ვის დაემუქრა თბილისის პროკურორი სამუდამო პატიმრობით

ამ საქმის ზედამხედველი პროკურორი გახლდათ მიხეილ შაყულაშვილი, რომელიც დღეს თბილისის პროკურორია და მის შეთითხვნაშიც, აქტიურად მონაწილეობდა.

 “რეალურ ბრძოლას სიმართლის გასარკვევად სწორედ ახლა ვიწყებთ”

სამუდამოპატიმრობამისჯილი ხვიჩა ყირმიზაშვილის ადვოკატი ნატალია წიკლაური, თავისი დაცვის ქვეშ მყოფ ყირმიზაშვილთან ერთად, თბილისის პროკურორს, მიხეილ შაყულაშვილს საქმის შეთითხვნასა და უდანაშაულო ადამიანის ციხეში გამოკეტვაში ადანაშაულებს. ქალბატონი ნატალია "პრემიერს" ექსკლუზიურად იმ დანაშაულის შესახებ მოუყვა, რომელსაც შაყულაშვილი ზედამხედველობდა. უდანაშაულოდ დაპატიმრებულ ბიჭს სწორედ გამოძიების პროცესში ადენდნენ სხეულიდან სისხლს იმისთვის, რომ მათი "შეკერილი" ბრალდებები ეღიარებინა და პროკურატურის გაყალბებულ ბრალზე ხელი უპრობლემოდ მოეწერა.

ნატალია წიკლაური:

_ ხვიჩა ყირმიზაშვილი გლდანის ციხეში, მე-8 საპყრობილეში ზის. იგი ახლა 28 წლისაა, როცა დააკავეს, 20 წლის იყო. წარმოშობით მცხეთის რაიონის სოფელი მუხრანიდანაა. ხვიჩა 2004 წელსაც, ასევე, უსამართლოდ იყო დაკავებული ნარკოტიკების მიხმარებისთვის. მაშინ მას ერთი წელი მიუსაჯეს. 2006 წლის 13 აგვისტოს კი მეორედ დააკავეს. ამჯერად ბრალი ყაჩაღობისთვის, მკვლელობისთვის და ქურდობისთვის წაუყენეს. საქონლის რამდენიმე ეპიზოდიან ქურდობას აბრალებდნენ. ბრალდების მიხედვით ყაჩაღობა და განზრახ მკვლელობა დამამძიმებელ გარემოებებში მოხდა. მას ასევე ბრალი დასდეს იარაღის უკანონო შეძენაში, შენახვასა და ტარებაში. მერე ყველაფერი შეაჯამეს და სამუდამო პატიმრობა გამოუყვანეს.

მკვლელობა მართლაც მოხდა მცხეთის რაიონში. საქმის მასალების მიხედვით ჭალაში რამდენიმე აზერბაიჯანელი ეროვნების დაახლოებით 6 ადამიანი ქეიფობდა. ისინი უკვე წამოსვლას აპირებდნენ, თავს რომ დაესხნენ ხვიჩა ყირმიზაშვილი და გიორგი ქოზაშვილი. მოკლეს დავით ნოვრუზოვი, ხოლო ლევან ბაირამოვი ფეხში მსუბუქად დაიჭრა. თითქოს 18 ტყვია ისროლა ყირმიზაშვილმა მათი მიმართულებით და ა.შ. ნოვრუზოვი საავადმყოფოში წაიყვანეს, მაგრამ ვერ გადაარჩინეს და გარდაიცვალა. საქმის მასალებიდან ისიც ჩანს, რომ ყირმიზაშვილი და ქოზაშვილი ჭალის გავლით მიდიოდნენ საქონლის მოსაპარად და ამისთვის რატომღაც კბილებამდე შეიარაღებულები იყვნენ ავტომატებითა და ნიღბებით. მათ დაინახეს ჭალაში მოქეიფე ხალხი, გადაწყვიტეს, საქონელი აღარ მოეპარათ და ეს ადამიანები დაეყაჩაღებინათ, რაც მერე განახორციელესო. ქოზაშვილმა ნაყაჩაღარი ოქროულობა, სავარაუდოდ, ხვიჩას გადასცა და ამით აიხსნა მისი ბიძის სახლიდან, ზემო არცევიდან შემდგომ ამ ოქროს ნივთების ამოღებაც. სინამდვილეში კი, ეს ნივთები ქოზაშვილმა დაკავების წინა დღეებში მიჰყიდა ყირმიზაშვილს. ხვიჩა მკვლელობისა და დაპატიმრების დღეს ამ სოფელში იყო და არა მცხეთის რაიონში.

