ვის გვამებს ითხოვდა მერაბიშვილი?

“მინდა მე ორი კაცი, ორი გვამი მჭირდება, მომიტანეთ ეს ორი გვამი, ვსიო, პრემია დიდია”

 “მინისტრმა გასცა ბრძანება, რომ ისინი ან ცოცხლები ამ მკვდრები უნდა ეპოვათ, რადგან საქმე სახელმწიფოს უსაფრთხოებას ეხებოდა”

 “დაგეგმვა ხდებოდა სააკაშვილთან, ეს კადრები გარეთ, ბრძანების მიმღებ დანაყოფებზეა გადაღებული”

სკანდალური ვიდეო, რომელიც youtube-ზე გავრცელდა, სავარაუდოდ, მუხროვანის ამბოხს ასახავს.  ვიდეომასალაში სამხედრო ფორმაში ჩაცმული პირები სამოქმედო გეგმაზე მსჯელობენ. კადრებში ჩანან კუდ-ისა და სოდ-ის ყოფილი უფროსები დათა ახალაია და ერეკლე კოდუა, ასევე საქართველოს ყოფილი პრეზიდენტი მიხეილ სააკაშვილი, იუსტიციის ყოფილი მინისტრი ზურაბ ადეიშვილი, შს ყოფილი მინისტრი ვანო მერაბიშვილი და გიგი უგულავა. კადრებში ჩანს ვანო მერაბიშვილი, რომელიც ამბობს: “მინდა მე ორი კაცი, ორი გვამი მჭირდება, მომიტანეთ ეს ორი გვამი, ვსიო, პრემია დიდია”. მერაბიშვილი შემთხვევის ადგილზე შეკრებილ პირებს სწრაფად მოქმედებისკენაც მოუწოდებს, ასევე კოდუასა და ახალაიას მოუწოდებს, დაილაპარაკონ და მიმართულებები აიღონ. ამის შემდეგ მერაბიშვილის დავალებით სამხედრო ფორმაში ჩაცმული პირები სხვადასხვა მიმართულებით მიდიან. youtube

-ზე ვიდეო appolon osman-ის სახელით აიტვირთა. პროკურატურა აცხადებს, რომ ინტერნეტში გავრცელებულ სკანდალურ ვიდეომასალას შეისწავლის და მოკვლევის შედეგებს საზოგადოებას გააცნობს. იმ პერიოდისთვის პრეზიდენტის პირადი ფოტოგრაფი ირაკლი გედენიძე “აქცენტთან” საუბარში განმარტავს, რომ ეს კადრები მუხროვანის ამბოხების დროს ბაზაზე საქართველოს პრეზიდენტის მისვლამდეა გადაღებული. “ეს სამზადისი არაა, კადრები გადაღებულია მაშინ, როცა მუხროვანის ბაზაზე პრეზიდენტი მივიდა, მაშინ მე მისი პირადი ფოტოგრაფი ვიყავი და თან ვახლდი”, _ აცხადებს გედენიძე.

იმ დროისთვის შსს-ს ყოფილი მაღალჩინოსანი, რომელმაც ამ ეტაპზე საკუთარი ვინაობის საჯაროდ გამხელისგან თავს იკავებს, აცხადებს, რომ არავითარი მკვლელობის შეკვეთაზე საუბარი არ არის. 

რესპონდენტი: გასაგებია ახლა რისთვისაც გაკეთდა ეს ყველაფერი. პროკურატურას მერაბიშვილის წინააღმდეგ ყველა საქმე თავზე ემხობა. ისიც გასაგებია, რომ ეს არავითარი appolon osman-ის ატვირთული არ არის. ხელისუფლების მიერ არის ორგანიზებული.

_ კი მაგრამ, ვიდეოში ისმის, რომ მერაბიშვილი გვამებს ითხოვს....

რესპონდენტი: გაიხსენეთ, ორი ადამიანი იყო გაქცეული მაშინ. რეალურად არავინ იცოდა ბოლომდე მათი განზრახვა, მინისტრმა გასცა ბრძანება, რომ ისინი ან ცოცხლები ამ მკვდრები უნდა ეპოვათ, რადგან  საქმე სახელმწიფოს უსაფრთხოებას ეხებოდა. ემოციურ ფონზე რას ამბობს მერაბიშვილი, ეს არ არის მთავარი. მთავარია, რომ მაშინ იყო ინფორმაცია იმის შესახებ, რომ იყვნენ გაქცეულები.

_ თუმცა რეალურად იყო მსხვერპლიც.

