დიდი ინტრიგები “ოცნებაში”

თეა წულუკიანს უზენაესი სასამართლოს თავმჯდომარედ ამზადებენ?

 დიდი ინტრიგები “ოცნებაში”- რატომ აიყარა გული ივანიშვილმა ქუცნაშვილზე და ვის ენდობა ყველაზე მეტად პრემიერი ღარიბაშვილი

 აი, ასე: “ქართულ ოცნებაში” თურმე ისეთი შიდა ინტრიგებია, რომ დედა შვილს არ აიყვანს ხელში. პრინციპში, მოსალოდნელიც იყო, რომ “ოცნებას” ინტრიგები წალეკავდა- აბა, ის პოლიტიკოსები, რომლებიც საქართველოს დამოუკიდებლობის დღიდან მოყოლებული, ფონს ინტრიგებით გადიან, ჩვეულებაზე უარს ხომ არ იტყოდნენ?! ჰოდა, ბევრი რომ აღარ გავაგრძელოთ, მსტოვრები ირწმუნებიან, რომ მას შემდეგ, რაც ბიძინა ივანიშვილი დიდ პოლიტიკას განერიდა და ბინა საზოგადოებრივ სექტორში დაიდო (ისე, სამართლიანობა მოითხოვს, აღინიშნოს, რომ არავინ იცის, გადამდგარი პრემიერი ცამ ჩაყლაპა თუ მიწამ: გადადგომის მერე, ფართო საზოგადოების წინაშე წამითაც კი არ გამოჩენილა), “ოცნების” კოალიციაში პირველობისთვის ნამდვილი ფრონტი გაიხსნა თურმე.

მსტოვართა ენაზე, ფრონტის გახსნა იმას ნიშნავს, რომ გარკვეული სუბიექტები ცდილობენ, ირაკლი ღარიბაშვილის კარზე გავლენა მოიპოვონ და მიზნის მისაღწევად უკან არაფერზე იხევენ.

ამ ფონზე, საკითხავია, ვის ენდობა პრემიერი ყველაზე მეტად?

ამბობენ, რომ ღარიბაშვილის მესაიდუმლე ენერგეტიკის მინისტრი კახი კალაძეა. პრინციპში, ამაში გასაკვირიც არაფერია, რადგან მოქმედი პრემიერი ყოფილის შვილობილია. ამასთანავე, ცნობილია, რომ ივანიშვილი კალაძესაც დიდ პატივს სცემს- წინააღმდეგ შემთხვევაში, ბერა საქართველოს საფეხბურთო ნაკრების ყოფილ კაპიტანსა და ე.წ. ავტოგოლების ავტორს ვაჟს არ მოუნათლავდა. აქედან გამომდინარე, ღარიბაშვილი და კალაძე ივანიშვილის ოჯახში მიღებულები არიან და შესაბამისად, ორივე ყოფილი პრემიერის იდეების გამტარებელია. 

კიდევ ერთი ადამიანი, რომელსაც პრემიერი ღარიბაშვილი ენდობა, როგორც მსტოვრები ამბობენ, შს მინისტრი ალექსანდრე ჭიკაიძეა. ისინი ერთმანეთს, თუ მოარულ ხმებს დავუჯერებთ, ჯერ კიდევ 2012 წლის საპარლამენტო არჩევნებამდე იცნობდნენ- ჭიკაიძის მამა და ღარიბაშვილის სიმამრი, გენერალი თამაზაშვილი მეგობრები ყოფილან.

რაც შეეხებათ იმ ადამიანებს, რომლებიც თავს ბიძინა ივანიშვილის მეგობრებად ასაღებდნენ, “ოცნების” კულუარებიდან მიღებული ცნობით, თითქმის ყველა მათგანი “აბსაითშია”. ამ მხრივ კი, განსაკუთრებით ცუდ მდგომარეობაში ზაქარია ქუცნაშვილი ყოფილა- “ქართული ოცნების” საპარლამენტო ფრაქციის ყოფილი თავმჯდომარე ახალ წლამდე ბიძინა ივანიშვილს სოლოლაკის რეზიდენციაში სტუმრებია და დაცვისთვის უთქვამს, ბატონ ბიძინას მოახსენეთ, მოვედი და მასთან პირისპირ საუბარი მსურსო. დაცვას, ბუნებრივია, ექსპრემიერისთვის მოუხსენებია, ზაქარია მოვიდაო. ჰოდა, აი, ამის თქმა ყოფილა და ივანიშვილი ისე აფეთქებულა, ქოში სულ უკუღმა უყრია.

