“ოცნების” საარჩევნო კულუარები

საქართველოში საარჩევნო საგიჟეთი იწყება. მართალია, ვიღაცები თვლიან, რომ ადგილობრივი თვითმმართველობის არჩევნებს აზრი არ აქვს, რადგან “ოცნება” თბილისში და, საერთოდ, მთელ საქართველოში პირველ ადგილზე სულ “ჯლიგინ-ჯლიგინით” გავა, მაგრამ, როგორც “პრემიერს” კულუარებში ეუბნებიან, საქმე არც ასე მარტივად არის და “ოცნების” ბოსები უშვებენ ალბათობას, რომ შავი 15 ივნისი გაუთენდებათ.

ამ მხრივ, ყველაზე ცუდი მდგომარეობა კი, როგორც “პრემიერის” კონფიდენტები ამბობენ, რეგიონებშია.

“ხალხს იმედი ჰქონდა, რომ მას შემდეგ, რაც “ნაციონალები” ხელისუფლებას ჩამოშორდებოდნენ, ცხოვრება სულ ცოტათი მაინც გაუმჯობესდებოდა, მით უმეტეს, რომ “ქართულ ოცნებას” 2012 წლის პირველი ოქტომბრის არჩევნებამდე ზღაპრული დაპირებები ჰქონდა, ფაბრიკა-ქარხნებს ავაშენებ, სამუშაო ადგილებს შევქმნი, საწვავი და ელექტროენერგიის გადასახადი გაიაფდებაო, მაგრამ მოსახლეობა ახლაღა ხვდება, რომ ყველაფერი ეს ჩვეულებრივი ბლეფი იყო. ამიტომაც თითქმის ყველა რეგიონში ხალხის განწყობა ერთნაირია _ ან 15 ივნისს არჩევნებში მონაწილეობას საერთოდ არ მიიღებს, ან საარჩევნო უბანზე მივა და “ოცნებას” დიდ ორიანს დაუწერს”, _ აღნიშნავს “პრემიერთან” პრივატული საუბრის დროს საარჩევნო ტექნოლოგიების სპეციალისტი, რომელიც თავის დროზე “ნაციონალების” გვერდით იდგა, მოგვიანებით კი, როგორც სააკაშვილის თანაგუნდელების ნაწილი, ისიც “ოცნების” აქტივისტი გახდა.

კოალიციის საარჩევნო წარმატების ალბათობას კითხვის ნიშნის ქვეშ ისიც აყენებს, რომ ბიძინა ივანიშვილი, რომლის ფაქტორიც 2012 წლის საპარლამენტო და 2013 წლის საპრეზიდენტო არჩევნებში ერთ-ერთი გადამწყვეტი იყო, ფართო ასპარეზზე აღარ ჩანს. მეტიც, ივანიშვილი აღიარებს, რომ მაგალითად, გიორგი მარგველაშვილში შეცდა. შესაბამისად, გამორიცხული არ არის, რომ ადგილობრივი თვითმმართველობის არჩევნებში შემდეგ, თუ დავით ნარმანია თბილისის მერი გახდა, ექსპრემიერი გამოვიდეს და თქვას, თურმე, არც ნარმანია ყოფილა ის, ვინც მეგონაო.

“დავით ნარმანიას, როგორც თბილისის მერობის კანდიდატს, საფრთხე არ ემუქრება, _ უხსნის “პრემიერს” ინფორმატორი, _ “ნაცები” ისედაც შეგუებულნი არიან, რომ 2008 წლის ვადამდელი საპრეზიდენტო და საპარლამენტო არჩევნებიდან მოყოლებული, თბილისს პირწმინდად აგებენ. ამიტომ, როგორც ვიცი, ყოფილი მმართველი გუნდი თბილისის მოგებისთვის თავს მაინცდამაინც არც ამჯერად აიტკივებს. ჩემი ინფორმაციით, “ნაციონალებმა” ზუსტად იციან, რა არის “ოცნების” სუსტი წერტილი და ამიტომ “წერტილოვან დარტყმებს” სწორედ რეგიონებზე მიიტანენ”.

