დავით ზურაბიშვილი: "10 წელზე მეტი სდიეს მოხუც, ჩამოწერილ პოლიტიკოს პინოჩეტს და ვერ გაასამართლეს"

"ამ დროს, მიხეილ სააკაშვილის დასაკითხად გამოძახება, ჩემი აზრით, პრინციპულად არასწორი ქმედებაა"

 "იმედი მაქვს, რამე სისულელეს არ ჩაიდენენ, თორემ "მაიდანს" ანახვებენ მაგათ"

 “ქართული ოცნება" და პირადად მე, ხელისუფლებაში რომ ვართ, იმის ერთგვარი ფასია, რომ მიხეილ სააკაშვილის მიმართ აგრესიული პოლიტიკური შურისძიება არ იქნება”

 საქართველოს ყოფილი პრეზიდენტი მიხეილ სააკაშვილი სისხლის სამართლის რამდენიმე საქმესთან დაკავშირებით 27 მარტს პროკურატურაში დაკითხვაზეა დაბარებული, თუმცა აღნიშნულის რეალიზების მოლოდინი ნაკლებად არსებობს. პროკურატურის განცხადების შემდეგ, რადენიმედღიანი პოლიტიკურად ცხელი დებატების შემდეგ, აშშ-ს სახელმწიფო დეპარტამენტმა ამ საკითხთან დაკავშირებით საგანგებო განცხადება გააკეთა.

"არავინ არ შეიძლება დადგეს კანონზე მაღლა, მაგრამ საქართველოს ყოფილი პრეზიდენტის წინააღმდეგ ერთდროულად რამდენიმე საქმეზე გამოძიების დაწყება ქმნის პოლიტიკური ანგარიშსწორების საფუძვლიან ეჭვს, განსაკუთრებით მაშინ, როდესაც სამართლებრივი და სასამართლო ინსტიტუტები ჯერ კიდევ სუსტია", _ ნათქვამია სახელმწიფო დეპარტამენტის განცხადებაში. ამასთანავე, სახელმწიფო დეპარტამენტი აღნიშნავს, რომ ვაშინგტონში პრემიერ-მინისტრის, ირაკლი ღარიბაშვილის უმაღლეს დონეზე შეხვედრისას, აშშ-მ მოუწოდა საქართველოს ხელისუფლებას, საკუთარი ძალისხმევა მიემართა ქვეყნის განვითარებაზე, ძლიერ ეკონომიკაზე, რეფორმების გაგრძელებაზე სამართლებრივ სფეროში და პროგრესზე ევროინტეგრაციის საკითხში.

მიხეილ სააკაშვილის შესაძლო დაკითხვისა და ქვეყანაში მიმდინარე პოლიტიკური მოვლენების შეფასების მიზნით "პრემიერი" რესპუბლიკური პარტიის წევრს, პარლამენტის თავმჯდომარის მრჩეველს, დავით ზურაბიშვილს ესაუბრა.

_ მიხეილ სააკაშვილის პროკურატურაში დაბარებას საერთაშორისო რეაგირება მაინც მოჰყვა, მიუხედავად იმისა, რომ მანამდე "ნაციონალური მოძრაობის" ლიდერები აცხადებდნენ, ასეთი გადაწყვეტილება საქართველოს საერთაშორისო იმიჯზე უარყოფითად იმოქმედებსო. თქვენი აზრით, არის თუ არა ეს პოლიტიკური ანგარიშსწორება, რომელიც ხელისუფლებისთვის წამგებიანია?

