“ასე გაწირავს სააკაშვილი “ნაციონალურ მოძრაობას”... სააკაშვილი თუ ბოკერია?!

“ნაციონალურ მოძრაობაში” დიდი აურზაურია. პარტია დაქსაქსვის პირასაა და შიდა ინტრიგებიც მატულობს. მართალია, ისინი არსად წასულან, მაგრამ ახლა სხვა მიზნებითა და მოტივებით პარტიაში ორი მთავარი ფიგურა _ მიხეილ სააკაშვილი და გიგა ბოკერია _ ბრუნდება. მთავარი კითხვა კი ასე ისმის: სააკაშვილი თუ ბოკერია _ გაწირავს თუ არა ექსპრეზიდენტი თავის გადასარჩენად “ნაციონალურ მოძრაობას”? ამ ეტაპზე “ნაცმოძრაობას” ოთხზე მეტი განშტოება ჰყავს და საბოლოოდ ვერ ჩამოყალიბებულან სამომავლო გემებთან დაკავშირებით. თუმცა მათთვის ცნობილია, რომ ჯერჯერობით ერთიანობის შენარჩუნება სასიცოცხლოდ აუცილებელია. სააკაშვილმა ახალაიას შეწყალებით მის წინაშე ვალი მოიხადა, რაც შეეხება მერაბიშვილს, როგორც ჩანს, პარტიაში მისი ბედი ნაკლებად ადარდებთ. რამდენიმე დღეში პარტიაში დაბრუნებული ექსპრეზიდენტი და უშიშროების საბჭოს ექსმდივანი მერაბიშვილის პატიმრობას თავისავე სასარგებლოდ, ანუ პარტიის დევნის არგუმენტად გამოიყენებენ. 

 როგორც ამბობენ, ვანო მერაბიშვილის წინააღმდეგ თბილისში გამართულმა სასამართლომ და მისმა “ბოდიშებმა” პროკურატურა აიძულა, ნაციონალების გენერალური მდივნის წინააღმდეგ უფრო წონადი არგუმენტები ეძებოს. როგორც ჩვენთვის გახდა ცნობილი,  პროკურატურა უახლოეს მომავალში ვანო მერაბიშვილს ბრალს დაუმძიმებს.

 პარტიის ერთ-ერთი ხელმძღვანელი მიხეილ მაჭავარიანი “პრემიერთან” საუბარში აცხადებს, რომ არავითარი დაპირისპირება პარტიაში არ არსებობს. თუმცა, თუ ცოტა ხნის წინ დათა ახალაიას მიერ სოციალურ ქსელში გამოქვეყნებულ წერილის გავიხსენებთ, სურათი სხვაგვარად იხატება: “ვანო მერაბიშვილი არ არის მიჩვეული სიმართლის მოსმენას, თუმცა მინდა გითხრათ, რომ მას ამის მოსმენა ძალიან ხშირად მოუწევს, უახლოეს მომავალში ძალიან ბევრ არასასიამოვნო სიურპრიზს უნდა ელოდეს”. ამას თუ დავუმატებთ თეა თუთბერიძის გალაშქრებას სააკაშვილის, მერაბიშვილისა და პარტიის დიდი ნაწილის წინააღმდეგ, მაჭავარიანის მტკიცება ცოტაზე მეტად არადამაჯერებლად ჟღერს.

 “პრემიერი” “ნაციონალური მოძრაობის” ერთ-ერთ ლიდერს, მიხეილ მაჭავარიანს ესაუბრა:

_ ბ-ნო მიხეილ, რამდენად შესაძლებელია, რომ მერაბიშვილის ციხეში ყოფნა იგივე ახალაიების ინტერესებში შედიოდეს? გაგახსენებთ მოარულ ჭორებს დათა ახალაიასა და ხვედელიძის თურქეთში შეხვედრის შესახებ.

_ ამის დამამტკიცებელი არანაირი ფაქტი არ არსებობს. ეს ჭორები გორდება იმისთვის, რომ განხეთქილება შემოიტანონ.

_ პერსონებს შორის თუ გუნდში?

_ პერსონებს (მერაბიშვილი-ახალაია) შორის და პარტიაშიც. ამ თემების აგორება და გამწვავება ხდება გარკვეული მოვლენების დროს. ეს ხდებოდა აპრილშიც, როდესაც ჩვენ მიტინგისთვის ვემზადებოდით და ხდება პერიოდულად. ეს არის შემოგდებული თემა.

_ და თქვენ ამბობთ, რომ ახალაიასა და მერაბიშვილის მომხრეების დაპირისპირება გუნდში არ არსებობს?

