რა ხდება "ნაციონალურ მოძრაობაში"?

"პარტიული დემოკრატიის განვითარება დებატების გარეშე ნამდვილად ვერ წარიმართება"

"პრემიერს""ერთიანი ნაციონალური მოძრაობის"საზოგადოებასთან ურთიერთობის მდივანი ზურაბ ჭიაბერაშვილი ესაუბრა:

პარტიის მმართველი სტრუქტურა და მისი შემადგენლობა ადეკვატურია იმ პირობებში, როდესაც პარტიის გენერალური მდივანი ციხეშია, ხოლო პარტიის წევრების დიდი ნაწილი პასუხისგებაშია მიცემული.

_ "ნაციონალური მოძრაობის"პოლიტიკურმა საბჭომ მიმართულებების მდივნები აირჩია. თუ არ ჩავთვლით გიორგი ვაშაძეს, რომელსაც 2012 წლის 1-ელ ოქტომბრამდე პარტიაში არავითარი თანამდებობები არ ჰქონდა, სხვა დანარჩენი ნაცადი და გამობრძმედილი გვარდია ხართ? რას ნიშნავს ეს _ ახალი სისხლის მიუღებლობას თუ უნდობლობას? ანუ ჩვენ უნდა ვირწმუნოთ ძველი სახეებით განახლების?

_ "ერთიანი ნაციონალური მოძრაობის"პოლიტიკური საბჭოს მიერ 2013 წლის 1-ელ დეკემბერს მიმართულებების მდივნების არჩევნებმა კიდევ ერთხელ დაადასტურა პარტიის სიცოცხლისუნარიანობა. ერთი წლის განმავლობაში პარტიამ, ხელისუფლების მხრიდან პოლიტიკური დევნისა და შერჩევითი სამართლის პირობებშიც, შეძლო შიდაპარტიული დემოკრატიული და გამჭვირვალე პრაიმერისის გზით გამოევლინა საპრეზიდენტო კანდიდატი. ასეთივე დემოკრატიული და გამჭვირვალე გზით გაგრძელდა პარტიის ახალი სტრუქტურის ჩამოყალიბება და ახალი სტრუქტურით განსაზღვრულ თანამდებობებზე პირების არჩევა.

პარტიის ხელმძღვანელობის დღევანდელი შემადგენლობა, ვფიქრობ, კარგი ნაზავია იმ ადამიანების, რომლებიც პარტიის ჩამოყალიბების სათავეებთან იდგნენ და იმ ადამიანების, რომლებსაც ახალი ცოდნისა და გამოცდილების მოტანა შეუძლიათ პარტიაში. "ახალი სისხლის"მოდინება პარტიაში დღესაც გრძელდება და ესაა სწორედ "ერთიანი ნაციონალური მოძრაობის"სიძლიერე.

_ შინაარსობრივად რა უნდა შეცვალოს მდივნების არჩევამ? ანუ მხოლოდ ეს პოსტები გახდის პარტიას საზოგადოებისთვის უფრო ჰუმანურსა და ღიას?

_ პარტიის ახალი მმართველი სტრუქტურის მიზანია, უფრო ეფექტურად იმართოს პარტია. ბუნებრივია, საზოგადოებისადმი ღიაობა ჩვენი მოქმედების ერთ-ერთი მთავარი მოდუსია და ეს ასეც დარჩება იმის მიუხედავად, როგორი იქნება პარტიის მმართველი სტრუქტურა და როგორი იქნება მისი შემადგენლობა. ვფიქრობ, პარტიის დღევანდელი მმართველი სტრუქტურა და მისი დღევანდელი შემადგენლობა ადეკვატურია იმ პირობებში, როდესაც პარტიის გენერალური მდივანი ციხეშია, ხოლო პარტიის წევრების დიდი ნაწილი პასუხისგებაშია მიცემული.

_ თქვენ მეტად საპასუხისმგებლო მიმართულება გერგოთ _ საზოგადოებასთან ურთიერთობის მდივანი. რა იქნება ის მთავარი ფაქტორი, რომელმაც უნდა განსაზღვროს თუნდაც თქვენი წარმატებული საქმიანობა?

_ საჯარო სამსახურსა და პოლიტიკაში მე სამოქალაქო სექტორიდან მოვედი. ამიტომ, ვფიქრობ, სამოქალაქო საზოგადოებასთან პარტიის კონტაქტების გაძლიერება არ უნდა გამიჭირდეს. რაც შეეხება მედიასთან ურთიერთობას, ამ მიმართულებას ქალბატონი ირმა ნადირაშვილი უხელმძღვანელებს, ვფიქრობ, ძალიან ეფექტურად.