_ მიხეილ სააკაშვილს რომ დანაშაულებრივი რეჟიმი ჰქონდა და რომ უნდა გასამართლდეს, პირადად ჩემთვის, ორი აზრი არ არსებობს. აბსოლუტურად დარწმუნებული ვარ, რომ ასეც მოხდება, მაგრამ აქ პრობლემა არის, როდის და როგორ. ჩვენ ხომ არ ვცხოვრობთ დროის, ეპოქისა და სივრცის გარეთ, არამედ ვცხოვრობთ კონკრეტულ ქვეყანაში, კონკრეტულ ვითარებასა და კონკრეტულ პოლიტიკურ კონიუნქტურაში, სადაც ერთმანეთზე ბევრი ინტერესია გადახლართულ-გადაჯაჭვული. მიხეილ სააკაშვილის ძალაუფლების ერთ-ერთი ბურჯი იყო მისი უკიდურესი ლოიალობა ამერიკისა და დასავლეთის პოლიტიკური წრეების მიმართ. წარმოიდგინეთ, აშშ-ს მიმართ იმდენად ლოიალური იყო, რომ  პრეზიდენტმა 2012 წელში ხელისუფლება დათმო იმის გამო, რომ ეს ამერიკის ელჩმა უთხრა. თან გავითვალისწინოთ, რომ მაშინ საპარლამენტო არჩევნები იყო და არა საპრეზიდენტო. ვინმეს ეჭვი ეპარება, რომ, რომ არა ამერიკის ზეწოლა და მოთხოვნა, ის ფეხებზე დაიკიდებდა იმ საპარლამენტო არჩევნების შედეგებს? რაც 7 ნოემბერსა და 26 მაისს იყო, იგივეს დაატრიალებდა ისევ. არ იკადრებდა, არ უქნია, თუ არ იზამდა? მისი თანაგუნდელებიც რომ არ ელოდნენ, მიხეილ სააკაშვილი უცებ გამოვიდა და თქვა, წავედიო. ამის შემდეგ ამერიკამ მოკიდა ხელი მიხეილ სააკაშვილს და წაიყვანა თავისთან, მისცეს სამსახური და უთხრეს, საქართველოს საქმეებში არ ჩაერიოო. გამოვიდა ისიც და თქვა, არ მაინტერესებს, რა ხდება საქართველოშიო. ახლა როგორ გგონიათ, მისი ციხეში ჩაჯდომა რომ ნდომებოდათ თავად ამერიკელებს, ამას გააკეთებდნენ? "ქართული ოცნება" და პირადად მე, ხელისუფლებაში რომ ვართ, იმის ერთგვარი ფასია, რომ მიხეილ სააკაშვილის მიმართ აგრესიული პოლიტიკური შურისძიება არ იქნება.

_ პოლიტიკური შურისძიება რას ნიშნავს, როცა ყველა თანხმდება, რომ მიხეილ სააკაშვილი სამართლებრივად  დამნაშავეა? ამას მხოლოდ დამტკიცება სჭირდება...

_ თუ ვინმეა დასაჭერი, პირველი ის არის, მაგრამ გავიხსენოთ ის ხალხიც, ვინც ლოიალურები იყვნენ დასავლეთის მიმართ. ვთქვათ, პინოჩეტი, რომლის რეჟიმი გაცილებით უარესი იყო, ვიდრე სააკაშვილის. ჩვენთან ადამიანების ნაწილს ჰგონია, რომ მიხეილ სააკაშვილისნაირი რეჟიმი კაცობრიობის ისტორიაში არ ყოფილა, მაგრამ ასე ნამდვილად არ არის. პინოჩეტის დროს ათასობით ადამიანი იყო მოკლული და უგზო-უკვლოდ გამქრალი. შემდეგ, არჩევნებისა და ზეწოლის გზით, ხელისუფლებაში მოვიდა ის ხალხი, ვინც მანამდე ციხეში იჯდა და აწამებდნენ. 10 წელზე მეტი სდიეს მოხუც, ჩამოწერილ პოლიტიკოს პინოჩეტს და ვერ გაასამართლეს. სამწუხაროდ, ასე მარტივად არ ხდება, მაგრამ სხვა საკითხია, გვიხარია თუ არ გვიხარია. ვიღაცამ შეიძლება თქვას, რად გვინდა ასეთი დასავლეთი, ამერიკა, თუ ამდენ საშუალებას არ გვაძლევს, მაგრამ მოდი, ასე შევხედოთ: რა ალტერნატივა გვაქვს ამის საწინააღმდეგო. პატარა ქვეყანა ვართ, კონკრეტულ გეოპოლიტიკურ რეგიონში, გვერდით გვყავს დიდი ქვეყნები, რუსეთი, თურქეთი და ირანი. იმისთვის, რომ რომელიმე ავირჩიოთ, საამისოდ საკმაოდ მოძლიერებული უნდა ვიყოთ, მაგრამ ასეთ მდგომარეობაშიც არ ვართ. რუსეთისგან განსხვავებით, ამერიკელები რაღაც კონიუნქტურას მაინც უწევენ ანგარიშს. ასე რომ არ იყოს, გვეყოლებოდა ისევ სააკაშვილი და "გაუპრავებდნენ" ყველაფერს, როგორც 2008 წელს. რუსეთს არანაირი წესები არ ანაღვლებს. მისი კაცი აქ 100 წელი რომ იყოს და მთელი ქვეყანა ფეხქვეშ ჰყავდეს ამოდებული, ერთხელაც არ ეტყვის, ადექი და წადიო. ჩვენ დიდი არჩევანი არ გვაქვს და რაც გვაქვს, ეს უკეთესია. შეხედეთ, რა ვითარებაში ვართ, რუსეთმა გადაყლაპა ყირიმი და ახლა ინელებს, დასავლეთი შეშფოთებულია, მაგრამ ჯერჯერობით ვერაფერს ვერ აკეთებს, რადგან არ ელოდნენ რუსეთისგან ამას. ახლა სხედან და ფიქრობენ, რა გააკეთონ. არის საფრთხე, რომ ჩვენც შეიძლება რაღაც დაგვემუქროს, რადგან იგივე ევროკავშირის ასოცირების ხელშეკრულებაზე რუსეთი მტკივნეულად რეაგირებს. არის საუბარი, რომ ამ ხელშეკრულების ხელმოწერა უნდა დაჩქარდეს და ამ დროს, მიხეილ სააკაშვილის დასაკითხად გამოძახება, ჩემი აზრით, პრინციპულად არასწორი ქმედებაა. მით უმეტეს, ეს კაცი საქართველოში არ არის და მისი დამჭერიც არ ხარ. მიხეილ სააკაშვილი იტყვის, არ მოვდივარო და მორჩა. ჩვენი კანონმდებლობით, დაკითხვის ჩატარება შეიძლება ისე, რომ სადაც არის, იქ გაუგზავნო გამომძიებელი, ან წერილობითი მოთხოვნა. ის აქ ჩამომსვლელი მაინც არ არის და ამას რა დიდი გათვლა უნდოდა?

