ივანიშვილის გრანიტის ძაფი

ხელისუფლებამ შევარდნაძისდროინდელი კორუფციული "მანქანების"ამუშავება დაიწყო

 ბიძინა ივანიშვილის ხელისუფლება რომ შევარდნაძისდროინდელი ფულის წყაროების ამუშავებას ახორციელებს, ამაზე წინა ნომერში უკვე გავაჟღერეთ. "ახალგაზრდა უფლებადამცველთა ასოციაციის" ხელმძღვანელი ლექსო კობაიძე ახალი ხელისუფლების მიერ დაგეგმილ "ფულისა და მონოპოლიების"იმ მექანიზმებზე გვესაუბრა, რომლის შესახებაც საზოგადოებას სრულფასოვანი ინფორმაცია არ აქვს.

ლექსო კობაიძე:

_ ახალ ხელისუფლებას შევარდნაძისდროინდელი კორუფციული "მანქანების"ამუშავება აქვს დაწყებული და მას წარმატებით ახორციელებს კიდეც. სააკაშვილის ხელისუფლებაზე რომ ვამბობდით, ყველგან "ხვრელს"აკეთებენ, ფულის წყაროდ რომ აქციონო, ესენიც ასე იქცევიან. ახლა რამდენიმე ისეთ მექანიზმზე გეტყვით, რომელიც საზოგადოებისთვის სრულფასოვნად ცნობილი არ არის. აქამდე ნასყიდობის ხელშეკრულებას ვინც აფორმებდა, ანუ ვინც ბინას, მანქანას ან რაიმე ნივთს ყიდდა და ყიდულობდა, ყველა საჭირო ოპერაციას რეესტრი უკეთებდათ. საქმეში ნოტარიუსის ჩართვა და მისთვის დამატებითი თანხების გაღება არ სჭირდებოდათ. ასეთი ფორმით ამ ადამიანებს დაახლოებით 200-300 ლარამდე თანხა ეზოგებოდათ. ეს შეღავათი, რაც არ უნდა იყოს, ნაციონალების დროს დაწესდა, ივანიშვილის ხელისუფლებამ კი მოხსნა.

_ აბა, ახლა როგორ ხდება?

_ როგორც შევარდნაძის დროს ხდებოდა. კანონში ჩაიდო, რომ ნასყიდობის ხელშეკრულება უნდა დაამოწმოს ნოტარიუსმა და ცხადია, მასთანაც უკვე თანხა უნდა გადაიხადოს მოქალაქემ.

კიდევ ერთი გაცოცხლებული ფულის წყაროა ავტომანქანების ტექნიკური დათვალიერება. ამ კანონით, როგორც კი ბოლომდე ამოქმედდება, ისედაც გაჭირვებულ საზოგადოებას დიდი პრობლემები შეექმნება. ჩვენი ქვეყანა დღეს ისეთ ქვეყნად ითვლება, რომელიც განვითარების გზაზეც კი არ დგას. ეკონომიკურადაც და სოციალურადაც ძალიან ცუდ მდგომარეობაში ვართ. მიუხედავად იმისა, რომ ახალი ხელისუფლების წარმომადგენლები ოპოზიციაში ყოფნისას და მერეც აპელირებდნენ, რომ იმ ჯარიმებს, რომელიც ხალხს კისერზე აწვა, შეამცირებდნენ, ხელისუფლებაში მოსვლის შემდეგ უსინდისოდ ზრდიან. რაც ნაციონალებმა ვერ გააკეთეს, ახლა ესენი აკეთებენ წარმატებულად. ადმინისტრაციული და საპროცესო შეთანხმების ჯარიმები თითქმის ორმაგი გახადეს. ასევე გვაქვს ინფორმაციები, რომ პატრულს ხელმძღვანელობა შეკრებებზე ავალებს, რაც შეიძლება მეტი მძღოლი დააჯარიმონ. ამის საფასურად კი პრემიებსა და დაწინაურებას ჰპირდებიან. ეს ყველაფერი მეტყველებს იმაზე, რომ ქვეყანაში ახალი ხელისუფლება სასიკეთოდ არაფერს ცვლის. მეტიც, უფრო აუარესებს საზოგადოების მდგომარეობას.

