სამი სცენარი, რომლითაც კრემლი საქართველოში სიტუაციას არევს

ჰყავს თუ არა საქართველოს კონტრდაზვერვა

რუსეთის საელჩოს შემდეგ, გაპუტინებული ქართველების მცირერიცხოვანი ჯგუფი “კინოს სახლში” შეიკრიბა და იმის დემონსტრირებას შეეცადა, რა ცუდია ჩრდილოატლანტიკური ალიანსი და როგორ დაღუპავს დასავლეთი საქართველოს. ადგილობრივი თვითმმართველობის არჩევნებსა და ევროკავშირთან ასოცირების ხელშეკრულების ხელმოწერამდე, მსგავსი რუსული პროვოკაციები, მთელი ქვეყნის მასშტაბით, პერმანენტულ ხასიათს მიიღებს, ანუ, სხვა სიტყვებით რომ ვთქვათ, კრემლი ყველაფერს გააკეთებს, რომ საქართველოში სამოქალაქო დაპირისპირების სურათი შექმნას.

ამასთანავე, “პრემიერის” წყაროები არ გამორიცხავენ, რომ ამ პროვოკაციაში პუტინმა სამღვდელოების წარმომადგენლებიც ჩართოს. ისე, ნიშანდობლივია, რომ “კინოს სახლის” აქციას რამდენიმე მღვდელმსახური შეუერთდა, რომელიც, პირდაპირ თუ ირიბად, ნატო-ს სატანად ნათლავდა.

დიდი ხანია, კულუარებში მუსირებს ვერსია, რომ ერთ-ერთი გზა, რომლითაც საქართველოში რუსული ფული შემოდის, სწორედ ეკლესიაა, თუმცა სენსიტიურობიდან გამომდინარე, ამ თემაზე ხმამაღალი საუბრისგან ყველა თავს იკავებს.

ამბობენ, რომ პოლიტიკაში ნებისმიერი პროვოკაცია გამართლებულია, რადგან მთავარი მიზანია. კრემლის მიზანი კი, საქართველოში სიტუაციის არევაა. საამისოდ მრევლი საუკეთესო იარაღია _ ძველი თუ ახალი ხელისუფლების პირობებში ჩატარებული ყველა კვლევით, ყველაზე მეტი ნდობა სწორედ სასულიერო პირებს აქვთ, რასაც, სხვა თუ არაფერი, საშობაოდ, დედა პარასკევას ნანახი სიზმარიც მოწმობს, რომლის “გასაჯაროების” შემდეგაც, მთელი საქართველო მცხეთას, კერძოდ, სამთავროს დედათა მონასტერს მიაწყდა მამა გაბრიელის საფლავის მოსალოცად.

გავრცელებული ინფორმაციით, ამ “წინასწარმეტყველური ავანტიურით” გარკვეულმა ძალებმა 4 მილიონის მოგება ნახეს. ამასთანავე, იმის სრული აღრიცხვაც გააკეთეს, საჭიროების შემთხვევაში, ქუჩაში რამდენი ათასი ადამიანის გამოყვანა მოხერხდება.

ამასობაში, კულუარებში აქტიურდება 17 მაისის თემა. მართალია, ჯერჯერობით არც არასამთავრობო ორგანიზაციებსა და არც ე.წ. “ლგბტ”-სუბიექტების დამცველებს არ უთქვამთ, რომ 17 მაისს რამეს გეგმავენ, მაგრამ, “პრემიერის” ინფორმაციით, გარკვეული ადამიანები, რომლებიც, ალბათ, მეტი დამაჯერებლობისთვის, წვერს ატარებენ, ცალკეულ ე.წ. ფეისებთან მიდიან და ეუბნებიან, 17 მაისს “პედერასტები” საქორწინო უფლების დაკანონებას მოითხოვენ. ამიტომ, პრემიერისა და პარლამენტის სახელზე სპეციალურ განცხადებას ვამზადებთ და ხელი მოგვიწერეთო.

