ბიძინას ჰობი - ადამიანებით თამაში

"მსოფლიოს უმდიდრეს ადამიანებს სხვადასხვა ჰობი აქვთ. აი, მაგალითად, ზოგი ცხოველთა უფლებების დაცვის საზოგადოებას ქმნის, ზოგიც მილიონებს ჭიანჭველებში უშვილობის პრობლემების დაძლევაში ხარჯავს. ბიძინასთვის კი ჰობი ადამიანებით თამაშია. რა, ვერ ატყობთ, რომ საქართველო საკუთარ შპს-დ გადააქცია და იმას აკეთებს, რაც მოუნდება? მოკლედ, ბიძინა თვლის, რომ ღმერთიც თვითონ არის და კონსტიტუციაც და ვაი, მას, ვინც არ დაემორჩილება, - ამბობს "პრემიერის წყარო, რომელიც რამდენიმე წლის წინანდელ ამბავსაც იხსენებს, როცა ივანიშვილმა საკუთარი ნათესავი, სულ რაღაც, 6 თუ 10 ათასი ლარის "მოტეხისთვის დააჭერინა.

ისე, თუ კარგად დააკვირდებით, მიხვდებით, რომ მილიარდერს "მეგობრების შერჩევა მაინცდამაინც არ ეხერხება - ჯერ იყო და, მიხეილ სააკაშვილში შეცდა, ახლა - მარგველაშვილში. საერთოდ, იმაზე, რომ ბიძინამ "მარგველაზე გული აიცრუა, ბევრი ითქვა და დაიწერა, მაგრამ რეალურად რა გახდა ამ "გულაცრუების საბაბი?

***

ოცნებობდა, ნეტავ, მიხეილ სააკაშვილის ლოგიკა მქონდეს, ირაკლი ალასანიას - გარეგნობა და ნინო ბურჯანაძის - პოლიტიკური გამოცდილებაო. ჰოდა, ამ ოცნება-ოცნებაში აღმოაჩინა, რომ - არც მეტი, არც ნაკლები - პლასტელინისაა. ისე, ყოფილ პრემიერსა და ამჟამად ქვეყნის მთავარ მოქალაქეს, მილიარდერ ბიძინა ივანიშვილსაც ეგონა, რომ პლასტელინის იყო და ამიტომ თავის ჭკუაზე ათამაშებდა, მაგრამ ნურას უკაცრავად - პრეზიდენტი გიორგი მარგველაშვილი კერკეტი კაკალი აღმოჩნდა!

როგორც "პრემიერის კონფიდენტები ამბობენ, მარგველაშვილისა და ივანიშვილის ურთიერთობაში პირველი ბზარი 2013 წლის 27 ოქტომბრის საპრეზიდენტო არჩევნების წინ გაჩნდა - ალბათ, გახსოვთ, მომავალი პრეზიდენტის საარჩევნო პიარს სათავეში ჟურნალისტი შალვა რამიშვილი ედგა. ჰოდა, ბიძინას უთქვამს, რამიშვილი მაინცდამაინც არ მესიმპათიურებაო. "მარგველას ეს შენიშვნა "გაუტარებია. ჰოდა, ბიძინა აფეთქებულა, იმის ღირსადაც არ მთვლის, რომ პასუხი გამცესო, მაგრამ გარემოცვას დაუმშვიდებია, რამიშვილი პიარის შეფი ფორმალურადაოო...

"პრემიერის სამთავრობო წყაროებს თუ დავუჯერებთ, პრეზიდენტ მარგველაშვილისა და მოქალაქე ივანიშვილის "დატაკების მიზეზი ამჯერადაც პიარი გახდა, ოღონდ ახლა, ბიძინას "გართულება შალვა რამიშვილზე კი არა, ირაკლი ალასანიას ცოლისძმის ცოლზე, ანუ მარტივად რომ ვთქვათ, გურამ ფანჯიკიძის რძალზე დასწყებია, რომელიც პრეზიდენტის ადმინისტრაციაში, თურმე საზოგადოებასთან ურთიერთობებს კურირებს.