ასევე, გვაქვს ინფორმაცია, რომ სავაჭრო ობიექტებში, წინათ მონიტორინგ-შემოწმებას ატარებდნენ შემდეგი ფორმით _ ამ სამსახურების თანამშრომლები მიდიოდნენ სავაჭრო ობიექტებში, ყიდულობდნენ პროდუქციას და თუ ქვითარს არ ამოურტყამდა გამყიდველი, ობიექტის მეპატრონეს აჯარიმებდნენ. ახლა ეს ყველაფერი უფრო გამკაცრდა. არაერთი სავაჭრო ობიექტი დააჯარიმეს იმ მოტივით, რომ რამდენიმე საათის წინ, რომელიღაც მყიდველს ქვითარი თურმე არ მისცეს. როგორც შევიტყვეთ, მაკონტროლებლებს ტანსაცმელზე დაუყენეს ღილის მსგავსი "ჟუჩოკები"და ამ თვალთვალის შედეგად ხდება მეწარმეების დაჯარიმება. როგორც ვიცი და მახსოვს, ახალ ხელისუფლებაში მყოფი ადამიანები მოსახლეობას პოლიციური, დესპოტური სახელმწიფოს ნგრევას ჰპირდებოდნენ და გამოდის, რომ უარეს წნეხში აქცევენ რიგით მოქალაქეებსაც და ბიზნესსაც. სახელმწიფო უფრო აძლიერებს წნეხს საზოგადოებაზე და ცდილობს, გაჭირვებული ხალხისგან აკეთოს ფული. ისინი მუდმივად შეშინებულები ჰყავდეს... კიდევ რამდენიმე საინტერესო ინფორმაცია მაქვს.

    _ გვითხარით, გისმენთ.

    _ მოგეხსენებათ, საქართველო განვითარებული ქვეყნებიდან გამოგზავნილი, ჩამოწერილი და ძველი ავტომანქანების ბაზრად არის ქცეული. ახლა ასეთი მანქანების მეპატრონეებიდან ცდილობს ხელისუფლება ფულის გაკეთებას, რაც ამაზრზენია. ავტომანქანებში ჩამონტაჟებულია მოწყობილობა გრანიტის ძაფი, რომელიც ხელს უწყობს გამონაბოლქვის გასუფთავებას და ის მავნებელი აღარ არის. ფილტრაციას უკეთებს გამონაბოლქვს და ეკოლოგიაზე კარგად აისახება. ეს მოწყობილობა, წესითა და რიგით, ყველა ავტომანქანას უნდა ჰქონდეს, რაც, ცხადია, ცუდი არ არის და ჩვენც მივესალმებით, ჰაერი, რომელსაც ვსუნთქავთ, გაბინძურებული თუ არ იქნება, მაგრამ ძველი ავტომანქანების მასიურად შემოდინებას სხვა ქვეყნებიდან ხომ თავად სახელმწიფომ შეუწყო ხელი და ახლა ამის გამო მხოლოდ მოსახლეობა რატომ უნდა დაზარალდეს? ამით კი, რასაც ესენი აკეთებენ, მოსახლეობა აუცილებლად დაზარალდება და ეს არის წნეხი. ამ ავტომანქანების საშუალებით ქვეყანაში ძალიან ბევრი თვითდასაქმებული ადამიანია, რომელიც ოჯახსაც ინახავს. თუ მათზე ზეწოლა და წნეხი განხორციელდება, თუ მათ მანქანას დაუყადაღებენ, ამით არა მხოლოდ ერთეული ადამიანები,  ოჯახები დაზარალდებიან. ადამიანების სიცოცხლის რისკით ხდება გარკვეული სახელმწიფო გადასახადების გაცოცხლება-დაწესება. გაჭირვებული ხალხისა და ოჯახების ხარჯზე ბიუჯეტის შევსება, სულ ცოტა, უზნეობაა. თუ რაიმე გადასახადის დაწესება აუცილებლობას წარმოადგენს, ეს ეტაპობრივად, ნელ-ნელა უნდა მოხდეს, მათ მასზე მორგება რომ შეძლონ, მაგრამ ფაქტია, ასე არ ხდება და უცებ შემოდის კანონი, რომლის შედეგადაც სახელმწიფო გეუბნება: მე გაგაკეთებინებ შენ ამას ნახევარ ფასად, მაგრამ მაინც უნდა გააკეთოო. გარდა იმისა, რომ სახელმწიფო წნეხის ქვეშ აქცევს  მოსახლეობას, აღადგენს სახელმწიფო მონოპოლიებსაც.  

  _ იქნებ უკეთ აგვიხსნათ, რა და როგორ ხდება?

