“ნარმანიას მაინც მოვუგებ არჩევნებს და ამის ეშინია ღარიბაშვილს”

“ხელისუფლება ვერ ეგუება, ქვეყანაში არჩევითი თანამდებობები რომ არსებობს”

“არ შეიძლება ადვოკატის იდენტიფიცირება თავის კლიენტთან”

 “რომ მეუბნებიან, ადვოკატის უფლებებს ნუ იცავო, აბა, რა ვქნა, პროკურორის უფლებები დავიცვა?!”

 “ფინანსური პოლიციის ხალხი, რომელიც ყველაზე მეტად იყო დამნაშავე ქონების წართმევის დროს, მთავარ პროკურატურაში გადაიყვანეს და ასე “გააპრავეს” ყველაფერი”

 “თუ გოგა ონიანმა ჩაიდინა დანაშაული, მან პასუხი უნდა აგოს, მაგრამ, თუ მასთან მიმართებაში სხვას აქვს ჩადენილი დანაშაული, მათაც უნდა აგებინონ პასუხი”

 “ეს გახლავთ ღარიბაშვილის შურისძიება ჩემზე”

 “მე ვეწირები სახელმწიფო მისწრაფებას, ყველა სტრუქტურა და სფერო ჩაიგდოს ხელში”

ის-ის იყო საქართველოს ადვოკატთა ასოციაციის პრეზიდენტთან, ზაზა ხატიაშვილთან ინტერვიუზე მივედი, გზის მხრიდან, რუპორიანი ახალგაზრდები რომ გამოჩნდნენ. ისინი ბატონ ზაზას თანამდებობიდან გადადგომას სთხოვდნენ. ამ სახის მოთხოვნა პირველად უფლებადამცველმა მჟავანაძემ გააჟღერა, მერე კი მას ახალგაზრდების ერთი ჯგუფიც აჰყვა. ამ ყველაფრის საბაბი კი, ადვოკატთა ასოციაციის პრეზიდენტის განცხადება იყო, რომლითაც მან ბაჩო ახალაიას დაკავებული ადვოკატი, გოგა ონიანი დაიცვა და მის აყვანას პოლიტიკური დაპატიმრება უწოდა. ამის მერე ხატიაშვილი საზოგადოებისა და “მჟავანაძისა და მისი ახალგაზრდების” ქარ-ცეცხლში მოექცა. თუმცა ის მიიჩნევს, რომ მისი “დაბომბვის” მიზეზები სულ სხვაა, ვიდრე ერთი შეხედვით ჩანს.    

    ზაზა ხატიაშვილი:

    _ ქვემოთ 15 ახალგაზრდა დგას, რომლებიც, ეტყობა, ვიღაცის ზეგავლენის ქვეშ მოექცნენ და კანონიც არ იციან. ძალიან ცუდია, როცა ახალგაზრდები ასე ცდილობენ კარიერის გაკეთებას და უცნაურ განცხადებებს ავრცელებენ ჩემთან მიმართებაში. ამის მთავარი მიზეზი არის ის, რომ ხელისუფლება ვერ ეგუება, ქვეყანაში არჩევითი თანამდებობები რომ არსებობს. სწორედ ასეთ თანამდებობაზე, 3 თვის წინ, საქართველოს ადვოკატების 80-მა პროცენტმა მე მომცა ხმა. ასეთი პროცენტული მაჩვენებლით თავად “ქართულ ოცნებასაც” არ მოუგია არჩევნები. შეშფოთებულები არიან, სამოქალაქო საზოგადოებაში პოპულარული რომ ვარ. ახალი ხელისუფლებისგან ერთი წლის განმავლობაში ვითხოვ ხალხის წინაშე აღებული ვალდებულების შესრულებას,  მართლმსაჯულების ხარვეზების კომისიის შექმნას, კანონიერ ძალაში შესული განაჩენების გადასინჯვას. ეს არ გააკეთა ივანიშვილის ხელისუფლებამ და დაიწყო სააკაშვილის რეჟიმის კოპირება, ამიტომ გავემიჯნე მათ. სამარცხვინოა, ეს ახალგაზრდები რომ ამბობენ, თითქოს ურთიერთობა მაქვს “ნაცმოძრაობასთან”. ესენი მართვადები რომ არ იყვნენ, “ნაცმოძრაობასთან” რომ საერთო არაფერი მაქვს, ბავშვმაც კი იცის. “ნაცმოძრაობის” იმ წარმომადგენლებს ნიშნავენ პროკურატურაში, მაშინ ფინანსურ პოლიციაში რომ მუშაობდნენ და ხალხს ქონებას ართმევდნენ. ჭიკაიძე, სააკაშვილის რეჟიმის მაღალი თანამდებობის პოლიციელი, შინაგან საქმეთა მინისტრად დანიშნეს. ყველა ის პროკურორი, რომელიც სამოქალაქო საზოგადოებას ატერორებდა, ამათ დააწინაურეს. ამაზე რატომ არ აქვთ რეაქცია? რატომ მათ არ უვარდებიან ოფისებთან და სახლებთან? რატომ არ ეძახიან, ნაცების სატელიტები ხართო? 5 წელი რიტორიკა არ შემიცვლია და ერთნაირ განცხადებებს ვაკეთებ, ნაციონალების დროს ეს იყო კარგი და “ოცნების” დროს ცუდია?

