მოჩურჩულე ტრუსები

სკანდალური პიესის პრემიერა სანდრო ახმეტელის სახელობის თეატრში

არტისტული, კინო თუ თეატრალური სკანდალებით დღეს ვეღარავის გააკვირვებ. თუმცა ამ ფონზეც, სანდრო ახმეტელის სახელობის თეატრში დადგმული ახალი სპექტაკლი, სახელწოდებით “ტრუსები” გარკვეულ სკანდალურ მოლოდინს მაინც აღძრავს. სპექტაკლის პრემიერა 1-ელ და 2 მარტს გაიმართება.

ევროპაში უკვე კარგად ცნობილი, რუსულენოვანი ბელორუსი დრამატურგის, პაველ პრიაჟკოს პიესა ახმეტელის თეატრის სცენაზე, მოწვეულმა ესტონელმა რეჟისორმა კალევ კუდუმ რეკორდულად მოკლე დროში _ 25 დღეში განახორციელა! ცხადია, ახმეტელის თეატრის მსახიობებთან ერთად. აღსანიშნავია, რომ ახალგაზრდა დრამატურგის პიესა პირველად იდგმება საქართველოში.

თამამი, გამომწვევი. სკანდალური და ამავე დროს, მძაფრად სოციალურიც _ ასეთია პაველ პრიაჟკოს პიესა, რომლის წარმოდგენას მინსკში, ახალგაზრდული თეატრების ფესტივალზე დიდი ვნებათაღელვა მოჰყვა. ამავე დროს, სწორედ “ტრუსებმა” მოუტანა რეჟისორ კალევ კუდუს დიდი წარმატება (TARTUS ETÜ & Vanemuise-ს დრამატული სტუდიაში განხორციელებული სპექტაკლი).

მომხიბვლელი, სექსუალური, ბავშვური, ოდნავ ქარაფშუტა ნინა პროვინციულ ქალაქში ცხოვრობს და უჩვეულო ფანტაზიები აქვს _ ის ტრუსების შეგროვებითაა დაკავებული. ეს “სიგიჟე”, ცხადია, მიუღებელია პროვინციის მცხოვრებლებისთვის, ნინას ლამის კეთროვანივით დევნის მთელი ქალაქი და ის საზოგადოების გულგრილობისა და სისასტიკის მსხვერპლი ხდება.

მთავარ როლს _ ნინას მსახიობი სოფია სებისკვერაძე ასრულებს, რომელიც გიორგი ლიფონავას ფილმის (“ჭამა და სექსი”) შემდეგ საკმაოდ პოპულარული გახდა ახალგაზრდებს შორის. ჟურნალისტებმა და კრიტიკოსებმა მას “ქართველი მერილინ მონროც” კი შეარქვეს. სპექტაკლში, ასევე, მონაწილეობენ ახალგაზრდა და შედარებით ძველი თაობის მსახიობები: ალეკო ალავიძე, მამუკა მაზავრიშვილი, თამარ ბეჟუაშვილი, მზია ტალიაშვილი, გიორგი მიგრიაული, გიორგი ჭუმბურიძე, გვანცა კანდელაკი, თამთა პატაშური.

მიმდინარე თეატრალურ სეზონში ეს უკვე მეორე საერთაშორისო თეატრალური კოპროდუქციაა, რომელსაც ახმეტელის თეატრი ახორციელებს. 2013 წლის დეკემბერში პოლონელი რეჟისორის, დარიუშ ეზერსკის სპექტაკლის პრემიერამ “პოლიცია” (სლავომირ მროჟეკის მიხედვით) თეატრში წარმატებით ჩაიარა.

სხვათა შორის, თეატრის დირექციამ მოსალოდნელი სკანდალის თავიდან ასაცილებლად წინასწარ ზომები უკვე მიიღო და აფიშაზე უკვე გაჩნდა წარწერა _ სპექტაკლზე არასრულწლოვანი მაყურებელი არ დაიშვება! ასე რომ, მოჩურჩულე ტრუსების სცენას თეატრში მისული მაყურებელი “გაგებით უნდა მოეკიდოს”, ისევე როგორც, ნინას ტრუსებისადმი ფაშისტურ, უცნაურ-პოეტურ დამოკიდებულებას... თუ გვინდა, რომ პიესაში წარმოჩენილ პროვინციულ ქალაქს არ დავემსგავსოთ, რომელიც თავისუფლების მოყვარულ გოგონას ლამის ჯვარზე გააკრავს.

კალევ კუდუ თეატრის რეჟისორი, მსახიობი და დრამატურგია. დაამთავრა ტალინის თეატრალური ინსტიტუტის  სარეჟისორო ფაკულტეტი. მანამდე სწავლობდა ტარტუს სახელმწიფო უნივერსიტეტში, ჟურნალისტიკის ფაკულტეტზე. იყო ETÜ & Vanemuise _ დრამატული სტუდიის მსახიობი, ამავე დროს,  ITI (თეატრის საერთაშორისო ინსტიტუტის) მკვლევარია 2014 წლიდან.

კალევ კუდუს სპექტაკლები მონაწილეობდა მრავალ საერთაშორისო თეატრალურ ფესტივალზე; არის არაერთი თეატრალური ჯილდოს მფლობელი. ესტონეთში დაარსებული აქვს ახალგაზრდული თეატრი THEATRE & ZERO THEATER. იყო ახალგაზრდა თეატრალური ჯგუფის, “GEOUP _ 80”-ის მსახიობი და რეჟისორი. დააარსა ერთი მსახიობის თეატრი. მოგვიანებით ტარტუს სტუდენტური თეატრი, რომლის დირექტორი, მსახიობი და რეჟისორი თავად იყო წლების განმავლობაში.

რეჟისორს დადგმული აქვს 40-მდე სპექტაკლი ევროპის სხვადასხვა ქვეყანაში. მათ შორის, ანდრე ჟიდის “საწყალი მიჯაჭვული პრომეთე”, სემუელ ბეკეტის “გაძევებული”, “თამაშის დასასრული”, “სუნთქვა” და “მომავლის გარეშე”; ავგუსტ სტრინდბერგის “სიკვდილის როკვა” და “მამა”, ეჟენ იონესკოს “მომავალი კვერცხებში”, “ახალი მობინადრე” და  “მარტორქები”, დოსტოევსკის “ეშმაკნი”, იური ელისტის “დაგვიანებული ფრენა”, სარა კეინის “განწმენდილები” და “ფსიქოზი 4.48”, პაველ პრიაჟკოს “წარმატებული ცხოვრება” და “ტრუსები”.

დავით ბუხრიკიძე, გაზეთი „პრემიერი“

FaceBook