ზურაბ ჭიაბერაშვილი: “ნაციონალურ მოძრაობა” აუცილებლად დაბრუნდება ხელისუფლებაში”

“სააკაშვილზე საერთაშორისო ძებნის გამოცხადებას იგივე ბედი ელის, რა ბედიც თავდაცვის ყოფილი მინისტრის, დავით კეზერაშვილის საქართველოში ექსტრადიციის მოთხოვნას მოჰყვა”

“მე დღესაც ვურჩევდი - კი არ ვურჩევდი, შევეხვეწებოდი - ბრიუსელს, რომ ამ ხელისუფლების უგუნურებათა გამო არ გვითხრან უარი ჩვენს ისტორიულ შანსზე”

“პრეზიდენტ სააკაშვილზე შეხება იქნება “წითელი ხაზის გადაკვეთა”

“ევროკავშირთან ასოცირების ხელშეკრულებაზე ხელმოწერის თარიღის ივნისში გადმოწევა, ივანიშვილმა ვანო მერაბიშვილის დაპატიმრების “პატიებად” და სააკაშვილის დაპატიმრებაზე “სანქციად” აღიქვა”

“ქართველი ხალხი ითხოვს ყველასგან, გვერდზე გადაიდოს პირადი ინტერესები და ქვეყნის საკეთილდღეოდ მოინახოს დღევანდელი რთული მდგომარეობიდან გამოსავალი”

“პრემიერის” კითხვებს “ერთიანი ნაციონალური მოძრაობის” სამოქალაქო საზოგადოებასთან ურთიერთობის მდივანმა ზურაბ ჭიაბერაშვილმა უპასუხა.

- მოგესალმები, მიხეილ სააკაშვილი პროკურატურაში არ მივა. უწყება დიდსულოვნად დაელოდება დათქმულ 12:00 საათამდე და მერე, თუ პრემიერ ღარიბაშვილის “წამოცდენით” ვიმსჯელებთ, მასზე საერთაშორისო ძებნას გამოაცხადებს ან სხვა, კანონით გათვალისწინებული ქმედებების განხორციელებას მიმართავს. მართალია, ქართულ პოლიტიკაში პროგნოზები უმადური საქმეა, მაგრამ “რა იქნება ხვალ”?

- შეერთებული შტატების სახელმწიფო დეპარტამენტის მკაცრმა გაფრთხილებამ, ესტონეთის პრეზიდენტის, შვედეთის საგარეო საქმეთა მინისტრების განცხადებებმა სერიოზულად უნდა დააფიქროს არა მხოლოდ საქართველოს ხელისუფლება, არამედ მთლიანად ქართველი საზოგადოება.

წელიწად-ნახევარია, მეგობრები - ქვეყნები, რომლებიც გვერდში დაგვიდგნენ 2008 წლის აგვისტოში პუტინის მიერ საქართველოში განხორციელებული სამხედრო აგრესიის დროს - გვირჩევენ, რომ საქართველოში დასრულდეს პოლიტიკური დევნა და მივხედოთ ქვეყნის განვითარებას, ეკონომიკურ წინსვლას და თითოეული ოჯახისთვის უკეთესი პირობების შექმნას. დღემდე მოცემული რჩევაც საკმარისი უნდა ყოფილიყო საქართველოს ხელისუფლებისთვის, რომ ეს გაეგო, თუკი მას ამის გაგება სურდა.

სამწუხაროდ, დიდი იმედი, რომ ბიძინა ივანიშვილი პირად ბოღმას გადალახავს და ჩვენს ეროვნულ ინტერესებს თავის პიროვნულ ინტერესებზე მაღლა დააყენებს, არ მაქვს. ამიტომ ღარიბაშვილის “წამოცდენა” შეიძლება განხორციელებულიც კი ვიხილოთ. ამას 2 შედეგი ექნება - სამართლებრივი და პოლიტიკური.

სამართლებრივად, პრეზიდენტ სააკაშვილზე საერთაშორისო ძებნის გამოცხადებას იგივე ბედი ელის, რა ბედიც თავდაცვის ყოფილი მინისტრის, დავით კეზერაშვილის საქართველოში ექსტრადიციის მოთხოვნას მოჰყვა ფრანგულ სასამართლოში. ფრანგულმა მართლმსაჯულებამ - პროკურატურამაც და სასამართლომაც, რომელთა მიუკერძოებლობაში ეჭვი არავის გვეპარება - ამ საქმეში სწორედ პოლიტიკური დევნის ელემენტები დაინახა და კეზერაშვილის ექსტრადიციაზე უარი განაცხადა. მით უმეტეს, ეს მოხდება პრეზიდენტ სააკაშვილის შემთხვევაში.