  _ როგორც გითხარით, მანქანა ტექდათვალიერებას ვერ გაივლის, თუ მასში გრანიტის ძაფი არ არის დამონტაჟებული. საქმე ისაა, რომ გრანტის ძაფი ასევე გამოიყენება სამშენებლო სამუშაოების დროსაც _ არმატურაში, ასფალტის დაგების დროს, რადგან ის მდგრადობას უწყობს ხელს. ამიტომაც გრანიტის ძაფი ძალიან ძვირი ღირს _ ერთი კილოგრამი 200 ლარზე მეტი. ერთ მანქანას კი კილო-ნახევარი გრანტის ძაფი სჭირდება(300 ლარზე მეტი), ტექდათვალიერების დროს არსებული მოთხოვნა რომ დააკმაყოფილოს. უცხოეთიდან შემოყვანილი ავტომანქანების 99 პროცენტში კი გრანიტის ძაფი არ არის. საქმე ისაა, რომ მანქანების შემოყვანის დროს, გაყიდვამდე ხდება გრანიტის ძაფის ამოღება და მისი სხვა მიზნებისთვის გაყიდვა. ამაზე ადამიანების გარკვეული ჯგუფები მუშაობენ დიდი ხანია. ეს არის დიდი ბიზნესი. ჰოდა, სახელმწიფომ ახლა ამ სეგმენტს დაარტყა და უნდა, რომ ამ ხალხსაც წაართვას ფულის წყარო.

_ გინდათ მითხრათ, რომ  ხელისუფლებას ტექდათვალიერებით ეკოლოგიური მდგომარეობის გაუმჯობესება კი არა, ბიზნესის "დათრევა"უნდა?

_ დიახ, ასეა და ახლავე აგიხსნით, ასე რატომ ვფიქრობ. სახელმწიფომ გააჟღერა, რომ აპირებს, ავტომფლობელებს ნახევარ ფასად მიჰყიდოს გრანიტის ძაფი. ცოტა ხანში კი საქართველოში აშენდება  ქარხანა, რომელიც გრანიტის ძაფს დაამზადებს. ამ ეტაპზე ასეთი ქარხანა არ არსებობს, თუმცა დაახლოებით 10 წლის წინათ, ამიერკავკასიის მასშტაბის მსგავსი ქარხნის გახსნას გეგმავდა სწორედ ბიძინა ივანიშვილი. ეს ინფორმაცია ჩვენ სანდო წყაროზე დაყრდნობით გვაქვს და ნამდვილია. ივანიშვილს "მერსედესის"ქარხანასთანაც კი ჰქონდა შეთანხმებები და ერთობლივად აპირებდნენ ქარხნის გამართვას. თუმცა მაშინ ეს ვერ განახორციელეს. რა იყო მიზეზი ამ ქარხნის არაშენებისა, ზუსტად ვერ გეტყვით, მაგრამ გონივრული ეჭვის დონეზე ვიცი, რაც მოხდა. როგორც ყველასთვის ცნობილია, ივანიშვილი აცხადებდა ხოლმე, რომ ნათესავებმა ერთ-ერთი დიდი საქმიდან ფული შეუჭამეს. ჩვენი ინფორმაციით, სწორედ ეს საქმე იყო ის, რაშიც მისმა ახლობლებმა ფული გაუფლანგეს ივანიშვილს და ქარხნის აშენებაც ამიტომ გადადო, დაელოდა დროსა და მომენტს და ეს მომენტიც დადგა. ახლა გრანიტის ძაფის დამამზადებელი ქარხნის აშენებაზე უკვე სახელმწიფომ დაიწყო საუბარი, თუმცა ინტერესები ამჯერადაც ბიძინა ივანიშვილს აქვს და ამის მოთხოვნაც კანონში სწორედ ამიტომ ჩაიდო. ამ სეგმენტის აუცილებლობის გაზრდა იყო მთავარი, ახლა კი ივანიშვილი ქარხანას ან დაუფარავად, საკუთარი სახელით ააშენებს, რადგან ის  ხელისუფლებაში აღარ არის, ანდაც, როგორც აქამდე ხდებოდა, ოფშორში დარეგისტრირებული რომელიმე კომპანიის მეშვეობით მოხდება ეს, მისი დამფუძნებლის ვინაობა კი არავის ეცოდინება. აქვე ვიტყვი იმასაც, რომ სანამ ეს ხალხი ხელისუფლებაში მოვიდოდა, გვიცხადებდა, რომ ოფშორის გახსნაზე იზრუნებდნენ და იქ დარეგისტრირებული კომპანიების მფლობელები ცნობილი გახდებოდა, მაგრამ ესეც არ გააკეთეს. ამის მიზეზი არის ის, რომ, ნაციონალების მსგავსად, ახალი ხელისუფლების წარმომადგენლებსაც იგივე ფორმით უნდათ ბიზნესმონოპოლიების დაწესება ქვეყანაში. ანუ სახელმწიფოს ჯერ მათი ბიზნესისთვის სასარგებლო კანონს მიაღებინებენ, მერე კი ოფშორში დარეგისტრირებული, საკუთარი კომპანიებით განახორციელებენ მას. ხალხს კვლავაც არ ეცოდინება, ვინ არის ამ მონოპოლიური კომპანიების რეალური მეპატრონე. უცხოური ინვესტიციებით ისპეკულირებს ეს ხელისუფლებაც.

