ვისი ინტერესები იკვეთება ყვითელი მიკროავტობუსების უკან?

ხელისუფლებასთან დაახლოებული პირები მსხვილ ბიზნესებში იკვეთებიან

 ყვითელი მიკროავტობუსების თემა ახალი ხელისუფლების პერიოდშიც ისეთივე აქტუალურია, როგორც ნაციონალების პერიოდში იყო. რუსთავში ხელისუფლების ამ ჯიუტ ნაბიჯს უკვე სამი მძღოლის სიცოცხლე შეეწირა. როგორც ამბობენ, ეს არ არის ბოლო, რადგან დაძაბულობა მძღოლებსა და იმ ფირმას შორის, რომელმაც ტენდერში გაიმარჯვა, კვლავ გრძელდება. ცოდვა, რომელიც რუსთავში ტრიალებს, ახალი ხელისუფლების კისერზეა. რატომ ფიქრობს საზოგადოება ასე, ამ კითხვას პასუხი “პრემიერთან” საუბარში ახალგაზრდა უფლებადამცველთა ასოციაციის ხელმძღვანელმა, ადვოკატმა ლექსო კობაიძემ დოკუმენტურად გასცა. 

ლექსო კობაიძე:

_ რუსთავში ყვითელი სამარშრუტო მიკროავტობუსების შემოყვანასთან დაკავშირებულ ტენდერში შპს “ინტერტრანსმა” გაიმარჯვა და ამ პროცესს სამი ადამიანის სიცოცხლეც შეეწირა. ორ მძღოლს საპროტესტო აქციის დროს ინფარქტმა დაარტყა და ისინი გარდაიცვალნენ. ერთმა კი თავი მოიკლა. ეს ხალხი ამ ზომამდე მიიყვანა ხელისუფლების უნიათობამ და დანაშაულებრივმა მფარველობამ, რაც კანონით არის დასჯადი, თუმცა სამართალდამცავები ამაზე რეაგირებას არ აკეთებენ. რატომ იქცევიან ასე, მათგან რა ინტერესები დევს ამ საქმეში ამჯერად დოკუმენტურად დაგიმტკიცებთ.

_ რა დოკუმენტები გაქვთ ასეთი?!

_ რუსთავში ხელისუფლებამ შემოიყვანა ყვითელი სამარშრუტო ტაქსები და მცირე ბიზნესის განვითარებას ამით ძალიან შეუშალა ხელი. მანამდე ეს მძღოლები ამ ბიზნესით საკუთარ ოჯახებსაც არჩენდნენ და რუსთავის ბიუჯეტსაც ამდიდრებდნენ, მაგრამ მათ “ოცნებამ” ეს ბაზარი წაართვა და ულუკმაპუროდ დატოვა. ამ ადამიანებს აღარ შესწევთ უნარი, ოჯახები არჩინონ, ვალები გადაიხადონ, რაც იწვევს მათ დეპრესიულ მდგომარეობას და სუიციდის მცდელობებს. ვეფხია, მძღოლი რომელმაც თავი მოიკლა, იმ დღეს ბიჭებთან ლუდს მიირთმევდა. როგორც ამბობენ, იქ ყველა მხიარულობდა, ის კი გულჩათხრობილი იჯდა მეგობრებთან. წასვლამდე ერთ-ერთს უთხრა, რა აზრი აქვს ჩემს ცხოვრებას, როცა ოჯახის შენახვა აღარ შემიძლიაო და დაახლოებით ნახევარ საათში ყველამ გაიგო მისი თვითმკვლელობის ამბავი. ასეთი რამ ევროპაში რომ მომხდარიყო, ამას სოციალური აფეთქება მოჰყვებოდა, რადგან ამ ზომამდე ეს ადამიანი ხელისუფლებამ მიიყვანა. მისი საქციელი ქართველი ხალხისთვის უნდა იყოს მაგალითი, რომ არ შეიძლება მოდუნება, გაჩერება, უსამართლობის შეგუება, რადგან ამის შედეგი ყოველთვის ასეთი იქნება.

