აი, ასე ტარდება სამინისტროებში ე.წ. კონკურსები

ციალა მირცხულავა პროფესიით იურისტია, თუმცა თავს მრავალგზის უფლებადარღვეულად მიიჩნევს. როგორც თავად გვითხრა, ჯერ სამსახურიდან გაათავისუფლეს უკანონოდ, შემდეგ კი ორი კონკურსი გაიარა წარმატებულად და კვლავ სამსახურის გარეშე დატოვეს. რა და როგორ ხდება სამინისტროებში გამოცხადებულ  ვაკანსიებზე ჩატარებულ ე.წ. კონკურსებში, ქალბატონმა ციალამ დეტალურად მოგვითხრო. 

ციალა მირცხულავა:

_ 2010 წლის 19 აპრილიდან 2013 წლის 11 დეკემბრამდე აფხაზეთის ავტონომიური რესპუბლიკის, შრომის, ჯანმრთელობისა და სოციალური დაცვის სამინისტროში, ადმინისტრაციული დეპარტამენტის უფროსის მოადგილე ვიყავი. ადმინისტრაციული დეპარტამენტის საქმეების გარდა, იურისტის ფუნქციებსაც მასრულებინებდნენ, რადგან ასეთი შტატი სამინისტროში რატომღაც არ იყო. 2013 წლის ოქტომბერში ჩვენი მინისტრი გახდა ქეთევან ბაკარაძე, რომელმაც სამინისტროში მალევე გამოაცხადა რეორგანიზაცია. ამ პროცედურის  დოკუმენტებიც მე მომამზადებინეს. მიზანი, სამინისტროში ოპტიმიზაციის განხორციელება, ანუ სამსახურიდან თანამშრომლების გაშვება გახლდათ. სამინისტროს დებულებაშიც შეიტანეს ცვლილება. წინათ ადმინისტრაციული დეპარტამენტის საქმიანობაში  შედიოდა სამართლებრივი საკითხები, მერე კი შეიქმნა ადმინისტრაციულ-იურიდიულ საკითხთა სამმართველო. სახელი შეუცვალეს და ჩემი თანამდებობის გაუქმების გამო მე გამათავისუფლეს. ახალ სამმართველოში დაინიშნენ ადამიანები, რომელთაც არა აქვთ იურიდიული განათლება, მე კი მოსამართლეობის გამოცდებიც წარმატებით ჩავაბარე. მთელ სამმართველოში მხოლოდ ერთ თანამშრომელს აქვს იურისტის პროფესია. დოკუმენტების მიხედვით, ყველა მათგანი, კონკურსის ჩატარებამდე, დროებით დაინიშნა მოვალეობის შემსრულებლად. ამის მერე სამინისტროსაც შეუცვალეს სახელი და სიტყვა “შრომა” საერთოდ ამოვარდა დასახელებიდან თუ ფუნქციიდანაც. 2014 წლის 29 იანვრიდან ჯანმრთელობისა და სოციალური დაცვის სამინისტროდ ჩამოყალიბდა, სადაც დაარსდა _ საქმის წარმოების, ადამიანური რესურსების მართვისა და იურიდიულ საკითხთა სამმართველო. წინა სამმართველოდან ხალხი ახლა აქ გადმოიყვანეს კვლავ მოვალეობის შემსრულებლებად და კონკურსის ვადებმაც, ცხადია, გადაიწია. მე კი იმედი მომცეს, ცოტა ხანში კონკურსი გამოცხადდება და თუ გაიმარჯვებთ, ისევ დაგაბრუნებთ სამსახურშიო. სანამ ეს კონკურსი ჩატარდებოდა და მონაწილეობას მივიღებდი, მანამდე კონკურსში აფხაზეთის ავტონომიური რესპუბლიკის ფინანსთა და ეკონომიკის სამინისტროში ჩატარდა იურიდიულ საკითხთა და ადამიანური რესურსების მართვის სამმართველოს იურიდიული განყოფილების უფროსის ვაკანსიაზე და მონაწილეობა იქაც მივიღე. პირველი ეტაპი აპლიკაციების გადაცემა იყო, რის შემდგომაც გადავედი მეორე ეტაპზე. ტესტირებაზე გამოიტანეს 20 საკითხი და 20 ქულა იყო უმაღლესი შეფასება. ყველა კითხვას სწორი პასუხი გავეცი, მაგრამ ტესტირების შედეგები როცა შეჯამდა, ტელეფონით შემატყობინეს, რომ მხოლოდ 16 ქულა მქონდა. მაშინვე ვუთხარი, ქულები არასწორად არის დაწერილი-მეთქი, მაგრამ საატესტაციო კომისიისკენ მიმითითეს, ამის დრო კი აღარ რჩებოდა, რადგან მეორე დღესვე გამიყვანეს გასაუბრებაზე, რომელსაც მესამე ეტაპი ჰქვია. საათზე მეტხანს მიმდინარეობდა გასაუბრება, უამრავი კითხვა დამისვეს, ყველას სათანადოდ ვუპასუხე და თავადაც ძალიან კმაყოფილი წამოვედი იქიდან, მაგრამ მომივიდა შეტყობინება, რომ მესამე ეტაპი ვერ გადავლახე. ამჯერად უკვე საპრეტენზიო კომისიაში მივედი.