_ აქ მოსვლა როგორ გაბედა, ახლავე გაეთრიოს, თორემ საკუთარ თავზე პასუხს არ ვაგებო,- იძახდა თურმე მილიარდერი.

ქუცნაშვილს ერთი კი დაუპირებია, გავარკვევ, ივანიშვილი რატომ მიბრაზდებაო, მაგრამ დაცვას უთქვამს, გირჩევნია, აქედან წახვიდეო.

მსტოვრების მიერ მოტანილ ამ ამბავში სად მთავრდება სიმართლე და სად იწყება ტყუილი, ძნელი გასარკვევია, მაგრამ თვალნათელია, რომ ქუცნაშვილის “ოცნება სეკვესტრირებულია”- საპარლამენტო თანამდებობებიც დაკარგა და მაინცდამაინც აღარც მედიაში აქტიურობს.

ამასთანავე, ამბობენ, რომ 2013 წლის 31 დეკემბერს, ახალი წლის დადგომამდე რამდენიმე საათით ადრე, ქუცნაშვილს თითქოს ფიზიკური ინციდენტი შეემთხვა- მშობლიურ თიანეთში “ოცნებელებთან” შეხლა-შემოხლა მოუვიდა... 

რატომ აიყარა ივანიშვილმა გული ქუცნაშვილზე?- “პრემიერმა” “ოცნების” კულუარებში ყური მოჰკრა, რომ ზაქარიამ თითქოს გარკვეული ბიზნესების ლობირება სცადა, რაც ივანიშვილმა გაიგო და ამიტომაც განაწყენდა, თუმცა იმასაც ამბობენ, რომ ივანიშვილს ქუცნაშვილის მიმართ ნდობა ჯერ კიდევ საპარლამენტო არჩევნებამდე დაეკარგა, მაგრამ მას ერთი შანსი კიდევ მისცა.

საპარლამენტო არჩევნებამდე ზაქარია ქუცნაშვილი, ყოფილ მთავარ პროკურორ არჩილ კბილაშვილსა და სხვა ადვოკატებთან ერთად, საქართველოს მოქალაქეობაწართმეული ივანიშვილის ინტერესებს იცავდა. ადვოკატთა ამ ჯგუფში პარლამენტის ადამიანის უფლებათა კომიტეტის ამჟამინდელი თავმჯდომარე ეკა ბესელიაც იყო, რომელსაც დაცვის სხვა სტრატეგია ჰქონია, მაგრამ ქუცნაშვილ-კბილაშვილის ტანდემს ეს სტრატეგია არ გაუზიარებია. მოგეხსენებათ, სააკაშვილის ხელისუფლების პირობებში, ივანიშვილმა საქართველოს მოქალაქეობა ვერ დაიბრუნა. ჰოდა, ბესელიას “ოცნების” ლიდერის გასაგონად ორაზროვნად უთქვამს, ზაქროსა და არჩილს ჩემთვის რომ დაეჯერებინათ, ყველაფერი კარგად დამთავრდებოდაო.

ამბობენ, რომ ბიძინა ივანიშვილი ეჭვიანი კაცია და თურმე ენების აყოლაც უყვარს. აქედან გამომდინარე, გასაკვირი არ არის, ქუცნაშვილისგან დისტანცირებას რატომაც ახდენს.