რასაკვირველია, “ოცნებაც” ხვდება, რომ რეგიონები მისთვის აქილევსის ქუსლია. ალბათ, ამიტომაც, “პრემიერის” ექსკლუზიური ინფორმაციით, მმართველმა პარტიამ რეგიონების მიხედვა რომან (რომა) კუსიანს დაავალა.

ვინ არის რომან (რომა) კუსიანი? _ ეს ადამიანი თითქმის 20 წელია, პოლიტიკაშია. შეიძლება, ხმაურიანი განცხადებებითა და გამოსვლებით საზოგადოებისთვის თავი არასოდეს დაუმახსოვრებია, მაგრამ ყველამ, ვინც ქართული პოლიტიკის კულუარებს იცნობს, იცის, რომ კუსიანი საარჩევნო “მოზგი” და ერთგვარი “რუხი კარდინალია”. კუსიანის პოლიტიკური კარიერა აწ განსვენებული პრემიერ-მიისტრის, ზურაბ ჟვანიას ხელშეწყობით დაიწყო და დღემდე ჟვანიას ერთგულად ითვლება. თავის დროზე, როცა ჟვანიამ “მოქკავშირი” დატოვა და “თავისუფალი დემოკრატები” შექმნა, რომა კუსიანი პარტიის ფორმირებაში აქტიურად მონაწილეობდა. უფრო მეტიც, 2008 წლის ვადამდელი საპრეზიდენტო არჩევნების დროს, კუსიანი სააკაშვილის საჩხერის საარჩევნო შტაბს ხელმძღვანელობდა, თუმცა ამ არჩევნების დამთავრების შემდეგ, კუსიანი “ნაციონალებს” საბოლოოდ გაემიჯნა. ამასობაში, ნინო ბურჯანაძემ პარტია შექმნა, სადაც კუსიანიც გამოჩნდა, თუმცა ბურჯანაძის პირველი პუტინური ვიზიტისთანავე, რომან კუსიანმა, ზურაბ ბიგვავასთან ერთად, “ანზოროვნას” პოლიტიკური დაჯგუფება დატოვა და, მოგვიანებით, ირაკლი ალასანიას “თავისუფალი დემოკრატების” წევრი გახდა.

რომან კუსიანი, რომელიც საჩხერელია და, როგორც ამბობენ, მილიარდერ ივანიშვილს წლებია, კარგად იცნობს, “ქართული ოცნების” აქტიური მხარდამჭერი იყო. ამასთანავე, “ოცნების” სხვა აქტივისტების პარალელურად, ნათია მოგელაძემ 2012 წლის პირველი ოქტომბრის საპარლამენტო არჩევნებამდე, პრობლემები კუსიანსაც შეუქმნა და ბინა დაუყადაღა...

ამ ბეგრაუნდის გამო, კუსიანი რეგიონების ხელში დაჭერას შეძლებს, მაგრამ როგორც “პრემიერს” ეუბნებიან, კუსიანის გამოჩენა “რესპუბლიკელებისთვის” შეიძლება, “თავის ტკივილად” იქცეს _ ამბობენ, რომ “რესპუბლიკელებს” დასანახად ვერ იტანს. თუ ეს ინფორმაცია მართალია, მაშინ არსებობს ალბათობა, რომ “ოცნების” საარჩევნო სიებში “რესპები” მინიმალურად, ან საერთოდ არ იყვნენ წარმოდგენილნი. მით უმეტეს, რომ ხმა დადის, ივანიშვილი “ანტირესპუბლიკური” განცხადების გაკეთებას გეგმავსო.

რეგიონების კუსიანისთვის ჩაბარება მაინცდამაინც სასიამოვნო არც დავით საგანელიძისთვის უნდა იყოს, რადგან ამბობენ, რომ საგანელიძეს პრეტენზია ჰქონია, იმერეთის ნაწილი (საუბარია ვანის რაიონზე) თავად აკონტროლოს. ამა თუ იმ რაიონის გაკონტროლების სურვილი უმრავლესობის სხვა წევრებსაც აქვთ. გაკონტროლება კი იმას ნიშნავს, რომ ადგილობრივ თვითმმართველობებში საკუთარი ნდობით აღჭურვილი პირები გაიყვანონ და მუნიციპალიტეტის გამგებლებადაც მართული სუბიექტები დასვან.