_ ამ კომისიაში რა გითხრეს?!

_ მითხრეს, მეორე კანდიდატს აქვს 20 ქულა, ტესტებში თქვენ 16 ქულაზე მეტი ვერ მოაგროვეთ, ამიტომ კომისიის წევრებმაც გასაუბრებაზე დადებითი შეფასება მას მისცესო. იქვე განვაცხადე პრეტენზია ტესტების შედეგებზეც. მოვითხოვე ჩემი ტესტების მოტანა და აღმოჩნდა, რომ ორ სწორ პასუხზე ხაზი იყო გადასმული, ანუ არასწორად ჩათვალეს. ეს ცხადია, შეგნებულად  გააკეთეს, რადგან წინასწარ იყო გადაწყვეტილი, ამ სამსახურში ვინც უნდა დაენიშნათ, ტესტირება კი ხალხის მოსაჩვენებლად ჩატარდა. საპრეტენზიო კომისიის თავმჯდომარე იყო აფხაზეთის იუსტიციის დეპარტამენტის თავმჯდომარე იგორ კოპალიანი. სხვა პასუხებზეც, რომელიც არასწორად ჩამითვალეს,  დავასაბუთე, რომ სწორი იყო. შეიძლება კომისიას ერთი კითხვის პასუხის შეფასება შეშლოდა, მაგრამ როგორ შეიძლება ოთხი პასუხის შეშლა?! მიუხედავად იმისა, რომ ტესტების გასაჩივრების ვადა იყო გასული, საპრეტენზიო კომისიამ ჩემი უარყოფითი შედეგები ხარვეზად ჩაუთვალა საკონკურსო-საატესტაციო კომისიას. ამის მერე მომივიდა შეტყობინება, რომ საკონკურსო-საატესტაციო კომისიამ გაითვალისწინა თქვენი პრეტენზია მხოლოდ ტესტირების ნაწილში, მაგრამ არ დააკმაყოფილა გასაუბრების ნაწილიო.