     _ ბოლო დროს ხელისუფლებამ “ფრთები” გაშალა და ჯიპომანია-პრემიომანიით ნაციონალების ოცნების კოშკებსაც კი გადაუფრინა. არ დაგიმალავთ და ადვოკატთა ასოციაციის კანცელარიას საჯარო ინფორმაცია, თქვენი შემოსავლების, მანქანებისა და პრემიების ნუსხა მოვთხოვე...

     _ მერე რა იპოვეთ?! მთავარი პროკურორი ფარცხალაძე რომ დანიშნეს, მაშინვე 150-ათასიანი ჯიპი იყიდა, ბათუმის მერმაც დანიშვნისთანავე ჯიპი მოითხოვა, უშიშროების მდივანიც იმავე დღეს ჯიპში ჩაჯდა... ასოციაციაში რომ მოვედი, “მერსედესი” დამხვდა და გავყიდე, ტვირთად რომ არ დასწოლოდა ორგანიზაციას. ასოციაციის პრეზიდენტის ხელფასი 5 ათასი ლარი იყო და ვთქვი, რომ ამხელა ხელფასი არ უნდა მქონოდა. განცხადებით მივმართე აღმასრულებელ საბჭოს და 30 პროცენტით შევამცირებინე. ყველა წინააღმდეგი იყო, მაგრამ მაინც გავაკეთებინე ეს. ალბათ, ნახავდით, 5 წლის განმავლობაში პრემიად აღებული მაქვს 500 ლარი, როცა შემიძლია 60 ათას ლარამდეც კი განვკარგო ჩემი შეხედულებისამებრ, ანუ ასოციაციის ბიუჯეტის 10 პროცენტი. ამათ რომ არ ვგავარ, უნდათ, ასეთი ბინძური მეთოდებით გამიშვან. სამოთახიანი ბინა და 50 ათასი დოლარი ვალი დამხვდა ასოციაციაში და ჩემი პრეზიდენტობის მანძილზე ასოციაციას ვუყიდე 4 ოფისი. რა შემოსავალიც ჩემს დროს იყო აქ, იგივე გახლდათ ჩემამდეც, მაგრამ ვალებში იყვნენ ჩაფლული.  ვინაიდან არ გავაკეთე ის, რასაც ნებისმიერი ხელმძღვანელობა აკეთებდა, დამიწყეს ყველა მხრიდან შემოტევა. ვეკითხები იმ ახალგაზრდებს, ჩემს გადადგომას რომ ითხოვენ, რატომ არ მიდიან და არ ითხოვენ ჭიკაიძის გადადგომას?! ხელისუფლების წარმომადგენლების მიერ შეძენილ ჯიპებზე რატომ არ იღებენ ხმას? ან მათი პრემიების გამო რატომ არ დარბიან მეგაფონებით და აქციებს არ აწყობენ?! პრემია არ ამიღია, ვამბობ, არ მინდა-მეთქი და კიდევ მე ვარ ნაციონალების სატელიტი?!

