მარია კალასი და არისტოტელე ონასისი

თავიდან მსოფლიო, უბრალოდ,  სკანდალმა მოიცვა. ერთ-ერთი მათგანი _ დივებს შორის დივა, ოპერის ღვთაება, ასწლეულის ხმა, მარია კალასი, მეორე კი _ პლანეტის უმდიდრესი ადამიანი არისტოტელე ონასისი, მხოლოდ და მხოლოდ ქალი და მამაკაცი იყვნენ. ერთ-ერთი ზაფხულის კრუიზის მშვენიერ საღამოს ისინი ონასისის ცოლმა თინამ იახტის მდიდრულ სალონში აღმოაჩინა.

მარია კალასი ნიუ-იორკში დაიბადა, სადაც ბერძენი ბიზნესმენის გეორგეს კალოგეროპულოსის ოჯახი ათენიდან ბედნიერების საძიებლად გადავიდა. ვაჟის დაღუპვის შემდეგ დედას ძალიან უნდოდა, ბიჭი გაეჩინა და ახალდაბადებულ ქალიშვილს ზედ არც კი უყურებდა. მარია მიტოვებული ბავშვივით იზრდებოდა და მხოლოდ ვუნდერკინდის უეცარმა დიდებამ, ზარივით ხმითა და აბსოლუტური სმენით, შეარიგა დედასთან.

მოგვიანებით ბავშვობის გახსენებისას კალასი ნაღვლიანად ამბობდა: “ვგრძნობდი, რომ სხვებს ვუყვარვარ, ოღონდ როდესაც ვმღერი”. მსუქანი, შეუხედავი და გულჩათხრობილი გოგონა ყოველთვის გრძნობდა, რომ ჩვეულებრივ ბავშვებთან შედარებით არასრულფასოვანი იყო. 16 წლისა თავისი მშვენიერი ხმით სერიოზულ ჰონორარს იღებდა და ოჯახსაც არჩენდა.

მისი ურთიერთობა დედასთან უცნაურად დასრულდა. მექსიკური ტურნეს შემდეგ მარიამ დედას საჩუქრად ბეწვის ქურქი უყიდა და მას შემდეგ ის აღარასდროს უნახავს.

კალასის კარიერა თავბრუდამხვევი სისწრაფით იზრდებოდა. თავის სახლად მან მზიანი იტალია აირჩია _ იქ მას აღმერთებდნენ. მილიონერი ჯოვანი ბატისტა მენეგინი მისით აღფრთოვანებული იყო. ის მარიაზე  27 წლით უფროსი გახლდათ. კალასი ჯოვანის ცოლი გახდა, ის კი დიდი ხნის განმავლობაში მისი მენეჯერი, კომპანიონი და მეურვე იყო. მარიას ქმარი ისე არ უყვარდა, როგორც უდიდეს პასუხისმგებლობას განიცდიდა მის მიმართ.

50-იანი წლების დასაწყისში მეხიკოში სეზონის გახსნისას კალასმა თავი მიტოვებულად და ავადმყოფად იგრძნო. ამ დროს ის ბევრს ჭამდა, მალე მისი საქციელი ყველანაირ გონივრულ ზღვარს გადავიდა. “210 ფუტი _ ეს უკვე მეტისმეტია!”. კალასი დაცინვის ობიექტი გახდა. მარიამ სასწრაფოდ მკაცრი დიეტა დაიწყო და 18 თვის განმავლობაში 40 კილოგრამი დაიკლო. თუმცა მისი ქმარი ამტკიცებდა, რომ მან თავი სპეციალურად ჭიებით დაიავადა, რათა გახდომის პროცესი დაეჩქარებინა. მარია მას შემდეგ აღარასდროს გასუქებულა.

მარია ისე ხშირად იმეორებდა თავისი გმირების ქმედებებს, რომ არცთუ იშვიათად ურევდა რეალობასა და გამოგონილს ერთმანეთში. მასში ყოველთვის იყო კონფლიქტი სიწმინდეებსა და ვნებიანი სიყვარულის სურვილს შორის. “როდესაც შევხვდი არისტოს, რომელიც სავსე იყო სიცოცხლით, სულ სხვა ქალი გავხდი”, _ აღიარა მარიამ. ბოლოს და ბოლოს, მან ხომ ნამდვილი, არასცენური ლტოლვა განიცადა. ამასთანავე, ონასისს მილიარდები ჰქონდა, ბატისტას კი _ მილიონები. ონასისი ფულს ქარაფშუტულად ხარჯავდა, ბატისტა კი ძუნწობდა. ვის შეეძლო, მოეწყო მდიდრული საღამო მის პატივსაცემად ლონდონში ცნობილ დორჩესტერის ოტელში და მთელი სასტუმრო ვარდებით გაევსო? ბატისტას? არასოდეს!