პოლიტიკურად, პრეზიდენტ სააკაშვილზე საერთაშორისო ძებნის გამოცხადება ძალიან დაგვაზარალებს. არათუ ეს ნაბიჯი, არამედ მისი დაკითხვაზე დაბარებაც კი საქართველოს ხელისუფლებას პუტინის ბანაკში ათავსებს. ეს კი იმ ქვეყნისთვის, რომელიც ნატოს წევრობას ესწრაფვის, სასურველი სულაც არაა.

- საზოგადოების ერთმა ნაწილმა გააქილიკა კიდეც თქვენი გუნდის განცხადებები - სააკაშვილის დაკითხვის მოთხოვნის პუტინთან დაკავშირება. გასაგებია, რომ სააკაშვილი არ არის მისაღები პერსონა პუტინისთვის, მაგრამ ეს ადამიანები ირონიულ კითხვას სვამენ - პირდაპირ დაურეკა პუტინმა ივანიშვილს თუ  ხუბუტიას მეშვეობით მოითხოვა მიშას თავიო. მოკლედ, თქვენი და სააკაშვილის განცხადებები ლოგიკას ეყრდნობა თუ ფაქტებს?

- პოლიტიკოსის, მით უმეტეს, უმაღლესი ხელისუფლების განცხადებები უბრალო განცხადება კი არაა, ის ქმედების ელემენტს შეიცავს. მაგალითად, რით დასტურდება, რომ “ერთიანი ნაციონალური მოძრაობის” მიმართ პოლიტიკური დევნა წარმოებს? ამას რამდენიმე გარემოება ადასტურებს:

- ყოფილი და ამჟამინდელი პრემიერ-მინისტრების - ბიძინა ივანიშვილისა და ირაკლი ღარიბაშვილის - მიერ არაერთგზის საჯაროდ გაცხადებული ამოცანა, რომ “ერთიანი ნაციონალური მოძრაობა” უნდა განადგურდეს, რომ “ერთიანი ნაციონალური მოძრაობა” არალეგიტიმური ოპოზიციაა და ა.შ.

- პოლიტიკოსების, იმავე ივანიშვილისა და ღარიბაშვილის მიერ პროკურატურის ქმედებების რეგულარულად დაანონსება;

- სამართლის შერჩევითობა 1: როგორც კი პოლიტიკოსი ტოვებს ენმ-ს, მის წინააღმდეგ “სამართლებრივი” დევნა წყდება (იხ. თბილისის საკრებულოს მოქმედი თავმჯდომარის მაგალითი);

- სამართლის შერჩევითობა 2: დღევანდელი ხელისუფლების პირობებში ჩადენილ დადასტურებულ დანაშაულებზე - გაიხსენეთ საგარეჯოს მოქმედი გამგებლის კორუფციული დანაშაული - პროკურატურის განსხვავებული მიდგომა.

ასევე, ვიცით რუსეთის პრეზიდენტის დამოკიდებულება პრეზიდენტ სააკაშვილის მიმართ. ასევე, ვიცით ბიძინა ივანიშვილის მიდგომა, რომ რუსეთის მიმართ უნდა გვქონდეს “დაყვავების” პოლიტიკა. ასევე, ვიცით, რომ პრეზიდენტი სააკაშვილი დღეს საქართველოს სახეა პუტინის მიერ უკრაინაში ჩადენილი საერთაშორისო დანაშაულის გამო შექმნილ დაძაბულ გარემოში. შესაბამისად, სახუმაროდ და საქილიკოდ საქმე ნამდვილად არ გვაქვს.

- რატომ კეთდება დაბეჯითებითი განცხადებები იმასთან დაკავშირებით, რომ სააკაშვილის თემამ შესაძლოა, ხელი შეუშალოს ევროინტეგრაციის პროცესს? მით უფრო, რომ ასოცირების ხელშეკრულების ხელმოწერის ვადები უკვე განსაზღვრულია. ამ ხნის განმავლობაში დასავლეთს ხომ თავი არ მოუკლავს თუნდაც მერაბიშვილთან დაკავშირებით.

- ბოლო მომენტამდე იანუკოვიჩიც აცხადებდა, რომ უკრაინა ხელს მოაწერდა ევროკავშირთან ასოცირების ხელშეკრულებას და ბოლო მომენტში მას მართლაც დაურეკა ვლადიმერ პუტინმა. იმედია, ზემოხსენებულ მოქილიკეებს ამ ფაქტში მაინც არ ეპარებათ ეჭვი.