 _ მჟავანაძემ ისიც თქვა, ხატიაშვილმა რუსეთის პრეზიდენტს გაუგზავნა წერილი და დაფინანსება მოითხოვაო. ეს სიმართლეა?

_ დავიწყებ იმით, რომ მჟავანაძე ამბობდა, ადვოკატის უფლებები საქართველოში არ ირღვევაო. “იუ თუ ბი”-ზე დევს, როგორ მიაყენა შეურაცხყოფა ადვოკატ ნონა კირთაძეს შემოსავლების სამსახურის თანამშრომელმა. ამის გამო ადვოკატი ცუდად გახდა და სასწრაფო გამოიძახეს. ადვოკატ რომეო საჯაიაზე თავად პროკურატურამაც დაადასტურა _ შეხლა-შემოხლა მოხდაო. პროკურატურა რასაც არ უარყოფს, მჟავანაძე იმაზეც ამტკიცებს, არ  მომხდარაო. წარმოგიდგენიათ, რა დონის ხალხია, ვინც ჩვენს გადადგომას ითხოვს?! ვხედავთ ირაკლი ღარიბაშვილი პოლიციურ სახელმწიფოს რომ ქმნის და ყველგან ნიშნავს პოლიციელებს. თავისი ერთ-ერთი მოადგილე თეა წულუკიანს ჩაუსვა, მეორე _ ალასანიას, ახლა უნდა, რომ სხვა მოადგილე ან ნდობით აღჭურვილი პირი დანიშნოს ადვოკატთა ასოციაციის  თავმჯდომარედ. მჟავანაძემ ყველაზე დიდი უზნეობა ჩაიდინა, როცა განცხადება გააკეთა, ხატიაშვილმა მითხრა, რომ პუტინს მისწერა წერილი და დაფინანსება ითხოვაო. მჟავანაძეს არასდროს შევხვედრივარ და სიმართლეც რომ იყოს, როგორ უნდა მეთქვა მისთვის ეს?! როცა საქართველოს ტერიტორიული საზღვრების მთლიანობა დაირღვა და რუსებმა მავთულხლართების გავლება დაიწყეს დვანში, ავტობუსი ვიქირავე და ადვოკატები წავიყვანე. მაშინ ხელისუფლებაც და მჟავანაძეც დამალულები იყვნენ. გოგა ონიანი იყო წამოსული რუსეთისგან ჩვენი საზღვრების დარღვევის გასაპროტესტებლად. გვაქვს ამის ფოტოსურათი და გადმოგცემთ. რაც ადვოკატთა ასოციაციის თავმჯდომარე ვარ, რუსეთში არ ვყოფილვარ. ჩემი ქვეყანა მათ ოკუპირებული აქვთ და ამიტომ არ ჩავდივარ. ეს ხალხი კი, რომელიც კვირაში ორჯერ იცვლის შეხედულებებს, ჩემზე ამბობს, თითქოს რუსეთთან რაღაც მაკავშირებს. ეს არის არასერიოზული.

_ თუ არასერიოზული და ცილისმწამებლურია, რატომ არ უჩივით მჟავანაძეს?