_ არანაირი დაპირისპირება არ არსებობს. ვანო მერაბიშვილი პარტიის ყრილობაზე გენერალურ მდივნად ავირჩიეთ. რაც შეეხება ბაჩო ახალაიას, ის არ ყოფილა პარტიის წევრი, რადგან ძალოვან უწყებებში _ სასჯელაღსრულებაში, თავდაცვის სამინისტროში, შემდეგ შინაგან საქმეთა სამინისტროში მუშაობდა. ის იყო ჩვენი მხარდამჭერი და სწორედ ამიტომაც იძია შური მასზე ხელისუფლებამ. თუმცა პარტიის წევრია, ჩვენი მაჟორიტარი დეპუტატია ბატონი როლანდ ახალაია. პარტიაში არის ერთიანი პოზიცია მერაბიშვილთან და ახალაიასთან დაკავშირებით _ ისინი არიან პოლიტიკური პატიმრები.

_ “ნაციონალურ მოძრაობაში” აღმასრულებელი ხელისუფლებიდან ბრუნდებიან საკმაოდ წონადი ფიგურები, იგივე მიხეილ სააკაშვილი, გიგა ბოკერია, რამდენად არის შესაძლებელი, რომ მათმა გამოჩენამ გარკვეული აზრთა სხვადასხვაობა შექმნას პარტიაში და თუ ახლა არა, სამერმისოდ მოხდეს პარტიის დაშლა ან რომელიმე ჯგუფმა დატოვოს “ნაციონალური მოძრაობა”?

_ აქ გადაწყვეტილებებს იღებს 68-კაციანი პოლიტსაბჭო და არა ერთი და ორი კაცი. ყველა საკითხზე მიმდინარეობს განხილვა, მსჯელობა, ზოგჯერ საქმიანი, ზოგჯერ ემოციური. რაიმე სახის განხეთქილებაზე საუბარი ზედმეტია. ერთი თვის წინ იყო ყრილობა და თუ რამე უნდა მომხდარიყო, მაშინ მოხდებოდა. დიდი ხანია ამბობენ, ახლა დაიშლებიან, ახლა მოხდება რაღაცო, მაგრამ არა.

_ თუმცა იგივე გიგა ბოკერია, პარტიაში დაბრუნებით, ცხადია, გარკვეულ კორექტივებს შეიტანს მის მუშაობაში და საინტერესოა, რა ფუნქცია ექნება მას?

_ გიგა შაბათამდე არის უშიშროების საბჭოს მდივანი. შაბათს ის განცხადებას დაწერს და წამოვა. შემდეგ კი პოლიტსაბჭო გადაწყვეტს. გათვალისწინებული იქნება, მას რა სურვილი აქვს და დარწმუნებული ვარ, პოლიტსაბჭო მას მხარს დაუჭერს. გიგა არის ადამიანი, რომელსაც აქვს ძალიან დიდი გამოცდილება, ძალიან წესიერი კაცია და მისი ამხელა რესურსის არგამოყენება ჩვენი მხრიდან სწორი არ იქნება.

 სხვა ინფორმაცია აქვს საპარლამენტო უმრავლესობის წევრს ოთარ ჩრდილელს, რომელიც აცხადებს, რომ მან ნაციონალებისგან იცის, რომ პარტიაში ყველაზე დიდ საფრთხეს გიგა ბოკერიასა და მიხეილ სააკაშვილში ხედავენ.

 ოთარ ჩრდილელი: ის, რაც ახლა “ნაციონალურ მოძრაობაში” ხდება, უფრო თვითგადარჩენის ინსტინქტით გამოწვეული ქცევაა. რამდენადაც ისევ და ისევ ნაციონალებისგან ვიცი, ყველაზე დიდ საფრთხეს ისინი გიგა ბოკერიასა და მიხეილ სააკაშვილში ხედავენ.

_ მიხეილ სააკაშვილი რატომ უნდა იყოს საფრთხე საკუთარი პარტიისთვის?

_ სააკაშვილს სურს, ისაუბროს “ნაციონალური მოძრაობის” არარსებული ათასობით და ლამის მილიონობით მხარდამჭერის სახელით. ამით მას მხოლოდ საკუთარი თავის გადარჩენა სურს და პარტია მისთვის ინსტრუმენტია. გაგახსენებთ მის ერთ-ერთ ბოლო “სპიჩს”, სადაც თქვა: შინაგან საქმეთა სამინისტროს მაღალჩინოსნებს ზედმეტად ვენდობოდიო. ახლა ის გაიხსენეთ, უფრო ადრე რომ თქვა, სამინისტროში არავის ვიცნობდიო. მაშინ რა გამოდის? მერაბიშვილი გაწირა ხომ? საკუთარი თანაგუნდელი. ეს მეტყველებს მის ფსიქოლოგიაზე. ასე გაწირავს სააკაშვილი “ნაციონალურ მოძრაობას” და ყველას, ოღონდ თავად გადარჩეს. თავად მის მიმართ რომ სამართალდამცავებს კითხვები ექნებათ, ეს სააკაშვილმა კარგად იცის და იმიტომაც დარბის ევროპელ ადვოკატებში.

