ვალერი ხაბურძანია: “შესაძლოა, რუსეთმა თავის კაპიტალურ მონაწილეობასაც გადახედოს საქართველოში”

“რუსეთიდან ქართველების დეპორტაციას არ გამოვრიცხავ...”

 “პრემიერს” ესაუბრება უშიშროების ყოფილი მინისტრი ვალერი ხაბურძანია:

 _ ბ-ნო, ვალერი, თქვენ ერთ-ერთი ხართ იმ პოლიტიკოსთაგან, ვინც საქართველოს ევროინტეგრაციას მხარს არ უჭერთ. იქნებ გვითხრათ, რა ძირითადი არგუმენტები გაქვთ?

_ მთავარი არგუმენტი არის ის, რომ ჩვენი სრული ევროინტეგრაცია დასავლური პოლიტიკური ბლეფია. ჩვენ გაგვყინავენ პარაფირება-ხელმოწერასა და ხელმოწერა-წევრობას შორის რამდენიმე ათწლეული, მერე რა იქნება, ღმერთმა უწყის, გაიტანს თუ არა ევროკავშირი ახლანდელი სახით თავს. არგუმენტია აღმოსავლეთ ევროპისა და ბალტიისპირეთის არასახარბიელო მდგომარეობა, არგუმენტია საბერძნეთისა და ესპანეთის, თვით იტალიის გაჭირვებაც კი, დისბალანსური ეკონომიკური სივრცე სამომხმარებლო ბაზრად გვაქცევს. ერთადერთი, რაც საქართველოს ევრობაზრისთვის აქვს, ეს სამუშაო ძალაა, ისიც დაბალი ხარისხის კვალიფიკაციის თვალსაზრისით, ჩვენი ადგილი ევროსერვისის დაბალი საფეხური, მარტივად რომ ვთქვათ, მომვლელობა და დასუფთავების სფეროა. იქნება გამონაკლისები, მაგრამ ეს გამონაკლისია. ძალიან მეშინია ჩვენი მევენახეობის გამო, ევრობაზარი მას კარგს არაფერს უქადის, მეციტრუსეობა, მეჩაიეობაზე ლაპარაკიც ზედმეტია, ბორჯომსაც კი გაუჭირდება, უკვე უჭირს და ევროპაში ფეხი ვერ მოიკიდა, გავაგრძელებდი, მაგრამ, მგონი, საკმარისია.

_ თქვენი აზრით, როგორი იქნება საქართველოს გზა პარაფირებიდან ხელმოწერამდე?

_ გზა პარაფირებიდან ხელმოწერამდე რთული იქნება და არამხოლოდ რუსული გამოწვევების გამო, ევროპული მოთხოვნები და ვალდებულებები იმდენად რთული იქნება, აუცილებლად გამოიწვევს მოსახლეობის უკმაყოფილებას, თუ არ იქნა ევროპული დოტაცია იმპლემენტაციისთვის. ასეთი ფინანსური დახმარება კი ან შეზღუდული იქნება, ან საერთოდ არ იქნება, რასაც ევროკავშირის დღევანდელი ფინანსური მდგომარეობა მაფიქრებინებს.

_ ფიქრობთ, რომ სირთულე მხოლოდ ეს იქნება და არა რუსეთის ზეწოლა? ამ გნებავთ, აგრესია, რომელიც ისევ ემბარგოთი გამოიხატება და ა.შ.?

_ ემბარგო იქნება ევროპული. რას ნიშნავს ეს? მაგალითად, ჩვენი ხილისთვის გაიხსნა რუსული ბაზარი, მაგრამ არც ერთმა დიდმა ქსელურმა სუპერმარკეტმა ის არ მიიღო, მიზეზი _ არ აკმაყოფილებს სტანდარტებს. თუ ევროპულ ბარიერებს მთლიანად გაავრცელებენ სასოფლო-სამეურნეო პროდუქციაზე, ის რუსეთშიც კი ვერ შევა, ისევე როგორც ევროპაში. არ გვაქვს ჩვენ ემბარგო ევროპაში, პირიქით, რუსეთზე მეტად გახსნილია ფორმალურად ეს ბაზარი ჩვენთვის, მაგრამ გინახავთ ქართული ვაშლი ან ატამი ბრიუსელში? ვერც ნახავთ! სტანდარტები ძალიან მაღალია. რაც შეეხება აგრესიას, არ ველოდები. ღვთის მადლით, ახლანდელი ხელისუფლება ნაკლებად მილიტარისტულია და ასეთს გამოვრიცხავ.