როგორც წყარო პრივატულ საუბარში ამბობს, ივანიშვილს მარგველაშვილისთვის ღია ტექსტით უთქვამს, ვიცი, რომ შენი მეგობარია და იმას არ გეუბნები, რომ ეგ ქალი პრეზიდენტის ადმინისტრაციაში არ დაასაქმო, მაგრამ მაინცდამაინც საზოგადოებასთან ურთიერთობის სამსახურს ნუ ჩააბარებო.

მარგველაშვილს "მამა-მარჩენალის რჩევა ამჯერადაც ყურს იქით გაუშვია. ჰოდა, ბიძინა უკვე ისე აფეთქებულა, რომ ქოში სულ უკუღმა უყრია.

ამასობაში, "მარგველამ ცეცხლზე ნავთი დაასხა და სახელმწიფო კანცელარიიდან პრეზიდენტის ავლაბრის რეზიდენციაში გადაბარგდა, რის გამოც ქვეყნის პირველი მოქალაქე მთლად შეშლილა.

"ბიძინა ასეთი გაბრაზებული არასოდეს მინახავს. ერთხანობას იმაზეც კი ფიქრობდა, რომ რამე სამართლებრივი მექანიზმი მოეძებნა და მარგველაშვილი პრეზიდენტობიდან გადაეყენებინა, მაგრამ "რესპუბლიკელებმა და უმრავლესობის იმ წევრებმა, რომლებიც კანონებში სხვებზე უკეთესად ერკვევიან, მილიარდერი დაარწმუნეს, რომ მარგველაშვილის გადაყენება საერთაშორისო სკანდალი იქნებოდა და იმაზე მეტი აჟიოტაჟი მოჰყვებოდა, რაც მიხეილ სააკაშვილის მთავარ პროკურატურაში მოწმის სტატუსით დაბარებას მოჰყვა... მოკლედ, ბიძინა ყველაფერს აკეთებს, რომ გიორგი მარგველაშვილი მიწასთან გაასწოროს. ის აჟიოტაჟიც, თუ ვინ მოაწერს ხელს ევროკავშირთან პარაფირების ხელშეკრულებას, სწორედ ამის შედეგია - ივანიშვილმა პრემიერ ღარიბაშვილს, პრაქტიკულად, უბრძანა, ყველაფერი გააკეთე, რომ ხელშეკრულებას ხელი შენ მოაწეროო, - უამბობს "პრემიერს ინფორმატორი, რომელიც პირად საუბარში იმაზეც მიანიშნებს, რომ ბოლო დროს ივანიშვილს პატარ-პატარა წინააღმდეგობებს ირაკლი ღარიბაშვილიც უწევს.

მარგველაშვილ-ივანიშვილის "მტრობის კიდევ ერთი, ასე ვთქვათ, დეტალი, თურმე მსახიობი მაკა ჩიჩუაა, ანუ გასაგებად რომ ვთქვათ, პრეზიდენტობა შეუთავაზებია თუ არა, ივანიშვილს მარგველაშვილისთვის იმპერატიულად მოუთხოვია, წლებია, ერთად ხართ, ხომ იცი, როგორ ქვეყანაში ვცხოვრობთ და ხალხმა ჭორაობა რომ არ დაიწყოს, არჩევნებამდე მაკა ცოლად შეირთე და ერთი გემრიელი ქორწილიც ვჭამოთო, მაგრამ "პლასტელინას ქვა აუგდია და თავი შეუშვერია, ცოლად ვის შევირთავ, ეს ჩემი საქმეაო. რაკი ასეა, შენ გაჩვენებ სეირსო, დამუქრებია ივანიშვილი.