რესპონდენტი: მსხვერპლი მერაბიშვილის ამ ბრძანებას არანაირად არ უკავშირდება და ეს გამოძიებით დადასტურებულია. იყო ინფორმაცია იმის შესახებაც, რომ შიგნით იყო დაპირისპირება და დაღუპული იყვნენ ადამიანებიც. არც იმას გამოვრიცხავ, რომ მერაბიშვილი სწორედ ამ დაღუპული ადამიანების ძებნას ითხოვდეს. რეალურად არიან ადამიანები, რომლებიც კადრებზე კარგად ჩანან და იმის გადამოწმება, რასაც ვამბობ, ძალიან ადვილია. ეს მასაზე გათვლილი სანახაობაა.

“პრემიერი” გავრცელებულ ვიდეოსთან დაკავშირებით უშიშროების ყოფილ მინისტრს ვალერი ხაბურძანიას დაუკავშირდა

_ ბ-ნო ვალერი, გავრცელდა სკანდალური ვიდეო, სადაც წინა ხელისუფლების მაღალჩინოსნები, მათ შორის პრეზიდენტიც, კონკრეტულ სპეცოპერაციას გეგმავენ. რა შეფასებას მისცემდით ვიდეოს შინაარსს?

_ ეს არის მაშინდელი ხელისუფლების დანაშაულებრივი მოქმედების ტიპური მაგალითი. სპეცოპერაციას გეგმავდა ქვეყნის უმაღლესი ხელისუფლება, უფრო სწორად მის ლეტალურ შედეგს და არა სპეციალისტები. ორი გვამის შეკვეთა აშკარად სააკაშვილისგან მოდის და მას ვანო მერაბიშვილი ახმოვანებს. ნებისმიერი სპეცოპერაცია უნდა დაიგეგმოს ადამიანური მსხვერპლის გამორიცხვით ან თუ ეს შეუძლებელია, მინიმალური მსხვერპლით, აქ კი იმთავითვე ხდება შეკვეთა ორი გვამის, თან იდენტიფიცირებაც არ ხდება, მთავარია, ორი გვამი და მიიღებ დიდ პრემიას. აი, ამიტომ იყო “ეფექტური” სააკაშვილის დანაშაულებრივი ხელისუფლება საკუთარ მოქალაქეებთან, ზოგადად, ადამიანებთან ბრძოლაში, ეს იძლეოდა კრიმინალთან წარმატებული ბრძოლის ილუზიას. მაშინ ხელისუფლებაში მყოფი მცირერიცხოვანი კრიმინალური ბანდა ჩაგრავდა არასახელისუფლებო კრიმინალს.

_ ავთენტურობა დადგენილი არ არის, შესაძლებელია, ვიდეო რეალური არ იყოს?

_ გამორიცხულია, ეჭვის შეტანის საფუძველიც კი არაა.

_ იმ მომენტში, სადაც მერაბიშვილი ორ გვამზე საუბრობს, ერთ-ერთი ყოფილი მაღალჩინოსანი ჩვენთან საუბარში ამბობს, რომ საუბარია ორ გაქცეულ სამხედროზე, რომლის მოყვანასაც ითხოვს მერაბიშვილი, ცოცხლებს თუ არა, გვამის სახით მაინცო და ამას ემოციურ განცხადებად აფასებს, რადგან გაქცეულების განზრახვა არავინ იცოდაო.

_ საუბრის ყველა მანერით გვამი არის მკვდარი ადამიანის სხეული, თუნდაც გაქცეული მებრძოლის ცოცხალის ან მკვდარის მოყვანა რა ლეგიტიმური ბრძანებაა?

_ სპეცოპერაციის დაგეგმვის ვიდეოგადაღება რატომ უნდა დასჭირვებოდათ?

_ დაგეგმვა ხდებოდა სააკაშვილთან, ეს კადრები გარეთ, ბრძანების მიმღებ დანაყოფებზეა გადაღებული, რომელიღაც იქ მიწვეული ოპერატორის მიერ, რომელიც, ალბათ, თვითნებურად გასცდა ნებადართულ არეალს.

_ თუმცა გავრცელდა ვიდეოს ფრაგმენტი და არა სრული ვერსია, რომელიც, ბუნებრივია, კითხვებს აჩენს...

_ კითხვები მხოლოდ სააკაშვილის, მერაბიშვილის, ადეიშვილისა და უგულავას მიმართ უნდა იყოს, რომელიც ნორმალურ ქვეყანაში არანაირად არ უნდა ყოფილიყო. და ეს კითხვა ეხება მკვლელობის შეკვეთას და არა დანაშაულის აღკვეთას.

გეგა სილაგავა, გაზეთი პრემიერი

FaceBook