ვალერი ხაბურძანია: “რუსეთს არ “სიამოვნებს” საქართველო ნატო-ში, ევროკავშირზე კი არა მგონია, თავი მოიკლას”

“დიპლომატური პოზა გვიჭირავს და ამით ვკმაყოფილდებით, დიცი და დვანი კი ევროტურიზმის ადგილებად ვაქციეთ”

“პრემიერს” ესაუბრა საქართველოს უშიშროების ყოფილი მინისტრი ვალერი ხაბურძანია:

_ ახლოვდება სოჭის ოლიმპიადა, როგორც თქვენ ჩვენთან ერთ-ერთ ინტერვიუში თქვით, ოლიმპიადის მერე რუსეთი საქართველოზე ზეწოლას გააძლიერებს. ამ ინტერვიუს შემდეგ დრო გავიდა და მოვლენებიც სხვაგვარად განვითარდა _ უკრაინის მოვლენები, რომელიც ჯერ კიდევ არ დასრულებულა, და ასევე, ევროკავშირის განცხადება, რომ საქართველოსთან ასოცირების ხელშეკრულებას დააჩქარებს... რა ბერკეტი რჩება რუსეთს?

_ მოდით, რეალისტები ვიყოთ. სამწუხაროდ, “დარჩენილი” საქართველო რუსეთს აღარაფერში სჭირდება. ოლიმპიადის წინ გამკაცრდება უსაფრთხოების რეჟიმი და არის საფრთხე, ამაში მოყვეს ასი ათასობით ქართველი არალეგალი. ვიმეორებ, ასი ათასობით, მაგრამ, საბედნიეროდ, ასეთი ჯერ არაფერი ხდება. სხვაგვარ ზეწოლებს, რას უნდა ველოდეთ ან რა მოტივაციით... რუსეთს არ “სიამოვნებს” საქართველო ნატო-ში, აი, ევროკავშირზე არა მგონია, თავი მოიკლას. უკრაინა სხვა თემაა, აღმოსავლეთ უკრაინის ეკონომიკა რუსეთისაზეა მიბმული და მისი ევროინტეგრაციით რუსეთის ეკონომიკაც პირდაპირ ზარალს განიცდის, აქ უფრო მეტი გეოსტრატეგიაცაა და პრესტიჟიც, ამიტომ “ებღაუჭება” რუსეთი უკრაინას. საქართველოს ეკონომიკური და გეოსტრატეგიული ხიბლი კი მისთვის სეპარატისტული რეგიონების დამოუკიდებლობის აღიარების ფონზე ნულის ტოლია, ერთადერთი პრობლემა კალინინგრადის ოლქივით დარჩენილი საბაჟო კავშირის წევრი სომხეთია, მაგრამ აქაც არა მგონია, დიდი ძალისხმევა დასჭირდეს რუსეთს. უბრალოდ, ჩვენ არ გვაქვს იმის რესურსი, სომხეთი “გავაბრაზოთ” და ამ მიმართულებით ადეკვატურ გარიგებებზე და შესაძლოა, დათმობებზეც უცილობლად წავალთ.

 _ პარლამენტის თავმჯდომარემ დავით უსუფაშვილმა მესიჯი გაუგზავნა საერთაშორისო თანამეგობრობას და გააფრთხილა, რომ შესაძლოა, საქართველოს ევროინტეგრაციას საფრთხე დაემუქროს, თუ “მაპ”-ს არ მივიღებთ... ფიქრობთ, რომ შესაძლებელია, საქართველოში უკრაინის სცენარი განვითარდეს?

