სანდრო ბრეგაძე: “ირაკლი ღარიბაშვილმა კი განაცხადა, კადრებს სანთლით ვეძებო, მაგრამ ეტყობა, მარტო ის ეძებს”

“საქართველოში სერიოზული პოლიტიკოსები არიან, მაგრამ დღეს მათი ადგილი დამკვრელებსა და მოცეკვავეებს უჭირავთ”

 “მარტვილის რაიონში არსებობენ კანდიდატურები, რომლებიც უწინ “მხედრიონელები” იყვნენ” 

ადგილობრივი თვითმმართველობის არჩევნებში მონაწილეობის მისაღებად, არასაპარლამენტო ოპოზიციური ძალებიდან, ჯერჯერობით, მხოლოდ “დემოკრატიული მოძრაობა”, “ქდმ”, “მემარჯვენები” და “ქართული დასი” გაერთიანდნენ, თუმცა არსებობენ პოლიტიკური პარტიები, რომლებიც არჩევნებში მონაწილეობას არ აპირებენ. ერთ-ერთი მათგანი მოძრაობა “ეროვნულებია”, რომლის ლიდერი სანდრო ბრეგაძეც ირწმუნება, რომ ყველაფერს გააკეთებს იმისთვის, რათა თბილისის საკრებულოსა და რაიონების მმართველობაში “ნაციონალური მოძრაობის” ისტორიასთან და “მხედრიონთან” დაკავშირებული პირები არ მოვიდნენ. ამის შესახებ “ეროვნულების” ლიდერმა მას შემდეგ განაცხადა, რაც არაოფიციალურად ცნობილი გახდა, რომ თბილისის საკრებულოს თავმჯდომარე ირაკლი შიხიაშვილი ადგილობრივი არჩევნების საარჩევნო სიის მიღმა რჩება და  შესაბამისი გადაწყვეტილება “ქართული ოცნების” გენერალურ მდივანს კახი კალაძეს მიუღია.

“პრემიერი” სანდრო ბრეგაძეს ესაუბრა.

- კახი კალაძე საკუთარ განცხადებაში “ნაციონალური მოძრაობის” ყოფილ წევრებს, აქტივისტებსა და შემდეგ უმრავლესობაში პორტირებულ პერსონებს გულისხმობს, მაგრამ თქვენ რა ბერკეტი გაქვთ საიმისოდ, რომ საარჩევნო სიები და შემდეგ საარჩევნო პროცესი აკონტროლოთ?

- პირველ რიგში, პირადი კონტაქტები და ავტორიტეტი მაქვს. ეს არის მთავარი, რაც შეიძლება ადამიანს ჰქონდეს საზოგადოების გარკვეულ ნაწილში. ამ შემთხვევაში, თუკი, მმართველ გუნდზე ვისაუბრებთ, იქ საკმაოდ ბევრი მეგობარი მყავს, რომელთათვისაც ჩემი გარკვეული მოსაზრებები გასათვალისწინებელია. ხელისუფლებაში მყოფ ჩემს მეგობრებს რომ ეწყინოთ კიდეც, მართლა ყველაფერს გავაკეთებ, თავს შევაკლავ, რომ თბილისის საკრებულოში და დანარჩენი ქვეყნის თვითმმართველობის დონეებზე ზონდერჯგუფებთან და  შევარდნაძის “ჩამყაყებულ” რეჟიმთან დაკავშირებული მოღალატეები არ მოვიდნენ. მე ბევრთან უკვე ვისაუბრე ამ თემაზე და ვიცი მათი პოზიცია, რომელიც ჩემი პოზიციის იდენტურია. მათაც იგივე სურთ, მაგრამ, სამწუხაროდ, ზოგჯერ პირიქით ხდება ხოლმე. ასეთი რამ რომ არ განმეორდეს, ამისთვის საჭიროა საზოგადოების ყველა ფენის წარმომადგენელმა ხმა აღიმაღლოს, რადგან მედროვეების, ყვარყვარეების დრო, ჩემი აზრით, წასულია და მართლაც უხერხულია, რომ ქართველი ერის ბრძოლით მოპოვებულ ხელისუფლებაში, თვითმმართველობის ორგანოებში კვლავ სახე და ფერშეცვლილი “ნაციონალები” მოვიდნენ. მე არანაირი სურვილი და გეგმა არა მაქვს, რომ რომელიმე ადგილობრივი ხელისუფლების ორგანოში ვიყარო კენჭი.