ამიტომ ყველაფერი უნდა გაკეთდეს, რომ საქართველოს მიერ ევროკავშირთან ასოცირების ხელშეკრულების ხელმოწერას ხელი არ შეეშალოს. საქართველოს ხელისუფლების უგუნური ქმედებები უკვე ერთეული ქმედება კი არა, სისტემური ხასიათისაა, მაგრამ მე დღესაც ვურჩევდი - კი არ ვურჩევდი, შევეხვეწებოდი - ბრიუსელს, რომ ამ ხელისუფლების უგუნურებათა გამო არ გვითხრან უარი ჩვენს ისტორიულ შანსზე.

საქმე მხოლოდ ხელმოწერაშიც არაა. მნიშვნელოვანია, რა ხდება ხელმოწერის შემდეგ: საქართველო ისევ პოლიტიკური ანგარიშსწორების ჭაობშია ჩაფლული თუ მთელი ძალისხმევა რეფორმებსა და ეკონომიკური მდგომარეობის გაუმჯობესებაზე გადავა.

დაბოლოს, ვანო მერაბიშვილის გასამართლებაში რომ პოლიტიკური მოტივი დაინახა, იმიტომ მისცა ასეთი მკვეთრი რეაქცია დასავლეთმა პრეზიდენტ სააკაშვილის დაკითხვაზე დაბარებას, თორემ პოლიტიკური დევნის წელიწად-ნახევარი რომ არ ეხილა, ვინ იხმარდა ფრაზას: “არავინ დგას კანონზე მაღლა, მაგრამ სისხლის სამართლის რამდენიმე საქმის ერთდროული დაწყება ყოფილი პრეზიდენტის მონაწილეობით ლეგიტიმურ შეშფოთებას აჩენს პოლიტიკური დევნის შესახებ, განსაკუთრებით მაშინ, როდესაც სამართლებრივი და სასამართლო ინსტიტუტები ჯერ კიდევ მყიფეა”. შეერთებული შტატების სახელმწიფო დეპარტამენტის განცხადებაში სწორედ ასე წერია.

- რას ნიშნავს სააკაშვილის განცხადება: საქართველოში ჩამოვალ პუტინის დავალებების შემსრულებლებისგან საქართველოს გასათავისუფლებლად - “ნაციონალური მოძრაობა” მორიგი რევოლუციისთვის ემზადება?

- ეს განცხადება ნიშნავს იმას, რაც მასში წერია.

- 2012 წელს ხშირად ვიმეორებდი ერთსა და იმავე კითხვას: რას ნიშნავს სამართლიანობის აღდგენა - ვენდეტას, შურისძიებას, რევანშს? სწორედ ასევე მაინტერესებს ახლა, თქვენი გუნდის ზოგადი სლოგანი - ჩვენ აუცილებლად დავბრუნდებით ხელისუფლებაში - რამდენად გულისხმობს თავის თავში სამაგიეროს გადახდას, ისევ ციხეების გადავსებას, კუდიანებზე ნადირობას, ვენდეტას, მოკლედ - რევანშს? რატომ უნდა მოუნდეს რიგით ამომრჩეველს საკუთარი ნებით შეუქმნას საფრთხე საკუთარ თავს? ეს ხომ გამოვიარეთ თქვენი ხელისუფლების დროსაც და ამას ვხედავთ ახლაც.  

- “ერთიანი ნაციონალურ მოძრაობა” აუცილებლად დაბრუნდება ხელისუფლებაში. ახლავე ვაცხადებ: ჩვენ თუ გავაკეთებთ იმას, რასაც ეს ხელისუფლება აკეთებს, ჩვენ კიდევ უფრო მეტად უგუნურები ვიქნებით. ეს არ არის გზა იქითკენ, რომ საქართველო დასავლური ტიპის ქვეყანა გახდეს.

- კიდევ ერთხელ დავუბრუნდები სააკაშვილის განცხადებას - მე ჩავაკითხავ, როცა საჭირო იქნება, ივანიშვილს, ოღონდ ჩავაკითხავ სხვა მიზნით. ღია ტექსტით საუბარს 2 მილიარდზე, ანუ ეს არის მინიშნება, რომ ივანიშვილი ქართველი “იანუკოვიჩია” და შესაძლოა, საქართველოში “თბილისის მაიდანიც” ვიხილოთ?  იმაზე ფიქრობს ვინმე, რომ საზოგადოება დაიღალა დაპირისპირებებით და მორიგმა კატაკლიზმებმა შესაძლებელია ეს ქვეყანა თავზე დაგვამხოს?