 _ უკრაინის სცენარი სავსებით გამორიცხულია. ჯერ ერთი, ევროინტეგრატორები, უკრაინისგან განსხვავებით, ხელისუფლებაში არიან და მეორეც, ოპოზიციაც ასეთივე ევროინტეგრატორია. საქართველოში საპირისპირო კი არა, სხვა ოდნავი ალტერნატივის მომხრე ძალაც კი არ ჩანს. ერთეული განცხადებები ამინდს ვერ ქმნის, ამიტომ უსუფაშვილი მარტივ შანტაჟს ეწევა, უბედურება კი ის არის, რომ ამით ევროპა არ შანტაჟდება, ქართველ ხალხს კი ატყუებენ. დავით უსუფაშვილისგან ეს პოპულისტურ-შანტაჟისტური პოლიტიკა უფრო მეტად საწყენია, ჩვენი პირადი ურთიერთობიდან და დიდი ხნის ნაცნობობიდან გამომდინარე, რას ვიზამთ ხელისუფლება აფუჭებს ადამიანებს.

_ პუტინის ბოლო პერიოდის განცხადება, რომ საქართველოსა და რუსეთს შორის სავიზო რეჟიმი მოიხსნება და რუსეთის მეთაურს თურმე  საქართველოს ახალი ხელისუფლების მიმართ უკეთესი განწყობა აქვს, პროგრესი არ არის?

_ გარდა რიტორიკის აგრესიულობის მოხსნისა ახალ ხელისუფლებას რუსეთისთვის ახალი არაფერი შეუთავაზებია, თუ არ ჩავთვლით ოლიმპიადაზე წასვლას, რასაც წინა ხელისუფლებაც აპირებდა და ახლა უსირცხვილოდ ანგაჟირებს ამ თემით. არა მგონია, სავიზო რეჟიმი სრულად მოიხსნეს, თუნდაც ამ ხელისუფლების პირობებში. რუსეთი დიდი ქვეყანაა და არ გამოვრიცხავ, ჩინოვნიკურ ლაბირინთებში პირველი პირის ნათქვამმაც კი ტრანსფორმაცია განიცადოს. ხელის შემშლელებს საქართველოშიც ვხედავ, განსაკუთრებით ნაციონალური ოპოზიცია შეეწინააღმდეგება ამას ჩვეული დემაგოგიით.

 _ თქვენ ამბობთ, რომ გარდა რიტორიკის აგრესიულობის მოხსნისა, ახალ ხელისუფლებას რუსეთისთვის ახალი არაფერი შეუთავაზებია. რა უნდა შეეთავაზებინა, მით უფრო იმ ფონზე, რომ რუსეთს არანაირი ნაბიჯი არ გადმოუდგამს, პირიქით, ანექსია გააგრძელა დვანში და ა.შ.

 _ რუსეთმა გახსნა ბაზარი, უნდა მოხსნას სავიზო რეჟიმი, მოსურნეა დიპლომატიური ურთიერთობის აღდგენის. რაც დვანსა და დიცში და სეპარატისტულ საზღვარზე ხდება, ნაწილობრივ ჩვენი ბრალიცაა, სირაქლემის დიპლომატიური პოზის გამო. რუსებმა აიღეს ძველი საბჭოთა რუკა და მიყვებიან სადემარკაციო ხაზს, ჩვენგან კი არავინ ელაპარაკებათ. რაღაც უაზრო თეატრალიზებულ პროტესტებში გადაიზარდა როგორც ოპოზიციის, ისე ხელისუფლების ქმედებები. ბერლინშიც კი, სადაც კომუნისტური რეჟიმი კედელს აშენებდა, რაღაც მოლაპარაკება მიდიოდა. არ ვცნობთ და სწორიცაა, მაგრამ ეს დიალოგის აუცილებლობას არ ხსნის. იმას მაინც მივაღწიოთ, რომ ამ სეპარატისტულმა საზღვარმა მოსახლეობის კარმიდამოზე არ გაიაროს, მაგრამ არა, ჩვენ დიპლომატური პოზა გვიჭირავს და ამით ვკმაყოფილდებით, დიცი და დვანი კი ევროტურიზმის ადგილებად ვაქციეთ.

