სახელფასო სკანდალი “ქართულ ოცნებაში”

“ქართულ ოცნებაში” მორიგი სკანდალი მწიფდება, ოღონდ ამჯერად საქმე კოალიციას კი არა, პარტია “ქართულ ოცნება _ დემოკრატიულ საქართველოს”, უფრო კონკრეტულად, პარტიულ გაზეთ “ქართულ ოცნებას” ეხება. იმ ფონზე, როცა სამოქალაქო სექტორში გადამისამართებული ექსპრემიერი ბიძინა ივანიშვილი მედიის შესახებ ბრტყელ-ბრტყელ განცხადებებს აკეთებს, ჟურნალისტებს სულ თითის ქნევით ელაპარაკება და ამბიცია აქვს, რომ ქართული მედიის სელექცია მოახდინოს, ანუ ტრენინგები ჩაუტაროს, კარგი იქნება, “დალაგება-დასუფთავება” ჯერ იმ მედიასაშუალებაში დაიწყოს, რომელიც მასთან ასოცირდება.

საერთოდ, ბიძინა ივანიშვილს ყველაფერზე, მათ შორის, ე.წ. მეოთხე ხელისუფლებაზეც თავისებური წარმოდგენა-შეხედულება აქვს. მაგალითად, დარწმუნებულია, რომ ჟურნალისტმა “არაეთიკური შეკითხვა” არ უნდა დასვას და რესპონდენტის, ამ შემთხვევაში, ყოფილი პრემიერის სულიერ სიმშვიდეზე იზრუნოს. დანამდვილებით ვერ ვიტყვით, ვინ შეუქმნა მილიარდერს მედიაზე ასეთი წარმოდგენა, მაგრამ აშკარაა, მისთვის მედია “საცდელი კურდღელია”, რომელსაც ისე მოექცევა, როგორც მოუნდება და ამას “მე-9 არხის” მაგალითიც მოწმობს: ტელევიზია ივანიშვილმა ჯერ 2004 წელს, ანუ მაშინ დახურა, როცა მის მიერ დაფინანსებული “ნაციონალები” ხელისუფლებაში მოვიდნენ. მეტიც, არხი, რომლითაც “მე-9 არხი” მაშინ მაუწყებლობდა, კულუარული ხმით, ივანიშვილმა, მადლიერების ნიშნად, “რუსთავი 2”-ის მაშინდელ მფლობელსა და ხელმძღვანელს, ეროსი კიწმარიშვილს აჩუქა. მერე, პოლიტიკაში რომ მოვიდა, საკუთარი მედიის აუცილებლობის საჭიროება იგრძნო და “მე-9 არხი” აღადგინა. ბოლოს კი, როცა ხელისუფლება გაინაღდა, “მე-9 არხი” და მისი ჟურნალისტები, რომლებიც საარჩევნო პერიოდში, პრაქტიკულად, ბრძოლის წინა ხაზზე იყვნენ, თავიდან მოიცილა.

“მე-9 არხი”, რომელიც ბიძინა ივანიშვილის მეუღლის, ეკატერინე ხვედელიძის სახელზეა გაფორმებული, კერძო საკუთრებაა და მესაკუთრე, ბუნებრივია, იმას უზამს, რასაც უნდა _ დახურავს ან არ დახურავს, მაგრამ, ალბათ, არსებობს მორალური მხარეც... თუმცა დიდი პოლიტიკისთვის მორალი, როგორც ჩანს, უცხო ცნებაა.

ახლა, რაც შეეხება მორიგ სკანდალს, რომელსაც “ქართული ოცნება” შეიძლება, ვერ გადაურჩეს. როგორც “პრემიერს” სამთავრობო მსტოვრებმა უთხრეს, პარტია “ქართული ოცნება _ დემოკრატიული საქართველოს” პარტიული გაზეთის, “ქართული ოცნების” თანამშრომლები ისე არიან გამწარებულები, რომ საკუთარი ღირსების დასაცავად შესაძლოა, სასამართლოსაც მიმართონ, თუმცა სანამ ვითარება ასე უკიდურესად დაიძაბება, თანამშრომლებს გზები მოუნახავთ და ენერგეტიკის მინისტრისთვის, რომელიც ამასთანავე, ვიცე-პრემიერიცაა და პარტია “ქართული ოცნება _ დემოკრატიული საქართველოს” გენერალური მდივანიც, ხმა მიუწვდენიათ. კახა კალაძე გაცოფებულა და უბრძანებია, ეს ხალხი სასწრაფოდ დააკმაყოფილეთო, მაგრამ სიტუაცია ჯერჯერობით უცვლელია.

