ვინ სწავლობს პრემიერის “დაპირებას” დეპუტატ ფეიქრიშვილზე

თავის პირველ პრესკონფერენციაზე საქართველოს პრემიერ-მინისტრი ირაკლი ღარიბაშვილი ჟურნალისტებს დაჰპირდა, რომ დეპუტატ გიორგი (თემურ) ფეიქრიშვილის, ანუ, როგორც მას სოციალურ ქსელებში მოიხსენიებენ, “წავკისელი ფეოდალის” საქმის შესწავლას “დაავალებდა”. მართალია, ამ დრომდე ვერსად გავარკვიეთ, ვის და კონკრეტულად რა დაევალა, მაგრამ, როგორც ამბობენ, კაცი იმედით ცხოვრობს. თუმცა საკითხს რომ რეალურად არავინ სწავლობს, იქიდანაც ჩანს, რომ ცალკეულ ნიუანსებში გასარკვევად არც გაზეთ “პრემიერს” დაჰკავშირებია არავინ და რამდენადაც ჩვენთვის ცნობილია, არც რომელიმე სხვა გამოცემას, რომლებსაც ასევე აქვთ “ქვის გასახეთქი” მასალები.

უფრო მეტიც, მთავარი პროკურორების ცვლილებით გამოწვეულმა პროცესმა არც ის მოიტანა, რომ “პრემიერში” გამოქვეყნებულ, აშკარად სს დანაშაულის ნიშნების შემცველ ფაქტებს ყურადღება არავინ მიაქცია. არადა ფაქტია, რომ ბატონი ფეიქრიშვილი კუდ-ის ყოფილი უფროსის მოადგილისგან -ვაჟა ლელუაშვილისგან კონკრეტული პირის დაპატიმრებას ითხოვდა.

ამაზე უფრო მეტი ის არის, რომ, როგორც ჩვენთვის გახდა ცნობილი, ფეიქრიშვილ-ლელუაშვილის გუნდმა წავკისში მშენებარე გამაჯანსაღებელი კომპლექსის წინააღმდეგ ახალი პიარკამპანია დაგეგმა და მის განხორციელებას ხელი, არც მეტი, არც ნაკლები, თავად ლელუაშვილმა მოჰკიდა. გადაწყდა, რომ ჯერ კიდევ ძველი დროიდან კომპრომატებითა და სათანადო უწყებებთან თანამშრომლობით “ვალში მყოფი” ჟურნალისტი საკმაოდ ბევრია და სწორედ ისინი ჩართონ თამაშში.

რაც შეეხება პროკურატურას, აქ თურმე ყველაფერი რიგზეა. რატომ? როგორც “პრემიერს” პროკურატურაში საკუთარმა წყარომ განუცხადა, ფეიქრიშვილის წინააღმდეგ შესული ყველა მასალა ერთ საქმეშია გაერთიანებული და ეს საქმე თავის დროზე, არც მეტი, არც ნაკლები, ამჟამინდელ მთავარ პროკურორს გიორგი ბადაშვილს ეწერა. სწორედ ბადაშვილს შემოუდია თაროზე ფეიქრიშვილის საქმე და ეს საკითხიც ასევე, არც მეტი, არც ნაკლები, თურმე ვაჟა ლელუაშვილმა მოაკვარახჭინა.

რაღაც მოჯადოებულ წრეს ჰგავს ეს ყველაფერი -პრემიერი, რომელიც პოლიტსაბჭოზე ფეიქრიშვილი-კონსერვატორების საკითხის განხილვას ესწრებოდა, აცხადებს, რომ არაფერი იცის. ასევე აცხადებს, რომ მისთვის უცნობია ინვესტორისთვის ხელისშეშლის ამბავიც, როდესაც საკითხის დარეგულირებაში მისი ვიცე-პრემიერი გიორგი კვირიკაშვილი იყო ჩართული. პროკურატურა არაფერზე რეაგირებს, არც ფეიქრიშვილის მიერ დაჩაგრული და გაუბედურებული ადამიანების საჩივრებზე და არც ცალკეული პირებისა თუ გამოცემების მიერ წარდგენილ ცალკეულ მასალებზე. ირკვევა, რომ მისი საქმე ამჟამინდელ მთავარ პროკურორს ეწერა. ასევე, ცნობილი ფაქტია, რომ რამდენიმე ხნის წინ ვეძისში, წავკისის გამაჯანსაღებელი კომპლექსის ინვესტორი კომპანიის ოფისი გაძარცვეს და ა.შ.

რაც შეეხება მთავარი პროკურორის მიერ თავის დროზე თაროზე შემოდებულ საქმეს, როგორც “პრემიერს” მთავარი პროკურატურის პრესსამსახურის უფროსმა თემურ დოლიძემ განუცხადა, საქმეზე გამოძიება მიმდინარეობს.