_ რადგან პროკურატურაში მისი დაბარება დროში ასოცირების ხელშეკრულების დაჩქარების საკითხს დაემთხვა, საზოგადოების ნაწილს დარჩა შთაბეჭდილება, რომ თავად ამერიკამ შეცვალა თავისი დამოკიდებულება და ამას მოჰყვა ადეკვატური რეაგირება საქართველოს პროკურატურის მხრიდან....

_ შეუძლებელია, ასე ყოფილიყო. ასეთი შთაბეჭდილება ვიღაც გარე მაყურებელს დარჩებოდა, მაგრამ ეს ხელისუფლების მხრიდან არასწორი მოქმედებაა. შესაძლოა, ხელისუფლებაში ჩათვალა ვიღაცამ, რომ ახლა ამერიკასა და დასავლეთს ძალიან ვჭირდებით და ამ თემას "გაგვიტარებენ", მაგრამ ვერ "გაატარებენ". მათ მარტო სააკაშვილი კი არ ჰყავთ ასე, ასეთი სააკაშვილები მსოფლიოს სხვადასხვა კუთხეებში არიან და ამერიკამ ასე ორ დღეში ყველა თუ ფეხზე დაიკიდა, მისი ინტერესების გამტარებელი სხვა ქვეყნებში ვინღა დარჩება. ჩვენ მოგვწონს თუ არა, რეალურად ასეა და უნდა მივიყვანოთ საქმე იქამდე, რომ ქვეყანა ფეხზე დადგეს, მაქსიმალურად შემცირდეს ოკუპაციის რისკები, ეკონომიკურად გავძლიერდეთ. ევროკავშირის წევრ ქვეყანაში ბერლუსკონი დაიჭირეს, იქ სარკოზის იძახებენ დაკითხვაზე და კაციშვილი ხმას არ იღებს, არავინ ეჩხუბებათ, ამას როგორ ბედავთო. აქ სხვა სიტუაციაა. მაგალითად, ფილიპინების დიქტატორი იყო მარკოსი 30 წელი... სააკაშვილივით 9 წელი კი არ ყოფილა, დააგროვა მილიარდები და ბოლოს ხალხმა დაამხო, იმასაც კარგა ხანს იფარავდნენ, თუმცა ბოლოს მაინც გაასამართლეს, მაგრამ ასე უცებ არ მომხდარა ეს. ამიტომ არ შეიძლება, ხელისუფლება აჩქარდეს, გააჩინოს ხალხში ისეთი მოლოდინები, რომელსაც ვერ შეასრულებს.