- მეც თქვენსავით სწორედ მოსალოდნელი კატაკლიზმების საფრთხე მაშფოთებს, მაგრამ კითხვას ვსვამ: ვინაა ამ კატაკლიზმების გამომწვევი? პრეზიდენტმა სააკაშვილმა მკაფიოდ განაცხადა: საქართველოს ინტერესებიდან გამომდინარე, მან დატოვა ქვეყანა. ბიძინა ივანიშვილი ექაჩება, ჩამოდი, უნდა დაგაპატიმროო. ვიმეორებ კითხვას: ვინაა შესაძლო კატაკლიზმების ინიციატორი და წყარო?

დასავლეთის ლიდერებმა არაერთხელ, არაორაზროვნად უთხრეს ბიძინა ივანიშვილს, რომ პრეზიდენტ სააკაშვილზე შეხება იქნება “წითელი ხაზის გადაკვეთა”. ივანიშვილი ფიქრობს: თუ პუტინს გასდის უკრაინასა და მთელ რეგიონში ის, რასაც აკეთებს, ამდენი გაფრთხილების მიუხედავად, მე რატომ არ გამივა? შესაბამისად, ივანიშვილი თავისას ცდილობს, თავისი საქმე თვითონ იცის. მე მას არ ვურჩევდი ამ “ცეცხლთან თამაშს”, ისევე, როგორც არ ვურჩევდი პუტინს იმის კეთებას, რასაც აკეთებს. მაგრამ ვიმეორებ, მათ თავის საქმისა თავად იციან.

მაგრამ საქართველო არ არის მხოლოდ ბიძინა ივანიშვილი. ამიტომაც მგონია, რომ დღევანდელ რეგიონულ კონტექსტში, გამოძიების მოუკერძოებლობასა და ლეგიტიმურობაში ეჭვი რომც არ გვეპარებოდეს, ეროვნული ინტერესებიდან გამომდინარე, ამ ნაბიჯს არ გადავდგამდი და პრეზიდენტ სააკაშვილს დაკითხვაზე არ დავიბარებდი.

აქვე იმასაც დავამატებდი, რომ ევროკავშირთან ასოცირების ხელშეკრულებაზე ხელმოწერის თარიღის ივნისში გადმოწევა ივანიშვილმა ვანო მერაბიშვილის დაპატიმრების “პატიებად” და სააკაშვილის დაპატიმრებაზე “სანქციად” აღიქვა. კეთილი. მას თავისი ლოგიკა აქვს.

მე კი ვიცი, რომ ევროკავშირთან დაახლოებულ და, მით უმეტეს, ევროკავშირის წევრ ქვეყანაში პრეზიდენტებსა და პრემიერ-მინისტრებს ოლიგარქები არ ნიშნავენ და მათ მართვას არ ცდილობენ.

- შეგნებულად არაფერს გეკითხებით ხელისუფლების სუსტ წერტილებზე, ამას საზოგადოება ხედავს. თუმცა, როგორ ფიქრობთ, ქვეყანაში არსებული დაპირისპირების საფუძველი რა არის? ხომ ცხადია, რომ საზოგადოება ორ ნაწილადაა გაყოფილი და ერთმანეთისადმი უსაზღვრო ზიზღს ავლენს. პოლიტიკური ლიდერები კი მუდმივად პროცესების წახალისებით არიან დაკავებულნი. არის კი თუნდაც ერთი საკითხი, რაზეც თქვენ და ხელისუფლება ერთიანი ხართ?  

- პატარა ბარბარე რაფალიანცის გარდაცვალება თავისთავად იყო ტრაგედია, მაგრამ ის კიდევ უფრო დიდ ტრაგედიად კოალიცია “ქართული ოცნების” მიერ უსაფუძვლოდ და უსაგნოდ პოლიტიკური სპეკულაციის მიზნით გამოყენებამ აქცია. პოლიტიკური ოპონენტებისადმი ამგვარი დამოკიდებულება ამ კოალიციის თვისება იყო მაშინაც, როცა ოპოზიციაში იყო, და ახლაც, როცა ქვეყანას მართავს. ქვეყანა კი ზიზღითა და დაპირისპირების გაღვივებით არ იმართება.

