გიორგინ აბაშიშვილი: “მეტი სითამამე ბიზნესმენების მხრიდან სასურველი იქნებოდა”

“ასეთი ტიპის შეხვედრები უნდა ემსახურებოდეს ბიზნესსა და მთავრობას შორის წარმოქმნილი პრობლემების სწრაფად გადაჭრას”

 პრემიერ-მინისტრმა ქართული ბიზნესის 80-მდე წარმომადგენელთან გამართა შეხვედრა. შეხვედრის მიზანი იყო ხელისუფლებასა და ბიზნესსაზოგადოებას შორის უშუალო და ეფექტური დიალოგის დაწყება. 2-საათიან შეხვედრაზე ირაკლი ღარიბაშვილმა ბიზნესმენებს ხელისუფლების გეგმა გააცნო _ როგორ უნდა მოხდეს სფეროს განვითარება და ასევე, დაინტერესდა, რა ხედვა აქვთ მათ. პრემიერ-მინისტრი მიიჩნევს, რომ ხელისუფლებამ და ბიზნესმა ერთად უნდა შექმნას ისეთი ინსტიტუციური გარემო, რომელიც უზრუნველყოფს ქვეყნის ეკონომიკური პოტენციალის მაქსიმალურ და ეფექტურ ათვისებას, შექმნის დამატებით სამუშაო ადგილებს და დაეხმარება ქვეყანას უმთავრესი პრობლემის _ სიღარიბის დაძლევაში. შეხვედრაზე გამოიკვეთა ბიზნესმენების ხედვა და მოსაზრებები, როგორც ქვეყნის ეკონომიკური განვითარების სტრატეგიის ჭრილში, ისე კონკრეტული პროექტების განხორციელებაში შექმნილ ხელისშემშლელ ფაქტორებთან მიმართებაში. პრემიერი ამბობს, რომ გასული წელი რთული იყო, მაგრამ წინააღმდეგობების მიუხედავად, ქვეყნის მთავარი მონაპოვარი კანონის უზენაესობის დამტკიცება და ბიზნესის პოლიტიკური წნეხისგან განთავისუფლებაა, ასევე, ირაკლი ღარიბაშვილმა ისაუბრა ქვეყნის მაღალ რეიტინგზე საერთაშორისო კვლევებში და სხვა ტენდენციებზე. ირაკლი ღარიბაშვილისა და ბიზნესმენთა შეხვედრა “პრემიერთან” ექსპერტმა ეკონომიკის საკითხებში გიორგი აბაშიშვილმა შეაფასა:

_ ზოგადად, მნიშვნელოვან ფაქტად მიმაჩნია, რომ მთავრობას ჰქონდეს დიალოგი ბიზნესთან, განსაკუთრებით პრემიერის დონეზე. თუმცა, ჯამში, გასაგებია, რომ ასეთი ტიპის შეხვედრები ყოველდღიური და ძალიან ხშირი ვერ იქნება. საბოლოოდ, მგონია, რომ იდეალური იქნება სიტუაცია, როდესაც მთავრობასა და ბიზნესს ერთმანეთთან დიალოგი და პრობლემების გაცნობა აღარ დასჭირდებათ, რადგან ქვეყანაში, შესაბამისად, კარგი ბიზნესგარემო იქნება ჩამოყალიბებული.

_ ასეთი შეხვედრები გვინახავს, მოგვისმენია რენესანსის ხანის დადგომის შესახებაც, მაგრამ კონკრეტული ნაბიჯები არ გადადგმულა, მაინც რას ემსახურება ასეთი ტიპის შეხვედრები?

_ მე მაინც მგონია, რომ ასეთი ტიპის შეხვედრები უნდა ემსახურებოდეს ბიზნესსა და მთავრობას შორის წარმოქმნილი პრობლემების სწრაფად გადაჭრას, ბიზნესმენთათვის ახალი შესაძლებლობების გაჩენას. თუმცა, იმისთვის, რომ შეხვედრები მხოლოდ სიმბოლურად არ დარჩეს, საჭიროა, დავინახოთ კონკრეტული ქმედება, რომელიც ამ შეხვედრის შემდგომ იქნება.

_ დღეს დასმული კითხვები, ინიციატივები თუ ემსახურებოდა პრობლემების გადაჭრას? ვგულისხმობ ბიზნესის მხრიდან დასმულ შეკითხვებს...

_ ვფიქრობ, კი, რადგან ნამდვილად იყო საუბარი რამდენიმე ტიპის აქტუალურ საკითხზე და შესაძლოა, ამ ყველაფერმა ბიზნესზე დადებითი ასახვა ჰპოვოს.

_ ბიზნესი რამდენად თამამ და საქმიან კითხვებს უსვამდა პრემიერს?  მახსოვს, გასულ წელს, ანალოგიურ შეხვედრაზე, ბიზნესმენმა პრემიერს ჰკითხა, როდის გადააბრძანებდნენ ხატს ეკლესიაში.

_ ჩემი აზრით, წინა წელთან შედარებით შეხვედრა უფრო საქმიანი იყო, თუმცა მეტი სითამამე ბიზნესმენების მხრიდან სასურველი იქნებოდა.

თორნიკე ლაგვილავა, გაზეთი „პრემიერი“

FaceBook