_ თუმცა ცხადია, რომ იგივე სააკაშვილიცა და ბოკერიაც პარტიაში ბრუნდებიან ბრძოლებში გამოცდილი გუნდით.

_ ნაციონალების პარტიული აქტივისთვის მნიშვნელოვან პრობლემას მიხეილ სააკაშვილი და პრეზიდენტის ადმინისტრაციიდან პარტიაში გადასაბარგებელი თავნება პერსონებიც წარმოადგენენ, რომლებიც თავიანთი სიმაღლეებიდან არასოდეს აღიარებდნენ პარტიულ ჩინოვნიკებს. ამას მე კი არ ვამბობ, ამას ამბობენ თავად “ნაციონალური მოძრაობის” წევრები. ცხადია, რომ “ნაციონალური მოძრაობა” როტაციასა და “ახალ სისხლს” დაარქმევს პრეზიდენტისა თუ უშიშროების საბჭოს აპარატის თანამშრომელთა პარტიაში გადასვლას, თუმცა ამ პროცესით, ძველ კადრებს სახლებში გაყრიან და პარტიაში უკმაყოფილოთა კრიტიკული მასა გაიზრდება.

_ ეს ჩვეულებრივი პროცესია, როდესაც მოდის ახალი კადრი, ძველს უწევს სახლში წასვლა ან სხვაგან გადასვლა.

_ ნუ გამხდით ახლა ნაციონალების ჭირისუფლად. მე პოლიტიკურ პროცესზე ვსაუბრობ და არ არის ეს, ასე მარტივად _ ახალი მოვიდა და ძველი წავიდა. ძირითად სამიზნეს მერაბიშვილის კადრები წარმოადგენენ. თუმცა აქ მთავარი მაინც ბოკერიას ფაქტორი იქნება, რომელიც სააკაშვილსაც კი არ აპატიებს თავნებობას და ამჟამად პოლიტსაბჭოში მიმდინარე ცალკეული დავები, სულაც არაა გამორიცხული, ხელჩართულ ბრძოლაშიც გადაიზარდოს. სწორედ ამის შემდეგ მოუწევს ბევრ “ნაცს” არჩევანის გაკეთება. უფრო სწორად იმის განხორციელება, რასაც ამ წუთასაც ფიქრობენ. გაემიჯნონ სააკაშვილს ან სააკაშვილი გააგდონ პარტიიდან.

_ დამეთანხმეთ, ეს არც ისე ადვილი იქნება

_ ადვილი იქნება თუ ძნელი, ამაზე ნაციონალებმა იდარდონ. მაგრამ ასეთი გადაწყვეტილების მიმღები ინდივიდუალური ფიგურა კი მანდ მხოლოდ ბოკერიაა. თან ფაქტია, რომ მერაბიშვილისა და ახალაიას კლანებს სამკვდრო-სასიცოცხლო ბრძოლა აქვთ ერთმანეთისთვის გამოცხადებული და რამდენიც არ უნდა მალონ ეს ნაციონალებმა, ფაქტი ყველასთვის ცნობილია.

_ ბაქრაძე?

_ ბაქრაძე არაა კონფლიქტური ადამიანი და ის უფრო შიდა უმრავლესობის ნებას დაჰყვება.

_ ანუ დაბეჯითებით ამბობთ, რომ სააკაშვილს “ნაციონალური მოძრაობა” და იგივე მერაბიშვილი გაწირული ჰყავს და ახლა თავის გადარჩენაზე ფიქრობს?

_ ამას მე კი არ ვამბობ, თავად ნაციონალები ამბობენ და ჰკითხეთ ნებისმიერს ეს არასაგაზეთოდ და თავად გეტყვიან. ხმამაღლა რომ ვერ ამბობენ, ეგეც მათი პრობლემაა.

ნებისმიერ შემთხვევაში “ნაციონალურ მოძრაობაში” ახალი ერა იწყება. პარტიის ბევრი წევრისთვის უკვე დაისია, დანარჩენები კი პოლიტიკურ გარიჟრაჟზე დგანან და მზის ამოსვლას ელოდებიან. საქართველოში ბევრი რამ არაპროგნოზირებადია, მათ შორის პოლიტიკური სვლები, ამიტომ ნუ გაგვიკვირდება, ყველაფერი სხვადასხვაგვარად იყოს. თუმცა მოვლენებს ძალიან ნუ გავუსწრებთ, დაველოდოთ, ვნახოთ.

გეგა სილაგავა, გაზეთი „პრემიერი“, 13-19 ნოემბერი

FaceBook