ახლა, რაც შეეხება იმას, ვის ინტერესებში შედის რუსთავში ყვითელი სამარშრუტო მიკროავტობუსების დამკვიდრება. თავიდან ეს საქმე მხოლოდ შარანგიებთან და ვიცე-მერთან, კახი კალაძესთან ასოცირდებოდა, მაგრამ ჩვენ უფრო საინტერესო რამ აღმოვაჩინეთ. მოვიპოვეთ მტკიცებულებები, რომ შპს “ინტერტრანსის” ხელმძღვანელი გახლავთ ზაზა ლომიძე, რომელიც ამ ფირმის 100-პროცენტიან წილს ფლობს. სწორედ ამ ფირმამ გაიმარჯვა რუსთავის ტენდერში და ყვითელი სამარშრუტო მიკროავტობუსებიც მან შემოიყვანა. ახლა გეტყვით, ვინ არის ეს კაცი. ზვიად ჯანყარაშვილი, რომელიც ახალმა ხელისუფლებამ შსს-ს გენერალური ინსპექციის დეპარტამენტის უფროსად დანიშნა, გახლავთ პრემიერ-მინისტრის სიმამრის, თამაზ თამაზაშვილის დისშვილი, ანუ ქეთევან თამაზაშვილის შვილი. მას შპს “სიტი”-ში აქვს 4,5-პროცენტიანი წილი. ზაზა ლომიძე “სიტი”-ს მეწილეც არის და ზვიად ჯანყარაშვილი და ლომიძე არიან პარტნიორები. “სიტი” დიდი ხნის დაფუძნებული ფირმაა და ნაციონალების დროსაც აქტიურ საქმიანობას ეწეოდა. ხელისუფლებაში “ოცნების” მოსვლის მერე კი, როცა ჯანყარაშვილი შსს-ს მაღალი თანამდებობის პირი გახდა, ეს ფირმა ასპარეზზე უფრო აქტიურად გამოვიდა. იგი ერთდროულად “სიტი”-ს მეწილეც იყო და გენერალური ინსპექციის უფროსიც. ჯანყარაშვილი, საკუთარი დეკლარაციის მიხედვით,  არის მილიონერი. საიდან, როგორ, ესეც კარგადაა გასარკვევი და ჩვენ ამ საკითხს აუცილებლად მივყვებით.

_ ამ ფირმას ყვითელი მიკროავტობუსების ინტერესი ახლა გაუჩნდა?!

_ ხელისუფლებასთან დაახლოებულ პირებს ახლაც ისევე აქვთ მონოპოლია სატრანსპორტო საშუალებებზე, როგორც ეს ნაციონალების პერიოდში ჰქონდათ. ფულის გამო, ისინი არანაირ დათმობაზე არ მიდიან, რასაც ადამიანების სიცოცხლე ეწირება. რუსთავში უამრავი აქცია იმართება, კიდევ გეგმავენ აქციებს, მაგრამ პროტესტანტ მძღოლებთან სახლებში მიდიან უშიშროების წარმომადგენლები და ეუბნებიან, გინდათ კუდ-ის ხალხი დაგვიძახეთ, გინდათ სოდ-ის, რაც გინდათ, ის თქვით, აქციებს თუ გააგრძელებთ, თქვენზე მოხდება ზეწოლაო. ფაქტობრივად, ამ ხელისუფლებამაც აამოქმედა ის საშინელი მანქანა, რომელსაც ოპოზიციაში ყოფნის დროს თავად ებრძოდა. მსგავსი ქმედებების გამო, ნებისმიერი ხელისუფალი კრახით დაამთავრებს საქმიანობას. ჩვენ ვიქნებით იმის ერთ-ერთი ინიციატორები, რომ ეს ასე მოხდეს.    

რამდენიმე დღის წინ რუსთავში ჩამოვიდა პრემიერ-მინისტრი ირაკლი ღარიბაშვილი. ისინი ხვდებიან, რომ “ოცნების” რეიტინგი ნულამდეა დასული. აღარ შესწევთ ძალა, საზოგადოება დაარწმუნონ, რომ ადგილობრივი არჩევნებით მოსვლის მერე, ისინი შეძლებენ რუსთავის განვითარებას. ღარიბაშვილი შეხვდა “ინტერტრანსის” ხელმძღვანელობას და ვითომდაც მოუწოდა მათ, რომ 25 მაისამდე შეასრულონ მათზე დაკისრებული მოვალეობები და აღებული პასუხისმგებლობა _ რუსთავის მთელი მასშტაბით ჩაუშვან მხოლოდ ყვითელი სამარშრუტო მიკროავტობუსები. ამჟამად ქალაქში კიდევ მოძრაობს სხვა სატრანსპორტო საშუალებები და ეს ნიშნავს, რომ  25 მაისის შემდეგ ვეღარ იმუშავებენ. გამოდის, რომ ესენი დათმობას არ აპირებენ და მნიშვნელოვან, საკუთარ ბიზნესად უნდათ, აქციონ რუსთავში ეს ტრანსპორტი. მართალია, ღარიბაშვილმა “ინტერტრანსა” დაავალა, პრობლემები მოაგვარეთო, მაგრამ რას გულისხმობდა ამ სიტყვებში, არ დაუკონკრეტებია და მისი წინადადება თუ გაფრთხილება ბუნდოვანი დარჩა. ფაქტია, რომ ხელისუფლებასთან დაახლოებული პირები მსხვილ ბიზნესებში იკვეთებიან, რაც საგანგაშოა. ხელისუფლებაში მოსულ ადამიანებს ბიზნესად არ ჰქონდათ გამხდარი მათი საქმიანობა და სკამები და მონოპოლიის საშუალებით გამდიდრების უფლებაც არ უნდა მიეცეთ.