“პრემიერის” წყარო, რომელიც ერთ-ერთ ასეთ “ფეისთან” წვეროსნების ვოიაჟის მოწმე შემთხვევით გახდა, ეჭვობს, რომ 17 მაისს სიტუაცია კრიტიკულად უმართავი გახდება, რასაც შესაძლოა, ფართომასშტაბიანი არეულობა მოჰყვეს.

ამ ვერსიას ისიც ამძაფრებს, რომ ბოლო დროს ქვეყანაში რუსეთში მოღვაწე იმ ფულიანი ქართველების მოძრაობაც შეინიშნება, რომლებმაც ფული პუტინის ხელშეწყობით იშოვეს.

აქამდე ითვლებოდა, რომ პუტინის მთავარი დასაყრდენი ნინო ბურჯანაძე და მისი “დემოკრატიული მოძრაობა” იყო, თუმცა, როგორც “პრემიერის” კონფიდენტი აღნიშნავს, ვლადიმერ ვლადიმეროვიჩს უთქვამს, ანზოროვნას სახელის გაგონებაც არ მინდა, ფული ორჯერ მივეცი, მაგრამ ორჯერვე ჩაფლავდაო. სხვათა შორის, ბურჯანაძის ხალხი სამეგობროში წუწუნებს, რომ ფული არ აქვს...

ამ ფონზე, ლოგიკურია, ჩნდება შეკითხვა, ვისზე გააკეთებს “სტავკას” პუტინი?

საქართველოში “მეხუთე კოლონის” მოძებნა პრობლემა არასოდეს ყოფილა, მაგრამ გასათვალისწინებელია, რომ რამდენიმე წლის წინათ, საქართველოს მოსახლეობის აბსოლუტურმა უმრავლესობამ, რეფერენდუმით, მხარი ქვეყნის ნატო-ში გაწევრიანებას დაუჭირა. ამასთანავე, 2013 წლის საპრეზიდენტო არჩევნებმაც ნათელყო, რომ ხალხს რუსეთი არ უნდა და სწორედ ამიტომაც, ბურჯანაძემ საარჩევნო უფლების მქონე მოსახლეობის ხმების მხოლოდ ათი პროცენტი მიიღო. ესე იგი, საქართველოში კრემლს, პლუს-მინუს, ათი პროცენტი ეთაყვანება.

აქედან გამომდინარე, როგორც “პრემიერის” ინფორმატორები ამბობენ, კრემლი შეეცდება, პოლიტიკურ ავანსცენაზე ახალი პატრიოტული ძალები გამოიყვანოს, რომელთა გულწრფელობასა და მოუსყიდველობაში ხალხს ეჭვი არ შეეპარება.

ასეთი ძალა კი, როგორც “პრემიერს” უხსნიან, აფხაზეთისა და სამაჩაბლოს ომების ვეტერანები არიან.

“სოციალური აფეთქების დასაწყებად ამ ხალხს საკმარისზე მეტი საბაბი აქვს _ ყველა ხელისუფლებისგან მიტოვებულია. არადა, ელემენტარულად, იმას ითხოვენ, რომ საარსებო პირობები შეუქმნან. შესაბამისად, კრემლს კარგი გათვლა აქვს _ ვეტერანებში ფულს ჩადებს და ქუჩაში სოციალური მოთხოვნებით გამოიყვანს. ამასთანავე, ისიც გასათვალისწინებელია, რომ რუსული სპეცსამსახურების წარმომადგენლები, მათ შორის, ძველი “კაგებეშნიკები” ხელისუფლების თითქმის ყველა შტოში არიან და ისინი ვითარების დაძაბვას შეეცდებიან. ისე, უცნაურია, რომ საქართველოს დამოუკიდებლობის გამოცხადების შემდეგ, “პაგონიანი კაგებეშნიკები” თავს მყუდროდ გრძნობენ. შეიძლება, ვინმემ იკითხოს, მათი “გაშიფვრა” როგორ მოხერხდებაო, მაგრამ მთავარი პოლიტიკური ნებაა, თორემ “გაშიფვრა” მარტივია _ მართალია, 1991-92 წლების მოვლენების დროს არქივის ნაწილი დაიწვა, ნაწილი კი საქართველოდან გაიტანეს, მაგრამ არსებობენ ადამიანები, რომლებმაც ყველაფერი იციან. ბოლოს და ბოლოს, ის ორი პიროვნება აალაპარაკონ, რომელმაც არქივები მოსკოვში ჩაიტანა. სხვათა შორის, ამ ორი კაციდან ერთი გარდაცვლილია. ერთი კი, როგორც ვიცი, დღესაც ერთ-ერთ ძალოვან უწყებაში მუშაობს”, _ ამბობს “პრემიერის” წყარო, რომელსაც სპეცსამსახურებთან ურთიერთობის გამოცდილება აქვს.

