ჯონდი ბაღათურია: ან ღარიბაშვილი დაასწრებს და მთავრობის შემადგენლობას გამოცვლის, ან ესენი

“ქართული ოცნება” ცდილობს, კვლავ “ნაციონალებთან” ერთად მოექცეს ხელისუფლების სათავეში”

 “პრემიერს” “ქართული დასის” ლიდერი ჯონდი ბაღათურია ესაუბრა:

 _ ბატონო ჯონდი, ცოტა ხნის წინ “ქართული დასის” ოფისში ოპოზიციური პარტიების შეკრება გაიმართა. კონკრეტულად რა იყო თქვენი შეკრების მიზეზი და რა საკითხები განიხილეთ?

_ “ქართული დასის” ოფისში ოპოზიციური პარტიების შეკრება თვითმმართველობის კოდექსთან დაკავშირებით გაიმართა და ყველა ერთად შეთანხმებამდე მივედით, რომ აუცილებელია, შეიქმნას ინტერპარტიული ჯგუფი, რომელიც აღნიშნულ საკითხთან დაკავშირებით იმუშავებს.

_ ვინ შევა ინტერპარტიული ჯგუფის შემადგენლობაში?

_ ყველა მსურველი პარტია, ვისაც ამ საკითხებზე მუშაობა უნდა. თუმცა ხელისუფლება ცდილობს, ინტერფრაქციული ჯგუფი შემოგვთავაზოს. რა განსხვავებაა ინტერფრაქციულ და ინტერპარტიულ ჯგუფებს შორის? _ ფრაქციები საკანონმდებლო ორგანოში ჰყავთ “ნაციონალურ მოძრაობასა” და კოალიცია “ქართულ ოცნებას”. გამოდის, რომ “ქართული ოცნება” ცდილობს, კვლავ “ნაციონალებთან” ერთად მოექცეს სათავეში და ისეთი კანონი დაწერონ, რომელიც მხოლოდ მათ ინტერესებზე იქნება მორგებული. მიგვაჩნია, რომ ეს ორი პარტია არაკეთილსინდისიერად იყენებს ადმინისტრაციულ რესურსსა და, ზოგადად, კანონებს. კანონი უნდა იყოს ისეთი, რომ ყველა პოლიტიკურ პარტიას თანაბარი კონკურენციის საშუალება მიეცეს. ამიტომ უნდა ჩამოყალიბდეს ინტერპარტიული ჯგუფი, რომელიც საშუალებას მოგვცემს,  პოლიტიკურმა პარტიებმა მაღალი კონსენსუსის საფუძველზე მივიღოთ თვითმმართველობის კოდექსი და არა მხოლოდ “ნაციონალებსა” და “ქართულ ოცნებას” შორის მიღწეული შეთანხმებით.

_ რეგიონული განვითარებისა და ინფრასტრუქტურის მინისტრის დავით ნარმანიას განცხადებით, პოლიტიკური პარტიები, რომლებიც თვითმმართველობის კოდექსთან დაკავშირებით პრეტენზიას გამოთქვამენ, აქტიურად უნდა მონაწილეობდნენ მუშაობის პროცესში. რა არგუმენტი გაქვთ ნარმანიას პოზიციაზე?

_ ნარმანიამ ამ განცხადების შემდეგ განმარტება გააკეთა და აღნიშნა, რომ შეცდომა დაუშვა. ის გულისხმობდა ერთ-ერთ ჩვენს კოლეგას, რომელსაც საკრებულოში შეხვდა, სულ სხვა თემაზე უსაუბრიათ, ყავა დაულევიათ და ეს იყო მისი წარმოდგენით კონსულტაცია.

_ საუბრისას მინდა შევეხოთ, ადგილობრივი თვითმმართველობის არჩევნებს. როგორ ფიქრობთ, არსებული საარჩევნო კოდექსის საფუძველზე არჩევნების ჩატარების შემთხვევაში პროცესი გამჭვირვალე და თავისუფალი იქნება?