ჩვენ დიდი სურვილი გვაქვს, დაჭერების გარდა, ტელემაყურებელი თუ გაზეთის მკითხველი ჩვენგან ისმენდეს მოსაზრებებს განათლების, ჯანდაცვის, სოფლის მეურნეობის, დასაქმების საკითხებზე. მაგრამ ხელისუფლება იმიტომაც გვებრძვის ასეთი უკანონო მეთოდებით, რომ ამ საკითხებზე არ ვილაპარაკოთ.

იმის მიუხედავად, რომ არ ვეთანხმები “ქართული ოცნების” ჯანდაცვის სტრატეგიას, მე პირადად მხარი დავუჭირე მინისტრ სერგეენკოს წამლის რეცეპტის შემოღებისა და ექიმთა რესერტიფიცირების საკითხებში, თუმცა კითხვის ნიშნები მაქვს, რეალურად როგორ განხორციელდება ეს. ჩვენ შეხების წერტილებს ბევრ საკითხში მოვნახავთ, თუკი საქმეზე ვილაპარაკებთ და ხელისუფლება პოლიტიკური ანგარიშსწორებით არ იქნება დაკავებული.

- ნამდვილად ვერ ვიტყვი, რომ ოპოზიციაში “ნაციონალების” საქმიანობა - სტრატეგია თუ ტაქტიკა ყოველმხრივ მისაღებია ჩემთვის და არამხოლოდ ჩემთვის. პერსონიფიცირებულმა “კათარზისმა”, რომელიც თქვენი გუნდის ცალკეულმა წევრებმა გამოავლინეს, ვერ დამარწმუნა იმაში, რომ გუნდში თვისობრივი ცვლილებები ხდება. რომ ბოლომდეა გააზრებული დაშვებული შეცდომები. ასე რომ მომხდარიყო, ამდენი ხნის განმავლობაში რაღაც დოკუმენტს მაინც შექმნიდით და იტყოდით, აქ და აქ დავუშვით შეცდომებიო და... მოკლედ, მე, მოქალაქემ, რომელსაც არცთუ ცუდი მეხსიერება მაქვს, რატომ უნდა დავიჯერო, რომ სავლე - ყოფილი ხელისუფლება, მომავალში გახდება პავლე?  

- გამოქვეყნებული მაქვს ორნაწილიანი წერილი “ნაციონალური მოძრაობის შეცდომები”, რომლებიც დაწერილია ზუსტად ერთი წლის წინათ, 2013 წლის მარტ-აპრილში. დამერწმუნეთ, პარტიაში მუდმივად გვაქვს მსჯელობა იმაზე, რა იყო ჩვენი შეცდომები.

პრაიმერისების სისტემა, რომელიც პარტიაში დავამკვიდრეთ, საშუალებას გვაძლევს, ყველა თაობის ძალიან საინტერესო ადამიანები მოვიზიდოთ ჩვენს რიგებში. ჩვენ უკვე ვართ კარგად სტრუქტურირებული, გამოცდილებისა და ტრადიციის მქონე პარტია, რომელიც პოლიტიკური დევნის პირობებშიც კი ახერხებს, განავითაროს შიდაპარტიული დემოკრატია. ეს შედეგს აუცილებლად მოგვცემს.

- დაბოლოს, სიმართლე გითხრათ, საკმაოდ ფხიზლად ვაკვირდები მოვლენებს და რატომღაც მიჩნდება განცდა, რომ უახლოესი რამდენიმე თვე, ყოველ შემთხვევაში შემოდგომის მიწურულამდე, საკმაოდ რთული იქნება ჩვენი ქვეყნისთვის. თქვენ რას ფიქრობთ ამ საკითხზე და როგორი იქნება “ნაციონალური მოძრაობის” როლი ქვეყნის უსაფრთხოების უზრუნველყოფისთვის?

- ჩვენ დღესაც მზად ვართ, ჩვენი გამოცდილება და ცოდნა გავუზიაროთ ხელისუფლებას იმ საკითხებში, რაც ქვეყნის უსაფრთხოებას ეხება. ოღონდ ამისთვის თავად ხელისუფლების პოლიტიკური ნება უნდა არსებობდეს. დღეს ეს არ გვაქვს. იმედია, აქამდეც მივალთ და მივალთ იმის გამო, რომ ქართველი ხალხი ითხოვს ყველასგან, გვერდზე გადაიდოს პირადი ინტერესები და ქვეყნის საკეთილდღეოდ მოინახოს დღევანდელი რთული მდგომარეობიდან გამოსავალი.

გოჩა მირცხულავა,  გაზეთი „პრემიერი“

FaceBook