ვინ გადასცა ხელისუფლებას კასრებში აღმოჩენილი ფირები?

ელისო კილაძე: “ამ დამსახურებისთვის ვაჟა ლელუაშვილის მეუღლემ ჯანდაცვის სამინისტროში პოსტი მიიღო. მეტიც, ქალი ციხის მაგიერ პრემიერის საზეიმო მიღებაზე აღმოჩნდა”

“პრემიერის” კითხვებს “ქრონიკა+”-ის მთავარმა რედაქტორმა ელისო კილაძემ უპასუხა:

_ საქართველოში უკვე მივეჩვიეთ, რომ ნებისმიერი, ცალკეული პერსონისთვის საჩოთირო ფაქტს სკანდალს ვეძახით. არადა, ბოლო დროს იმდენი საჩოთირო ფაქტი დაგროვდა, რომ თავმოყვარე ხელისუფლება, რომელიც ქვეყნის სათავეში “დადგმული სპექტაკლით” მოვიდა, სახლში წავიდოდა და პოლიტიკას შეეშვებოდა. იგივე შეგვიძლია ვთქვათ ოპოზიციაში აღმოჩენილ ყოფილი ხელისუფლების არაერთ წარმომადგენელზეც, რომელიც ახლა კრავის ქურქშია გახვეული. ასეთ ფაქტზე სამართალდამცავები არც კი რეაგირებენ. რატომ? რეალობასაა მოკლებული პრემიერ-მინისტრების _ ყოფილისა და ამჟამინდელის განცხადება სამართალდაცავი ორგანოების დეპოლიტიზების შესახებ, თუ სხვა მიზეზია რამე?

_ სამართალდამცავი ორგანოების დეპოლიტიზება სრული მითია, რადგან ამ დროისთვის ამ სტრუქტურაში ორი გამოკვეთილი ფრთაა _ ჯგუფი, რომელიც წინა ხელისუფლებას წარმოადგენდა და ჯგუფი, რომელიც ამ სტრუქტურაში მივიდა პრემიერის სიმამრის, თამაზ თამაზაშვილის რეკომენდაციით. ხაზს ვუსვამ, თამაზაშვილის რეკომენდაციით და ხშირად, ძალოვან უწყებაში თანამდებობებზე ადამიანები ინიშნებიან თამაზაშვილის მარანში. ეს სამწუხარო რეალობაა და ამას ვერსად გავექცევით. არიან ადამიანები, რომლებმაც წინა ხელისუფლების დროინდელი გავლენები შეინარჩუნეს. შეინარჩუნეს მხოლოდ იმიტომ რომ მათ სარფიანად ივაჭრეს. სხვათა შორის, გავლენები ისევ შეინარჩუნეს იმ ადამიანებმა, რომლებიც ფორმალურად მოხსნეს თანამდებობიდან, დიმა დარბაისელი არაოფიციალურად ისევ სასჯელაღსრულების დეპარტამენტის თავმჯდომარეა. ხოლო გენინსპექციის უფროსი ზვიად ჯანყარაშვილი, პრემიერის მეუღლის მამიდაშვილი ისევ მართავს გენერალურ ინსპექციას. გუშინ სასამართლომ კეზერაშვილი ეთილის სპირტის საქმეზე გაამართლა. საინტერესოა, რამდენი ხანი დასჭირდება იმას, რომ გამოძიებულ იქნას, როგორ “დაითრია” ზვიად ჯანყარაშვილმა ზურაბ ადეიშვილის ფრთებქვეშ მყოფი მესპირტე “ჩორნა” და რა ოდენობის თანხა გამოსძალა მას ახალ ხელისუფლებასთან სიტუაციის “გასაიასნებლად”? ამათ, ეტყობა, ჰგონიათ, რომ ხალხი ბრმა და ყრუა და არავინ არაფერი იცის, ან მედიის ზოგიერთ წარმომადგენელს თუ რესტორანში დაპატიჟებს გენერალი თამაზაშვილი ან მამულებში მიიპატიჟებს და მერე მასალებს გამოაქვეყნებინებს, ამით ყველაფერი დაიფარება.