_ მჟავანაძე ჩემზე ლაპარაკით იკეთებს კარიერას. მას რომ ვუჩივლო, ამით პატივი უნდა დავდო. ნორმალურმა ადამიანმა, ვინც მის ნათქვამს ისმენს, არა მგონია, დაიჯეროს. როცა მთავარი პროკურორი კბილაშვილი რუსეთში წავიდა, ძალიან გავმწარდი. მე თუ მქონდა ღირსება და არ მივდიოდი, ისინი რატომ უნდა წასულიყვნენ? სანკტ-პეტერბურგში ამერიკის ადვოკატთა ასოციაციამ მოაწყო კონგრესი და მიმიწვია, მაგრამ არც იქ არ წავედი. ჩემი პრემიები ვერ ნახეს, მანქანა ვერ ნახეს და ეს სისულელე დამაბრალეს. მთავარი პროკურორის სწორი თანამდებობა მიკავია ქვეყანაში, მეკუთვნის ავტომანქანა, ვიყიდი ასოციაციის ფინანსებიდან, ამის უფლება მაქვს და ღირსეულად ვივლი, მაგრამ არ ვაკეთებ. საქართველოს, ხალხს ისე უჭირს, არაფერი მოხდება, თანამდებობის პირები ხშირად მეტროთი, ავტობუსით, “მარშრუტკით” თუ ივლიან. მჟავანაძისა და მისი ახალგაზრდების ეს განცხადებები საეჭვოდ ემთხვევა ივანიშვილის სამოქალაქო სექტორში გადმოსვლას. მე სამოქალაქო საზოგადოებას მოვუწოდე, რომ ამ ადამიანს გამიჯვნოდა. ვთხოვე, ფულის გამო, ივანიშვილთან არც ერთ სამოქალაქო, ცნობილ ორგანიზაციას შეხება არ ჰქონოდა. ამ ადამიანმა, როცა ხელისუფლებაში იყო, მიღებული კანონი, რომლითაც მოწმე პირველად სასამართლოში უნდა დაეკითხათ, გადაავადა და ამით სამოქალაქო საზოგადოებას დაარტყა. ამ საკანონმდებლო ნოვაციის შემდეგ საკმაოდ იქნებოდა დაცული სამოქალაქო საზოგადოება. ივანიშვილი ხალხს ვერასდროს დაიცავს, ვერც სხვა, ეს უნდა გააკეთოს კანონმა და სამართალმა. ივანიშვილი შემოვიდა თუ არა სამოქალაქო სექტორში, ახალგაზრდები დგებიან ჩემს კართან და მჟავანაძესთან ერთად ითხოვენ გადადგომას. რომელი ადვოკატიც მათთან მივა, ეს იქნება მათი ლუსტრაცია.

_ ადამიანები, რომლებიც თქვენს კართან მოდიან (ასევე, საზოგადოებაც), აცხადებენ, რომ ონიანი იყო სააკაშვილის ჯალათი, ის არბევდა და აწამებდა, ნარკოტიკს უდებდა უდანაშაულო ადამიანებს. ახლა კი ადვოკატურას შეაფარა თავი, ხატიაშვილი ჯალათს იცავს და პოლიტიკურ განცხადებებს აკეთებსო. ამ ბრალდებებზე თავს რით იმართლებთ?

_ ონიანთან ცუდი ურთიერთობა უფრო მქონდა, ვიდრე კარგი. მას 6 თვე არ ვიღებდი ადვოკატთა რიგებში, გამოცდის ჩაბარებას ვთხოვდი... 7 წელი იყო გასული, რაც გამოცდა ჩააბარა და კანონში წერია _ ამდენი ხნის მერე არ უნდა მივიღოთ, მაგრამ სასამართლოს სამ ინსტანციაში გაასაჩივრა. ონიანისთვის ყველაზე მიუღებელი ადამიანი ვიყავი, თუმცა მას ყველანაირი საფუძველი ჰქონდა, ადვოკატთა ასოციაციის წევრი გამხდარიყო _ განათლება, ცოდნა.  კიდევ რამდენიმე ადამიანი იყო, ვინც ასეთი ფაქტი გაასაჩივრა და სასამართლო პროცესი მოიგო. სასამართლომ მითხრა, არასწორია, მოსამართლეებად და პროკურორებად ნამუშევარ ადამიანებს ადვოკატად რომ არ იღებო. სასამართლომ დამავალა მისი გაწევრიანება და გავაწევრიანე. ჩვენი ურთიერთობა უფრო დაძაბული იყო, ვიდრე მეგობრული. თუმცა, როგორც ადვოკატს, როცა მას თავს დაესხნენ, ამით მეც დამესხნენ. როცა რომეო საჯაიას მიაყენეს ფიზიკური შეურაცხყოფა, მეც მომაყენეს. ადვოკატთა ასოციაციის წესდების თანახმად, ასოციაციის თავმჯდომარე ხელმძღვანელობს ადვოკატთა დაცვის ღონისძიებას. მე გახლავართ ადვოკატთა ომბუდსმენი. რომ მეუბნებიან, ადვოკატის უფლებებს ნუ იცავო, აბა, რა ვქნა, პროკურორის უფლებები დავიცვა?! გოგა ონიანი სამი კვირის წინ დაიბარეს მოწმედ, დაკითხეს და ეუბნებოდნენ, თუ ითანამშრომლებ, არ დაგიჭერთო, მანამდე წელიწადზე მეტხანს იდო შათირიშვილის განცხადება იქ, მაგრამ რეაგირება მოხდა მაშინ, როცა ეს ხელისუფლებას მოუნდა. ამიტომ ეს არის სწორედ პოლიტიკური დაკავება. გუშინ დიმიტროვმაც გააკეთა იგივე განცხადება, ეჭვს ბადებსო. დიმიტროვს თუ გაუჩნდა ეს ეჭვები, ადვოკატთა ასოციაციის თავმჯდომარეს არ უნდა გასჩენოდა? საერთაშორისო კონვენციებითაც პოლიტიკური დაკავება იყო ეს.          