კალასმა ქმარი მიატოვა და პარიზში ონასისთან ახლოს გადავიდა.

ის სიმღერასაც წყვეტს და თავს ერთადერთ ჭეშმარიტ სიყვარულს უძღვნის. არისტოტელე ცოლს შორდება და მარიას ჰპირდება, რომ ცოლად შეირთავს. ამ დროს მარია 36 წლისაა. მაგრამ დრო გადის და არისტო მას ცოლობას არა და არ სთხოვს. ეს არაამქვეყნიური ვნება ნელ-ნელა მრავალწლიან ჩვეულებრივ რომანად გადაიქცა. 

კიდევ რა იყო დამამცირებელი ამ ათწლიან ისტორიაში? ონასისის მიერ ჟაკლინ კენედისადმი საჩუქრად მირთმეული კარტიეს სამაჯური თუ ნამდვილად დრამატული სიუჟეტი 43 წლის ორსული კალასის შესახებ? ონასისმა მას ბავშვის გაჩენის უფლება არ მისცა. “დაფიქრდით, როგორ შეივსებოდა ჩემი ცხოვრება, სიმტკიცე რომ გამომეჩინა და ბავშვი შემენარჩუნებინა”, _ ამბობდა შემდეგ მარია.

პარიზში მარია თავის საუკეთესო როლს _ ნორმას პარტიას ასრულებს და ფინალში მოულოდნელად მარცხს განიცდის.

ის აღარ მღერის... ის აღარ უყვართ... ეს უკვე მეტისმეტია! მაგრამ ეს ჯერ კიდევ არ არის დასასრული!

1968 წლის ოქტომბერში არისტოტელე ონასისი ჟაკლინ კენედიზე ქორწინდება. მარია ამიერიდან აღარაფერს წარმოადგენს, სრულიად არაფერს, გარდა ტრავმირებული და გაუბედურებული ქალისა: საკუთარი თავი კარიერას შესწირა, კარიერა _ სიყვარულს, სიყვარული კი, თურმე, არც არსებულა.…

ონასისის დაქორწინების შემდეგ მარია ნერვიულობისგან ხმას კარგავს. ეს სიკვდილის ტოლფასია. ონასისმა მას ყველაფერი წაართვა: ხმა, დედობა და სიყვარული...

მიუხედავად ქორწინებისა, ონასისი დროგამოშვებით ხვდებოდა კალასს, ღამით მის ფანჯრებთან იდგა და ყვიროდა, შემომიშვი, თორემ კარს შემოგიმტვრევო. მარიასთვის მისი ერთი სიტყვაც საკმარისი იყო, რომ უპირობოდ დანებებოდა. არისტო ჰპირდებოდა, რომ ჯეკის გაეყრებოდა და შეცდომას გამოასწორებდა.

1970 წელს კალასი პიერ პაოლო პაზოლინის ფილმში მედეას როლს დასთანხმდა. ეს როლი სარკესავით ირეკლავდა ყველა მის ტანჯვასა და წამებას. “ეს ქალი რაღაც აზრით ქალთა შორის ყველაზე თანამედროვეა, მაგრამ მასში ცხოვრობს უძველესი ქალიც _ უცნაური, მისტიკური, ჯადოსნური, საშინელი შინაგანი კონფლიქტებით”, _ იხსენებდა პაზოლინი.

1975 წლის მარტში არისტოტელე ონასისი გარდაიცვალა. მარია დაკრძალვაზე არ ყოფილა, ის პარიზის აპარტამენტებში განმარტოვდა და საკუთარ თავს ჭეშმარიტ ქვრივად მიიჩნევდა. “არაფერს მნიშვნელობა აღარ აქვს, რადგან არაფერი ისე აღარ იქნება, როგორც იყო... უიმისოდ”.

1977 წლის 16 სექტემბერს მარია კალასი 54 წლის ასაკში მოულოდნელად გარდაიცვალა. ბედის ირონიით მისი ქონება _ 12 მილიონი დოლარი მემკვიდრეობით ერგო მის ორ ბოროტ მტერს _ ქმარსა და დედას.

 “ასწლეულის ხმა სამუდამოდ დადუმდა!” _ წერდა მსოფლიო პრესა.

მას კი მხოლოდ ერთი რამ სურდა: მისი ფერფლი ჩაეშვათ ზღვაში სკორპიოსთან _ სიყვარულის ბერძნულ კუნძულთან, რომელზეც დაკრძალული იყო მისი არისტოტელე.

მაგრამ ეს სურვილიც, ისევე როგორც სხვა დანარჩენი, არ აღსრულებულა. 

მოამზადა მაკა სვიმონიშვილმა, გაზეთი "პრემიერი", 20-26 ნოემბერი

FaceBook