- რატომ?

- ეს არ არის ის არჩევნები და ის ორგანო, რომელსაც ჩემთვის გადამწყვეტი მნიშვნელობა აქვს. თავს არ მივცემ უფლებას, რომ იქ, სადაც ჩემს ადგილს ვერ ვხედავ, კენჭი ვიყარო. აქედან გამომდინარე, არანაირი პირადი ინტერესი არ მაქვს, იმის გარდა, რომ ერთი მიზანი მამოძრავებდეს. ჩემდა სამწუხაროდ, ყოფილი “ნაციონალები” ბევრად უფრო გაქნილები აღმოჩნდნენ, ეს განსაკუთრებით რაიონებს ეხება. ის ადამიანები, რომლებიც მანამდე “ქართული ოცნების” წინააღმდეგ ბრძოლაში აქტიურად მონაწილეობდნენ, უკანა პოზიციებზე გადავიდნენ და წინა პლანზე ყვარყვარეები წამოვიდნენ. ათასნაირი ტერმინი შეიძლება ვიხმარო მათ წინააღმდეგ. 

- სახელმწიფო სტრუქტურებში ბევრ რამ პროფესიონალ კადრებზეა დამოკიდებული. რაკი კადრების დეფიციტზე პრემიერ-მინისტრიც ხმამაღლა საუბრობს, ხომ არ უნდა ვიფიქროთ, რომ “ნაციონალების” პორტირება სახელმწიფო სტრუქტურაში ამ პრობლემის გამო მოხდა?

- ვინმე თუ გამაკვირვებს იმით, რომ “ნაციონალები” პროფესიონალები არიან და მათი შენარჩუნება ამისთვის არის საჭირო, უბრალოდ, გამაცინებს. რეალურად “ნაციონალების” ფერის შეცვლა მხოლოდ და მხოლოდ პირადი ურთიერთობებით, ნაცნობობით ხდება და არა ვიღაცის კომპეტენტურობის ნიშნით. ირაკლი ღარიბაშვილმა კი განაცხადა, კადრებს სანთლით ვეძებო, მაგრამ ეტყობა, მარტო ის ეძებს. მის გარშემომყოფებს სანთლები ჩამქრალი აქვთ და ჩამქრალი სანთლებით ეძებენ. რა თქმა უნდა, კადრები არსებობს, მაგრამ პირდაპირ ვთქვათ, რომ სინამდვილეში ეს კადრები ხშირად ხელოვნურადაა ბლოკირებული. ამას წინათ, ერთ შესანიშნავ ადამიანზე მაღალ ეშელონებში ვიკითხე, რატომ არ იყენებენ მის უდავოდ დიდ პოტენციალს, რატომ არის ის იგნორირებული-მეთქი და განსაცვიფრებელი პასუხი მივიღე, - როგორც კადრი, შესანიშნავია, მაგრამ უმართავიაო. ე.ი. საქართველოში თანამდებობაზე, ან ხელისუფლებაში, არსებობს ასეთი კრიტერიუმი - უნდა იყო მორჩილი, კონფორმისტი და ამავე დროს, ცოტა მოდებილოც. მნიშვნელოვან საკითხებზე საკუთარი აზრი არ უნდა გქონდეს, უტყვი მორჩილი, ბრძანებების შემსრულებელი უნდა იყო და კითხვაც არ უნდა დასვა.

- ვინ არის ეს პიროვნება, იქნებ დააკონკრეტოთ...

- სამწუხაროდ, მასთან შეუთანხმებლად ვერ დავასახელებ, რადგან შეიძლება შეურაცხყოფად მიიღოს.

- ფიქრობთ, რომ ადვილად სამართავი ადამიანებით სახელისუფლებო სტრუქტურების დაკომპლექტება საქართველოში ახალი ამბავია?