_ ონიანის ზონდერობასა და მის მიერ ადამიანების წამებებზე რას იტყვით, ეს კითხვა უკვე დაგისვით, მაგრამ არ მიპასუხეთ...

_ მაჩვენეთ განაჩენი გოგა ონიანზე, რომ იყო ზონდერი. მე გახლავართ ადვოკატთა ასოციაციის თავმჯდომარე და ხომ არ შეიძლება, ჰაერზე ვაკეთო განცხადებები?! ონიანი, როგორც ადვოკატი, კბილებით იცავდა თავისი დაცვის ქვეშ მყოფს და ჩემი სიმპათიები, როგორც ადვოკატმა, რა თქმა უნდა, დაიმსახურა. ის ყველა კანონიერი საშუალებით ცდილობდა, თავისი დაცვის ქვეშ მყოფი გაემართლებინა. ეს არის სწორედ ადვოკატის მოვალეობაც. ონიანს ასე რომ დაეცვა პოლიტპატიმრად აღიარებული პირები, ის იქნებოდა ახლა აღიარებული ვარსკვლავი, მაგრამ, რადგან დაიცვა ბაჩანა ახალაია, გახდა ყველასთვის მიუღებელი. ადვოკატის როლის შესახებ გაეროს ძირითადი პრინციპები გვეუბნება, რომ არ შეიძლება ადვოკატის იდენტიფიცირება თავისი დაცვის ქვეშ მყოფთან. ამას აკეთებს სწორედ სამოქალაქო საზოგადოება, ხელისუფლება, რაც ნიშნავს იმას, რომ ადამიანებმა არ იციან, რა წერია საერთაშორისო კონვენციაში. თუ გოგა ონიანმა ჩაიდინა დანაშაული, მან პასუხი უნდა აგოს, მაგრამ, თუ მასთან მიმართებაში სხვას აქვს ჩადენილი დანაშაული, მათაც უნდა აგებინონ პასუხი. რომეო საჯაიას განცხადებით, გადაყვანის მომენტში, ონიანზე მოხდა ფიზიკური ზემოქმედება, მე ხომ არ მომიგონია ეს, არა?! ახლა რაც ასოციაციის გარეთ ხდება, ეს არის ადვოკატთა ასოციაციის თავმჯდომარეზე ზეწოლა. როგორც მერიაში მიდის მართვადი პროცესი, რომ იქ მერის დანიშვნას ცდილობენ, უნდათ, აქაც დანიშნონ თავისი კადრი და ასოციაცია ასე აკონტროლონ. ადვოკატს რომ დაიჭერენ, მჟავანაძე გამოიყვანონ და ათქმევინონ, არ ირღვევა ქვეყანაში ადვოკატის უფლებებიო. მან ისიც თქვა, ამ ხელისუფლებამ გამოუშვა ციხიდან დაკავებული ადვოკატები, ხატიაშვილს არაფერი გაუკეთებიაო და ეს არის უსინდისობა. თეა წულუკიანმა ამ დღეებში “კავკასიაზეც” იკითხა, როცა ხატიაშვილი იგივე განცხადებებს ნაციონალების წინააღმდეგ აკეთებდა, მაშინ კარგი ზაზა იყო და ახლა ცუდი ზაზა გახდაო?! ფოტორეპორტიორები რომ დააკავეს და ჟურნალისტები აქციებს მართავდნენ, მხოლოდ მე, ერთადერთი ადვოკატი დავდიოდი და არც ერთი აქცია არ გამიცდენია. ესენი, ახლა ვითომ ხალხისა და სიმართლის დამცველები, მაშინაც იმალებოდნენ და მე ვარ ახლა ნაციონალების სატელიტი, აბა, თქვით?! ეს გახლავთ ღარიბაშვილის შურისძიება ჩემზე. არ მოეწონა, როცა ევროკავშირს მივწერე _ ეს ხელისუფლებაც დევნის ადვოკატებს-მეთქი. ევროპის ადვოკატთა ასოციაციის პრეზიდენტმა მოსწერა წერილები მარგველაშვილს, ღარიბაშვილსა და უსუფაშვილს, ევროპელი ადვოკატების სახელით. ამ წერილის მოსვლასაც ემთხვევა ჩემს მიმართ აგორებული კამპანია. ომი გამომიცხადეს იმის გამო, რატომ შევყარე ქვეყანა და ვთქვი, საქართველოში მიდის ადვოკატების დევნა-მეთქი და მათ ფაქტები და მტკიცებულებები გავუგზავნე. ევროპის ადვოკატთა ასოციაცია გაოგნებული დარჩა ამ ფაქტებით და საქართველოს ხელისუფლებას უმკაცრესი წერილი გამოუგზავნა. სააკაშვილი, ვისზეც ვითხოვდი პერსონა ნონ გრატად ცნობას ევროპაში, ასეთი ბინძური მეთოდებით არ მებრძოდა. მას არ უკადრებია, თავისი ორგანიზაციებისთვის დაევალებინა, წადით ხატიაშვილთან და მისი გადადგომა მოითხოვეთო. ესენი ყველაფერზე მიდიან.

