“ჯორჯიან უოთერ ენდ ფაუერის” საქმეს პროკურატურა სწავლობს

ნიკოლოზ მჟავანაძე: “კომპანიამ შეუქმნა პრობლემები დედაქალაქს, ცალკე საუბრის თემაა წყლის სტანდარტი”

“უფლებადამცველთა გაერთიანების” საჩივართან დაკავშირებით, რომელიც კომპანია “ჯორჯიან უოთერ ენდ ფაუერში” არსებულ მძიმე სიტუაციასა და დარღვევებს ეხება, პროკურატურამ მუშაობა დაიწყო.

როგორც “უფლებადამცველთა გაერთიანების” ხელმძღვანელი ნიკოლოზ მჟავანაძე აცხადებს, “ჯორჯიან უოთერ ენდ ფაუერში” იმდენად კატასტროფული მდგომარეობაა, რომ უკვე აქტიურად მიმდინარეობს კომპანიის გაყიდვის თაობაზე მუშაობა. არ არის გამორიცხული კომპანია სახელმწიფოს დაუბრუნდეს, ხოლო იმ ზიანის გამო, რაც თბილისელებს მიადგათ, “ჯორჯიან უოთერ ენდ ფაუერში” დაპატიმრებებსაც უნდა ველოდოთ.

თბილისის პოლიციის ყოფილი შეფის სოსო ალავიძის “ჯორჯიან უოთერ ენდ ფაუერში” უსაფრთხოების სამსახურის უფროსად დანიშვნას, მჟავანაძე კომპანიის ქვედა რგოლში მოსალოდნელ რეპრესიებს უკავშირებს, რათა მაღალი თანამდებობის პირები გადარჩნენ.

ამ პირობებში კომპანია კრიზისული სიტუაციების მართვის შტაბს ქმნის, რათა მოსახლეობამ და დაინტერესებულმა პირებმა მიაწოდონ ინფორმაციები მათსავე ქსელში არსებულ ავარიებსა და დაზიანებებზე.

“თბილისის წყალში” არსებულ ვითარებასთან დაკავშირებით “პრემიერის” კითხვებს ნიკოლოზ მჟავანაძემ უპასუხა”

_ ჩვენ შევიტანეთ პროკურატურაში განცხადება, რომელიც წარმოებაშია მიღებული და უახლოეს პერიოდში სხვადასხვა საგამოძიებო მოქმედებებსაც უნდა ველოდოთ. შესაბამისად, ამას მსვლელობა რომ მოჰყვება, რეალურად დაისჯება ის, ვინც თბილისი და ეს კომპანია ამ დონემდე მიიყვანა.

_ რას გულისხმობთ კონკრეტულად?

_ პირობაში ჩადებული იყო 2014 წლისთვის თბილისის უწყვეტი წყალმომარაგება. დღეს ეს რეალურად არ ხდება, იმიტომ რომ ქსელების რეაბილიტაცია არ მომხდარა. ამის გამო თითქმის ყოველ კვირას, ყველა უბანში ერთხელ მაინც ზიანდება მილი. ეს არის 60 წლის წინათ და უფრო ადრე ჩალაგებული მილები და ამორტიზებულია _ დაზიანებულია. მათ ევალებოდათ, ეს მილები გამოეცვალათ და არ გამოცვალეს. მეტსაც გეტყვით, ამ დაზიანებების გამო თბილისის მთელი რიგი კორპუსები და უბნები წყალზე დგას, ირეცხება საძირკვლები და სახლებს ექმნებათ ავარიული მდგომარეობა. ძალიან დიდი საფრთხეა და ჩვენ ვფიქრობთ, რომ პროკურატურა ყველაფერს გამოიკვლევს და დადგება კონკრეტული პირების პასუხისმგებლობის საკითხიც. რეალურად კომპანიამ შეუქმნა პრობლემები დედაქალაქს. არ განხორციელდა გამრიცხველიანება 2014 წლამდე. ცალკე საუბრის თემაა წყლის სტანდარტი.

_ და თუ ეს პირობები ვერ ან არ სრულდებოდა, ვინმეს ხომ უნდა გაეწია ამაზე ზედამხედველობა?