არადა, დაკმაყოფილება სირთულეს არ წარმოადგენს, მით უმეტეს, იმ ფონზე, როცა 15 ათასი ლარი ივანიშვილის მილიარდებთან სასაცილო თანხაა.

მაინც, რა ხდება “ქართულ ოცნებაში”?

რა და, როგორც “პრემიერს” მსტოვრები ეუბნებიან, გაზეთის დამფუძნებლებს თანამშრომელთა სახელფასო დავალიანება აქვთ, რომელიც 15 ათას ლარს არ აღემატება. და ასევე, სტამბების ვალი.

პარტიული გაზეთი “ქართული ოცნება” 2012 წლის პირველი ოქტომბრის საპარლამენტო არჩევნების წინ შეიქმნა და უფასოდ ვრცელდებოდა. როგორც “პრემიერისთვის” ხდება ცნობილი, მაშინ, მიუხედავად იმისა, რომ “ნაციონალები” “ოცნებას” გასაქანს არ აძლევდნენ, გაზეთს, ფინანსური თვალსაზრისით, პრობლემები არ ჰქონდა. მეტიც, როგორც ინფორმატორი ამბობს, თანამშრომლები ყოველი თვის ბოლოს სოლიდურ პრემიებსაც იღებდნენ, თუმცა ყველაფერი ეს, თურმე, “ქეშად” ხდებოდა.

მართალია, უფასოდ რიგდებოდა და იმ დროს “ქართული ოცნების” მიმართაც მოსახლეობის დიდი ინტერესი არსებობდა, მაგრამ მიუხედავად ამისა, გაზეთი “ქართული ოცნება” მაინცდამაინც დიდი პოპულარობით არ სარგებლობდა. პრინციპში, ყველა პარტიული გაზეთის, ასე ვთქვათ, ბედი ასეთია, თუმცა “ქართულმა ოცნებამ” კოალიციის გამარჯვებაში თავისი წილი აგური მაინც დადო.

ნათქვამია, მავრმა მავრის საქმე გააკეთა, მავრი უნდა წავიდესო. ჰოდა, “ქართული ოცნებაც” მავრის როლში აღმოჩნდა _ საპარლამენტო არჩევნების შემდეგ, გაზეთის თანამშრომლები შინ, თურმე, უპარდონოდ გაუშვეს, თუმცა როგორც “პრემიერის” წყაროები ამბობენ, მაშინ “ზემდგომები” პატიოსნად მოიქცნენ და კუთვნილი ხელფასი ყველას გადაუხადეს.

ახლა, როცა სიტუაცია კრიტიკულია, გაზეთის წარმომადგენლები, თურმე, იმ მორალურ კომპენსაციასაც ითხოვენ, თავის დროზე გაზეთის მოულოდნელი დახურვით რომ მიიღეს, თუმცა კომპენსაციაზე ოცნება, როგორც ჩანს, ოცნებად დარჩება...

2013 წლის ზაფხულიდან, ანუ იმ დროიდან, როცა კოალიციამ საპრეზიდენტო კანდიდატად გიორგი მარგველაშვილი დაასახელა და საარჩევნო კამპანია დაიწყო, გაზეთი “ქართული ოცნება” აღდგა _ სამსახურში თითქმის ყველა ძველი თანამშრომელი დააბრუნეს, თუმცა ხელფასები გაუნახევრეს. განახლებული “ქართული ოცნება” კვლავინდებურად უფასოდ ვრცელდებოდა და, წესითა და რიგით, პარტიის ყველა რაიონულ და რეგიონულ ორგანიზაციაში უნდა ჩაეტანათ, მაგრამ, როგორც ამბობენ, ჩატანით თავს არავინ იწუხებდა. არადა ტრანსპორტირებისთვის სერიოზული თანხები ყოფილა გამოყოფილი. სად მიდიოდა ეს თანხა, ამის გარკვევა, ალბათ, საინტერესო იქნება.