_ 2012 წელს სახელმწიფოში არჩევნების შედეგები, ყოფილი გენერალური პროკურორის არჩილ კბილაშვილის მიერ ერთპიროვნულად პასუხისმგებლობისგან განთავისუფლებული დამნაშავის ლადო ბედუკაძის სარეჟისორო ნამუშევარს მოჰყვა. დღევანდელი გადასახედიდან, რომ შევაფასოთ, რატომ გააკეთა ეს ყველაფერი ბედუკაძემ და რა იყო მისი ინტერესი? 

_ ბედუკაძის თემა გაცილებით ფართოა, ვიდრე შემეძლო წარმომედგინა. კითხვები, რომლებიც მისი მისამართით არსებობდა და არსებობს, ისევ პასუხგაუცემელია. პირადად ჩემთვის არანაირ ეჭვს არ იწვევს კარანტინის დაშლის კადრები, რომელიც ნამდვილად ამხელს სისტემურ დანაშაულს, მაგრამ ბედუკაძის კადრები, ცხადია, კითხვებს ბადებს. ყველა ფირში, რომელიც მან გაასაჯაროვა, ისმის მხოლოდ მისი ხმა. ერთი ფირი, თუ კარგად მოვისმენთ, პირდაპირ ასახავს მის მიერ პატიმრის გაუპატიურების ფაქტს. მიაქვს დუბინკა პრეზერვატივით, მერე კი სადისტურად ეუბნება პატიმარს, _ გეტკინა? გესიამოვნა?.. ლოგიკურია კითხვები _ სად არის სხვა კონტროლიორების მიერ გადაღებული ფაქტები? ფირები? და მეორე და ყველაზე მთავარი კითხვა _ როგორ მოახერხა ბედუკაძემ გლდანის ციხიდან ამ ფირების გამოტანა? შეგახსენებთ, გლდანის ციხეში იმ დროს ადვოკატებიც ვერ ახერხებდნენ პატიმრის წერილების გამოტანას. რას აპირებდა ბედუკაძე ამ ფირებით? არსებობს გონივრული ეჭვი იმის თაობაზე, რომ ბედუკაძე რეალურად არის ის “გმირი”, რომელსაც ამოცანად ჰქონდა არა რეჟიმის მხილება, არამედ ის იყო ხელისუფლების შიდა დაპირისპირების პროდუქტი და რეალურად ის ვანო მერაბიშვილის კრიშის ქვეშ აგროვებდა მასალებს ბაჩო ახალაიას წინააღმდეგ. სხვათა შორის, გლდანის ციხის ყოფილი პატიმარი აცხადებს, რომ მას ბედუკაძემ გადასდო შიდსი. ეს სისხლის სამართლის დანაშაულია და თუ ბედუკაძეს უნდა, თავი იმართლოს, აიღოს სისხლის ანალიზი და ყველა დაარწმუნოს, რომ ის აივ-ინფიცირებული არ არის. არც ის იქნებოდა ურიგო, ავადმყოფობის ისტორიაც გაესაჯაროებინა. მისივე განცხადებით და ეს რამდენიმე ინტერვიუშიც თქვა, რომ “ც” ჰეპატიტი თითის გაჭრის მერე პატიმრისგან გადაედო. სხვათა შორის, ლადო ბედუკაძეს პირადად ჩემთვის და კიდევ რამდენიმე ადამიანისთვის აქვს ნათქვამი, რომ კადრების ამბავი ვანომ იცოდა. რას ნიშნავს, ვანომ იცოდა? ეს ის კითხვაა, რომელზეც ბედუკაძეს პასუხის გაცემა აუცილებლად მოუწევს.

_ ცნობილი ხდება, რომ შენ ბედუკაძის წინააღმდეგ გაქვს ახალი მამხილებელი მასალები. ანუ აპირებ მის მიერ უკანონოდ მოპოვებული ჩანაწერების გასაჯაროებას. რა ჩანაწერებზეა საუბარი და რამდენად “ქაჩავს” მისი ნამუშევარი “ოსკარზე”?