- საქმე ისაა, რომ მე მინახავს ასეთი მმართველობები საქართველოში და ყველა მათგანმა ძალიან ცუდად დაამთავრა. ყველაფერს რომ თავი დავანებოთ, ასეთი მმართველობა ქვეყნის პროგრესს გამორიცხავს. ვფიქრობ, ეს ძალიან სერიოზული პრობლემაა და საუბარი იმაზე, რომ კადრები სანთლითაა საძებარია, პირდაპირ ვიტყვი, არამართებულია. სანთლებით არავინ არავის არსად არ ეძებს.

- გავლენიანი ნაცნობობის გამოვლინებად არ მიგაჩნიათ ის, რომ “ქართული ოცნების” საარჩევნო სიების დაკომპლექტებაში სიტყვა გეთქმით და კონსულტაციის გაწევის უფლება გაქვთ? 

- არანაირი კონსულტანტი არა ვარ, არის მხოლოდ მეგობრული ურთიერთობები და საუბრები. არ მინდა ასეთი საუბარი, მთავარია, საქმე გაკეთდეს და მოისპოს ის “მუწუკები”, რომელიც ყველა ხელისუფლებაში ამოდის ხოლმე და ამ ხელისუფლებაშიც ამოვიდა, თორემ ვისი დამსახურება და ვისი კონსულტაციების შედეგი იქნება, ეს მეორეხარისხოვანია. კახა კალაძემ  ძალიან ადეკვატურად განაცხადა, რომ “ნაციონალებთან” კითხვებით დაკავშირებული ადამიანები არ უნდა იყვნენ ხელისუფლების კართან. სხვათა შორის, მე ვფიქრობ, რომ არც “მხედრიონთან” დაკავშირებული ადამიანები უნდა იყვნენ. ჩემთვის მეტად საოცარია, რომ სამეგრელოს რეგიონში სწორედ “მხედრიონთან” დაკავშირებული ბევრი ადამიანი ცდილობს, მმართველი კოალიციის მეშვეობით მოვიდნენ ადგილობრივ ხელისუფლებაში. იმედია, რომ ეს არ მოხდება, მაგრამ ინფორმაცია მაქვს, რომ ისინი ამას ცდილობენ. მარტვილის რაიონში არსებობენ კანდიდატურები, რომლებიც უწინ “მხედრიონელები” იყვნენ. ჯერ საქართველოს უახლეს ისტორიაში “მხედრიონელი” რას ნიშნავს და ახლა წარმოიდგინეთ, სამეგრელოში...

- ალბათ, ასეთ ადამიანებსაც სხვა უფრო გავლენიანი პირები უწევენ რეკომენდაციას...

- აქ საინტერესო არ არის, ვინ უწევს ასეთ ადამიანებს ლობირებას, მე არ მინდა მმართველი გუნდის გამცხრილავი გამოვიდე. ვფიქრობ, ამას თვითონ შეძლებენ და თუ ვერ შეძლებენ, ისევ მათთვის იქნება ცუდი. “ნაციონალებმა” არა თუ ადვილად შეძლეს კოჰაბიტირება, არამედ “ქართული ოცნების” პატიოსანი ხალხი (მე მატყუარასაც ბევრს ვიცნობ, 1-ლი ოქტომბრის საპარლამენტო არჩევნებამდე ერთად ვიბრძოდით და მანამდეც), ჩაანაცვლეს და თვითონ წამოვიდნენ წინა პლანზე. ყველაზე საშინელებაა ეს და საშიშიც არის. ვფიქრობ, დიდი სიფრთხილეა საჭირო, რომ ადგილობრივ არჩევნებში ისევ არ გაიმარჯვონ “ნაციონალებთან” დაკავშირებულმა პირებმა. ყოფილი “ნაციონალი” არ არსებობს, ისევე, როგორც არ არსებობს ყოფილი კახპა და თუ ვინმეს იმის ილუზია აქვს, რომ ყოფილ “ნაციონალს” ზურგზე ფრთები გამოუვიდა, ის ან თავს იტყუებს, ან ინტელექტისგან დაცლილია, ან რეალურად ვერ ხვდება, რა ხდება ქვეყანაში და მის გარშემო.

