გოგა ხაინდრავა: “არავითარი შემოთავაზება არ მქონია, თუმცა ახალ ხელისუფლებას ყველანაირად დავეხმარები”

ქვეყანაში შექმნილ პოლიტიკურ მდგომარეობასა და სამომავლო გეგმებზე “პრემიერს” გოგა ხაინდრავა ესაუბრა.

_ ბატონო გოგა, ბოლო პერიოდში პოლიტიკურად ნაკლებად აქტიური ხართ, რატომ, რა არის მიზეზი? შენიშვნები არ გაქვთ ახალი ხელისუფლების მიმართ?

_ ჩვენ სხვადასხვა ქვეყანაში, ან სხვადასხვა ქალაქში ვცხოვრობთ? მე თუ ნაკლებად პოლიტიკურად აქტიური ვარ, მაშინ აქტიურობას რაღა ჰქვია. პრაქტიკულად, კვირა არ გადის, რომ ტელევიზიაში, ან გაზეთში ჩემი ინტერვიუ არ იყოს.

_ მიხეილ სააკაშვილის პერიოდს თუ გავიხსენებთ, თქვენ გაცილებით კრიტიკული და აქტიური იყავით ხელისუფლების მიმართ?

_ საქართველოში ადრე ფაშისტური რეჟიმი იყო და ამას ღიად, დაუფარებლად ვამბობდი და ვამხელდი ხელისუფლების ყოველ ბოროტ ქმედებას. ახლა ხელისუფლებაში მითოლოგიური ადამიანები არ არიან, ნორმალური ადამიანები მოვიდნენ, რომლებსაც თავისი პლუსები და მინუსები აქვთ. ამიტომ დამოკიდებულებაც ნორმალური და ადამიანური მაქვს.

_ გაამართლეს თქვენი და ხალხის მოლოდინი კოალიცია “ქართული ოცნების” გუნდმა და ბიძინა ივანიშვილმა?

_ ჩემი აზრით, გაამართლეს, რადგან მივიღეთ დაბალანსებული ხელისუფლება, საკმაოდ კარგი პარლამენტი უმრავლესობის აქტიურობით, სადაც უამრავი პროფესიონალია. ასეთი პარლამენტი საქართველოს დიდი ხანია, არ ჰყოლია. პოლიტიკური სისუსტეები, როგორც ყოველთვის, არის, განვითარებადი დემოკრატიის ქვეყანა ვართ და, პრაქტიკულად, სახელმწიფოდ ნელ-ნელა ვყალიბდებით. აქამდე საქართველო ერთპიროვნული მმართველობის პირობებში იმყოფებოდა და დღეს დემოკრატია ფეხს ნელ-ნელა იდგამს. ის, რომ პრეზიდენტად ფილოსოფოსი ავირჩიეთ, ვფიქრობ, წარმატებული ნაბიჯია, რომელიც მიუთითებს, რომ ქართული გონი, ქართული სიბრძნე და ზოგადად, საქართველო ფეხზე დგება. ამავე დროს, ბიძინა ივანიშვილის გადაწყვეტილება, მის შემცვლელად ირაკლი ღარიბაშვილის დასახელების შესახებ მეტყველებს იმაზე, რომ კოალიცია “ქართული ოცნების” ძირითად ბირთვს კარგად ესმის, რა უნდა გააკეთოს და საით მიჰყავს ქვეყანა. წინააღმდეგ შემთხვევაში, დარწმუნებული ვარ, ქართული საზოგადოება აღარ დაუშვებს იმ კოლაფსს, სადამდეც მიხეილ სააკაშვილმა საქართველო მიიყვანა.

_ რას ფიქრობთ, რა არის ივანიშვილის გუნდის მთავარი შეცდომა და პოზიტივი?

_ განვლილი ერთი წლის განმავლობაში კოალიცია “ქართული ოცნების” მიერ დაშვებულ კარდინარულ შეცდომას ვერ ვხედავ. ვფიქრობ, საქართველოში ყველაზე დიდი პრობლემა სასამართლო ხელისუფლებაა, რომელიც უსამართლობის ძალიან მძიმე მაგალითებს გვაჩვენებს. იგივე ახალაიასა და ადამიანების მწამებლების გამართლება გვაჩვენებს, რომ უკანონობის ეს ბუდე, რომლის სათავეში დგას ჩამოყალიბებული ავაზაკი კუბლაშვილი კიდევ ქართული სახელმწიფოს წყლულია. თუმცა ამ სისტემაში განკურნების ნიშნებიც შეიმჩნევა, რადგან მთელი რიგი განაჩენები ცხადყოფს, რომ სასამართლომ თავისი პირდაპირი ფუნქციის შესრულება დაიწყო.

_ როგორ ფიქრობთ, რატომ ვერ უზრუნველყო ხელისუფლებამ სასამართლო სისტემის მავნე მხარეების გამოსწორება?

_ იმიტომ, რომ კანონმდებლობა და ევროპული პოლიტიკური კონიუნქტურა ამ ყველაფერს სერიოზულად უშლის ხელს. ის დაუფარავი, უსინდისო ლობირება, შემარცხვენელი თვითონ დასავლური ღირებულებების, რომლის მოწმენიც ვართ და რომელიც საკმაოდ ინტენსიურად მოედინება, როგორც ევროპის გარკვეული წრეებიდან, ასევე აშშ-დან, ამის საშუალებას არ გვაძლევს. ე.წ. ლიბერალური და დემოკრატიული დასავლეთი საშუალებას არ გვაძლევს, ქვეყანაში წესრიგი და სამართლიანობა აღვადგინოთ. თუმცა ეს დაძლევადი პრობლემაა, რომელსაც დრო, მოთმინება, მუშაობა სჭირდება და ადრე თუ გვიან საქართველოში სამართლიანობა აღდგება. ეჭვი არ მეპარება, რომ ყველა დამნაშავე დაისჯება.