_ სანამ “ოცნება” ხელისუფლებაში მოვიდოდა, ისინი პიარს იმით იკეთებდნენ, რომ ნაციონალების მიერ წარმოშობილ მონოპოლიებს ებრძოდნენ. ყვითელ მიკროავტობუსებზე შარანგიებს რომ ჰქონდათ დადებული თათი ნაციონალების ხელშეწყობით, ეს ყველამ კარგად იცოდა და ახლა რა ხდება, მათი ჩანაცვლება?!

_ დიახ, იმ ადამიანებს, ვისაც ბიზნესებში 4-პროცენტიანი წილები ჰქონდათ, რატომღაც, უცებ 100-პროცენტიანი გაუხდათ. შარანგიები არ “მოუტეხიათ”, ისინი უკვე ერთად, კოჰაბიტირებულად მუშაობენ. შარანგიები თბილისში უძღვებიან ამ ბიზნესს, ღარიბაშვილის სიმამრის ხალხი კი _ რუსთავში. ყვითელი მიკროავტობუსების ბიზნესი მათ შორის გაიყო. მხოლოდ ფული აინტერესებთ “ოცნების” ლოგოთი მოსულ ადამიანებს, ნაციონალების მსგავსად, და არ ფიქრობენ, რა შედეგი შეიძლება მოჰყვეს ამ ყველაფერს. არ შეიძლება, ადამიანებს ხელისუფლება ასე ექცეოდეს და თვითმკვლელობამდე მიჰყავდეს ისინი, ეს არის სისხლის სამართლის დანაშაული. სამწუხაროდ, მძღოლების თვითმკვლელობის შესახებ გამოძიება არ იწყება და ისევ მათზე ხორციელდება ზეწოლა. უშიშროების წარმომადგენლები აგვარებენ კერძო ბიზნესმენების საქმეებს, ანუ იგივე გრძელდება, როცა ნაციონალების დროს პოლიტიკურ დაკვეთას ახორციელებდნენ პოლიციის ჯალათი თანამშრომლები. ახლაც იგივე ადამიანები აკეთებენ იმას, რომ შეწყვიტოს ხალხმა პროტესტი და გატარდეს ხელისუფლებასთან დაახლოებული პირების ინტერესები. ახლა გადმოგცემთ დოკუმენტებს, საიდანაც კარგად ჩანს, რომ შპს “სიტი”-ს დამფუძნებლები და პარტნიორები არიან ზვიად ჯანყარაშვილი, ზაზა ლომიძე და ა.შ. ზვიად ჯანყარაშვილის ქონებრივ დეკლარაციაში კი წერია, რომ დედამისი, ქეთევან თამაზაშვილი არის თამაზ თამაზაშვილის, ღარიბაშვილის სიმამრის და. ასევე, გადმოგცემთ დოკუმენტს, სადაც დაფიქსირებულია, რომ “ინტერტრანსის” 100-პროცენტიან წილსაც ფლობს ზაზა ლომიძე ჯანყარაშვილის პარტნიორი “სიტი”-ში. ამით ყველაფერი უკვე ნათქვამია, ვინ მფარველობს რეალურად ბიზნესს, რომლის გამოც რუსთავში ადამიანები იხოცებიან. მტკიცდება ისიც, რომ ყვითელი სამარშრუტო ტაქსების ბიზნესი გარიგებულია ხელისუფლებასთან და ამ კერძო ბიზნესს ლობირებს საქართველოს მთავრობა. დანარჩენზე დასკვნა საზოგადოებამ უნდა გამოიტანოს. ხალხმა თავად უნდა შეაფასოს, რას წარმოადგენს ხელისუფლებაში მოსული “ოცნება” და რა გზას ადგანან ისინი დღეს. ნაციონალების დროსაც ლობირებდა ხელისუფლება იმ ბიზნესებს და სხვებს ატერორებდნენ,  იგივე ხდება ახლაც. ადამიანები თვითმკვლელობამდე მიჰყავთ. ნებისმიერი მძღოლის გარდაცვალება მათ კისერზეა და პასუხისმგებლობაც აუცილებლად მათ უნდა მოეთხოვოთ. გვაქვს ინფორმაცია, რომ კიდევ შეიძლება განხორციელდეს ამ მძღოლებისგან სუიციდი, რადგან ამ ადამიანს აქვთ უდიდესი ვალები და მისი გადახდის საშუალება აღარ დაუტოვეს. ისინი ხელისუფლების ნაბიჯმა დეპრესიაში ჩააგდო და ეს პროცესი როგორმე უნდა შეჩერდეს. 

ანკა ბაზერაშვილი, გაზეთი „პრემიერი“

FaceBook