გიორგი აბაშიშვილი: დაპირებულ ქარხნებს ამ ხელისუფლებას ყოველი ფეხის ნაბიჯზე შეახსენებენ

“ბიუჯეტის ზედმეტმა სოციალურმა ორიენტაციამ შესაძლოა, არსებული დახმარებებიც  კითხვის ნიშნის ქვეშ დააყენოს”

 “პრემიერს” ესაუბრა ექსპერტი ეკონომიკის საკითხებში გიორგი აბაშიშვილი:

_ 2013 წელი არასახარბიელოდ დასრულდა, გარღვეული ბიუჯეტი, შენელებული ეკონომიკა და ა.შ. როგორი წელი იქნება ეკონომიკური თვალსაზრისით 2014? დაგეგმილია 5-პროცენტიანი ეკონომიკური ზრდა, თუმცა გასული წლის პრაქტიკასა და პროგნოზს თუ გავითვალისწინებთ, პროგნოზი პროგნოზად დარჩა. ამასთანავე, ექსპერტთა ერთი ნაწილი 5%-იან ეკონომიკურ ზრდას ეჭვით უყურებს. თქვენ ექსპერტთა რომელ ნაწილს მიეკუთვნებით და როგორია თქვენი პროგნოზი?

_ 2014 წელს ნამდვილად ველოდები ბევრ ცვლილებას პოზიტიური კუთხით, 2013 წელთან შედარებით. მგონია, რომ მთავრობამ “ძალიან უნდა მოინდომოს”, რომ 2014 წელს იგივე ტიპის პრობლემები შეექმნას ეკონომიკას, როგორც ეს 2013 წელს იყო. ვგულისხმობ, იმას, რომ ეკონომიკური აქტივობა 2014 წელს უნდა იყოს მაღალი და შესაბამისად, ეკონომიკის ზრდა 5-პროცენტიან მაჩვენებელზე არის სრულიად რეალური. საქმე ისაა, რომ არანაირი სერიოზული წინაპირობა არ არსებობს იმასთან მიმართებაში, რომ 5-პროცენტიანი ეკონომიკური ზრდა არარეალურია, საქმე შესრულების ხარისხშია. ფაქტია, რომ მთავრობის არგუმენტები პოლიტიკური არასტაბილურობის შესახებ ამ შემთხვევაში აღარ იმუშავებს.

_ 2014 წლის სახელმწიფო ბიუჯეტი ძირითადად მიმართულია სახელმწიფო ხარჯების, საგარეო ვალისა და სოციალური დახმარებების დასაფარავად. იმ ფონზე, როდესაც ქვეყანაში ეკონომიკურად აქტიური 2 მლნ-დან მხოლოდ 17 პროცენტია დასაქმებული, როგორ შეძლებს ამას ბიუჯეტი და ცოტა ზედმეტი ფუფუნება ხომ არ არის საქართველოსნაირი ქვეყნისთვის სოციალური ბიუჯეტი? როგორ გავლენას მოახდენს ეს ეკონომიკურ ზრდაზე?

_ ნებისმიერ შემთხვევაში, ალბათ, სასურველია, რომ ყველა ტიპის სოციალური ხარჯი იმაზე მეტი იყოს, ვიდრე არსებობს, ყველას მეტი დახმარება ურჩევნია, ყველას მოსწონს გაზრდილი პენსია, მაგრამ ერთი რამ უნდა ვთქვათ: რა შესაძლებლობები გვაქვს. სინამდვილეში მთავარი კითხვა სწორედ ესაა 2014 წლის სახელმწიფო ბიუჯეტთან მიმართებაში _ ხომ არ ვიღებთ ზედმეტ სოციალურ ვალდებულებებს? მე მესმის “ქართული ოცნების”, რომელსაც სურს, საკუთარი წინასაარჩევნო დაპირებები მაქსიმალურად ასრულებადი გახადოს, თუმცა ბიუჯეტის ზედმეტმა სოციალურმა ორიენტაციამ შესაძლოა, არსებული დახმარებებიც კი კითხვის ნიშნის ქვეშ დააყენოს. მგონია, რომ ხელისუფლებას მეტი დაფიქრება და მეტი პრაგმატიზმი მართებს სოციალური პოლიტიკის განხორციელების პროცესში.

_ ხელისუფლება არაფერს ამბობს დასაქმებაზე, თუ ამბობს, კონკრეტული ნაბიჯები არ იდგმება... გარდა ამისა, არსად ჩანს დაპირებული ქარხნები, ეს კიდევ უფრო ხომ არ დაამძიმებს მდგომარეობას?

_ დაპირებული ქარხნები არის თემა, რომელსაც ამ ხელისუფლებას ყოველი ფეხის ნაბიჯზე შეახსენებენ. თუმცა, მგონია, რომ ხელისუფლება თავად კი არ უნდა ხსნიდეს ქარხნებს ან ხელოვნურად აჩენდეს სამუშაო ადგილებს, არამედ ისეთი ტიპის ბიზნესგარემოს უნდა ქმნიდეს ქვეყანაში, რომ ინვესტორებს თანხის დაბანდების სურვილი უჩნდებოდეთ, ბიზნესმენებს კი _ რეინვესტირების, მოსახლეობას არ ჰქონდეს მომავლის შიში და უფრო მეტს ხარჯავდეს და ა.შ. ეს არის ის ფაქტორები, რომელიც დასაქმებას შეუწყობს ხელს და არა ის, რომ ხელოვნურად, ბიუჯეტის ხარჯებით ხდებოდეს დასაქმების მოგონილი პროგრამების წახალისება, როგორც ეს ადრე არაერთხელ მომხდარა.

_ წელს დიდი მოცულობის საგარეო ვალია გადასახდელი, ესეც მძიმე ტვირთია. ხედავთ რესურსს, რომ ეს დაიძლიოს?

_ საგარეო ვალის გადახდა ქვეყანას ყოველ წელს უწევს, თუმცა უნდა გავითვალისწინოთ, რომ საგარეო ვალის მომსახურება არა წლიური, არამედ გრძელვადიანი საკითხია და ქვეყნის ბიუჯეტი ყოველთვის მზად არის ამ ტვირთის მისაღებად. არასოდეს არ არის სასიამოვნო ვალის გადახდა, მაგრამ უნდა გავითვალისწინოთ, რომ ვალის აღებით საშუალება მოგვეცა, უამრავი ინფრასტრუქტურული პროექტი განგვეხორციელებინა და ქვეყნის ეკონომიკური ზრდისთვის ხელი შეგვეწყო.

ლაშა ნოდია, გაზეთი „პრემიერი“

FaceBook