“ფეიქრიშვილის წინააღმდეგ ყველა საქმე გაერთიანდა და ქვემო ქართლის პროკურატურას გადაეგზავნა, ამჟამად იქ მიმდინარეობს საქმის გამოძიება”, -განაცხადა დოლიძემ.

“პრემიერის” კითხვაზე: ერთ-ერთი საჩივრის ავტორია გაზეთ “ქრონიკა+”-ის მთავარი რედაქტორი ელისო კილაძე, რომელიც არავის დაუბარებია დაკითხვაზე და მის ხელთ არსებული მტკიცებულებების წარსადგენად, დოლიძემ განაცხადა: “გამოძიება როცა ჩათვლის საჭიროდ, დაიბარებენ”.

სამართლიანობის აღდგენის სლოგანით ხელისუფლებაში მოსული ხელისუფლებების კეთილსინდისიერებაშიც შეიძლება ადამიანს ეჭვი შეეპაროს. თუმცა ეს საქმის მორალური მხარეა, მაგრამ საკმაოდ მნიშვნელოვანი, რადგან არჩევნების დროს ხმის მიცემისას მორალური და ემოციური განცდები ხდება გადამწყვეტი. ხომ ცხადია, რომ ათასობით ადამიანი გარდაბნის რაიონში არასოდეს ირწმუნებს, რომ ქვეყანაში სამართალი ოდესმე იზეიმებს. მაგრამ ეს სამომავლოდ, ახლა კი წინ გახედვისთვის “ოცნების” ხელისუფლებას არ სცალია. იქნებ იმ დრომდე კიდევ რამდენიმე ჩინოსანმა იფეშქაშოს წავკისსა და ტაბახმელაში ფეიქრიშვილ-ლელუაშვილისგან მიწის ნაკვეთები, ან სულაც სახლი ააშენებინოს “წავკისელ ფეოდალს”.

მაგრამ ნათქვამია, ერთი კაცისთვის და ერთიც ღმერთისთვისო.

ჩვენ ამ ხნის განმავლობაში ველოდებოდით ფეიქრიშვილის პასუხსაც, სხვა მისი ჯგუფის წევრების გამოხმაურებასაც, თუნდაც ინვესტორის “დანაშაულებრივ” ქმედებაზე, მაგრამ ამაოდ.

ამიტომაც ვითარებაში გარკვევას თავად შევეცადეთ, იმ იმედით, რომ იქნებ სათანადო სამსახურებმა პრემიერ-მინისტრს მინიმუმ სწორი ინფორმაცია მაინც მიაწოდონ.

აი, რას ყვება თამაზ მჭედლიძე, ინვესტორი, პეტერბურგში მოღვაწე ქართველი ბიზნესმენი, რომელიც 21-ე კლინიკას ფლობს და წავკისში გამაჯანსაღებელ კომპლექსს აშენებს:

“2006 წლიდან დავაპირე, საქართველოში დავბრუნებულიყავი საინვესტიციო პროგრამით და ველნეს კურორტების მშენებლობა დამეწყო. პირველის აშენება თბილისთან ახლოს გადავწყვიტე. ველნეს კურორტისთვის ყველაზე კარგი ადგილი აღმოჩნდა წავკისსა და კოჯორს შორის მიმდებარე ტერიტორია. ამ წლების განმავლობაში დავიწყე მოსახლეობისგან ნაკვეთების შესყიდვა. რვა ჰექტარამდე სხვადასხვა ნაკვეთები შევიძინე. 2011 წელს გადავწყვიტე, გამეერთიანებინა ისინი და სახელმწიფოსთვის საინვესტიციო პროექტით მიმემართა.

მთლიანობაში 25 ჰექტარი იყო საჭირო ამ პირველი პროექტისთვის. ნაკვეთების გაერთიანების დროს აღმოჩნდა, რომ რეესტრით მესაკუთრეებმა არ იცოდნენ, ნაკვეთები რომ ჰქონდათ. მესაკუთრე მალხაზ გვარაძე და გულნარა გვარაძე რომ დავარწმუნეთ ნაკვეთების ქონებაში, მათ გადამიცვალეს ანალოგიურ ფართებში და ორი ათასი დოლარის ანაზღაურებით.

შემდეგი მესაკუთრეების სახელით ჩემს დირექტორს დაუკავშირდა გიორგი (თემურ) ფეიქრიშვილი და განაცხადა, რომ ყველა ის ნაკვეთი მისია, ისინიც კი, გვარაძეებმა რომ გადაგვიცვალეს და მასთან უნდა გვქონოდა საქმე. რაც უკვე გაქვთ ნაყიდი ამ წლების განმავლობაში, ისინიც ჩემი თანხმობით გაქვთ ნაყიდიო. ფეიქრიშვილმა დანარჩენი ნაკვეთების გადაცვლაზე უარი თქვა და მოითხოვა 20 დოლარი კვადრატულ მეტრში.