_ სამართლიანობის აღდგენა ხელისუფლების წინაშე საზოგადოების დაკვეთაა და წინასაარჩევნოდ ასეთი საკითხების გააქტიურებით ელექტორატის ყურადღების მიპყრობას ცდილობენ?

_ ყველაფერს რომ თავი დავანებოთ და ფეხებზე დავიკიდოთ პოლიტიკური კონიუნქტურა, მიხეილ სააკაშვილი ფიზიკურად აქ ხომ უნდა იყოს, რომ ხელი მოკიდო. არ არის ეს კაცი საქართველოში, ან რომელი ჯეიმს ბონდები ჩვენ ვართ. ამიტომ რაც არ შეგიძლია, არ უნდა გაიქაჩო და როცა შეძლებ, მოამზადო ნიადაგი, მაშინ გადახვიდე საქმეზე. მე არჩევნებს ამ საკითხს ნაკლებად ვუკავშირებ. ჯერ სააკაშვილის მომხრეებს შეეშინდათ, ვაიმე, დასავლეთმა ხომ არ "დაგვახურდავაო", აქეთ ვიღაცებმა გაიხარეს, არიქა, სამართალი აღსრულდებაო და მერე ასეთი კომიკური სიტუაცია შეიქმნა.

ზურაბ ჟვანიას საქმის გამოძიებაც საკმაოდ რთული საკითხია და  როცა საქმე დადებული არ გაქვს, ასეთ საკითხებზე ლაპარაკის აზრს საერთოდ ვერ ვხედავ. რაღაცას რომ დაჰპირდები ადამიანს და არ გააკეთებ, უფრო არ ეწყინება, ვიდრე საერთოდ რომ არ დაჰპირდები? დაახლოებით ასეთი ვარიანტია, წინასწარ რატომ ამბობ იმას, რის გამკეთებელიც არ ხარ. ვფიქრობ, წინასაარჩევნო პერიოდში ეს თემები ყველაზე ნაკლებად წამოიწევს, რადგან ახლა ადგილობრივი თვითმმართველობის არჩევნებია და სულ სხვა საკითხებია მნიშვნელოვანი.

_ როდესაც ამომრჩეველი ხვდება, და უკვე მერამდენედ, რომ  ამჟამინდელი ხელისუფლება, სურვილის მიუხედავადაც, დანაპირებს ვერ ასრულებს, ეს არჩევნების შედეგებზე როგორ იმოქმედებს? "ქართული ოცნება" იმის იმედად არის, რომ "ნაციონალებს" ხმას არ მისცემენ და კვლავ ამის ხარჯზე მიიღებს სასურველ შედეგს?

_ არჩევნების შედეგებზე ეს საკითხი ვერ იმოქმედებს, რადგან ქართველ ხალხს დიდი არჩევანი არა აქვს. არის "ნაციონალური მოძრაობა" და ჰყავს იმდენი მომხრე, რამდენიც ჰყავს. მისი ელექტორატი პროცენტულად ძალიან ნელა იკლებს, კოალიცია "ქართული ოცნების" გარეთ არსებული პოლიტიკური ძალებიდან კი, რაიმე სერიოზული ძალები ჯერჯერობით ვერ ყალიბდება. ყველაზე სერიოზული მაინც "ბურჯანაძე-დემოკრატებია" და მისი პროცენტები შეიძლება ცოტა გაიზარდოს, ვიდრე ჰქონდა, ვთქვათ, საპრეზიდენტო არჩევნების დროს. არც "ნაციონალების" და არც "ბურჯანაძე-დემოკრატების" შედეგი შესაძლო 20%-ს არ აცდება, ამიტომ ძალიან დიდი უპირატესობა აქვს კოალიცია "ქართულ ოცნებას", რომლის რეიტინგიც კვლავ შეუდარებლად მაღალი რჩება. ამიტომაც არჩევნების შედეგები წინასწარ ცნობილია და არა მგონია, ამ სამი პოლიტიკური ძალის გარდა, ვინმე გამოჩნდეს, ისიც ყველგან უპირატესობა "ქართულ ოცნებას" ექნება. ადგილობრივი თვითმმართველობის არჩევნებში ბრძოლა მხოლოდ პირველი და მეორე ადგილებისთვის გაიმართება.

_ არასაპარლამენტო პოლიტიკური ძალები თამაშგარე მდგომარეობაში ყოფნას სახელისუფლებო კოალიციას აბრალებენ, მათ სასარგებლოდ არ მოქმედებს არც საარჩევნო კოდექსში შეტანილი ცვლილებები, რომელიც პარტიულ დაფინანსებას ეხება.