_ ასეთი აქციებით თქვენი გადაყენება შესაძლებელია? როგორც ცნობილია, ისინი ადვოკატების 10 პროცენტის ხელმოწერების შეგროვებას აპირებენ. მართლა გელით, ბატონო ზაზა, გადაყენება?!

_ თუ 10 პროცენტს მოაგროვებენ, მომმართავენ, მოვიწვევ კრებას და დავაყენებ ჩემი უფლებამოსილების შეწყვეტის საკითხს. თუ მხარს დაუჭერენ, ადვოკატთა ასოციაციას გადავუხდი მადლობას და ჩემს პროფესიას დავუბრუნდები. საქართველოში ვინ უნდა დააკავონ, ზაზა ხატიაშვილის ადვოკატობა რომ არ მოუნდეს? ერთადერთი ადვოკატი ვიყავი 2012 წელს ვეროპაში, რომელმაც 3 სასამართლო პროცესი 3 თვეში მოვიგე. ასეთი რამ არავის გაუკეთებია. დღეს ადვოკატებს ჩემი სახით უფასო დამცველი ჰყავთ. არჩევნების წინ, დეკემბერში, ფინანსურ პოლიციაში იბარებდნენ ადვოკატებს და ეუბნებოდნენ, ხატიაშვილს არ მისცეთ ხმაო. თუ ისინი ფინანსურმა პოლიციამ ვერ შეაშინა, მჟავანაძის განცხადებები შეაშინებთ? როგორც მითხრეს, მჟავანაძესთან არის ნუგზარ ბირკაია. ის ადვოკატთა ასოციაციის არჩევნებზე ახლახან იყრიდა კენჭს და 0 ხმა მიიღო. მდინარაძის გარდა, ვინც კი მებრძოდა, 0-დან 10-მდე ხმა მიიღეს, მეტი _ ვერა. მამუკა იყო ერთადერთი ღირსეული ადამიანი და ღირსეულადაც მებრძოდა, მაგრამ ხმების დიდი რაოდენობით მაინც მე გავიმარჯვე.

_ ახლა კი გამოდის, რომ ონიანს ეწირებით?