_ არსებული საარჩევნო კოდექსით არჩევნების ჩატარება ნიშნავს იმ დრაკონული საარჩევნო კოდექსის შენარჩუნებას, რომელიც “ნაციონალებმა” საკუთარ თავზე მოირგეს. ერთი მაგალითი შემიძლია, მოგიყვანოთ, საპრეზიდენტო არჩევნების დროს არსებული კანონის საფუძველზე “ქართულ ოცნებაზე” 21 000 კაცი მუშაობდა, “ნაციონალებზე” _ 28 000 აქტივისტი, დანარჩენ პარტიებზე კი _ არც ერთი. როგორ ფიქრობთ, ეს სიტუაცია ნორმალურია? _ ცხადია, არა. იმდენად დიდი უპირატესობით სარგებლობენ “ქართული ოცნება” და “ნაცმოძრაობა”, წარმოუდგენელია, მოუგო, თუ ზურგს უკან გიდგას 7 მილიარდის პატრონი, რომელიც ჩვენ არ გვყავს.

_ საარჩევნო კოდექსში არსებულ ხარვეზებზე მიუთითებთ. თუ ეს ყოველივე არ გამოსწორდა, მიუხედავად ყველაფრისა, “ქართული დასი” ადგილობრივი თვითმმართველობის არჩევნებში მონაწილეობას მიიღებს?

_ აუცილებელია რეფორმების გატარება და სიტუაციის შეცვლა. რაც შეეხება ადგილობრივი თვითმმართველობის არჩევნებს, მონაწილეობა უკვე გადაწყვეტილი გვაქვს და საარჩევნო პროცესში აქტიურად ჩართვასაც ვგეგმავთ. ვფიქრობ, მარტო არა _ შესაძლოა კოალიციურ ფორმატში, ვნახოთ, როგორ გამოვა. 

_ რომელ პოლიტიკურ პარტიებთან ერთად ვიხილავთ “ქართულ დასს”?

_ როცა კონკრეტულ შეთანხმებას მივაღწევთ, ამ ყველაფერს მაშინ გაგიგებთ.

_ როდის გეგმავთ აქტიური წინასაარჩევნო კამპანიის დაწყებას?

_ საარჩევნო კამპანია იწყება მაშინ, როცა არჩევნები ინიშნება, მაგრამ პოლიტიკური პარტიებისა და ლიდერების ცხოვრება სულ საარჩევნო კამპანიაა. არჩევნების დამთავრების მეორე დღიდანვე იწყება საარჩევნო კამპანია.

_ კოალიციური ფორმატის შესაქმნელად კონსულტაციები უკვე დაწყებულია?

_ დიახ, კონსულტაციები უკვე მიმდინარეობს.

_ შეგიძლიათ, დაასახელოთ რომელიმე კონკრეტული პარტია?

_ ამ ეტაპზე არ შემიძლია რომელიმე პოლიტიკური პარტიის დასახელება, რადგან საბოლოო შეთანხმება მიღებული არ არის. ამიტომ მანამდე ჩემი მხრიდან ამ საკითხზე საუბარი არასერიოზულია.

_ ხშირად აკრიტიკებდით ბიძინა ივანიშვილსა და მისი გუნდს. რას ფიქრობთ ყოფილი პრემიერის პოლიტიკიდან წასვლის შემდეგ ქვეყანაში შექმნილ გარემოზე? გაამართლა “ქართულმა ოცნებამ” ხალხის მოლოდინი?