ბევრი რომ აღარ გავაგრძელოთ, საარჩევნო კამპანიის დროს, გაზეთის თანამშრომლებს პრობლემები თურმე არ ჰქონიათ. ამასობაში, 27 ოქტომბერიც დადგა, საპრეზიდენტო არჩევნებში გიორგი მარგველაშვილმა გაიმარჯვა და “ქართული ოცნება”, როგორც ჩანს, კვლავ მავრის როლში აღმოჩნდა _ თანამშრომლებისთვის, მიუხედავად იმისა, რომ ხელშეკრულებები დაუმთავრდათ, უთქვამთ, რომ გაზეთი ნოემბერშიც უნდა გამოეცათ და ფინანსების მხრივ პრობლემები არ შეექმნებოდათ.

სხვათა შორის, გაზეთი, როგორც “პრემიერს” აუხსნეს, “ქართუ ფონდიდან” ფინანსდებოდა.

2013 წლის ნოემბერში, “პრემიერის” წყაროების თქმით, გაზეთ “ქართული ოცნების” ოთხი ნომერი გამოვიდა. ბოლო, მეოთხე ნომერი განსაკუთრებული ყოფილა _ “ქართული ოცნება _ დემოკრატიული საქართველოს” ყრილობისთვის, თურმე, საგანგებოდ მომზადდა, მაგრამ პირველმა პრობლემამ თავი, როგორც ამბობენ, სწორედ ამ დროს იჩინა _ “ელიტა ბურჯმა”, რომელიც ამდენი ხნის განმავლობაში გაზეთს ბეჭდავდა, თურმე ბეჭდვაზე უარი განაცხადა. უარის მიზეზი ქაღალდის არქონა ყოფილა, მაგრამ ისიც აღსანიშნავია, რომ გაზეთს სტამბის სერიოზული დავალიანებაც ჰქონია.

ასე იყო თუ ისე, გაზეთის სტაფს ბეჭდვის პრობლემა დიდი წვალებით მოუგვარებია და პარტიის ყრილობაზე “ქართული ოცნება” დაურიგებიათ კიდეც, მაგრამ მას შემდეგ, გაზეთი აღარავის გახსენებია. მეტიც, რედაქციას, რომელიც თავდაპირველად “ქართუ ბანკში” ყოფილა განთავსებული, ახლა კი ბანკის გვერდით მდებარე შენობაშია, გამოსახლებას უპირებენ.

“პრემიერის” სამთავრობო წყაროების თქმით, გაზეთის თანამშრომლები ხმაურის ატეხას აპირებდნენ, მაგრამ ცოტა ხანს გაჩერდნენ, რადგან კახა კალაძის სიტყვის იმედი აქვთ, თუმცა თუ “ქართული ოცნება _ დემოკრატიული საქართველოს” გენერალური მდივანი მათ დახმარებას ვერ შეძლებს, მაშინ გამორიცხული არ არის, ჟურნალისტებმა პრემიერ ირაკლი ღარიბაშვილთან, როგორც პარტიის თავმჯდომარესთან, მოითხოვონ შეხვედრა. უკიდურეს შემთხვევაში კი საპროტესტო აქციები გამართონ.

საერთოდ, ფულთან დაკავშირებული პრობლემები კოალიციისთვის ახალი არ არის _ არსებობს ინფორმაცია, რომ აგიტატორებისა და სხვა აქტივისტების ნაწილს, რომელიც 2012 წლის საპარლამენტო და 2013 წლის საპრეზიდენტო არჩევნების დროს “ქართულ ოცნებაზე” მუშაობდა, შეპირებული ჯამაგირი დღემდე არ მიუღია. ასევე, ცნობილია, რომ ბიძინა ივანიშვილმა მსახიობებისა და სხვა დამსახურებული ადამიანების ნაწილს ე.წ. სტიპენდია მოუხსნა.

გეგა სილაგავა, გაზეთი „პრემიერი“

FaceBook