_ ამტკიცებთ, რომ ხვიჩა ყირმიზაშვილი ამ მკვლელობის მონაწილე არ არის?

_ მკვლელობა მოხდა 2006 წლის 6 აგვისტოს, საღამოს საათებში, ხვიჩა კი ამ დროს იმყოფებოდა ზემო არცევში და ამის მოწმეებიც არიან. იგი 13 აგვისტოს დააკავეს არცევში. ამ დაკავებას ესწრებოდნენ შიდა ქართლის სამხარეო პოლიციის, მცხეთის სამხარეო პოლიციისა და ცხინვალის მილიციის თანამშრომლები, რადგან ეს სოფელი ცხინვალის ოკუპირებული ტერიტორიის შემადგენლობაში შედის. დაკავების ოპერაცია შეთანხმებული იყო ცხინვალის მხარესთან. მათი მხრიდან ოპერაციას ესწრებოდა და ხელმძღვანელობდა ცხინვალის შინაგან საქმეთა მაშინდელი მინისტრი ნინზაევი. ეს ადამიანი იყო გარანტი იმისა, რომ იქ ჩასული ქართული მხარე პრობლემებში არ გაეხვეოდა და დაპატიმრებას წესისა და რიგის მიხედვით აღასრულებდა. უსაფრთხოდ იყო შესაძლებელი მოწმეების დაკითხვა, დაკავების ოქმის შედგენა, თუმცა ეს ასე არ გააკეთეს. შემდეგ, იქიდან ჩამოსულმა სამართალდამცავებმა განაცხადეს, თითქოს სახიფათო სიტუაციაში იყვნენ და დროულად უნდა დაეტოვებინათ ტერიტორია. მოკლედ რომ ვთქვათ, ისე დააპატიმრეს ყირმიზაშვილი, დაკავების ოქმი არ შეუდგენიათ. სამართალდამცავების მიზეზი, თითქოს საფრთხის გამო ვერ გააკეთეს ეს, არის ტყუილი, რადგან, როგორც გითხარით, სწორედ მათი უსაფრთხოებისთვის იმყოფებოდა იქ ცხინვალის შსს-ს მაშინდელი მინისტრიც. ცხადია, მათ შეეძლოთ, მშვიდ გარემოებაში ჩაეტარებინათ საგამოძიებო მოქმედებები, რაც არ გააკეთეს.

_ ეჭვობთ, რომ მათ არ აწყობდათ მოწმეების დაკითხვა და სიმართლის დადგენა?! რატომ არ უნდა ნდომებოდათ ეს?!

_ სანამ კითხვაზე გიპასუხებთ, გეტყვით, რომ ამჟამად ქოზაშვილი უკვე თავისუფალია, რადგან მას 18 წელი მიუსაჯეს. თქვეს, რომ გამოძიებასთან ითანამშრომლა და ამიტომ მოხდა ასე. ყირმიზაშვილი კი დღემდე ამტკიცებს, რომ უდანაშაულოა და ითხოვს საქმის რეალურ შესწავლას. ქოზაშვილის გამოძიებასთან თანამშრომლობისას მან თქვა, ჩემთან ერთად იმყოფებოდა ყირმიზაშვილი, ერთად დავგეგმეთ ყველაფერი და განვახორციელეთო. ერთ საინტერესო დეტალს გეტყვით, როცა ყირმიზაშვილი დააკავეს და მანქანაში ჩასვეს, ქართულმა მხარემ ნინზაევს ქაღალდის რაღაც შეკვრა გადასცა. სავარაუდოდ, ეს იყო ფული. შემდგომ, მანქანაში, ყირმიზაშვილს უთხრა კიდეც ერთ-ერთმა თანამშრომელმა, _ შენი დაკავება 5 ათასი დოლარი დაგვიჯდაო. 