ახლა გეტყვით საკონკურსო-საატესტაციო კომისია როგორც აფასებს კონკურსანტს. შეფასების ფურცელზე წერია კონკურსანტის სახელი, გვარი, შეფასება, მერე შეესაბამება თუ არა მოთხოვნას, სადაც კომისიის ყველა წევრი, ცალ-ცალკე გაფასებს. კითხვა რომ არ დაუსვამთ ჩემთვის, ანდაც მხოლოდ ერთი კითხვა დამისვეს და დადებითი პასუხი გავეცი, კომისიის ისეთმა წევრებმა დაწერეს “ნაწილობრივ შეესაბამებაო”. მხოლოდ ორმა წევრმა _ არასამთავრობოს სექტორისა და პროფკავშირის წარმომადგენელმა დაწერა, რომ შევესაბამებოდი ამ თანამდებობას. “ნაწილობრივ შეესაბამებაო” იმ ადამიანებმა დაწერეს, რომლებმაც ჩემი ტესტური ნამუშევარი არასწორად შეაფასეს.  ღია კონკურსშიც, გასაუბრებაზე ისინი დასხდნენ და ვინც თავად უნდოდათ, ის გაიყვანეს. რატომ, ან რის ფასად მოხდა ეს, არ ვიცი და ტყუილად ვერავის ვერაფერს დავაბრალებ. უბრალოდ, ამჯერად ფაქტის კონსტატაციას ვახდენ.

_ საინტერესოა ეს ყველაფერი. წინა მთავრობას უჩიოდნენ, კონკურსებს ტყუილად ატარებდნენ, პარტიული ნიშნით ხდებოდა მაინც ხალხის დანიშვნა თანამდებობებზეო და გამოდის, რომ ახლა უარესი ხდება. ასეა?! 

_ იცით, რა? გაუთვითცნობიერებელი და გაუნათლებელი ხალხი ზის სწორედ ასეთი მიკერძოებული კონკურსების გამო სამინისტროებში?! ვერც კი წარმოიდგენთ. სამინისტროში ხომ დავწერე ჩემი პრეტენზია, მოგვიანებით ჩემი განცხადების ასლი მოვითხოვე ადმინისტრაციულ დეპარტამენტში და ასეთი კონკურსით დანიშნულმა თანამშრომელმა  მითხრა, ჯერ ვერ მოგცემთ, მინისტრმა რეზოლუცია უნდა დაადოსო. შევეკამათე, რას ამბობთ, განცხადების ასლს რეზოლუცია რად უნდა-მეთქი?! საპრეტენზიო კომისიასაც ვუთხარი, რომ 21-ე საუკუნეში, თბილისში, პრეტენზიის განცხადების ასლს რეზოლუციას ადებენ. სამართლის საკითხებში ეს ხალხი გონზე არ არის.

საპრეტენზიო კომისიას მოვთხოვე ტესტის სწორი პასუხების მოტანა. ხომ უნდა იცოდეს ვინმემ, რას თვლის კომისია სწორ პასუხად და რას _ არა?! არ ჰქონდათ ასეთი პასუხები და რას მოიტანდნენ, მიუხედავად ამისა, უარყოფითად შეფასებულ ჩემს პასუხებზე მაინც ვერ მითხრეს, რომ სწორი არ იყო. მოსაჩვენებელი კონკურსი იყო, კიდევ ვიმეორებ. მე რომ მცოდნოდა ეს, იქ არ მივიდოდი და ამხელა სტრესსაც არ მივიღებდი. ახლა გეტყვით, სამივე ეტაპზე ვინ იყვნენ საკონკურსო-საატესტაციო კომისიაში და ვინ ჩაიდინა ეს ყველაფერი: ვასილ ხორავა _ კომისიის თავმჯდომარე, აფხაზეთის ავტონომიური რესპუბლიკის ფინანსთა და ეკონომიკის მინისტრი. რომან ქვათაია, მისი მიადგილე, კომისიის წევრი, ეკატერინე გაბისკირია _ ასევე, მინისტრის მოადგილე, ლევან თევზაია, ისიც მიადგილე, შალვა წულეისკირი _ აფხაზეთის ავტონომიური რესპუბლიკის პროფესიული გაერთიანების თავმჯდომარე, ასმათ გოგავა, სოხუმის სახელმწიფო უნივერსიტეტის ასოცირებული პროფესორი, ვასილ ზაქარაია _ აფხაზეთის ავტონომიური რესპუბლიკის იუსტიციის დეპარტამენტის თავმჯდომარის მოადგილე, ნუკრი ნოდია _ არასამთავრობო ორგანიზაციის “კავკასიურ ხალხთა თანამეგობრობის” თავმჯდომარე.

