თამარ ჩხეიძე: “რუსეთი საქართველოს ხელისუფლების ხელით არჩევს მოქმედებას”

“საქართველო უნდა განიხილავდეს რუსეთის ბაზარს, როგორც მხოლოდ ერთ-ერთს. რუსეთის ბაზარზე ორიენტაცია დამღუპველია”

 “მოსალოდნელია, ხელისუფლებამ თავისი სიტყვით, ისიც მხოლოდ ლოზუნგის დონეზე პროდასავლური, და საქმით, ხშირად განცხადებების დონეზეც, რუსეთისთვის აშკარად მაამებლური და სასარგებლო პოლიტიკა გააგრძელოს”

 “პრემიერი” ილია ჭავჭავაძის საზოგადოების თავმჯდომარეს თამარ ჩხეიძეს ესაუბრა:

_ უკრაინის ევროპული არჩევანი რუსეთმა, ფაქტობრივად, დაამუხრუჭა. ექსპერტები აცხადებენ, რომ კრემლი მომავალ წელს ჩვენთვის მოიცლის. რა განსაკუთრებულ პრობლემებს უნდა ველოდოთ მოსკოვისგან?

_ უკრაინული საზოგადოების რეაქცია ძალიან იმედისმომცემია. საერთოდ, ჯერ ამ საკითხზე ბრძოლა წაგებული არ არის. თუ რუსეთმა მაინც შეძლო და თავისი გაიტანა, რა თქმა უნდა, ეს საქართველოზეც აისახება. ცხადია, ეს პარაფირებას ხელს არ შეუშლის, რადგან რუსეთი, ამ ეტაპზე, საშუალებას მისცემს საქართველოს ხელისუფლებას, ასეთი სახით მოახდინოს თავისი “ევროპული არჩევანის” დემონსტრირება. რაც შეეხება შემდგომ პერიოდს, ვფიქრობ, რუსეთი ტრადიციული ქმედებების გარდა, საოკუპაციო ზონის გაფართოება, რაც არჩევნების შემდეგ უკვე განაახლა, ვაჭრობის შეზღუდვა, სავიზო რეჟიმი და სხვ., ძირითადად მაინც საქართველოს ხელისუფლების ხელით არჩევს მოქმედებას. მაგალითად, საქართველოში არსებული პოლიტიკური დევნის დემონსტრირებით, რაც ხელს შეუშლის თავად ევროპას, მიიღოს შესაბამისი გადაწყვეტილება; თუმცა არც უფრო მასშტაბური  პროვოკაციებია გამორიცხული.

_ არის თუ არა მოსალოდნელი, რომ დეკლარირებული დასავლური კურსის მიუხედავად, სოჭის ოლიმპიადის მოახლოებასთან ერთად, საქართველოს ხელისუფლებამ თავისი ვექტორი მკვეთრად შეცვალოს?

_ მკვეთრად, უფრო სწორად სრულიად ღიად შეცვლისთვის არა მგონია, სიტუაცია მზად იყოს, თუ რაიმე ძალიან დრამატულ მოვლენებს არ ექნა ადგილი. უფრო მოსალოდნელია ხელისუფლებამ თავისი სიტყვით, ისიც მხოლოდ ლოზუნგის დონეზე პროდასავლური, და საქმით, ხშირად განცხადებების დონეზეც, რუსეთისთვის აშკარად მაამებლური და სასარგებლო პოლიტიკა გააგრძელოს. თავად სოჭის ოლიმპიადაში მონაწილეობა, როგორც სპორტსმენების, ასევე ხელისუფლების დონეზე ოკუპაციასთან შეგუების პოლიტიკის ნაწილია.

_ რუსეთი დაჟინებით ითხოვს, რომ საქართველომ გააკეთოს განცხადება ძალის გამოუყენებლობის შესახებ. რა პირობებში შეძლებს ის საქართველოს ხელისუფლების დაყოლიებას?

_ ძალის გამოუყენებლობის შესახებ  საქართველოს მხრიდან არაერთხელ გაკეთდა ოფიციალური განცხადება. ეს მოხდა სააკაშვილის მიერაც. ქართული მხარე ეხვეწება რუსეთს ძალის გამოუყენებლობაზე განცხადების გაკეთებას და რუსეთი ამაზე არ თანხმდება. სავარაუდოდ, საქართველოს მხრიდან რუსეთისთვის რაიმე არსებითი და ჩვენთვის დაუშვებელი დათმობის გარეშე, რუსეთი ამაზე არ დასთანხმდება. თუ საქართველო რამეს ისეთს დათმობს, რაც არსებითად მოემსახურება ამ ტერიტორიის ოკუპაციის ლეგალიზაციას, მაშინ რუსეთი შესაძლოა, ამაზე წავიდეს.

