყებებმა სასწრაფოდ უნდა შეისწავლონ და ყველა პრემია უკან დააბრუნებინონ ამ ხალხს. ციხეში ბევრი პატიმარი სწორედ სახელმწიფოს ძარცვისა და ყაჩაღობისთვის იხდის სასჯელს. ესენიც იგივეს აკეთებენ. გამოდის, რომ `მგლები~ დააყენეს დარაჯად და ისინი რატომ არ უნდა დაისაჯონ?! იმის შესახებ, რომ ინვენტარი ღია ცისქვეშ იყო და ფუჭდებოდა, სახალხო დამცველის, უჩა ნანუაშვილის აპარატის, მონიტორინგის სამსახურმაც იცის. ისინი პერიოდულად შედიან იქ და ყველაფერს კარგად ხედავენ. რამდენიმე თანამშრომელმა მიუთითა კიდეც ამ დარღვევის შესახებ, მაგრამ მათაც არაფრად ჩააგდეს ეს. შეუსწავლელად ვინმეს დასჯას არ ვითხოვ, მაგრამ ობიექტურად გაარკვიონ სათანადო უწყებებმა ყველაფერი და დარწმუნდებიან, რომ მართალს გიყვებით~.
დამეთანხმებით, წყაროს მიერ მოწოდებული საკმაოდ სკანდალური ინფორმაცია სასჯელაღსრულების დაწესებულების მაღალჩინოსნების დანაშაულებრივი ქმედებების მამხილებელი ფაქტებით არის გაჯერებული. მისი შემოწმება არც პროკურატურისთვის არის პრობლემა და არც ჯანდაცვის სამინისტროს სამედიცინო საქმიანობის რეგულირების სააგენტოსთვის, თვალავაძის უწყებას რომ ეძახიან. როგორც ჩვენთვის არის ცნობილი, ციხის საავადმყოფო დღე-დღეზე გაიხსნება და უკვე ეტყობა, რომ იქ ფულების უპრაგონოდ ფლანგვა და ქონების დანიავება ამ ხალხს დედის რძესავით შერჩება. ცხადია, ეს არ უნდა მოხდეს. `პრემიერი~ სათანადო უწყებებიდან ადეკვატურ ქმედებებს ელოდება, რადგან ჩვენ ამ თემასა და საკითხებს ძალიან მალე კვლავ მივუბრუნდებით.
ანკა ბაზერაშვილი, გაზეთი „პრემიერი“
![]() |
04-01-2016, 16:00
ლია მუხაშავრია: მურუსიძის სასამართლოში დარჩენა პირადად ბიძინა ივანიშვილთან იყო შეთანხმებული |
![]() |
14-12-2015, 17:00
თამარ კორძაია: „რესპუბლიკურ პარტიას“ საკუთარი ძალის და წონის შესაბამისი მოთხოვნები ექნება |
![]() |
22-12-2015, 17:00
ზურაბ აბაშიძე: რაც ვლადიმერ პუტინმა განაცხადა, ვფიქრობ, საყურადღებოა |
სხვა |