_ ვანო მერაბიშვილისთვის გენმდივნის პოსტის შენარჩუნება პოლიტიკური საჭიროებით არის გაპირობებული, თუ მას პარტიაში კვლავაც მაღალი რეიტინგი აქვს?

_ ვანო მერაბიშვილი "ერთიანი ნაციონალური მოძრაობის"ერთ-ერთი დამფუძნებელი და დღეს გენერალური მდივანია. ის პარტიისთვის მნიშვნელოვანი აქტივი იყო ყოველთვის და ასეა დღესაც.

_ პარტიის თავმჯდომარე მიხეილ სააკაშვილი დიდი ხანია, უცხოეთშია და არც ვიცით, როდის დაბრუნდება ქვეყანაში. ამ ვითარებაში რამდენად გამართულად ფუნქციონირებს პარტია და რეალურად რას ეყრდნობა ხმები შიდა დაძაბულობის შესახებ?

_ შიდა პარტიული დემოკრატიის განვითარება, თან იმ პირობებში, როცა პარტიაში უამრავი მცოდნე და გამოცდილი ადამიანია, დებატების გარეშე ნამდვილად ვერ წარიმართება. ეს არა მხოლოდ ფაქტია, არამედ სასურველიცაა, რომ სწორედ ასე ხდებოდეს პარტიის რეფორმირება. "ერთიანი ნაციონალური მოძრაობის"პოლიტიკური საბჭოს 2013 წლის 1-ლი დეკემბრის სხდომამ კიდევ ერთხელ დაადასტურა, რომ პარტიაში ჯანსაღი პროცესი მიმდინარეობს. ჩვენ ძალიან კარგად ვიცით, რომ ძალა ერთობაშია.

_ კონკრეტულად არის თუ არა მოსალოდნელი, რომ პარტია დატოვონ აქტიურმა პოლიტიკურმა სახეებმა და ამით მისი ფუნქციონირების პარალიზება მოახდინონ?

_ შეიძლება ეს ვინმეს ძალიან უნდოდეს, როგორც უნდოდათ, რომ "ერთიანი ნაციონალური მოძრაობა"საერთოდ გამქრალიყო ქართული პოლიტიკური სცენიდან. მაგრამ ამ ადამიანების გაწბილება მოგვიწევს. "ერთიანი ნაციონალური მოძრაობა"არის ყველაზე ძლიერი, სტრუქტურირებული პარტია საქართველოში. ამასთანავე, საქართველოში პირველად არის ოპოზიციაში პარტია, რომელსაც თვითონ აქვს ხელისუფლებაში ყოფნის გამოცდილება. ამიტომაცაა ჩვენი ოპონირება კონსტრუქციული.

_ ბატონმა კბილაშვილმა თავის დროზე განმარტა, რატომ არ უნდა ყოფილიყო მერაბიშვილი გარეთ. თუმცა თუ მოწმეების ჩვენებებსა და პროკურატურის დაბნეულობას გადავხედავთ, ცხადი ხდება, რომ მისი გარეთ ყოფნა ხელისუფლებისთვის უფრო მომგებიანი იქნებოდა. მინიმუმ ერთ მოწმეს მაინც მოძებნიდნენ, რომელიც იტყოდა, ჩემზე ზემოქმედებას ჰქონდა ადგილიო. ამ ვითარებაში როგორ ხედავთ "მერაბიშვილი-ჭიაბერაშვილის"საქმის ფინალს?

_ სასამართლო პროცესმა უკვე მიიღო საკმაოდ კომიკური სახე. წინა სხდომაზე, გასულ ხუთშაბათს, პროკურატურამ ერთკვირიანი "ტაიმ-აუტი"მოითხოვა, რადგან აშკარად გამოიკვეთა, რომ ამ ფორმით სასამართლოს გაგრძელება ბრალდების სრულ დისკრედიტაციას იწვევს. როგორც ჩანს, და მე ეს სხდომაზეც ვთქვი, პროკურატურა შეეცდება, სერიოზული ზეწოლა მოახდინოს მოწმეებზე.

ალექსი ნოზაძე, გაზეთი „პრემიერი“, 4-10 დეკემბერი

FaceBook