მივეცი განკარგულება დირექტორს, რომ შეეწყვიტა საინვესტიციო ქმედებები და შეძენილი ნაკვეთები გასაყიდად გაეტანა. რამდენიმე ხანში დირექტორმა განმიცხადა, რომ ფეიქრიშვილს შეხვდა და გადაცვლაზე დაითანხმა, ინვესტიცია რომ არ ჩაშლილიყო. ვინაიდან ეს ინვესტიცია ფეიქრიშვილისთვისაც მომგებიანი იქნებოდა, რადგან მის უამრავ ნაკვეთსაც გაეზრდებოდა ფასი. უფრო სწორად, ფეიქრიშვილმა მიგვითითა სახელმწიფოს კუთვნილ იმ ნაკვეთებზე, რომელშიც თავისას გაგვიცვლიდა.

მან ნოტარიატში მოიყვანა ის ხალხი, ვისზეც ჰქონდა გაფორმებული ნაკვეთები, გადავიხადეთ ეგრეთწოდებული “ბე” და შევადგინეთ შესაბამისი ხელშეკრულებები.

შემდეგ ჩემი საინვესტიციო წინადადებითა და შედგენილი ხელშეკრულებებით მივმართეთ თბილისის მერიას. რამდენიმე თვის შემდეგ ხელი მოვაწერე საინვესტიციო კონტრაქტს (ის საჯაროა და ნებისმიერ ადამიანს შეუძლია გაეცნოს). 2012 წლის გაზაფხულზე მშენებლობა დავიწყეთ და პირველ რიგში, ივნისის თვეში გზა შემოვიყვანეთ ტერიტორიაზე. იმ დროისთვის ყველა საბუთიც მზად იყო ნაკვეთების გადასაცვლელად და აქ დაგვხვდა პირველი სიურპრიზი.

ფეიქრიშვილმა დამიდასტურა ყველა შეთანხმება და გადამიცვალა ნაკვეთები, გარდა ერთისა, რომელზეც გაკეთებული გზა შემოდიოდა ტერიტორიაზე. მან განაცხადა, რომ ამ ნაკვეთის ყიდვა მომიწევს 50 დოლარად კვადრატულ მეტრში. ეს იმით ახსნა, რომ ის ნაკვეთი მძახალისაა და მისი მეუღლე კატეგორიული წინააღმდეგია გაცვლისა. ფეიქრიშვილთან, მის შვილთან, მის მძახალთან მრავალი მოლაპარაკების, მათი მუქარების (ოთხი სოფლის აჯანყებითა და ინვესტიციის ჩაშლით) და დაწყებული შავი პიარის შემდეგ, ჩვენ მივმართეთ სასამართლოს. ამჟამად კიდევ ერთი საქმეა სასამართლოში, ვინაიდან ფეიქრიშვილის ჯგუფი ნახევარი წლის განმავლობაში ფიზიკურად ხელს უშლიდა ტერიტორიაზე ოფიციალური პროექტით ელექტროენერგიის შემოყვანას. ამ პერიოდში ჩვენ მოგვმართეს მალხაზ და გულნარა გვარაძეებმა დახმარების მოთხოვნით. აღმოჩნდა, რომ ფეიქრიშვილმა მათ დაათმობინა ჩვენთან გადაცვლილი ნაკვეთები და დაარწმუნა, რომ მათ ის არ ეკუთვნოდათ. საბუთებით კი გაუფორმა, რომ ვითომ იყიდა 20 და 30 ათას დოლარად, შესაბამისად, რამაც გვარაძეებს სოციალურად დაუცველის სტატუსი მოუხსნა. ვინაიდან გვარაძეებმა ჩათვალეს, რომ ისინი დაისაჯნენ ჩვენ გამო, მოგვმართეს, რომ დავხმარებოდით. თან მალხაზ გვარაძემ გაგვიცხადა, რომ მას აძალებენ ჩვენს წინააღმდეგ ჩვენების მიცემას, ვითომ ძალით გადავაცვლევინეთ მას ნაკვეთი და ამიტომ ჩვენგან შველას მოითხოვს”.

ეს მოკლედ იმ დიდი ომიდან, რასაც ფეიქრიშვილი ინვესტორი კომპანიის წინააღმდეგ აწარმოებს. თუმცა ფეიქრიშვილის მხარის მიერ არაერთგზის გაცხადებულ თემაზე, რომ ინვესტორი გარემოს ზიანს აყენებს, აქვს ცალკეული დარღვევები და სჩადის დანაშაულებრივ ქმედებებს, ჩვენ შევეცდებით, დეტალურად გავარკვიოთ და არც ეს საკითხი დავმალოთ საზოგადოებისთვის.

მანამ კი საინტერესოა, პრემიერის დაპირებას -“შევისწავლით”, ვინ ასრულებს და რა ვადაში უნდა დასრულდეს ეს პროცესი?

გოჩა მირცხულავა, გაზეთი "პრემიერი"

FaceBook