ამასთანავე, კულუარებში, პრაქტიკულად, აღარავინ მალავს, რომ “ოცნების” ე.წ. ღარიბაშვილ-ივანიშვილის ფრთა თავდაცვის მინისტრ ირაკლი ალასანიას მოცილებას ცდილობს. იმასაც ამბობენ, რომ ბოლო დროს ქართულ მედიასა და სოციალურ ქსელებში ალასანიას “მამხილებელი მასალების” გავრცელებას თითქოს ხელისუფლება უწყობს ხელს.

“პრემიერის” წყაროს თქმით, ღარიბაშვილ-ალასანიას დაპირისპირებას საფუძველი ჯერ კიდევ 2012 წლის პირველი ოქტომბრის საპარლამენტო არჩევნებამდე ჩაეყარა, როცა ივანიშვილმა საარჩევნო სიაში პირველ ნომრად ღარიბაშვილი ჩაწერა.

“ალასანია მაშინვე მიხვდა, რომ ივანიშვილი პრეზიდენტად არ დაასახელებდა და კოალიციაში საკუთარი გუნდის გაძლიერება დაიწყო. ალბათ, გახსოვთ, საპრეზიდენტო არჩევნების წინ, ხალხში ხმა დადიოდა, რომ ალასანია თავდაცვის მინისტრობიდან გადადგებოდა და კენჭს ისე იყრიდა, როგორც დამუკიდებელი საპრეზიდენტო კანდიდატი. ეს იდეა მართლაც არსებობდა, მაგრამ ალასანიას ამერიკელებმა ურჩიეს, რომ მოთმინება გამოეჩინა და ნაჩქარევი გადაწყვეტილება არ მიეღო”, _ უხსნის “პრემიერს” კონფიდენტი.

რაც შეეხება “ოცნების” საარჩევნო სიებს, როგორც “პრემიერმა” ინფორმატორებისგან შეიტყო, “ოცნებაში” ერთგვარი უშიშროების სამსახურია შექმნილი, რომელიც თვითმმართველობის სავარაუდო კანდიდატებს, ანუ მათ, ვინც შეიძლება, სიაში აღმოჩნდნენ, ან მაჟორიტარობის კანდიდატად დარეგისტრირდენ, “ლუპის ქვეშ” ატარებს _ რამდენიმე გამოცდილი სპეცსამსახურელი “ობიექტს” ხვდება (შეხვედრები ძირითადად, თურმე, “საინტერესო პირის” სახლში ეწყობა) და, დაახლოებით, ისეთ კითხვებს უსვამს, აი, აშშ-ის მოქალაქეობის მიღების პროცედურისას რომ ისმება.

კიდევ ერთი საინტერესო ინფორმაცია, რომელიც “პრემიერს” მოაწოდეს, ისაა, რომ თბილისში, არჩევნებში მონაწილეობა, როგორც მაჟორიტარობის კანდიდატმა, შესაძლოა, რამდენიმე ისეთმა ცნობილმა სახემ მიიღოს, რომელიც ბოლო დროს პოლიტიკური აქტიურობით მაინცდამაინც აღარ გამოირჩევა. მაგალითად, ლაპარაკია ყოფილ პარლამენტარ ხათუნა ხოფერიაზე, რომელიც გადაუმოწმებელი ინფორმაციით, შეეცდება, საკრებულოში ვაკის მაჟორიტარი გახდეს. ასევე, გადაუმოწმებელი ინფორმაციით, ერთ-ერთი რაიონის გამგებლობისთვის შესაძლოა, თავდაცვის ყოფილმა მინისტრმა, გია ყარყარაშვილმაც იბრძოლოს.

ალექსი ნოძაზე, გაზეთი "პრემიერი"

FaceBook