_ აფხაზეთის ჯანმრთელობისა და სოციალური დაცვის სამინისტროს კონკურსზე რაღა მოხდა, ბარემ ისიც მოგვიყევით?!

_ განაცხადი საქმის წარმოების, ადამიანური რესურსის მართვისა და იურიდიულ საკითხთა სამმართველოს უფროსის მოადგილის ვაკანსიაზე შევიტანე. მათ მოთხოვნაში ეწერა, სასურველია იურისტიო. 29 აპრილს მივიღე შეტყობინება, რომ 30-ში ჩატარდებოდა ტესტირება. აფხაზეთის ფინანსთა სამინისტროს ტესტები წინასწარ ჰქონდა გამოქვეყნებული, ამათ ესეც არ გააკეთეს. 30-კითხვიანი ტესტი მოიტანეს და აქედან 29-ზე სწორი პასუხი გავეცი. მთელ სამინისტროში არც ერთ ვაკანსიაზე, ამხელა ქულა არავის მიუღია. სამინისტროში ამჟამად მომუშავეებიდან მხოლოდ 7-მა ჩააბარა ტესტირება, დანარჩენებმა კი ვერ ჩააბარეს. მერე გასაუბრებაზეც გავედი, მაგრამ შედეგი დღემდე არ არის ცნობილი. ის ადამიანები, ვინც ჯანდაცვაში აქამდე დროებით იყვნენ დანიშნული სამსახურებში და ტესტირება ჩემზე წარუმატებლად გაიარეს, ან საერთოდ ჩაიჭრნენ, დღემდე მუშაობენ იქ და როგორც მაქვს ინფორმაცია, ოფიციალურად დაამტკიცეს კიდეც თანამდებობებზე, მე კი გასაუბრების შედეგსაც არ მიგზავნიან. თუ უარყოფითი შედეგია, ხომ უნდა ვიცოდე, რომ პრეტენზია მაინც დავწერო?! კომისიის თავმჯდომარე აქ იყო აფხაზეთის ჯანდაცვის მინისტრი. შალვა წულეისკირი კი, რომელიც ფინანსთა სამინისტროს ატესტაციაზე კომისიის წევრი იყო, აქაც კომისიის თავმჯდომარის მოადგილე გახლდათ. კომისიაში ასევე იყვნენ ფსიქოლოგი, არასამთავრობოს წარმომადგენელი, აფხაზეთის მთავრობის იურიდიული სამსახურის უფროსი და “ეიჩარის” წარმომადგენელი. ერთ საინტერესო დეტალზე მოგიყვებით გასაუბრებიდან. მათ ერთ-ერთ კითხვაზე ვუპასუხე, რომ საკანონმდებლო აქტი ძალაში შედიოდა ოფიციალურად მისი გამოქვეყნებიდან მე-15 დღეს, თუ საკანონმდებლო აქტით სხვა ვადა არ იყო დადგენილი. “ეიჩარის” წარმომადგენელმა მითხრა, რომ მას არ ახსოვდა და ეჭვი ეპარებოდა, რომ კანონში 15 დღე ეწერა. მის ამ სისულელეს კი, მთავრობის იურიდიული სამსახურის უფროსმაც თავი დაუქნია. ახლა ამ ფაქტს უარყოფენ, რადგან მტკიცებულება არ მაქვს. სამოქალაქო და ადმინისტრაციულ კოდექსთან დაკავშირებით კი, “ეიჩარის” წარმომადგენელი განაჩენს მიხსენებდა. განაჩენს აქ რა უნდა-მეთქი, ვუთხარი და მიპასუხა, ადამიანურად გესაუბრებიო. ამით იმის თქმა მინდა, რომ აქაც იგივენაირი კონკურსი ჩატარდა, ანუ ყველაფერი იყო ტყუილზე აგებული და ფარსი.