ხვიჩას დაკავება იმიტომ იყო საჭირო, რომ მცხეთის რაიონის საგამოძიებო ორგანოებისთვის საფრთხეს წარმოადგენდა და მათ არ აწყობდათ, რომ ის გარეთ ყოფილიყო. თავიდან მისი სიძე ჰყავდათ დაკავებული და ამის გამო მას პოლიციელებთან სერიოზული უთანხმოება და შელაპარაკება მოუხდა. ცხადია, იგი აითვალწუნეს და მიხვდნენ, რომ არ გაჩერდებოდა მათ უსამართლობებზე, რაც მისი სიძის მიმართ ჩაიდინეს. ბოლომდე მიჰყვებოდა მათ, რის შემდეგაც უკვე თავად გაუშვეს ციხეში. როგორც გითხარით, პირველად ყირმიზაშვილი 2004 წელს დააკავეს და მაშინ ნარკოტიკი ჩაუდეს. როცა ერთი წლის მერე გამოუშვეს, ხვიჩამ კიდევ უთხრათ, ამ ყველაფერს ასე არ დავტოვებ და შესაბამისად ვიმოქმედებო, ამას მოჰყვა უკვე ის ამბები, რაც გითხარით.

_ თუ ხვიჩა ყირმიზაშვილი არ იმყოფებოდა მკვლელობის ადგილზე, მაშინ გამოდის, რომ ქოზაშვილს თანამზრახველი არ ყოლია, ხომ?!

_ ქოზაშვილთან ერთად იმყოფებოდა სხვა პიროვნება, რომელსაც არ ასახელებენ, თუმცა თავად გამოძიება ამის გარკვევით არც დაინტერესებულა. ყირმიზაშვილის დაკავების შემდეგ მოხდა ქოზაშვილის დაკავება. თავად ქოზაშვილი ამბობს დაკითხვის დროს, რაც სასამართლო სხდომის ოქმშიც არის დაფიქსირებული, რომ გამომძიებელმა უთხრა, _ აღიარე, რომ ხვიჩა იყო შენთან ერთად. ის თავად არ მალავს ამას და ამბობს, რომ ერთობლივად ჩაიდინეთ დანაშაული და სჯობს, შენც აღიარო, თუმცა არ მოგთხოვ იმ რეალური პიროვნების დასახელებას, ვინც ნამდვილად იყო შენთანო. ანუ ირიბად და პირდაპირ ეუბნებოდა, ყირმიზაშვილს დააბრალე დანაშაულიო. ეს გამომძიებელი გახლდათ გიორგი გოდერიძე. სასამართლო ოქმშიც დაფიქსირებულია ეს სიტყვები. ქოზაშვილმა სასამართლოზეც განაცხადა, ასეთი რამ მითხრა გამომძიებელმა და ამიტომ ვთქვი მეც ასეო. ქოზაშვილმა მართალია, წინასწარ გამოძიებაში აღიარა, რომ ყირმიზაშვილი მასთან ერთად იყო, მაგრამ სასამართლოზე უარყო და განაცხადა, რომ მასთან ერთად არ ყოფილა, ყირმიზაშვილს არანაირი დანაშაული არ ჩაუდენია, ჩემთან ერთად სულ სხვა პიროვნება იმყოფებოდაო. თუმცა მან არც ამჯერად არ დაასახელა, ვინ იყო მასთან.

_ ქოზაშვილთან რეალურად მყოფი პიროვნების დასახელებას რატომ ერიდებიან, ვერ ვიგებ, ვინმე "ჩინიანია"?!

_ როგორც ამბობენ, ის არის ჩვეულებრივი, რიგითი მოქალაქე. რატომ არ ასახელებენ, ამას მეც ვერ გეტყვით. ისე განთავისუფლდა პატიმრობიდან ქოზაშვილი, არ თქვა მისი ვინაობა. ციტირებასაც მოვახდენ ქოზაშვილის სასამართლო სხდომის ჩვენებიდან: "გამომძიებელმა გოდელიძემ მითხრა, რომ დაკავებული ჰყავდათ ხვიჩა ყირმიზაშვილი და თუ ხელს დავადებდი, საპროცესო შეთანხმებას გამიფორმებდნენ და გამიშვებდნენ. არ მომთხოვდნენ ჩემი ნამდვილი თანამზრახველის დასახელებასო". მიუხედავად ასეთი განაცხადისა, მაინც არავინ დაინტერესებულა, ვინ იყო ის პიროვნება, ვინც ამ მკვლელობის დროს ქოზაშვილთან ერთად იმყოფებოდა და მონაწილეობდა დანაშაულში. აქედანაც ჩანს, გამოძიების მთავარი მიზანი იყო ის, რომ ყირმიზაშვილი ციხეში ჩაესვათ. როგორც ვიცი, თავად ხვიჩამაც არ იცის, ვინ იმყოფებოდა ქოზაშვილთან ერთად მკვლელობის დღეს.