_ მე ვეწირები სახელმწიფო მისწრაფებას, ყველა სტრუქტურა და სფერო ჩაიგდოს ხელში, ასევე, ღარიბაშვილის ბოღმას. სასამართლო პროცესი მოვიგე სტრასბურგში “დვალიშვილი საქართველოს წინააღმდეგ”. ამ ადამიანს კოკა-კოლა ენით აალოკვინეს და მისი წამება დაადგინა კიდეც ევროპის სასამართლომ. რევაზ ქობულია, რომელმაც დვალიშვილი აწამა, დაინიშნა პოლიციის სამმართველოს უფროსად. ახლა მე ვარ მათი აგენტი თუ ივანიშვილი, რომელმაც მთელი “ნაცმოძრაობა” თავზე დაგვასვა?! როცა ღარიბაშვილი შინაგან საქმეთა მინისტრი იყო, ძმები სოზაშვილები პოლიციელებმა სცემეს. მტკიცებულება ამოიღეთ-მეთქი, პირადადაც ვთხოვე ღარიბაშვილს, მაგრამ ეს არ გააკეთა. პირველად აქედან დაიწყო ჩემი და მისი სამართლებრივი დაპირისპირება. მერე სოზაშვილების საქმეზე გამამართლებელი განაჩენი დააყენა სასამართლომ და აღმოჩნდა, რომ მართალი ვიყავი და ღარიბაშვილი ტყუოდა. ამის შემდეგ ივანიშვილმა ღარიბაშვილი მაინც პრემიერად დანიშნა. ანუ კაცი, რომელმაც ევროსასამართლოს რევიზია მოახდინა და ამ ყველაფერს რატომ არ აპროტესტებს მჟავანაძე?!

ისე, ყველა არჩევნების წინ ხდება ჩემზე ასეთი ზეწოლა, რადგან სულ ჰგონიათ, რომ კენჭი უნდა ვიყარო. საპრეზიდენტო არჩევნების წინაც დაიწყო ჩემზე ასეთი კამპანიის აგორება. ახლა, ეტყობა, ფიქრობენ, რომ შეიძლება მერად ვიყარო კენჭი. საარჩევნო კამპანია რომ საერთოდ არ ჩავატარო და მარტო ჩემი სურათი დავდო, ნარმანიას მაინც მოვუგებ არჩევნებს და ამის ეშინია ღარიბაშვილს. თუ პოლიტიკაში ჩართვას გადავწყვეტ, იცის, რომ გავიმარჯვებ კიდეც და ამიტომ მაბრალებს ახლა თავისი ჭკუით პუტინისთვის წერილის მიწერას. არა მგონია, საზოგადოებას ასეთი უტვინო ვეგონო. როცა “ქართული ოცნება” მოდიოდა, პარლამენტის დეპუტატობის კანდიდატთა სიაში მეც ჩამწერეს, მაგრამ უარი ვთქვი, _ პოლიტიკა არ მინდა, თავი დამანებეთ-მეთქი. ახლახან მედიასაშუალება “ბანკებმა და ფინანსებმა” გამოკითხვა ჩაატარა და პატრიარქის შემდეგ წლის ადამიანად დამასახელა. ესეც იყო ერთ-ერთი ბიძგი ჩემზე ასეთი სიბინძურეების აგორების.

_ მიუხედავად ამ ყველაფრისა, ონიანის, როგორც ადვოკატის, დაცვას გააგრძელებთ?

_ ონიანის დაცვას უფრო გაათმაგებულად გავაგრძელებ იმ მაიმუნობების მერე, რაც ხელისუფლებამ წამოიწყო. მე რომ პრეცედენტი დავუშვა, ადვოკატი უკანონოდ დააკავონ, ხვალ 10-15 ადვოკატს დაიჭერენ და მეტყვიან, ონიანზე ხმა თუ არ ამოიღე, ახლა რა გინდაო?! ონიანს დაულუქეს პირადი კომპიუტერი. ადვოკატს შეიძლება 10-15 დაცვის ქვეშ მყოფზე ჰქონდეს მონაცემები და იქიდან ხომ შეუძლიათ, ეს ინფორმაციები ამოიღონ? ამის უფლება არავის არ აქვს. ამით კლიენტსა და ადვოკატს შორის კონფიდენციალურობა ირღვევა და ეს ყველა საერთაშორისო ნორმით აკრძალულია. სხვა სამართალდარღვევებზე უკვე აღარაფერს ვამბობ. ბაჩანა ახალაიას ერთი ადვოკატი დაიჭირეს, მეორე სცემეს და ამით ეუბნებიან სამოქალაქო საზოგადოებას, პოლიტიკურ პროცესებში ჩართული რომ დაგინახოთ, თქვენც ის მოგივათ, რაც ამათ დაემართათო. ამის მერე როგორ შემიძლია გაჩუმება?