როცა რეორგანიზაციის დროს, აფხაზეთის ჯანდაცვის სამინისტროდან უკანონოდ გამათავისუფლეს, რა თქმა უნდა, უსამართლობის განცდა გამიჩნდა. გამოვედი და ვთქვი, მაქვს იურისტის კვალიფიკაცია, მე გამათავისუფლეს და იურიდიულ საქმეთა სამმართველოში არაიურისტები დანიშნეს-მეთქი. ამის მერე დროებითი ადგილი შემომთავაზეს ზემო აფხაზეთის საავადმყოფოში იურისტის პოზიციაზე. მაისის მერე სამსახური არ მექნება და “ეიჩარის” წარმომადგენელმა მითხრა, თქვენ ხომ გაქვთ სამსახურიო?! ეს ხომ კონკურსია და რა შუაშია, სამსახური მაქვს თუ არა?! თანაც ჩემი ოჯახი აფხაზეთიდან არის დევნილი, უამრავი უბედურება გამოვიარეთ, ახლაც თითქმის მთელ ოჯახს ვინახავ ხელფასით და სამსახური რომ მინდოდეს, ეს გასაკვირია?! პროფკავშირის წარმომადგენელმა მკითხა, საიდან ხართო?! ვუპასუხე, წარმოშობით სენაკიდან-მეთქი. ესეც არ მესმის, რა შუაშია წარმოშობის ადგილი, განა ნარმანია, რომელიც სამეგრელოდან არის წარმოშობით, თბილისის მერობაზე კენჭს ვერ იყრის?! თანაც ამ ყველაფერს ცოდნის დონესთან რა კავშირი აქვს?! აი, ასე ტარდება სამინისტროებში ე.წ. კონკურსები და ჩემნაირად დაზარალებული და იმედგაცრუებულიც ძალიან ბევრია. წულეისკირი, რომელიც პენსიონერია, მაგრამ მაინც მუშაობს, მეუბნება, ამ სამინისტროსთვის თავს რატომ იკლავო? ის რომ გაათავისუფლონ პენსიას მაინც აიღებს 150 ლარს და მე მალე ისიც არ მექნება.

_ ყველაფერი გასაგებია, ახლა რას აპირებთ?

_ აფხაზეთის ჯანდაცვის სამინისტროსთან დაკავშირებით კი უკვე ვამზადებ სარჩელს, მაგრამ ფინანსთა სამინისტროზეც რომ მოვამზადო, ამდენ სარჩელს ხომ სჭირდება ბაჟი და მე ეს თანხა არ მაქვს. თანაც ჯანდაცვაში მეორე ეტაპის პასუხს არ მაძლევენ და როგორ გავასაჩივრებ? არ აქვთ უფლება, პასუხი არ შემატყობინონ, მაგრამ ხომ ხედავთ, რასაც უნდათ, იმას აკეთებენ. ჯანდაცვის სამინისტროში სხედან ადამიანები, რომლებიც, შევალ თუ არა, ჩხუბს იწყებენ. მაპროვოცირებელ სიტყვებს მეუბნებიან, უნდათ, რომ გამაღიზიანონ და ყველაფერს თავი დავანებო, რადგან, როგორც გავიგე, 7 მაისს უკვე დანიშნეს ყველა ვაკანსიაზე ვიღაც-ვიღაცები, მაგრამ არ ვაპატიებ ასეთ ქმედებებს არავის. კიდევ ერთხელ უნდა დავწერო განცხადება და მოვითხოვო კონკურსის შედეგი. სასამართლო ხელისუფლების იმედი უფრო მაქვს, ვიდრე ამათი.  

_ ასეთი ფორმით სამსახურებში პარტიულ მეგობრებს ნიშნავენ თუ ნათესავებს?

_ ამას ზუსტად ვერ გეტყვით, რადგან მტკიცებულებები არ მაქვს. თუმცა ამ ხალხით დაინტერესება რომ არსებობს, ეს ფაქტია.  

ანკა ბაზერაშვილი, გაზეთი „პრემიერი“

FaceBook