ეკოსისტემა რომ უნდა გაუმჯობესდეს, ფაქტია, მაგრამ ეს ადამიანებს მძიმე ტვირთად არ უნდა დააწვეთ. თუ არ უნდა მოსახლეობაზე წნეხი მოახდინოს, სახელმწიფომ თავად ჩადგას გრანიტის ძაფი ავტომანქანებში, ხალხს ამ ეტაპზე ფულის არ გადაახდევინოს, ააშენოს ქარხანა და მერე, თუ კიდევ დასჭირდებათ, უკვე მიჰყიდოს. ეს იქნება ყველაზე სწორი, მაგრამ ასე არ აწყობს. როგორც გითხარით, ისე აკეთებენ და ეს უკვე არის მონოპოლია ამ საქმეზე. ახლა იცით, რა გამოდის? თავად აწესებს კანონს, მერე თავად იწყებს ბიზნესს და ხალხს ფულს გლეჯს. ამ შემთხვევაშიც ხალხი აღმოჩნდება დაზარალებული, როგორც ეს წინათ იყო ხოლმე და გამოდის, რომ ნაბიჯები წინ არ იდგმება. მინდა გავაფრთხილო ხელისუფლება, რომ ამას აუცილებლად მოჰყვება მასობრივი უთანხმოება. პრიორიტეტი უნდა იყოს ადამიანი და არა ბიზნესი, სხვანაირად ისინი ნაციონალებზე უარეს ძალად აღიქმებიან ძალიან მალე და იმაზე უარეს წინააღმდეგობას მიიღებენ ხალხისგან, რაც მიშისტებმა მიიღეს.

კიდევ ერთ ტყუილში უნდა ვამხილო ახალი ხელისუფლება. ისინი ხალხს ჰპირდებოდნენ, რომ შექმნიდნენ ანტიმონოპოლიურ სამსახურს, მაგრამ ფაქტია, არც ქმნიან და არც ლაპარაკობენ ამაზე. როცა ხელისუფლება და მის ჩრდილში მდგომი მმართველი ახალი მონოპოლიების შექმნას, ან ძველის გაცოცხლებას აპირებს, მას არ აწყობს ასეთი სამსახურის არსებობა და ესეც კიდევ ერთი მინუსია, რომელიც ამ ხელისუფლების  მიმართ უარყოფითად იმოქმედებს.. მართვის მოწმობების შეცვლაც დაიწყეს, თუმცა, როგორც ამბობენ, მოსახლეობა მასში თანხებს არ გადაიხდის. ამ ეტაპისთვის, როცა ქვეყანაში უამრავი პრობლემაა, ამ თემის წამოწევა აქტუალური და სათუო ნამდვილად არ იყო. თუმცა ამას ხომ რეალურად სჭირდება თანხები და ის კიდევ ბიუჯეტმა უნდა დაფაროს?! ანუ ფული მაინც სჭირდება და არ სჯობდა, ეს თანხები სხვა, უფრო აქტუალურ საკითხებში ჩაედოთ? ანუ აქაც კითხვის ნიშნები ჩნდება. ყოველდღე ისეთ ახალ-ახალ სიურპრიზს გვიმზადებენ და გვთავაზობენ, რომელიც მხოლოდ მათთვის არის სასარგებლო და არა ხალხისთვის და ასეთი ქმედებები ამ ხელისუფლებას რომ კარგს არაფერს მოუტანს, ეს უნდა იცოდნენ.

ანკა ბაზერაშვილი, გაზეთი „პრემიერი“

FaceBook