_ როგორც შეხვედრის დროს მითხარით, საადვოკატო გამოძიება ჩაატარეთ. ახალი რა გაარკვიეთ?

_ შევხვდი დაზარალებულსა და რამდენიმე მოწმეს, თუმცა საგამოძიებო მოქმედებები ამით არ დაგვისრულებია. ძალიან მალე ბევრ ბუნდოვან საკითხს მოვფენთ ნათელს. დაახლოებით უკვე ისიც არის ჩვენთვის ცნობილი, ვინ იმყოფებოდა ყირმიზაშვილის გვერდით, თუმცა კიდევ ერთი საინტერესო დეტალი იკვეთება საქმიდან. მოკლული დავით ნოვრუზოვის მამამ, თამაზ ნოვრუზოვმა შსს-ს მაშინდელ მინისტრ მერაბიშვილს, გენერალურ პროკურორ ადეიშვილს მაშინ გაუგზავნა წერილი, სადაც ამბობდა, რომ მცხეთის საგამოძიებო სამსახურის მიერ არაობიექტურად და არასამართლიანად მიმდინარეობდა მისი შვილის მკვლელობის გამოძიება. იგი არ ენდობოდა შესაბამის სტრუქტურას და ითხოვდა, საქმე გამოსაძიებლად ქალაქის სამმართველოს, ან გენერალურ პროკურატურას გადასცემოდა. თამაზ ნოვრუზოვი აცხადებს, რომ მისი შვილი არ არის მოკლული ყირმიზაშვილის მიერ და ის მისი შვილის თანმხლებმა პირებმა გამოასალმეს სიცოცხლეს. კონკრეტულად კი ხელს ადებდა ლევან ბაირამოვს. ეს წერილი საქმის მასალებშიც დევს და თქვენც გადმოგცემთ. იგი ასევე აცხადებს, გამომძიებელსაც ვუთხარი, რომ ასეთი ეჭვი მქონდა, მაგრამ ის ამაზე რეაგირებას არ ახდენსო. თამაზ ნოვრუზოვი არ ასახელებს, რატომ გაუჩნდა ასეთი ეჭვი, თუმცა, როგორც ვიცი, მისი თქმით, ნოვრუზოვი სახლიდან სწორედ ბაირამოვმა და იმ ადამიანებმა გაიყვანეს. მოკლული ნოვრუზოვის მამა იმასაც აცხადებს, როცა ეს ყველაფერი გამომძიებელს უთხრა, მაგრამ მან ცინიკურად გაიცინა და ყველა მისი ნათქვამი გოდერიძემ ბაირამოვსა და დანარჩენებს ჩაურაკრაკაო. უთხრათ, მამამისი ხელს თქვენ გადებთო. ასე რომ,  ბაირამოვმაც იცის, რომ ოჯახს მასზე აქვს ეჭვი.    

_ საკმაოდ ჩახლართული სიტუაციაა. თქვენი და გარდაცვლილის ოჯახის წევრების ეჭვები ერთმანეთს ემთხვევა?