- რიგგარეშე საპარლამენტო არჩევნების აუცილებლობის შესახებ  ხმამაღლა განაცხადა უმრავლესობის ყოფილმა წევრმა გია გაჩეჩილაძემ. ემხრობით თუ არა, ან გაქვთ თუ არა ინფორმაცია, რომ ხელისუფლებაში მას მხარდამჭერებიც ჰყავს?

- რიგგარეშე საპარლამენტო არჩევნები საქართველოს, როგორც სახელმწიფოს, განვითარებისთვის სასიცოცხლო აუცილებლობაა. პარლამენტში ვიღაცები სხედან და ფიქრობენ, 4-5 წელი კიდევ ვიყოთ, რა სჯობია “ნაციონალურ მოძრაობას”, როგორც კი ჩვენს კრიტიკას დაიწყებენ, მაშინვე წამოვაძახებთ, თქვენ 9 წელი რას აკეთებდითო. ბევრი ფიქრობს, რომ “ნაციონალური მოძრაობა” გალახული, დისკრედიტებული პარტიაა, მუდმივად შეიძლება მათ კომპრომატებზე საუბარი და სჯობს, გალახული მოწინააღმდეგე გყავდეს, ვიდრე გაულახავი. ამიტომ უნდათ, შეინარჩუნონ “ნაციონალური მოძრაობა” პარლამენტში და ჰგონიათ, რომ ეს პრაგმატული ნაბიჯია. სინამდვილეში ეს არც პრაგმატული ნაბიჯია, არც ზნეობრივი და არც მორალური. რიგგარეშე არჩევნები ისეთივე საჭიროებაა, როგორც ადამიანის სიცოცხლისთვის ჰაერი და წყალი. თუკი მართლა გვინდა, რომ ქვეყანაში დემოკრატია განვითარდეს და ნორმალურ ქვეყანაში ვიცხოვროთ. პარლამენტში ახლა ნინო ბურჯანაძე, ან კახა კუკავა რომ იყოს ოპოზიციური პარტიის თავმჯდომარე, “ქართული ოცნებიდან” მათ ვერ წამოაძახებენ, აქამდე სად იყავითო. ასეთი ოპოზიციის წარმომადგენლებმა შეიძლება “ქართული ოცნების” ბევრ წევრს იქით უთხრან, შენ თვითონ სად იყავიო.

- არ ფიქრობთ, რომ რიგგარეშე საპარლამენტო არჩევნებს თავად “ქართულ ოცნებაში” ეწინააღმდეგებიან და ასეთი ხალხი ძალიან ბევრია, მათ შორის, აღმასრულებელ ხელისუფლებაშიც?

- მოდით, პირდაპირ ვთქვათ, პარლამენტში ბევრი ისეთი დეპუტატია, ვინც მართლა შემთხვევით მოხვდა პარლამენტში და ამის შესახებ ბიძინა ივანიშვილმაც არაერთხელ აღნიშნა. სამწუხაროდ, ბევრი მოხვდა იქ ისე, რომ პარლამენტი რას ნიშნავს, არც დღეს იციან. ეს შეიძლება კატასტროფის მომტანი აღმოჩნდეს ქართული სახელმწიფოებრიობისთვის. ადამიანებისთვის შეურაცხყოფის მიყენება არ მინდა, თუმცა, თავადაც მშვენივრად იციან, რომ ასეა. მაგალითად, მახსენდება 2003 წელი, როდესაც ნახევარი საქართველო ვარდით ხელში ქუჩა-ქუჩა დარბოდა და მიშა-მიშას გაჰყვიროდა. მაშინ ვინმეს ამ ეგზალტირებული ბრბოსთვის სიმართლე რომ ეთქვა, მიხეილ სააკაშვილი გიჟია და რეგრესის მეტს არაფერს მოიტანსო, ალბათ, იქვე ჩაქოლავდნენ. ამ ერთი უკეთური კაცის გამო, 9 წელი დავკარგეთ. ვფიქრობდით, ამ მწარე გამოცდილების შემდეგ მაინც გამოფხიზლდებოდა ქართველი ერი და მიხვდებოდა, რომ ქვეყანას არა რომელიმე პიროვნება, არამედ თავად საზოგადოება გადაარჩენს, რომელმაც თავისი ფუნქცია უნდა იტვირთოს. დღესაც იგივე სინდრომია და ისევ ვარდითა და ტიტებით სირბილის ნოსტალგია იგრძნობა. მერწმუნეთ, რომ ისევ დიდ იმედგაცრუებას მივიღებთ. საქართველოს მოსახლეობამ ერთობლივად უნდა მართოს ქვეყანა. გამოსავალი მხოლოდ ქვეყნის კოლექტიურ-დემოკრატიულ მმართველობაშია და არა იმაში, რომ ვიღაცა რაღაცას იტყვის და მესია გამოჩნდება. ეს მესიანიზმი უნდა დასრულდეს. დღევანდელი პარლამენტი საქართველოს მოსახლეობის ნების გამოხატულებას არ წარმოადგენს. 40% რომ მხარს არ უჭერს “ნაციონალურ მოძრაობას”, მგონი, ისეთმა თავგადაკლულმა “ნაციონალებმაც” იციან, როგორიც, მაგალითად, ჩიორა თაქთაქიშვილია. “ნაციონალური მოძრაობის” ხელოვნურად შენარჩუნება ისეთივე ტიპის დანაშაულია, როგორც მისი წევრობა.