_ მოგეხსენებათ, ლადო ბედუკაძე ბელგიიდან დაბრუნების მერე რამდენიმე თვის განმავლობაში ჩემს ოფისში მყავდა შეკედლებული. აქვე გეტყვით, რომ ეს არ იყო ჩემი პირადი ინიციატივა, ეს იყო პირთა გარკვეული წრის თხოვნა, რომ ბედუკაძე არ ყოფილიყო “უპატრონოდ” მიტოვებული. ამავე პერიოდში მიმდინარეობდა მისი სასამართლო პროცესი. მას ჩემთან ჰქონდა ლეპტოპი, სადაც დატოვა ჩანაწერები. მას შემდეგ, რაც ლადო ბედუკაძემ ჩემს წინააღმდეგ მიზანმიმართული კამპანია დაიწყო თამაზ თამაზაშვილის დავალებით, და ეს მოხდა იმ ფაქტის მერე, როცა ჩვენ გავშიფრეთ გენერალ თამაზაშვილის სქემა გელა ხვედელიძის წინააღმდეგ, მე მოვისმინე ის ჩანაწერები, რომლებიც ბედუკაძემ ჩემს ოფისში დატოვა და აღმოვაჩინე ფრიად საინტერესო რამ, რაც ბედუკაძის მორალზე ნათლად მეტყველებს. ალბათ, იცით, რომ ბედუკაძის ოჯახს, როცა ისინი თურქეთში იმყოფებოდნენ, ფინანსურად ეხმარებოდა ვანო ჩხარტიშვილი. ბედუკაძე ჩამოსვლის შემდეგ შეხვდა ბიზნესმენს და რა გააკეთა? ჩუმად ჩაწერა ვანო ჩხარტიშვილი მასთან ოფისში სტუმრობისას. ამ მორალის კაცია ბედუკაძე და ღმერთმა მშვიდობაში მოახმაროს გენერალ თამაზაშვილს, რომელიც ამჟამად მას მფარველობს და ამუშავებს ჩემს წინააღმდეგ. აქვე მინდა ვთქვა, რომ ყველა ის მასალა, რომელიც მე თამაზაშვილის მიერ დანიშნულ კადრებზე გამოვაქვეყნე, ლადო ბედუკაძემ მომაწოდა თავის დროზე. მათ შორის ყვარლის პოლიციის უფროსის სკანდალური ვიდეო, რომელიც არჩევნების წინ აქციას _ “ძირს ბიძინა” ხელმძღვანელობდა.

ჩანაწერები, რომლის გასაჯაროებასაც ვაპირებ, ეხება ლადო ბედუკაძის სასამართლო პროცესს. პროცესი იყო დახურული და მას და მის ადვოკატს ხელი ჰქონდათ მოწერილი მასალების გაუხმაურებლობაზე. მით უფრო, არ შეიძლებოდა პროცესის ჩაწერა. ჩანაწერებში აღმოვაჩინე მოწმეების _ ირმა ინაშვილისა და გიორგი ლომიას ჩვენებები. ეს სისხლის სამართლის დანაშაულია და სწორედ ამ ჩანაწერებს გადავცემ პროკურატურას.

_ აპირებ, მიმართო პროკურატურას და გჯერა, რომ ხელისუფლება თავის “გმირს” გაწირავს? ხომ ფაქტია, რომ ჩვენ მიერ გახმაურებული არაერთი ფაქტი იმტვერება პროკურატურის თაროებზე.

_ ცხადია, არანაირი ილუზია არა მაქვს, რომ მანამ სანამ ბედუკაძეს პრემიერის სიმამრი მფარველობს, მის წინააღმდეგ სისხლის სამართლის საქმე აღიძვრება, მაგრამ დადგება დრო, როცა მას აუცილებლად მოუწევს პასუხისგება, მათ შორის იმ დანაშაულებზეც, რომელსაც ის ციხეში სჩადიოდა. ჩემს ოფისში მუშაობდა ადამიანი, სხვათა შორის დედამისის მოგვარე, რომელიც ბედუკაძეს სასტიკად ჰყავს ციხეში ნაცემი.

_ არსებობს ცნობილი ისტორია _ როდესაც რუზველტს მოუყვნენ ნიკარაგუის დიქტატორი მმართველის ანასტასიო სომოსას მიერ ჩადენილ საშინელებებზე, მან უპასუხა: “შესაძლოა, სომოსა ძაღლიშვილია, მაგრამ ის ჩვენიანი ძაღლიშვილია!”. მეორე ვერსიით, რუზველტის კითხვაზე: “ეს კაცი, როგორც ჩანს, ძუკნაა?” მისი სახელმწიფო მდივნის ქორდელ ჰალის პასუხი იყო: “არის, მაგრამ ის ჩვენი ძუკნაა”. ამ ლოგიკით, ქვეყანასა და სამართლიანობას ხელისუფლების “ძაღლიშვილებისა” და “ძუკნების” ლოლიავში უნდა ამოხდეს სული?

