ნანა კაკაბაძე: “თუ პროცესები ანალოგიურად გაგრძელდება, ქუჩაში გამოსვლას დავიწყებთ”

,,ხელისუფლებამ ან უნდა დაამყაროს სამართალი, ან უნდა იცოდეს, რომ ქვეყანაში მშვიდობა არ იქნება”

 “პრემიერის” შეკითხვებს პასუხობს “ყოფილი პოლიტპატიმრები _ ადამიანის უფლებებისთვის” თავმჯდომარე ნანა კაკაბაძე.

 _ ქალბატონო ნანა, თქვენ ერთ-ერთი პირველი იყავით, ვინც ახალი ხელისუფლების ქმედებები ღიად გააკრიტიკეთ და სამართლიანობის აღდგენის მოთხოვნით სპორტის სასახლეში აქცია გამართეთ. შეიცვალა თქვენი დამოკიდებულება ხელისუფლების მიმართ?

 _ მინდა გითხრათ, რომ კოალიცია “ქართული ოცნების” წინასაარჩევნო დაპირება, აღადგენდნენ სამართლიანობას საზოგადოებისთვის მხოლოდ და მხოლოდ ოცნებად დარჩა. ხელისუფლება თავს იკავებს იგივე მართლმსაჯულების ხარვეზების დამდგენი კომისიის შექმნაზეც, რომელსაც უკანონოდ გამოტანილი განაჩენებისთვის უნდა გადაეხედა, რაც აშკარა უსამართლობა და საზოგადოების მოტყუებაა.

 _ როგორ ფიქრობთ, რატომ დადგა ამგვარი შედეგი, რა არის მიზეზი, რომ ხელისუფლებამ ვერ უზრუნველყო სამართლიანობის აღდგენა?

 _ ბუნებრივია, ეს დასავლეთის ზეწოლის ბრალია, მაგრამ ხელისუფლება ვერანაირად გაიმართლებს თავს ვერც დასავლეთის ზეწოლისგან და ვერც ვერაფრისგან. ჩვენ გვინდოდა დამოუკიდებელი და თავისუფალი საქართველო. ხელისუფლება რუსეთის მონობაში იქნება, დასავლეთის თუ ორივეს ერთად, ჩვენთვის რა მნიშვნელობა აქვს. ჩვენ გვინდა დამოუკიდებელი ქვეყანა, მაგრამ ის მონური მდგომარეობა, რომელიც სამართლიანობის აღდგენასთან დაკავშირებით დასავლეთის მიმართ ხელისუფლებას გააჩნია, სამარცხვინოა. დასავლეთის ინტერესები, პრინციპში, გასაგებია, რადგან, როცა “,ნაციონალური მოძრაობის” პასუხისმგებლობის საკითხი დგება, ბუნებრივია, ჩნდება კითხვა, რატომ უჭერდნენ ისინი მხარს სააკაშვილის ფაშისტურ, მოძალადე ხელისუფლებას და რატომ გამოჰყავდათ დემოკრატიის შუქურად. გამოდის, რომ ისინი დემოკრატიის მაგივრად რეჟიმს აფინანსებდნენ. ბუნებრივია, ამის გამო ბევრი კითხვა ჩნდება და არც დასავლეთის ინტერესებში არ შედის “ნაციონალების” გასამართლება, მაგრამ ახალი ხელისუფლება რატომ იჩენს ასეთ მონურ მორჩილებას დასავლეთის დაკვეთისადმი და რატომ არ იჩენს სამართლიანობის აღდგენის სურვილს, ძალიან დამაფიქრებელია. თუ პროცესები ასე გაგრძელდა, “ქართული ოცნება” რეიტინგის ვარდნაში “ნაციონალურ მოძრაობას” გაუსწრებს. “ქართულმა ოცნებამ” არჩევნების თუ სხვა კვლევების შედეგად რა პროცენტული მაჩვენებლებიც არ უნდა დაიწეროს, ფაქტი ფაქტად რჩება _ საზოგადოება არის მოტყუებული და ქართველი ხალხი ელის სამართლიანობის აღდგენას და არა ერთი კლანის მეორეთი ჩანაცვლებას. 

