ვალერი გელბახიანი: სიმართლის ხელისუფლებაც გვაინტერესებს როგორია და ვერ ვნახეთ...

“პრემიერს” ესაუბრა ვალერი გელბახიანი:

 - ბატონო ვალერი, ადგილობრივ არჩევნებში მონაწილეობას აპირებთ?

- დიახ, ვაპირებ, კენჭი ვიყარო გლდანის რაიონში, სადაც ვცხოვრობ. თუმცა საბოლოო გადაწყვეტილება ჯერ არ მიმიღია, სად და როგორ. გლდანის რაიონი 4 ოლქადაა დაყოფილი. ამიტომ ჯერ ვფიქრობ, სად და როგორ.

- რომელი პარტიიდან?

- მოლაპარაკებები მაქვს რამდენიმე სუბიექტთან. მათ შორის ნინო ბურჯანაძესთან, ასევე, სხვა პარტიებთან.  შეიძლება დამოუკიდებელი კანდიდატი ვიყო. კონკრეტული გადაწყვეტილება ჯერჯერობით არ მიმიღია. კანდიდატი აუცილებლად ვიქნები, მინიმუმ დამოუკიდებელი.

- საარჩევნო კოდექსზე შენიშვნები გქონდათ და ამბობდით, რომ შესაცვლელია, რადგან გაყალბებისგან დაცვის მექანიზმი არ არსებობს. ამჯერად თავად აპირებთ არჩევნებში მონაწილეობას და გაყალბებას გამორიცხავთ?

- არავითარი პირობები გაყალბების გამორიცხვის არ არსებობს. თავისუფალი არჩევნები ნიშნავს იმას, რომ ადამიანი მივიდეს და ვისაც უნდა, იმას მისცეს ხმა. ეს პირობა დაცული იქნება. არავითარი პოლიცია და შეშინება არ იქნება. პროცესი კანონით ისეთნაირად არის გაწერილი, რომ ყველა პირობაა იმისა, არჩევნების მონაცემები იყოს დამახინჯებული და გაყალბებული.

- და თუ ასეა, როგორ აპირებთ ხმების დაცვას?

- ამაზე ჩვენ გავაკეთებთ განცხადებას. ვაპირებ, ეს თემა წამოვწიო. ამ პრობლემის არსი ისაა, რომ ხმები ითვლება ორი პარტიის მიერ. ესაა “ქართული ოცნება” და “ნაციონალური მოძრაობა”. დანარჩენ პარტიებს, რომლებიც დამკვირვებლის სტატუსით არიან მიწვეულები, არ აქვთ უფლება, ახლოდან დააკვირდნენ, ანუ მხედველობის არეალიდან. ამიტომ რომელი ბიულეტენი როგორ გადაიდება, ეს ამ კომისიის შეთანხმების საგანია. ვიდრე არ მიეცემა დამკვირვებელს იმის უფლება, რომ დათვლის პროცესების დროს დაინახოს, რომელი ბიულეტენი საით იდება, მანამდე სულ იქნება გაყალბება. ჩვენ წამოვწევთ ამ თემას, რომ დამკვირვებლის მხედველობის არე არ შეიზღუდოს. დამკვირვებელს შეეძლოს, ნახოს, ვისია ბიულეტენში შემოხაზული ნომერი.

- არსებობს ასეთი ვერსიაც, რომ ნაციონალები ხელისუფლების ძალადობრივი გზით შეცვლას შეეცდებიან და შს მინისტრის განცხადება, რომ “ნაციონალური მოძრაობა” “მაიდანის” მოწყობას გეგმავს, სწორედ ამას ემსახურებოდა. რამდენად შესაძლებელია ეს მოხდეს?