_ კითხვაზე არ მპასუხობთ, რუსეთისგან ყოველგვარ ზეწოლას გამორიცხავთ?

_ როგორ არ გპასუხობთ, თუ ეკონომიკურ ზეწოლაზეა საუბარი, იქნება ევროპულ ფარგლებში, შესაძლოა, ისიც არა, ძალისმიერს კი გამოვრიცხავ და აბა, სექსუალურად ვერ დაგვაწვებიან, უბრალოდ, გავიჭეჭყებით.

_ ემბარგო ერთ-ერთი მაგალითია, უკრაინამაც აღიარა, რომ რუსეთი ზეწოლას ახორციელებს, ჩვენ კი მავთულხლართები გვაქვს, რომლის გაბმასაც რუსეთი დღესაც აგრძელებს. ომამდე კი გვახსოვს დეპორტაცია და სხვა “სიკეთეები”...

_ მავთულხლართები 08.08.08-ს შედეგია და ეგ არაა ზეწოლის ფორმა, ახდენენ იმის დემარკაციას, რაც წაგვერთვა. რუსეთიდან ქართველების დეპორტაციას არ გამოვრიცხავ. ვინც უკანონოდ იმყოფება, იმათ მიმართ შეიძლება გამკაცრდეს. ამას წინათ აზერბაიჯანელებს დაერივნენ, მანამდე ტაჯიკებს. ისე, არ დაგვავიწყდეს და ევროკავშირმა მოგვთხოვა არალეგალების გაყვანა ევროპიდან. სტატისტიკისთვის, იმ “დეპორტაციის” დროს 4 ათასამდე კაცის დეპორტი მოხდა და სულ 5 ათასამდეა დეპორტირებული, მაშინ როცა თურქეთიდან ეს რიცხვი რამდენადმე მეტია.

_ მოდით, დავაკონკრეტოთ, არ გამორიცხავთ დეპორტაციას, ემბარგოს... კიდევ?

_ ასევე, შესაძლოა, რუსეთმა თავის კაპიტალურ მონაწილეობასაც გადახედოს საქართველოში და მოიშოროს ნაკლებად ეფექტური აქტივები, რაც საქართველოში აქვს, სხვანაირად ისინი მძევლის მდგომარეობაში არიან

_ ნაკლებადეფექტურ აქტივებში რას გულისხმობთ?

_ მე როგორც ვიცი, საქართველოში არის რუსული კაპიტალის საწარმოები, რომელთა ეფექტურობა ნულის ტოლია, რისი მიზეზიც ქართულ-რუსული კორუფციაა და ერთობლივ “ატკატებს” გულისხმობს. საწარმოებს არ დავასახელებ გარკვეული ეკონომიკური და პოლიტიკური მიზეზების გამო, არც მაგათთან სასამართლოებში დავის დრო და სურვილი მაქვს.

_ უკრაინის სცენარს გამორიცხავთ საქართველოში?

_ უკრაინის სცენარის საქართველოში გამეორების  არავითარი საფუძველი არ არის. ხელისუფლებიან-ოპოზიციიანად ყველა ევროინტეგრაციის მომხრეა. ქალბატონი სალომე ზურაბიშვილი და მამუკა არეშიძე დარჩნენ სკეპტიკურებიდან, მე არამომხრეებიდან. როგორ უნდა განვითარდეს უკრაინული სცენარი, აქ მოწინააღმდეგეები არ ჩანან.

_ შესაძლოა, ჯერ ადრეა, უკრაინამაც ბოლოს გადაიფიქრა, უფრო სწორად იანუკოვიჩმა.

_ ჯერ ერთი, პარაფირება მოხდა, მეორეც, ხელმოწერამდე ერთი წელია მინიმუმ და ამ ერთ წელიწადში ხელისუფლება, რომელიც პროპროდასავლურია, ანუ ორჯერ დასავლური, მაგას არ იზამს, თუნდაც უკვე უკრაინის მაგალითის გამო. აი, ასოცირების ხელშეკრულების მერე ზესტაფონელი გლეხის ყველის ჭამა რომ აგვეკრძალება, შეიძლება ხალხი გონს მოეგოს და მერე რა სცენარები იქნება, ძნელი საპროგნოზოა.

ლაშა ნოდია, გაზეთი „პრემიერი“, 4-11 დეკემბერი

FaceBook