- არასაპარლამენტო პოლიტიკური ძალებიდან ნინო ბურჯანაძე და “ქდმ” ერთად გავლენ არჩევნებში. მათი პოლიტიკური რესურსი იმოქმედებს თუ არა ალტერნატიული ოპოზიციის გაძლიერებაზე?

- თავად ნინო ბურჯანაძე პოლიტიკური ფიგურაა, მას ჰყავს თავისი მხარდამჭერები. ვფიქრობ, მესამე პოლიტიკური ძალის მხარდაჭერა ნელ-ნელა გაიზრდება და უკვე გაზრდილიც არის. რამდენად წარმატებას მიაღწევს ეს მესამე ძალა, თავად იმ ნაბიჯებზე იქნება დამოკიდებული, რომელსაც გადადგამენ. ჯერჯერობით, ქმედითი ნაბიჯი არ გადაუდგამთ, იმის გარდა, რომ თბილისის მერობის კანდიდატად მართლაც ღირსეული პიროვნება - დიმიტრი ლორთქიფანიძე დაასახელეს. ეს ადამიანი სერიოზული კანდიდატია, დანარჩენს კი დრო გვიჩვენებს. ვფიქრობ, რომ “ნაციონალურმა მოძრაობამ” არ უნდა იარსებოს და სწორედ დღევანდელმა არასაპარლამენტო ოპოზიციურმა ძალებმა, რომლებიც დაკავშირებული არ იყვნენ “ნაციონალურ მოძრაობასთან”, უნდა იტვირთონ ქვეყანაში ოპოზიციის ფუნქცია. ეს არის ლოგიკა და საქართველოს მოსახლეობის პოლიტიკური დაკვეთა. ვისაც არ სჯერა, რომ “ნაციონალური მოძრაობის” პოლიტიკურ ოპოზიციად არსებობა ხელოვნური პროცესია, დანიშნოს რიგგარეშე საპარლამენტო არჩევნები და საკუთარი თვალით ნახოს, რომ ამ პოლიტიკურ ძალას, 5%-იანი ბარიერის გადალახვა ძალიან გაუჭირდება. პოლიტიკაში მსახიობების, მუსიკოსების დრო უნდა დასრულდეს. ერთადერთი მსახიობი, რომელმაც პოლიტიკაში წარმატებას მიაღწია, როლანდ რეიგანი იყო, რომელიც პოლიტიკაშიც და ზოგადადაც, სულ სხვა ფენომენი იყო. დარწმუნებით შემიძლია გითხრათ, საქართველოში სერიოზული პოლიტიკოსები არიან, მაგრამ დღეს მათი ადგილი დამკვრელებსა და მოცეკვავეებს უჭირავთ.

ხათუნა ხატიაშვილი, გაზეთი "პრემიერი"

FaceBook