 _ ხელისუფლებას სულ ტყუილად ადანაშაულებენ. ხელისუფლება ვინმეს რამეში ხელს უშლის, ატერორებს, მოსყიდვას ახორციელებს, თუ რას აკეთებს ამნაირს? "ქართული ოცნება" ყველანაირ პარტიას აერთიანებს. დაწყებული, ვთქვათ, ჩვენისთანა ლიბერალებით, დამთავრებული "მრეწველებით", რომლის ლიდერიც ამბობს, რომ ნატო არ უნდა. პრაქტიკულად ქართული პოლიტიკური განწყობების სრული სპექტრია აქ თავმოყრილი. ეს კოალიცია თავის დროზე იმიტომ შეიქმნა, რომ "ნაციონალური მოძრაობის" დამარცხება სხვაგვარად შეუძლებელი იყო. რეალურად გამოვიდა ავტორიტეტული პიროვნება ბიძინა ივანიშვილი და გააერთიანა განსხვავებული ოპოზიციური ძალები და ეს არის დროებითი, ამ პერიოდზე გათვლილი გაერთიანება. შესაძლოა, 2016 წლის შემდეგ სხვა რეალობაში დავდგეთ, მთელი ცხოვრება 6 პარტია ერთად რომ ვერ ივლის, ეს თავისთავად ცხადია, მაგრამ თვითმმართველობის არჩევნებზე არაფერი შეიცვლება. "ნაციონალური მოძრაობა" არის აქტუალური, გვინდა თუ არა, და ახლაც დაგვანახებს, რომ მას ექნება 10-15%, რაც ცოტა ნამდვილად არ არის. თან გასათვალისწინებელია, რომ "ნაცმოძრაობის" განვლილი წლებისგან მიღებული ტრავმა საზოგადოებას მოშუშებული არა აქვს და სენსიტიურად რეაგირებს ყველაფერზე.

 _ სენსიტიურობაზე გამახსენდა, "ნაციონალური მოძრაობის" ლიდერებმა საქართველოში "მაიდანის" გამეორებაზე მინიშნებები გააკეთეს. ხომ არ ფიქრობთ, რომ ამ განცხადების უკან კონკრეტული ძალების მხარდაჭერაც არსებობს?

_ "ნაციონალურ მოძრაობას" არათუ ამის რესურსი არა აქვს, სასაცილოცაა ამაზე საუბარი. იმედი მაქვს, რამე სისულელეს არ ჩაიდენენ, თორემ "მაიდანს" ანახვებენ მაგათ. რაც არ უნდა გარედან მხარდაჭერა, ან სიმპათია ჰქონდეთ, ნებისმიერ შემთხვევაში, საქართველოში ქართველი ხალხის მხარდაჭერა წყვეტს ყველაფერს. მხარდაჭერა როცა გაქვს, ძალიან კარგია, მაგრამ ეს ვერასდროს გადაწონის ხალხის მხარდაჭერას. როცა ეს არ გაგაჩნია, ნელ-ნელა გარე ინტერესს დაკარგავ. ჯერჯერობით, "ნაციონალური მოძრაობისადმი" გარედან ინტერესი დაკარგული არ არის, არა იმიტომ, რომ ვიღაცას "ჯვარი აქვს დაწერილი", მას საზოგადოების ნაწილის მხარდაჭერაც აქვს. ნებისმიერი რეიტინგით "ნაცმოძრაობას" 10%-ზე ნაკლები არა აქვს და საპრეზიდენტო არჩევნებში 20%-ზე მეტი უჩვენა. ახლა ვნახოთ, რას უჩვენებს თვითმმართველობის არჩევნებში. ეს გარკვეულწილად, პოლიტიკური ძალების მორიგი დათვალიერებაა. გაყალბება რომ არ იქნება და არჩევნები პატიოსნად ჩატარდება, ამაში დარწმუნებული ვარ. ვნახოთ, რა იქნება, თუ ნინო ბურჯანაძე გადაასწრებს "ნაცმოძრაობას", მთავარი ოპოზიციური ძალა ის გახდება, თუ არა და ისევ "ნაცმოძრაობა" დარჩება. ეს მათზე და საზოგადოების განწყობაზეა დამოკიდებული.

ხათუნა ხატიაშვილი, გაზეთი „პრემიერი“

FaceBook