_ ნოვრუზოვის მამა ამბობს, რომ ხვიჩა მკვლელობის დროს იქ არ ყოფილა. სხვათა შორის, საქონლის ის ქურდობები, რომელიც დააბრალეს, რომ თითქოს ერთად ჩაიდინეს ქოზაშვილმა და ყირმიზაშვილმა, არის ტყუილი. როგორც ირკვევა,  ყირმიზაშვილმა ქოზაშვილი 2006 წლის ივლისის ბოლოს გაიცნო, ქურდობები კი მანამდეა ჩადენილი და ცხადია, მას ერთად ვერ ჩაიდენდნენ. ის დაზარალებულებიც, რომელთა საქონელიც არის მოპარული, ვერ ადასტურებენ ყირმიზაშვილის იქ ყოფნას. მის მიმართ არანაირი მტკიცებულება არ არსებობს არც ქურდობაზე და არც კიდევ ყაჩაღობა-მკვლელობაზე, მაგრამ ის მაინც სამუდამო პატიმრობით ზის ციხეში. მეტსაც გეტყვით, ძალზე  მნიშვნელოვანი ალიბი არსებობს, რაც გამოძიებას და სასამართლოს რატომღაც არ გაუთვალისწინებია. იმ დღეს როცა მკვლელობა მოხდა, ყირმიზაშვილი იყო სოფელ ზემო არცევში და მეზობელს ეხმარებოდა შეშის ტყიდან წამოღებაში. დაახლოებით საღამოს 7 საათისთვის ისინი გააჩერა პოლიციამ და შეშა სახლში არ გაატანათ. ის პოლიციის შენობაში მიატანინეს და დააცლევინეს. ამის მოწმეები, ცხადია, არიან.  მკვლელობა მოხდა დაახლოებით საღამოს 9 საათისთვის, 6-7 საათისთვის კი, როგორც გითხარით, ხვიჩა პოლიციის ეზოში ამ შეშას ცლიდა. მინიმუმ ორი საათი სჭირდება ზემო არცევიდან იმ ადგილზე მისვლას, სადაც მკვლელობა მოხდა. აქედანაც ჩანს, რომ ხვიჩა უდანაშაულოა და სრულიად ტყუილად ზის.

ამ საქმის ზედამხედველი პროკურორი გახლდათ მცხეთის მაშინდელი პროკურორი მიხეილ შაყულაშვილი, რომელიც დღეს ქალაქ თბილისის პროკურორია. იგი ზედამხედველობდა ამ საქმეს და მის შეთითხვნაშიც, რა თქმა უნდა, აქტიურად მონაწილეობდა. ხვიჩასთან ციხეში შესულები იყვნენ მიშა შაყულაშვილი და გამომძიებელი. შაყულაშვილი მას დაემუქრა კიდეც: კაცი არ ვიყო, თუ სამუდამო არ მოგცეო. ის გაბრაზებული იყო იმის გამო, რომ ვერც გამოძიებაში და ვერც შემდგომ, ის ვერ აიძულეს, ეღიარებინა, რაც არ ჩაუდენია.

_ მასზე ფიზიკური და ფსიქოლოგიური ზეწოლები იყო? აღიარება რომ მოეპოვებინათ, ხომ არ სცემდნენ?

_ დიახ, სანამ სამუდამოს მიუსჯიდნენ, მასზე ყველანაირი ზეწოლა განხორციელდა. ამ ზეწოლების გამო გამოძიებაც კი არის დაწყებული. მას ასეთი ზეწოლით აიძულებდნენ,  ეღიარებინა, რომ იმ დღეს მკვლელობის ადგილზე იმყოფებოდა და დავით ნოვრუზოვი მოკლა. მასზე ფიზიკური ზეწოლების შესახებ, ცხადია, მისმა ზედამხედველმა პროკურორმაც იცოდა. როცა ხვიჩა ციხეში ასეთი დაზიანებებით იყო, ერთ-ერთმა იქ მომუშავე პიროვნებამ შეადგინა ოქმი და უთხრა, რომ მასზე ხელი უნდა მოეწერა. ოქმში დეტალებში კი იყო აღწერილი მისი დაზიანებები, მაგრამ იქვე ეწერა, რომ ის გადმოვარდა საწოლიდან და ჯერ ერთი მხრიდან მიიღო დაზიანება, მერე მეორე მხრიდან, რაც არის აბსურდი. ყირმიზაშვილმა ხელი მოაწერა ამ ოქმს იმიტომ, რომ, როგორც მერე გვითხრა, ამას თუ არ გააკეთებდა, მეორე დღეს საკანში ჩამოკიდებულს იპოვიდნენ.

_ ანუ ქალაქის ამჟამინდელ პროკურორს ბრალდებას უყენებთ?!