 _ როგორ ფიქრობთ, მთავარი პროკურორის არჩილ კბილაშვილის თანამდებობიდან გადადგომა სამართლიანობის აღდგენის პროცესს დააჩქარებს?

 _ ის, რომ არჩილ კბილაშვილი გადადგა და თანამდებობას არ ჩამოეკიდა, ამაღელვებელი და დამაფიქრებელია. ერთია, რომ ის თანამდებობას არ გამოეკიდა და მეორე საკითხია, რომ მას საშუალება არ მიეცა, განეხორციელებინა ის გეგმები, რაც მას ჰქონდა, რის გამოც დატოვა თანამდებობა. არჩილ კბილაშვილის მხრიდან ბოლომდე არ იყო გაჟღერებული, რა უნდოდა და რა ვერ განახორციელა, მაგრამ თავისთავად ცხადია, რომ მთავარი პროკურორის გადაწყვეტილება სამართლიანობის აღდგენას უკავშირდება. მთავარი პროკურორის გვარ-სახელების შეცვლა ქვეყანას არანაირ სიკეთეს არ მოუტანს, თუ პოლიტიკა არ შეცვალა. სამწუხაროდ, დღეს არ არის პოლიტიკური ნება იმისთვის, რომ ქვეყანაში სამართლიანობა აღდგეს. ამ ყველაფრის მკაფიო გამოხატულება ისაა, რომ ხელისუფლება ფეხს ითრევს, შეიქმნას ხარვეზების დამდგენი კომისია და გადაისინჯოს უსამართლოდ გამოტანილი განაჩენები.

_ ხელისუფლებამ თუ სამართლიანობის აღდგენის პროცესთან დაკავშირებით კვლავ პასიურობა გამოიჩინა, მაშინ რა არის გამოსავალი, ხალხი ისევ ქუჩაში უნდა გამოვიდეს?

_ თუ ხელისუფლება არ იქნება გარანტი სამართლიანობის აღდგენის კუთხით, ბუნებრივია, ამის განხორციელებას საზოგადოება დაიწყებს. სჯობს, აღდგეს სამართლიანობა, დამნაშავეს დაერქვას დამნაშავე და უდანაშაულო ადამიანებს სასამართლომ აღუდგინოს საკუთარი უფლებები, ვიდრე მათ თავიანთი ხელით აღიდგინონ უფლებები. მინდა გითხრათ, რომ ხელისუფლება სერიოზულად ებრძოდა სამართლიანობის აღდგენის მოთხოვნით სპორტის სასახლეში გამართულ შეკრებას, ყველანაირად შეეცადნენ, რომ ეს საკითხი ყველანაირად მიეჩქმალათ.

 _ უახლოეს მომავალში ხომ არ გეგმავთ, სპორტის სასახლეში ჩატარებული აქციის ანალოგის ჩატარებას?

 _ რა თქმა უნდა, ვგეგმავთ, თუმცა ჩვენ არ ვართ ჩასაფრებულის პოზიციიდან მაყურებელი ადამიანები. დაველოდებით ინაუგურაციას, გავიდეს ერთი ორი კვირა, დავინახავთ, რას მოიმოქმედებს ხელისუფლება, საზოგადოება ჯერ კიდევ მოლოდინის რეჟიმშია, მაგრამ თუ პროცესები ანალოგიურად გაგრძელდება, დავიწყებთ როგორც ქუჩაში გამოსვლას, ისე საზოგადოების ინფორმირებას.  მთავარია, რომ სამართალმა იზეიმოს და ქვეყანაში სამართლიანობა თუ არ იქნება, არ იქნება არც მშვიდობა, ამისთვის ხელისუფლება მზად უნდა იყოს. მან ან უნდა დაამყაროს სამართალი, ან უნდა იცოდეს, რომ ამ ქვეყანაში მშვიდობა არ იქნება.

მირანდა ნაბახტეველი, გაზეთი „პრემიერი“, 13-19 ნოემბერი

FaceBook