_ იმ ვითარებაში, როდესაც ვიცით, მომავალი წლის შესაძლო პრობლემების თაობაზე, რამდენად სწორი და პრაგმატულია საქართველოს ხელისუფლების ნაბიჯები რუსეთის ბაზარზე დასაბრუნებლად? მით უფრო იმ ვითარებაში, რომ რუსეთს ერთი ხელის მოსმით შეუძლია, ბაზარი დაგვიკეტოს და რუსეთზე გადაწყობილ კომპანიებს მნიშვნელოვანი ზარალი მიაყენოს?

_ რუსეთის ბაზრისკენ ასეთი დაჟინებული სწრაფვა და ამის  პანაცეად დასახვა, რასაკვირველია, საქართველოს ინტერესებიდან გამომდინარე, სრულიად არასწორი პოლიტიკაა. მე არა ვარ, რა თქმა უნდა, რუსეთის ბაზრის საერთოდ უარყოფის მომხრე, მაგრამ ამას უნდა ჰქონდეს ორმხრივი, ჯანსაღი, მშვიდი ხასიათი და არ უნდა იქნეს დასახული რუსეთის წყალობად, რისთვისაც ბევრი რამის დათმობა ღირს.

_ მაშინ როგორ უნდა ვიურთიერთოთ რუსეთთან ამ მიმართულებით?

_ საქართველომ უნდა გააგებინოს რუსეთს, რომ, თუ ეს პროცესი იქნება, კარგია. ის ამას განიხილავს სასურველ, ორმხრივი ინტერესის საგნად და არა მისთვის სასიცოცხლო აუცილებლობად.

_ რამდენად სასარგებლოა რუსეთის ბაზარზე მიბმა?

_ საქართველო უნდა განიხილავდეს რუსეთის ბაზარს, როგორც მხოლოდ ერთ-ერთს; რუსეთის ბაზარზე ორიენტაცია დამღუპველია. ჯერ ერთი იმიტომ, რომ, მართლაც, რუსეთი ნებისმიერ დროს გამოიყენებს მას პოლიტიკური ზეწოლისთვის და მეორეც, სუფთა ეკონომიკური თვალსაზრისითაც, ეს ხელს შეუშლის ჩვენს ეკონომიკას ნორმალურ, ევროპულ სტანდარტებზე ორიენტირებულ განვითარებაში.

_ რა გამოსავალი არსებობს იმისთვის რომ საქართველოშიც არ განმეორდეს უკრაინის სცენარი. ანუ ხვალ ხელისუფლებამ არ გვითხრას, რომ ვერ ვუძლებთ ზეწოლას?

_ გამოსავალი არის ორივე _ საქართველოსა და ევროპის მხრივ სწრაფი და გაბედული მოქმედებები; ასე რუსეთს ნაკლებად მიეცემა დროცა და ილუზიებიც მოწინააღმდეგეზე ზეწოლის განსახორციელებლად.

_ და რეალურად არსებული პოლიტიკური პროცესები იძლევა ამის იმედად ყოფნის საშუალებას?

_ სამწუხაროდ, საქართველოს ხელისუფლება უფრო რუსეთის ინტერესებზე ფიქრობს, ვიდრე საკუთარი ქვეყნის, ამიტომ ეს მისგან ნაკლებად არის მოსალოდნელი.

_ რა არის ის შეცდომა რომელიც კატეგორიულად არ უნდა დავუშვათ, თუ მართლა გვსურს ევროინტეგრაცია?

_ საჭიროა ევროპისთვის ისეთი  დაბრკოლებების მოხსნა (და არა გაძლიერება), როგორიც პოლიტიკურად მოტივირებული დევნაა. რამდენად დააჩქარებს ევროპა საქართველოსთან ხელშეკრულების გაფორმებას და არ დაექვემდებარება რუსეთის დაწოლას, ამას მომავალი გვიჩვენებს.

გეგა სილაგავა, გაზეთი „პრემიერი“, 27 ნოემბერი - 3 დეკემბერი

FaceBook