_ სამართლიანობის აღდგენას საქართველოში ამ ხელისუფლების პირობებში დააგვიანდება, არ არსებობს პოლიტიკური ნება და იმიტომ. თანაც რა დანაშაულისთვის უნდა დასაჯონ ძველები? იმისთვის, რასც თავად სჩადიან? ისევ უკანონოდ ისმენენ, ისევ უკანონოდ გვითვალთვალებენ, მათ შორის მედიის წარმომადგენლებს, “ქრონიკა+”-ის ოფისთან ისევ მორიგეობენ აიფონიანი ტაქსის მძღოლები და ა.შ..

_ აქვე არ შემიძლია, არ გკითხო შენს აღშფოთებაზე დამოუკიდებლობის დღის წვეულებაზე ვაჟა ლელუაშვილის მეუღლის გამოჩენის შესახებ. რამდენადაც ცნობილია, ამ ქალბატონის მიმართ თავის დროზე სისხლის სამართლის საქმეც იყო აღძრული. ლელუაშვილის ოდიოზური ფიგურა ყველასთვის კარგად არის ცნობილი. მოკლედ, შეგვიძლია, დავასკვნათ, რომ ლელუაშვილს უშუალოდ ღარიბაშვილი მფარველობს? და ათასობით გამწარებული ადამიანის მოლოდინმა ამ პერსონასთან მიმართებაში სამართლიანობის ზეიმის შესახებ “ჩაილურის წყალი” დალია?

_ სიმართლე გითხრათ, ეს ინფორმაცია მანამ არ დავიჯერე, სანამ ფოტო არ მივიღე. ვაჟა ლელუაშვილი იყო კუდ-ის უფროსის მოადგილე, მისი ხელმძღვანელობით ხდებოდა უკანონო მოსმენები და გადაღებები, მათ შორის “ოცნების” მაღალჩინოსნების. მან გადასცა ახალ ხელისუფლებას ის ფირები, რომელიც სამეგრელოს კასრებში აღმოაჩინეს. ამ დამსახურებისთვის მისმა მეუღლემ მიიღო პოსტი ჯანდაცვის სამინისტროში. მე მქონდა ინფორმაცია, რომ ამ ზამთარში სისხლის სამართლის საქმე აღძრეს მის წინააღმდეგ ნარკოტიკების უკანონო რეალიზაციის ფაქტზე, მაგრამ რა? ქალი ციხის მაგიერ პრემიერის საზეიმო მიღებაზე აღმოჩნდა. ახლა გიკვირთ, რატომ ვწერთ და ვკითხულობთ ჩვენ ვაჟა ლელუაშვილზე წელიწადზე მეტია და რატომ არ არის რეაგირება?

_ ლელუაშვილის ხელისუფლებასთან ჩახუტება, ამ ჭრილში ბედუკაძისა და მისი მფარველი პოლიტიკოსებისა და “საზოგადო მოღვაწეების” თვალნათელი სიამტკბილობა ხომ არ გაძლევს იმის დაშვების საშუალებას, რომ წინა ხელისუფლების “სუსტი რგოლი” სწორედ ლელუაშვილი იყო? ანუ ლელუაშვილი ხომ არ არის, ბედუკაძესთან ერთად, “ჩვენი დროის გმირი?”

_ მე მაქვს ინფორმაცია, რომ ამ დღეებში აღმოაჩენენ მოსასმენ აპარატურას და კუდ-ის ყოფილი აგენტი მისცემს ჩვენებას, რომ ეს აპარატურა “ნაცმოძრაობის” დავალებით შეიძინეს. ამ სპექტაკლის პრემიერის დღეს მე დავასახელებ იმ პირის ვინაობას, რომელმაც ამა წლის იანვარში საქართველოში კონტრაბანდის გზით შემოიტანა მოსასმენი აპარატურა. გონივრული ეჭვი მაქვს, რომ ამ სპექტაკლის დადგმაში ხელისუფლებას სწორედ ვაჟა ლელუაშვილი ეხმარება. სხვა დეტალებზე პრემიერის დღეს ვისაუბრებ.

ალექსი ნოზაძე, გაზეთი „პრემიერი“

FaceBook