_ დავიწყებ იმით, რომ ჩვენ ხშირად არ ვაკრიტიკებდით ბიძინა ივანიშვილის გუნდს, ვაკრიტიკებდით იმდენჯერ, რამდენჯერაც საჭირო იყო. ამიტომ გავაკრიტიკებთ იმდენჯერ, რამდენჯერაც მდგომარეობა მოითხოვს. ცხადია, ივანიშვილის პოლიტიკაში მოსვლა პროგრესული ნაბიჯი იყო და ამან შედეგი მოიტანა. თუმცა დაპირებული ოცნებები რომ არ ასრულებულა, თქვენც კარგად იცით და, შესაბამისად, “ქართულმა ოცნებამ” ხალხის მოლოდინი ვერ გაამართლა. იგივე ტარიფების განახევრება შესაძლებელი იყო და არ გაკეთდა, მართლმსაჯულების ხარვეზების დამდგენი კომისიის შექმნა აუცილებელი იყო და მათი უპრინციპობის გამო ეს პროექტიც ჩააგდეს, სოციალურ ნაწილში შესამჩნევია ჯანდაცვის მინისტრის მოქმედება, რომელსაც პოზიტიურად ვაფასებ, თუმცა აღნიშნული პროექტები შეიძლებოდა უფრო ეფექტური ყოფილიყო, თუ გუნდის ერთიანობა იქნებოდა. “ქართულმა დასმა” საპენსიო რეფორმაზე მუშაობა დაასრულა, რომელიც არის ყველაზე უნიკალური, სამართლიანი პროექტი. პროექტზე დარგის სპეციალისტებმა იმუშავეს, თუმცა იდეა და ძირითადი ჩარჩო ჩემი ინიციატივა იყო. იმედი მაქვს, აღნიშნულ საკითხზე ხელისუფლებასთან ვითანამშრომლებთ.

_ საპრეზიდენტო არჩევნებამდე კეთდებოდა განცხადებები, რომ ივანიშვილის კოალიციიდან წასვლის შემდეგ კოალიცია უახლოეს პერიოდში დაიშლებოდა, ნაწილი ამ პოზიციას არ იზიარებდა. ფაქტია, რომ ყოფილი პრემიერის პოლიტიკიდან წასვლის შემდეგ კოალიციაში გადაადგილებები დაიწყო, ფრაქცია “ქართული ოცნებისა” და ინტერფრაქციული ჯგუფის თავმჯდომარის თანამდებობა დატოვა ზაქარია ქუცნაშვილმა, საუბარია, რომ დავით საგანელიძეც უახლოეს პერიოდში დატოვებს პოლიტიკას. თქვენი აზრით, რა ხდება? კოალიციის შიგნით რღვევის პროცესი  დაიწყო?

_ კოალიციაში რაც ხდება, ეს მათი შიდა საკითხია და ჩემი მხრიდან  კორექტული არ იქნება, მათ შიდაპოლიტიკურ საქმიანობაში ჩარევა.  რაც შეეხება ზაქარია ქუცნაშვილს, ის ნიჭიერი კაცია. რახან ის ფრაქციის თავმჯდომარე აღარ არის, არ ნიშნავს, რომ მომავალში მაღალ თანამდებობებს არ დაიკავებს. ამიტომ მე მას წარმატებას ვუსურვებ. რაც შეეხება კოალიციის ერთიანობას, აქ იმდენად განსხვავებული პოზიციები და დღის წესრიგია, რომ კოალიცია “ქართული ოცნების” გუნდი უკვე დიდი ხანია ერთიანი არ არის. აქამდე კოალიციას ივანიშვილის მიზიდულობა კრავდა. სანამ ეს მიზიდულობა იარსებებს ივანიშვილის ან ღარიბაშვილის მხრიდან, მანამდე კოალიციის წევრები ღიად განსხვავებულ პოზიციებს არ დააფიქსირებენ. როგორც კი ღარიბაშვილი მიზიდულობის ძალას დაკარგავს, მაშინვე დაიწყება წარუმატებლობისგან გამიჯვნა. შესაბამისად, ამ სიტუაციაში ან ღარიბაშვილი დაასწრებს და მთავრობის შემადგენლობას გამოცვლის, ან, თუ ესენი დაასწრებენ, პარლამენტს შეუძლია მთავრობის დათხოვნა. ყოველ შემთხვევაში მოცემულობა ისეთია, რომ უფრო მოქნილი და ოპერატიული  ღარიბაშვილს შეუძლია, იყოს.

_ პროცესების ამ ჭრილში განვითარება როდისაა შესაძლებელია?

_ მე მკითხავი ხომ არ ვარ, როგორ გითხრათ.

_ ყოველ შემთხვევაში პოლიტიკოსი ხართ და არსებული სიტუაციის შეფასების უნარი გაქვთ?