"ღარიბაშვილი პრემიერად რომ წარადგინა, ალბათ, გახსოვთ, ივანიშვილმა საზოგადოებას ირაკლის ცოლიც გააცნო და სულ ღიმილ-ღიმილით თქვა, აი, გაიცანით, თქვენი მომავალი პირველი ლედიაო... მართალია, "ოცნება თითქოს მონოლითური ერთიანობაა, მაგრამ ამ კოალიციის წევრები ერთმანეთთან ისე არიან, როგორც თხა და მგელი, ანუ "ოცნებაში არის ხალხი, რომლისთვისაც ბიძინას სიტყვა კანონია. შესაბამისად, მათთვის პირველი ლედი ღარიბაშვილის ცოლია და პრეზიდენტმა მარგველაშვილმა ჯვარიც რომ დაიწეროს, ჩიჩუას პირველ ლედად მაინც არ აღიარებს, - აღნიშნავს "პრემიერთან საუბრისას კონფიდენტი.     

რაც შეეხება საპარლამენტო უმრავლესობისა და ყოფილი და მოქმედი პრემიერების ურთიერთობას, როგორც "პრემიერის კონფიდენტები ამბობენ, ისე გადის დღეები, კვრები და თვეები, რომ ივანიშვილსა და ღარიბაშვილთან დაკონტაქტებას საპარლამენტო კომიტეტების თავმჯდომარეებიც ვერ ახერხებენ. ამასთანავე, უმრავლესობის წევრები ერთმანეთს, თურმე, ეჭვის თვალით უყურებენ და ცდილობენ, ზომაზე მეტი არაფერი თქვან, რადგან არავინ იცის, "მამა-მარჩენალს ინფორმაციას ვინ და რა ფორმით მიაწვდის. სხვათა შორის, როგორც "პრემიერმა გაარკვია, ძალიან ბევრი დეპუტატი, რომელიც თავის დროზე ბიძინას ნდობით სარგებლობდა, ბოლო დროს "ცაიტნოტშია - არსებობს ვერსია, რომ მათ შესახებ ვიღაცამ ივანიშვილს "ენა მიუტანა. ვინ არის ეს "ვიღაც? - ამის დადგენას უმრავლესობა ამაოდ ცდილობს. 

"ამდენი ხანია, ვცდილობ, გავარკვიო, როგორ, ან ვისი საშუალებით შეიძლება პრემიერთან შეხვედრა, მაგრამ ჩემი მცდელობა ამაოა. არადა, უამრავი საკითხია, რაზეც ღარიბაშვილის აზრი და პოზიცია მაინტერესებს... სიმართლე გითხრათ, კომუნიკაცია პრემიერ ივანიშვილთანაც ჭირდა, მაგრამ მაშინ სიტუაცია ცოტა უკეთესი იყო - ივანიშვილი ვინმეს პირით შემომითვლიდა, ესა და ესაა გასაკეთებელიო. ღარიბაშვილი კი ასეთ მესიჯებსაც არ გვაძლევს, - ამბობს "პრემიერთან პრივატულ საუბარში უმრავლესობის ერთ-ერთი ლიდერი.

სხვათა შორის, ყოფილ პრემიერთან კავშირის დამყარება, როგორც "პრემიერმა გაარკვია, საზოგადოებისთვის ცნობად იმ სახეებსაც უჭირთ, რომლებიც თავის დროზე "ქართული ოცნების საარჩევნო კამპანიაში ივანიშვილის უშუალო თხოვნით ჩაერთვნენ.

ის, რომ ივანიშვილი განდეგილივით ცხოვრობს, ახალი არ არის - 2011 წლის შემოდგომამდე მასზე მხოლოდ ლეგენდები დადიოდა და ბევრმა ისიც კი არ იცოდა, როგორ გამოიყურებოდა.

რატომ იმალება ივანიშვილი? - ამაზე საუბარი ანალიტიკოსებსაც უჭირთ, თუმცა ამბობენ, რომ დამალვა "ბოსების ერთგვარი თვისებაა.

გეგა სილაგავა, გაზეთი "პრემიერი"

FaceBook