_ ინტერნეტსივრცეში გავრცელდა ფოტო, სადაც ონიანი ახალაიას ერთ-ერთ პროცესზე, აქციის მონაწილეს ხელს ურტყამს. ეს ფოტო ახალგაზრდებმა აქციაზეც მოიტანეს და გაჩვენეს. “ფეისბუკზე” ერთ-ერთმა პარლამენტარმა კი მას მიაწერა, ხატიაშვილს აჩვენეთ, ონიანს რომ იცავსო.

_ ვიცი ეგ ფოტო. მანდ რაც მოხდა, თავად ონიანი ცნო სასამართლომ დაზარალებულად და გაამართლა. დაპირისპირებულ მხარეს კი ადმინისტრაციული ჯარიმა მიესაჯა. როგორც ონიანმა მითხრა, ცოლსა და შვილს მიგინებდნენ და რეაქციაც მქონდაო. იმ ადამიანმაც აღიარა,  ონიანს შევაგინეო და შეიძლება ადვოკატი აგინო?! მაგ პარლამენტმა და პარლამენტარებმა საკუთარ გულებში ჩაიხედონ და მიხვდებიან, რა გააკეთეს, მოწმის სასამართლოში გადავადება რომ მოახდინეს და სამოქალაქო საზოგადოება წამების ქვეშ დაგვტოვეს. მაგათ ხმა ამოეღებათ?! აქციებს ვატარებდი პარლამენტის წინ და ამერიკის საელჩოც კი დაინტერესდა, რატომ გადაიდო ეს პროცესი და ცხადია, მაგათ ასე უნდა ილაპარაკონ, საკუთარი დანაშაული რომ დაფარონ. ბოღმას ასე ანთხევენ, ზაზა ხატიაშვილი ბევრის მსგავსად რომ ვერ გადაიბირეს და ვერ იყიდეს. მაგათ საზოგადოებაში მე იმიტომ ვარ მიუღებელი, პატიოსანი თანამდებობის პირი არ უნდა არსებობდეს.     

კიდევ ერთ მნიშვნელოვან მიზეზს გეტყვით, რის გამოც ომი გამომიცხადეს და მათთვის სრულიად მიუღებელი გავხდი. ალბათ, გახსოვთ, ივანიშვილი წინასაარჩევნოდ დაზარალებულ ადამიანებს ქონების დაბრუნებას რომ ჰპირდებოდა, მერე კი ღარიბაშვილმა თქვა, ამდენი თანხები არ გვაქვს და ვერ შევქმნით ამ კომისიასო. იცით, რა გააკეთეს? ფინანსური პოლიციის ხალხი, რომელიც ყველაზე მეტად იყო დამნაშავე ქონების წართმევის დროს, მთავარ პროკურატურაში გადაიყვანეს და ასე “გააპრავეს” ყველაფერი. იმ ქონებას კი, რომელიც “ნაცმოძრაობას” ხალხისთვის ჰქონდა წართმეული და რომლის გაყიდვაც ვერ მოასწრო, ახლა ეკონომიკის სამინისტრო ყიდის. ეს ფაქტიც გავახმაურე და ვთქვი, ასეთი რამ არ შეიძლება-მეთქი და ამასაც მოჰყვა ჩემი “დაბომბვა”.

აუცილებლად პირადად ჩავალ ევროპის ადვოკატთა ასოციაციის პრეზიდენტთან და ვეტყვი, _ რასაც სააკაშვილი არ მიკეთებდა, ახლანდელი ხელისუფლება მიკეთებს-მეთქი. მათ აუცილებლად ექნებათ რეაქცია და თან სერიოზული.

ანკა ბაზერაშვილი, გაზეთი „პრემიერი“

FaceBook