_ ევროპული და ამერიკული საზოგადოება “ნაციონალებს” მფარველობენ?

_ ამ შემთხვევაში საზოგადოება არაფერ შუაშია. საზოგადოება და პოლიტიკური ისტებლიშმენტი ორი განსხვავებული კლასია. პირიქით, ამერიკული და ევროპული საზოგადოება ძალიან გვეხმარება. რომ არა მათი მხარდაჭერა, ჩვენ 90-იან წლებში, შეიძლება, შიმშილით ამოგვხდომოდა სული. ვგულისხმობ მარგინალ პოლიტიკოსებს, როგორიც მაკკეინია აშშ-ში და ევროპარლამენტში “სახალხო პარტია”, რომლებიც დღეგამოშვებით მატროსოვის ციხეში მერაბიშვილთან დადიან და როცა 7 ნოემბერსა და 26 მაისს სისხლში ჩაახშვეს ქართული საზოგადოების თავისუფალი სული, ხმა არ ამოუღიათ. მე მათ ვგულისხმობ და არა საზოგადოებას.

_ თქვენ პოზიტიურად შეაფასეთ ივანიშვილის გადაწყვეტილება მის შემცვლელად ღარიბაშვილის დასახელების შესახებ. თუმცა გამოითქვა აზრი, რომ პრემიერმა მის შემცვლელად მასთან ყველაზე მეტად დაახლოებული პირი იმიტომ დაასახელა, რომ სურს პოლიტიკიდან წასვლის შემდეგ პროცესების გვერდიდან მართვა. თქვენ იზიარებთ ამ მოსაზრებას?

_ რატომ გვერდიდან, ეს რა სიბეცეა, გამაგებინეთ და ჟურნალისტებმაც აიტაცეთ. პროცესების მართვა რომ უნდოდეს, რატომ წავიდოდა.

_ ახლა პრემიერია და მას პასუხისმგებლობა პირდაპირ ეკისრება და პოლიტიკიდან წასვლის შემდეგ ამგვარი პასუხისმგებლობა აღარ დაეკისრება.

_ პასუხისმგებლობა მას ყველა ვარიანტში ისედაც დაეკისრება. ის კოალიციის ლიდერი იყო, ივანიშვილმა მოიყვანა ხელისუფლებაში მოქმედი მთავრობა, ის ტოვებს თავის მემკვიდრედ ღარიბაშვილს და პასუხისმგებლობა მასაც აკისრია, ეს რა არგუმენტია. საერთოდ, ეს რა სიბეცეა _ გვერდიდან უნდა მართოს, პირდაპირ ვერ მართავს ივანიშვილი პროცესებს, თუ ვინმე აიძულებს წასვლას. თავის შემცვლელად ღარიბაშვილს რომ ტოვებს, სწორედ ივანიშვილის პასუხისმგებლობაზე მეტყველებს, რადგან, პრაქტიკულად, მემკვიდრე დატოვა, ადამიანი, რომელიც მასთან ძალიან დაახლოებულია და რეალურად მის ხელშია გაზრდილი. ღარიბაშვილმა მოახერხა და განვლილი ერთი წლის განმავლობაში მერაბიშვილის მმართველობის დროს საპირუტყვე დაწესებულებად გადაქცეული შსს წარმატებულად აქცია ადამიანურ დაწესებულებად.

_ თქვენ, როგორც ყოფილ მაღალჩინოსანს, ხომ არ გქონიათ, ან ხომ არ გაქვთ კონკრეტული შემოთავაზება ხელისუფლებისგან?

_ არავითარი შემოთავაზება არ მქონია, არც მაქვს და რაც მთავარია, მსგავსი გეგმები არ მაქვს. თუმცა ახალ ხელისუფლებას ყველანაირად დავეხმარები, თუ ამის საჭიროება იქნება. ამ ეტაპზე ჩემი გეგმები არანაირად არ არის დაკავშირებული რაიმე სახით სახელისუფლებო მმართველობასთან, მერე რა იქნება, ვნახოთ.

_ ამ ეტაპზე რა რჩევას მისცემთ ახლად არჩეულ პრეზიდენტ გიორგი მარგველაშვილს?

_ ჯერჯერობით კონკრეტული რჩევების მიცემა უადგილოა, რადგან თავისი უფლებამოსილების განხორციელების შესრულება არ დაუწყია. ას დღეს ყველას აძლევენ, ამიტომ როცა ჩამოყალიბდება მარგველაშვილის, როგორც პრეზიდენტის, გაცხადებული სახელმწიფოებრივი ხედვა, რჩევებზე საუბარი მერე შეიძლება. გიორგი მარგველაშვილს საკმაოდ დიდი პასუხისმგებლობა დაეკისრა, საამაყო ხვედრი არგუნა მას ბედმა, ქართველმა ხალხმა და მინდა ამ ყველაფერს წარმატებულად გაუძღვეს და დარწმუნებული ვარ, ასეც იქნება.

მირანდა ნაბახტეველი, გაზეთი „პრემიერი“, 6-12 ნოემბერი

FaceBook