_ დიახ, ასეა. მისის უშუალო ხელმძღვანელობით მოხდა ყველაფერი ხვიჩა ყირმიზაშვილის თავს. ქოზაშვილი და ყირმიზაშვილი ციხეში შეახვედრეს ერთმანეთს. ეტყობა, აინტერესებდათ ხვიჩას რეაქცია, მაგრამ, როგორც ვიცი, მას ის რეაქცია არ ჰქონია, რაც მათ უნდოდათ. იგი დღემდე აცხადებს, რომ უდანაშაულოა. შეწყალებაზე მასთანაც იყვნენ შესულები, მაგრამ უარი განაცხადა. ამბობს, შეწყალებაზე განაცხადი რომ გამეკეთებინა, ეს დანაშაულის აღიარება იქნებოდა. მე არ ჩამიდენია ეს, არაფერი დამიშავებია, დამნაშავე არ ვარ და სიმართლის დამტკიცებას, ადრე თუ გვიან, უნდა მივაღწიოო. ამ საქმის ხელახალ გამოძიებას ითხოვს, სიმართლე რომ დადგინდეს. ასევე ითხოვს, ის პირები, რომლებიც ამ საქმის გაყალბებას ხელმძღვანელობდნენ და მათი უშუალო თანამონაწილეობით ხდებოდა ეს ყველაფერი, დაისაჯონ. მათ შორის ითხოვს დღევანდელი ქალაქის პროკურორის დასჯას.

_ შაყულაშვილმა იცოდა, რომ ხვიჩა უდანაშაულო იყო, ამ სისხლიან საქმეში სხვა იყო გარეული და მიუხედავად ამისა, მაინც ასე მოიქცა?

 _ დიახ, ყველამ, ვინც ამ საქმეში იყო ჩართული, იცოდა, სინამდვილეში რა მოხდა. ბევრი გაურკვეველი და ბუნდოვანი დეტალია საქმეში. სასამართლო სხდომის ოქმშიც ბევრი დარღვევაა. საქმეს იხილავდა მცხეთის მოსამართლე გელა ქირია. მურმან აივაზოვიც, რომელიც იმ დროს იქ იმყოფებოდა და დაზარალებულის სახით არის ცნობილი, ამბობს, რომ, როცა ხვიჩა მას ამოსაცნობად წარუდგინეს, ხელი ვერ დაადო. მისი თქმით,  ასეთი პიროვნება იქ არ დაუნახავს და ტყუილად ვერ დავაბრალებდიო. ზოგი ამბობს, რომ ხვიჩა ყირმიზაშვილს ჰქონდა "პრივიჩკა" და მხრებს უკან წევდა ხოლმე დროდადრო. სინამდვილეში ხვიჩას ასეთი "პრივიჩკა" ნამდვილად არ აქვს და ვის აქვს ეს, გამოძიებამ უნდა გაარკვიოს.

_ აქამდე ეს საქმე არსად გაგისაჩივრებიათ? ან ახლა როგორ აპირებთ სიმართლის გარკვევას, როცა საქმის ზედამხედველი პროკურორი, რომელსაც გაყალბებას ედავებით, ქალაქის პროკურორად არის დაწინაურებული?

 _ ხვიჩამ ყველა ინსტანციაში გაასაჩივრა ეს საქმე, მაგრამ უშედეგოდ. ის ყველგან იბლოკებოდა. ადამიანს, რომელიც საქმის ასეთ შეთითხვნას ხელმძღვანელობდა, არათუ მაღალ თანამდებობაზე, ასეთ სტრუქტურაში საერთოდ არ უნდა ემუშავა. ხვიჩა, პერიოდულად, როცა ამ საქმეს ასაჩივრებდა, მის ბრალს განსაკუთრებულად უსვამდა ხაზს. მიუხედავად ამისა, რომ ახალ ხელისუფლებას ეს საკითხი წამოეწია, განეხილა და დამნაშავეები დაესაჯა, შაყულაშვილი დააწინაურეს. თუმცა რეალურ ბრძოლას სიმართლის გასარკვევად სწორედ ახლა ვიწყებთ. ამის შესახებ პირველ და ექსკლუზიურ განცხადებას “პრემიერში” ვაკეთებთ. მერე კი ყველაფერს გავაკეთებთ,  ყველა ის ადამიანი რომ დაისაჯოს, ვინც უდანაშაულო ახალგაზრდა ციხეში სამუდამოდ გამოკეტა.          

ანკა ბაზერაშვილი, გაზეთი „პრემიერი“

FaceBook