- გამოვრიცხავ ასეთ სცენარებს საქართველოში. არაფრისგან ქმნიან რაღაცას. ხელისუფლებას, პირდაპირ გეტყვით, ჭკუა არ ჰყოფნის, რომ ამ იდეოლოგიას ეწევა. ეს არის ხელოვნური თემები. ანუ ხალხის მოთხოვნებიდან, ხალხის განწყობიდან გამომდინარე, საპირისპირო სურათს ქმნიან. რაც არარეალურია, იმას გვაწვდიან. არ არის “ნაციონალური მოძრაობა” ის ძალა, “მაიდანი” მოაწყოს და ხელისუფლების შეცვლა განახორციელოს. მას რეალურად ძალა არ გააჩნია, მაგრამ ეს სურათი იხატება იმის გამო, რომ ხალხში იყოს განწყობა, რომ ოღონდ ნაციონალები არ მოვიდნენ და “ოცნებას” მისცენ ხმა. დანარჩენი პარტიები გაძევებულია სივრციდან. სპეციალურად ხდება, რომ ორი პოლიტიკური ძალა იყოს - ნაციონალები და “ოცნება”. ეს არის, კიდევ ვიმეორებ, ხელოვნური პროცესი. შეიძლება საქართველოს მოსახლეობის დიდ ნაწილს ამ იდეოლოგიის სჯეროდეს, მაგრამ დრო გავა და მოსახლეობა ირწმუნებს, რომ ეს ახალი ფალსიფიკაცია იყო. ხელისუფლება, რომელიც ცდილობს, ასეთი ფალსიფიკაციებით მართოს, დიდხანს ვერ იქნება. ხელისუფლება, რომელიც უშვებს იმას, რომ შეთითხნილი ვარიაციებით, დაგეგმილი რაღაცით მიაღწიოს მიზანს... ეს არასოდეს ამართლებს. ეს დავინახეთ ამ 30 წლის განმავლობაში. არსებობს სინათლისა და სიბნელის პრობლემა, სიბნელიდან ვითომ 2012 წელს ვთქვით, რომ გამოვედით, მაგრამ თუ დღევანდელი ხელისუფლება აპირებს, ისევ სიბნელეში ამყოფოს ქართული მოსახლეობა, არაფერი გამოუვა. აეხილება ყველას თვალები. შეიძლება დღეს მოტყუვდეს, მაგრამ ხვალ აეხილება. ვურჩევდი ყველას, ვინც ამას გეგმავს, იდეოლოგებს, ნუ ეწყინებათ, მე ვიცნობ რამდენიმეს და არც ერთს არ აქვს არც ცოდნა, არც გამოცდილება და არც ტექნოლოგია იმისა, რომ ეს მეთოდები გამოიყენოს. ახელილი აქვს ყველას თვალი. ნუ ჰგონიათ, რომ მოსახლეობაში იგივე აზრია, რაც 2012 წელს. დღეს სხვა აზრია. დღეს ყველა ხვდება, რომ მათ არ შეუძლიათ ხელისუფლების სრულად განხორციელება. ან ხალხთან მიაღწიონ თანხმობას, ან დაანებონ თავი ამ ბნელ ვარიაციებს. საიდან მოაქვთ, რომ “ნაციონალური მოძრაობა” არის მტერი და თურმე დანარჩენი მოსახლეობა უნდა იყოს მაყურებელი. ასე არ არის. დანარჩენი საქართველო მონაწილეა ამ პროცესებისა. ამ პროცესებში მეტ-ნაკლებად გამოიკვეთება, რომ მთლად ასე არ არის. ამ ტყუილში, ამ სიცრუეში ვერ აცხოვრებ ხალხს. გუშინწინ ამბობდი, რომ სააკაშვილის ხელისუფლება სიცრუის ხელისუფლება იყო, მაგრამ სიმართლის ხელისუფლებაც გვაინტერესებს, როგორია და ვერ ვნახეთ...

- ანუ ეს ხელისუფლებაც სიცრუის ხელისუფლებაა?

- ბუნებრივია. ეს ხელისუფლებაც სიცრუის ხელისუფლებაა. მაშინ რაში სჭირდებათ ეს ხელოვნურობა, რაზეც ვისაუბრე?

- საინტერესოა, მართლაც რაში სჭირდებათ?

- გეტყვით, ეს არის ძალიან სოფლური გათვლა. ანუ, თუ მხოლოდ ნაციონალები იქნებიან ოპონენტები  და ამას დაანახვებენ მოსახლეობას, მოსახლეობა არ მისცემს ხმას “ნაციონალურ მოძრაობას” და მისცემს მათ. აი, მარტივი გათვლა. რაც არ უნდა აპიარო ნაციონალების თემატიკა, როდემდე დააბრალებ “ნაციონალურ მოძრაობას”, ხალხს შედეგი აინტერესებს. კი, ბატონო, დასაჯე დასასჯელი, მაგრამ ალტერნატივა შესთავაზე ხალხს. მიეცი საშუალება, ირწმუნოს, რომ შენ მართალი ხარ და ისიც ირწმუნოს, რომ ხალხზე ზრუნავ. ახლა ახალაიას რომ დაიჭერ, მაგით მე, რა, სამსახურში მოვეწყობი, ხელფასს მომცემს ვინმე, თუ რა? მე მომეცი ამოსუნთქვის საშუალება და დაგიჭერ მხარს მერე იმაში, ამას იჭერ თუ იმას. დაჭერის პოლიტიკა არ არის გამართლებული, როდესაც სოციალური პრობლემატიკაა. ქვეყანას მიხედე, რა...

- კი მაგრამ, დამნაშავე არ უნდა დაისაჯოს?

- შენ უნდა დამანახო, რომ მორალურად ხარ მართალი. შენ ნუ სჩადიხარ იმ დანაშაულს, რისთვისაც სხვას სჯი. როდესაც შენ სჩადიხარ იგივე დანაშაულს და სხვას ედავები, მაშინ რატომ არ ფიქრობ, რომ შენი შემცვლელი ხელისუფლება შენც დაგიჭერს?

- რას გულისხმობთ ამ ხელისუფლების დანაშაულში?

- მე ვხედავ, რომ იგივე მეთოდიკაა, რაც იყო. მოსმენები... გეტყვით მაგალითს, ექსპერტი დაიჭირეს ჟვანიას საქმესთან დაკავშირებით, დაიჭირეს წინასწარ მტკიცებულების გარეშე, ჯერ არ აქვთ ახალი ექსპერტიზის დასკვნა, რომელიც იტყვის, რომ წინა ექსპერტიზის დასკვნა იყო ყალბი. მე იურისტი ვარ და არ ვარ გვერდიდან მაყურებელი. მტკიცებულების გარეშე რომ ადამიანს იჭერ, უნდა ჩავთვალო, რომ შენც იგივე მეთოდებით აგრძელებ. სამართალი არ გაინტერესებს, გაინტერესებს პიარი. არ გაინტერესებს პროცედურა, არ გაინტერესებს მტკიცებულება და ამ დროს მეძალავები და მჯობიხარ იმით, რომ ხელისუფლებაში ხარ. ანალოგიაა ყველგან და ყველაფერში. 

თემურ კალანდაძე, გაზეთი „პრემიერი“

FaceBook