ისე, კულუარებში არც იმას გამორიცხავენ, რომ “ოცნების” “სტაფმა” ეკა ბესელიაც ჩამოიცილოს. ჩამოცილების სავარაუდო სცენარი კი შეიძლება, ასეთი იყოს: ბესელია პარლამენტიდან რომელიმე აღმასრულებელ თანამდებობაზე გადაამისამართონ, საიდანაც შინ უმტკივნეულოდ გაუშვებენ.

“სახლში გაშვების” კანდიდატთა სიაში, როგორც ამბობენ, იუსტიციის მინისტრი თეა წულუკიანიც ფიგურირებს. ის, რომ წულუკიანის თავს მთლად კარგი ამბები არ ხდება, ბოლოდროინდელმა მოვლენებმაც ნათელყო:

ჯერ იყო და, ქალბატონმა თეამ განაცხადა, ოთარ ფარცხალაძის მთავარ პროკურორად წარდგენა ჩემთან შეთანხმებული არ იყოო. მერე, ვანო მერაბიშვილმა სკანდალური განცხადება რომ გააკეთა, იუსტიციის მინისტრმა ბრძანა, ვანოსი არ მჯერა, მაგრამ რახან განცხადება გაკეთდა, უნდა გამოვიკვლიოთ, საკნიდან მართლა გაიყვანეს თუ არაო.

ამასობაში, “ნაციონალებმა” ფარცხალაძის ნასამართლობის საქმე “გახეთქეს” და წულუკიანი “შარშანდელი თოვლივით” გაქრა- თურმე კუთვნილი შვებულება აიღო და შობა-ახალი წელი ევროპაში გაატარა.

ირაკლი ალასანია რომ არა, თეა წულუკიანი არა თუ იუსტიციის მინისტრი გახდებოდა, არამედ ქართულ პოლიტიკაშიც არ გამოჩნდებოდა. მართალია, მას შემდეგ, რაც “ოცნება” ხელისუფლებაში მოვიდა, რამდენჯერმე ითქვა, რომ თეასა და ირაკლის გზები გაიყო, მაგრამ “თავისუფალ დემოკრატებთან” დაახლოებულნი ვენებს იხსნიან, ალასანია და წულუკიანი სამარადჟამოდ მეგობრები იქნებიანო.

კულუარებში ღიად ამბობენ, რომ ორ ირაკლის (ღარიბაშვილსა და ალასანიას) შორის უთანხმოებაა- ალასანიას ღარიბაშვილის მიმართ ანტიპათია ჯერ კიდევ მაშინ გასჩენია, როცა ბიძინა ივანიშვილმა “ქართული ოცნების” საარჩევნო სიის პირველ ნომრად დღევანდელი პრემიერი ჩაწერა.

“ალასანია მიხვდა, რომ მუდამ ღარიბაშვილის ჩრდილში იქნებოდა”,- ამბობენ “ოცნებასთან” დაახლოებულნი.

ერთი სიტყვით, ღარიბაშვილ-ალასანიას “კონტრა”, ლოგიკურია, წულუკიანზეც გავრცელდება. ამერიკელი პარტნიორები პრემიერს თურმე ურჩევენ, რომ თეა წულუკიანი უზენაესი სასამართლოს თავმჯდომარედ გაამწესოს, მაგრამ ღარიბაშვილი ამის კატეგორიული წინააღმდეგია. თუ უცხოელებმა პრემიერის დარწმუნება ვერ შეძლეს, მაშინ, როგორც “პრემიერს” სამთავრობო წყაროებმა უთხრეს, დიდ სამთავრობო წმენდას, რომელიც, სავარაუდოდ, გაზაფხულამდე უნდა განხორციელდეს, წულუკიანიც შეეწირება.

ამავე წყაროების მონაცემებით, დიდ სამთავრობო წმენდას ერთადერთი, შეიძლება, კახი კალაძე გადაურჩეს, რომელიც, როგორც ზემოთ აღვნიშნეთ, ღარიბაშვილის მეგობარია, თუმცა მინისტრთა კაბინეტის გადახალისების შემთხვევაში, კალაძე ენერგეტიკის მინისტრის პოსტს აღარ დაიკავებს.

გეგა სილაგავა, გაზეთი „პრემიერი“

FaceBook