 _ რუსეთის “სანქცია” _ ბაზრის ჩაკეტვა, ქართული ბიზნესისთვის უკვე ძველია. იმის მიუხედავად, რომ ბაზარი ამჟამად ნაწილობრივ ღიაა, ქართული ბიზნესი იქ ისეთ ინვესტიციას არ განახორციელებს, რომ ამით კიდევ ერთხელ დიდი ზარალი მიიღოს. სხვა რა სახის ზეწოლაა მოსალოდნელი რუსეთის მხრიდან სოჭის ოლიმპიადის შემდეგ?

 _ რა ქართულ ინვესტიციებზეა საუბარი რუსეთში, რომელი ინვესტიციების ექსპორტიორი ჩვენ ვართ. აი, ჩვენი სასოფლო-სამეურნეო პროდუქციის გატანა სხვა თემაა და აქაც უკვე მაღალ სტანდარტებს ვეჯახებით. მაგალითად, წელს არც ერთმა სერიოზულმა სასურსათო ქსელმა ჩვენი ხილი არ მიიღო არასტანდარტულობის გამო და ისევ ჩვეულებრივი ბაზრის იმედზე დავრჩით. რა ბერკეტები და ზეწოლა, ეს ყველაფერი ზღვაში წვეთია და ქართულ ანარქიულ მეურნეობასაც ბევრს ვერაფერს მოუმატებს ან მოაკლებს.

უკრაინის მერე ნამდვილად არაა საქართველოს ევროინტეგრაცია რუსეთის წინააღმდეგობის სამიზნე. უკრაინა _ კი ბატონო, ეს საქართველო კი, თუ გამოვა, ხომ კარგი, თუ არა და რუსეთი რაიმე რესურსს აქეთ, დარწმუნებული ვარ, არ მიმართავს, ელემენტარული მოტივაციის არქონის გამო. ნატო კი ბატონო, სამხედრო-პოლიტიკური ბლოკი სხვაა. რაც შეეხება ევროინტეგრაციას, არ გამოვრიცხავ, რუსეთმა “ხელიც კი შეგვიწყოს”, რომ მალე ვიწვნიოთ რეალური პრობლემები, რაც ევროკავშირთან ურთიერთობაში ობიექტურად გველოდება და ამ ფონზე ევრაზიულ კავშირში შეყვანა მუდარის რანგში გადაგვიყვანოს. ერთი სერიოზული ეკონომისტი მითხარით საქართველოში, რომელსაც გადაბმით სამი გვერდი ექნება დაწერილი გლობალურ ევროეკონომიკურ სივრცეში ჩვენი შესვლის შედეგებზე. კარგია კარგი ცხოვრება, მაგრამ ძვირი ჯდება და თუ ამ ძვირს ვერ იხდი, კარგ ცხოვრებასაც დაემშვიდობე, ეს სამწუხარო რეალობაა და როდის უნდა გამოვიდეთ ქართველები პოლიტუტოპიზმის რომანტიკიდან?

_ რუსეთის გეგმა ნათელია _ საქართველომ უარი თქვას ევროინტეგრაციაზე, მაგრამ რუსეთმა საქართველოში დასაყრდენი მძლავრი პოლიტიკური პარტია ან პარტიები ვერ “იშოვა”. ვის დაეყრდნობა რუსეთი?

 _ რაც შეეხება იმას, ვის დაეყრდნობა რუსეთი, არ გამოვრიცხავ უახლოეს მომავალში უფრო პოლიტვულგარული, პოპულისტური პრორუსული ძალების გამოჩენას, რომლებიც უფრო რადიკალურნი იქნებიან და საზოგადოებაში მკვეთრი დაპირისპირების ნიადაგს შექმნიან. სამწუხაროდ, არსებულ პოლიტიკურ ძალებს არ შეუძლიათ ცივილიზებული ურთიერთობები, ვერ იტანენ რეალისტურ ალტერნატივას, ამიტომ მიიღებენ მარგინალურ ძალებს უფრო მეტი საფრთხით.

FaceBook