წყაროს ვერსიითვე, მალე შესაძლოა, ის დღემდე უცნობი პარტია გააქტიურდეს, რომლებიც ვეტერანებითაა დაკომპლექტებული.

მისივე თქმით, 17 მაისის გარდა, “ეფ-ეს-ბე” კიდევ ერთ სცენარს ამუშავებს, რომელიც სამცხე-ჯავახეთში, კახეთსა და შიდა ქართლში სიტუაციის დაძაბვას ეხება.

იმას, რომ სამცხეში რაღაც ხდება, ბოლო დღეებში გავრცელებული ინფორმაციაც ადასტურებს _ თვითმხილველთა თქმით, თბილისში, რუსეთის საელჩოსთან რეგიონის ეთნიკური სომხების რიგი დგას. ამბობენ, რომ მათ რუსეთის პასპორტებს ურიგებენ(!).

2008 წლის აგვისტოში პუტინმა საქართველოზე იერიში საკუთარი მოქალაქეების დაცვის საბაბით მოიტანა. თუკი სამცხე-ჯავახეთის სომხობა ოფიციალურად რუსეთის მოქალაქე გახდება, ანუ რუსულ პასპორტს მიიღებს, პროვოკაციის მოწყობას წინ აღარაფერი დაუდგება _ ვთქვათ, ჩახალიანი, ან რომელიმე მსგავსი სეპარატისტი ელემენტი “განგაშს” ატეხს, სომხების უფლებები ირღვევაო (ამ ფონზე კიდევ უფრო საინტერესოა, რა მიზნით გამოუშვა ციხიდან “ოცნების” ხელისუფლებამ ჩახალიანი). შესაძლოა, რამე სისხლიანი პროვოკაციაც მოეწყოს, რასაც პუტინის “შეშფოთება” მოჰყვება, რუსეთის მოქალაქეები განსაცდელში არიანო და ოკუპანტების არმია ჯავახეთისკენ დაძრას.

ამასთანავე, როგორც “პრემიერის” კონფიდენტი ამბობს, გასათვალისწინებელია, რომ სამცხე-ჯავახეთში, კახეთისა და შიდა ქართლის მსგავსად, რამდენიმე საერთაშორისო მნიშვნელობის მილსადენი გადის. სიტუაციის დრამატიზებისთვის გამორიცხული არაა, რომ ამ მილსადენების რომელიმე მონაკვეთზე აფეთქება, ან აფეთქების ინსცენირება მოხდეს, რაც, თავისთავად, დასავლეთსაც შეაშფოთებს, ანუ შეიქმნება ფონი, რომ საქართველოში კრიმინოგენური სიტუაცია უკიდურესად დაძაბულია და ამ ფონზე არ შეიძლება, ქვეყანამ ევროკავშირთან ასოცირების ხელშეკრულებას ხელი მოაწეროს, მაპ-ზე ლაპარაკიც ხომ ზედმეტია.

ყოველივე ზემოთქმულის ფონზე, “პრემიერის” კონფიდენტი სვამს რიტორიკულ შეკითხვას: სად არის და რას აკეთებს საქართველოს კონტრდაზვერვა, სამსახური, რომელიც სახელმწიფო ბიუჯეტიდან ფინანსდება?

ალექსი ნოზაძე, გაზეთი „პრემიერი“

FaceBook