კახა კოჟორიძე: “მართებული იქნება, თუ ნარმანია უფლებამოსილებას შეიჩერებს, ან თანამდებობას დატოვებს”

კოალიცია “ქართული ოცნების” მხრიდან თბილისის მერობის კანდიდატად მოქმედი რეგიონული განვითარებისა და ინფრასტრუქტურის მინისტრის დავით ნარმანიას დასახელებამ საზოგადოებაში, მათ შორის კოალიციის შიგნითაც აზრთასხვადასხვაობა გამოიწვია. ხალხის ნაწილი “ქართულ ოცნებას” არჩევანს უწუნებს, ზოგიც აცხადებს, რომ მოქმედი მინისტრის წარდგინებით საარჩევნო კოდექსი დაირღვა და შესაძლოა, სახელმწიფო ხარჯები ნარმანიამ წინასაარჩევნო მიზნებისთვის აქტიურად გამოიყენოს. საკითხის ირგვლივ “პრემიერი” “საია”-ს თავმჯდომარეს კახა კოჟორიძეს ესაუბრა.

_ ბატონო კახა, კოალიცია “ქართულმა ოცნებამ” დაარღვია საარჩევნო კოდექსი, როცა მოქმედი მინისტრი მერობის კანდიდატად დაასახელა?

_ აღნიშნული ქმედება საარჩევნო კოდექსს არ ეწინააღმდეგება. კოდექსში ჩვენ ვერ ვნახეთ კონკრეტული ნორმა, რომელიც წინააღმდეგობაში მოდის ამ გადაწყვეტილებასთან. თუმცა ვისურვებდით, რომ მოქმედი მინისტრი დავით ნარმანია ამ ეტაპზე მერობის კანდიდატად არ დასახელებულიყო. გამომდინარე იქიდან, რომ ნარმანია მინისტრის უფლებამოსილებას ასრულებს. არასაპარლამენტო ოპოზიციას ვეთანხმებით, რომ მოქმედი მინისტრის მერის კანდიდატად დასახელება შესაძლებელია, ადმინისტრაციული რესურსის გამოყენების საშუალება იყოს და მოსახლეობამ მინისტრის საქმიანობა აღიქვას, როგორც მერობის კანდიდატის მხრიდან გაკეთებული საქმე. შესაბამისად, შესაძლოა, მერობის სხვა კანდიდატები ამ ფონზე არათანაბარ მდგომარეობაში აღმოჩნდნენ. როცა გიორგი მარგველაშვილი საპრეზიდენტო კანდიდატად დასახელდა, მაშინ ის განათლების მინისტრი იყო. მიუხედავად იმისა, რომ იმ მომენტში კანონმდებლობით არ ეკრძალებოდა მინისტრის უფლებამოსილების შესრულება, მან გადადგა სწორი ნაბიჯი და დატოვა მინისტრის თანამდებობა. მარგველაშვილის ეს გადაწყვეტილება “საია”-ს საარჩევნო ანგარიშშიც მოხვდა, სადაც მისი ქმედება პოზიტიურადაა შეფასებული.

_ დავით ნარმანიას მხრიდანაც უფრო მართებული იქნება, რომ დაკავებული თანამდებობა დატოვოს?

_ მართებული იქნება, თუ ნარმანია უფლებამოსილებას შეიჩერებს, ან თანამდებობას დატოვებს.

მირანდა ნაბახტეველი, გაზეთი „პრემიერი“, 27 ნოემბერი - 3 დეკმებერი

FaceBook