_ ზედამხედველობაზე არ გვაქვს საუბარი. საუბარია დანაშაულზე. არსებობს აუდიტორული დასკვნა, რომელშიც აღნიშნულია გარკვეული პირობების დარღვევის შესახებ კომპანიასა და სახელმწიფოს შორის გაფორმებულ ხელშეკრულებაში. ჩვენ მთელი რიგი მასალები დავურთეთ პროკურატურაში შეტანილ საჩივარს და სულ მალე იმედი მაქვს, რომ კონკრეტული დამნაშავეებიც გამოვლინდებიან. ჩვენ, ასევე, წამოვაყენეთ ინიციატივა, რომ, რადგან კომპანია, ფაქტობრივად, ვერ მართავს ვითარებას და გაჩანაგებამდეა მისული და ყველა უბანს საფრთხე ემუქრება, უპრიანი იქნება, სახელმწიფომ ეს კომპანია დაიბრუნოს. მე რამდენადაც ვფლობ ინფორმაციას, შესაძლოა, კომპანია უახლოეს პერიოდში გაიყიდოს.

_ კი მაგრამ, სახელმწიფოს ამ ბიუჯეტის პირობებში აქვს იმის შესაძლებლობა, რომ კომპანია იყიდოს?

_ არა მგონია, რომ ფასი იმდენად კატასტროფულად დიდი იყოს, რომ სახელმწიფომ ვერ გამოისყიდოს. თან გაითვალისწინეთ, რომ სტრატეგიული მნიშვნელობის ობიექტია. მეტიც, რადგან კომპანიამ ვერ შეასრულა ვალდებულებები, ეს საფუძველია იმისა, რომ არსებული ხელშეკრულება გადაიხედოს. ყველა ვითარებაში გამოსავალია საპოვნი უახლოეს პერიოდში, თორემ შედეგი ნამდვილად კატასტროფული იქნება.

_ თქვენ გააჟღერეთ ინფორმაცია იმის შესახებაც, რომ კომპანიაში ერთ-ერთ თანამდებობაზე თბილისის პოლიციის ყოფილი შეფი სოსო ალავიძე დაინიშნა.

_ დიახ, სოსო ალავიძე დაინიშნა უსაფრთხოების სამსახურის უფროსად. სიმართლე გითხრათ, აქამდე არც ვიცოდი კომპანიაში ასეთი შტატი თუ იყო. ამოდენა კომპანიას კი უნდა ჰყავდეს გარკვეულწილად რაღაც მაგდაგვარი სტრუქტურა და ადრე იყო თუ არა, ჩემთვის უცნობია. მაგრამ ჩვენ ვარაუდი გამოვთქვით, რომ ეს ადამიანი იმიტომ დაინიშნა, რომ კომპანიის ხელმძღვანელი პირების პასუხისმგებლობის საკითხი აუცილებლად დადგება და მის მესვეურებს სურთ, რომ ალავიძის მეშვეობით ჯოხი დაბალი რანგის მოხელეებზე გადატყდეს. მერე იტყვიან, რომ მათ მიიყვანეს კომპანია ამ მდგომარეობამდე. წარმოიდგინეთ, რომ ახლა შექმნეს კრიზისული სიტუაციების მართვის შტაბი. ადრე ყველა უბანში იყო რეაგირების სამსახური და თუ სადმე დაზიანება ხდებოდა, შესაბამისი სამსახური მის აღმოსაფხვრელად გადიოდა. ახლა მხოლოდ ერთი ასეთი სამსახური აქვთ ხუდადოვზე და სადაც არ უნდა მოხდეს დაზიანება, საავარიო ჯგუფი აქედან უნდა გავიდეს. ასევე, სხვადასხვა პერიოდში სამსახურებიდან გაუშვეს პროფესიონალები და კომპანია დილეტანტებით აავსეს. ახლა კი კრიზისული სიტუაციების მართვის შტაბს ქნიან და მოსახლეობას სთხოვენ, თქვენ შეგვატყობინეთ სადმე რამე თუ მოხდაო. მოკლედ ვიტყვი, კომპანიაში კატასტროფული მდგომარეობაა.

ლაშა ნოდია, გაზეთი „პრემიერი“

FaceBook