_ ეს ყველაფერი დამოკიდებულია იმაზე, როგორ წავა მთავრობის საქმე, როგორ იმუშავებს. მე ვგულშემატკივრობ, რომ წარმატებული იყოს არსებული მთავრობა, რადგან ის ხალხსა და ქვეყანას ძალიან სჭირდება. არც ღარიბაშვილის მიმართ ვარ ცუდად განწყობილი, ახალგაზრდა კაცია და რატომ არ უნდა მინდოდეს, რომ წარმატებული პრემიერი იყოს. წარმატების მიღწევას კი სჭირდება კორპორაციული მოქმედება, სხვისი ცოდნის, გამოცდილების გაზიარება. თუ ამ ყველაფრის განხორციელებას ღარიბაშვილი მოინდომებს, გამოდის, რომ ის უფრო მასშტაბური ლიდერია, ვიდრე ეს ვინმეს წარმოუდგენია. თუ ღარიბაშვილი სხვისი გამოცდილების გაზიარებას არ ისურვებს და ჩაიკეტება, მაშინ მთლიანად მასზე გადავა წარმატებისა და წარუმატებლობის პასუხისმგებლობა, რომელიც გაზაფხულზე დადგება. დარწმუნებული არ ვარ, რომ ხელისუფლებას გაზაფხულზე შესამჩნევი წარმატებები ექნება, შესაბამისად, უკმაყოფილებაც გაიზრდება. “ქართული ოცნების” ეკონომიკური გუნდის მხრიდან არ მომისმენია არც ერთი მასშტაბური პროექტი, რომელიც მოკლე ვადაში ახალ ინვესტიციებსა და სამუშაო ადგილებს გააჩენს. თუ ასეთი პროექტები არსებობს და არ გვეუბნებიან, კიდევ არა უშავს, მაგრამ ვფიქრობ, რომ ამგვარი პროექტები არ გააჩნიათ. ამიტომ დიდად ოპტიმისტურად განწყობილი არ ვარ, რომ მომდევნო ექვსი თვის განმავლობაში 650 მილიონის ამოღება მოხერხდეს, თუმცა სწორი მოქმედების შემთხვევაში ეს შესაძლებელია. ყოველ შემთხვევაში ჩვენ მზად ვართ, ხელისუფლებას დავეხმაროთ რეფორმების განხორციელებაში, მაგრამ ეს მხოლოდ ჩვენზე არაა დამოკიდებული, მათაც უნდა უნდოდეთ, რომ იყვნენ წარმატებულნი და არ უნდა შეეშინდეთ გახსნილობისა და თანამშრომლობის. კარჩაკეტილობას ნებისმიერი ხელისუფლება ყოველთვის წარუმატებლობამდე მიჰყავს.

_ როგორ ფიქრობთ, ირაკლი ღარიბაშვილის ხელისუფლება კარჩაკეტილია?

_ ძირითად საკითხებთან მიმართებაში კარჩაკეტილობა იგრძნობა. მაგალითად, ამდენი კაკუნი კარზე, რომ შეიქმნას ინტერპარტიული ჯგუფი, არ უნდა გვჭირდებოდეს. ამ საკითხზე ამდენი დროის გაწელვა კარჩაკეტილობის მაჩვენებელია. იგივე პრეზიდენტის ინაუგურაციაზე ოპოზიციური პარტიების არდაპატიჟება, კარჩაკეტილობა და შეცდომა არ არის? მე არანაირად არ მჭირდებოდა ინაუგურაციაზე სიცივეში ჯდომა, ეს სჭირდებოდა სახელმწიფოს და დარწმუნებული ვიყავი, რომ მიმიწვევდნენ. ოპოზიციური პარტიების ინაუგურაციაზე მისვლა ნიშნავდა, რომ ვაღიარებდით გიორგი მარგველაშვილს, როგორც ქვეყნის პრეზიდენტსა და როგორც ლეგიტიმურ არჩევნებში გამარჯვებულ პირს.

მირანდა ნაბახტეველი, გაზეთი „პრემიერი“, 4-10 დეკემბერი

FaceBook