კახა კახიშვილი: “პროკურატურას აქტიურად რომ ემუშავა, “ნაციონალური მოძრაობა” ამხელა პროცენტს ვერ მიიღებდა”

პრემიერ ივანიშვილის განაცხადებით, საპრეზიდენტო არჩევნებში “ნაციონალური მოძრაობის” საპრეზიდენტო კანდიდატისთვის 21%-იანი მხარდაჭერა სიურპრიზი იყო. როგორც ჟურნალისტებთან შეხვედრისას ივანიშვილმა განმარტა, ის არ მოელოდა, თუ დავით ბაქრაძე ამხელა მხარდაჭერას მიიღებდა. თუმცა ივანიშვილი მიიჩნევს, რომ “ნაციონალების” მიერ მოპოვებული 21% შიდა პოლიტიკურ პროცესზე გავლენას ვერ მოახდენს. საკითხის ირგვლივ “პრემიერი” არჩევნებისა და პოლიტიკური ტექნოლოგების კვლევის ცენტრის ხელმძღვანელს კახა კახიშვილს ესაუბრა.

_ ბატონო კახა, პრემიერის მსგავსად, თქვენ ფიქრობთ რომ “ნაციონალური მოძრაობის” 21,7% ქვეყნის შიდა პოლიტიკურ პროცესებზე გავლენას ვერ მოახდენს?

_ “ნაციონალებმა” საპრეზიდენტო არჩევნებზე მოიპოვეს 31 500 ხმა, ეს იმ ფონზე, როცა არჩევნებზე მოსახლეობამ პასიურობა გამოიჩინა. თუმცა არჩევნებზე მოსახლეობის დიდი ნაწილის მისვლის შემთხვევაში მათ გაცილებით ნაკლები პროცენტული მაჩვენებელი ექნებოდათ. თუ არჩევნებზე მოსახლეობის დიდი ნაწილი გამოცხადდებოდა, მაშინ ეს პირდაპირპროპორციულად იმოქმედებდა საპრეზიდენტო კანდიდატების რეიტინგზე. მაგალითისთვის, მე თუ არჩევნებში ვმონაწილეობ და არჩევნებში ხმის მიცემის უფლება აქვს სულ 100 ადამიანს და ამათგან საარჩევნო ყუთთან გამოცხადდება ხუთი და 95 არ მოვა, შედეგში დამიფიქსირდება 10%, ხოლო არჩევნებზე თუ მოვა 10 კაცი და  ხუთი მათგანი მე მომცემს ხმას,  მაშინ საბოლოო რეიტინგში მექნება 90%, ხოლო 100 კაციდან თუ ასივე მოვა და მე ხმას მომცემს მხოლოდ ხუთი მათგანი, შედეგში დამიფიქსირდება 5%. ასე რომ, პროცენტული მაჩვენებლები პირობითია. მით უმეტეს, უნდა გავითვალისწინოთ რომ მათ გამოიყენეს ადმინისტრაციული რესურსი. მათ ერთი წლის განმავლობაში ოკუპირებული ჰქონდათ საპარლამენტო ტრიბუნა, მათ ხელში იყო ადგილობრივი თვითმმართველობები, აქედან გამომდინარე გარკვეულ შედეგს დადებდნენ. საპრეზიდენტო არჩევნებზე “ნაციონალური მოძრაობის” 31 500 ხმა ნიშნავს იმას, რომ შარშანდელ არჩევნებთან შედარებით მათ დაკარგეს ამომრჩევლის 50%. დარწმუნებული ვარ, მათ რომ არ ჰქონოდათ ის ბერკეტები, რაც ჰქონდათ, არსებული პროცენტული მაჩვენებელი არ დაუფიქსირდებოდათ. ამავდროულად განვლილი ერთი წლის განმავლობაში პროკურატურის მხრიდან საზოგადოებისთვის არ გახდა ცნობილი ინფორმაცია კონკრეტული დანაშაულების შესახებ. ამიტომ პროკურატურას აქტიურად რომ გამოეძიებინა საქმეები, რომელიც ყოფილი თანამდებობის პირებს უკავშირდება, “ნაციონალური მოძრაობა” ამხელა პროცენტს ვერ მიიღებდა. 

_ გამოდის, რომ “ნაციონალური მოძრაობა” პოლიტიკურ ცხოვრებაზე ვერანაირ გავლენას ვერ მოახდენს?

 _ ფაქტია, რომ “ნაციონალებმა” შეძლეს და 2013 წლის საპრეზიდენტო არჩევნებზე დააფიქსირეს არჩევნების შემაჯამებელ ოქმში მეორე ადგილი. ახლა “ნაციონალები” ამ ოქმით შემოირბენენ მთელ მსოფლიოს. ვფიქრობ, პრეზიდენტი და ქალაქის მერიც იმიტომ გაემგზავრნენ ევროპაში, რომ აღნიშნული ოქმის საფუძველზე დაიწყონ საუბარი, რომ ისინი არიან პოპულარობით მეორე პოლიტიკური ძალა და მათზე დევნა უნდა განხორციელდეს და ამ ოქმის საფუძველზე დაიწყებენ გარანტიების მოპოვებას. შესაბამისად, იმ ადამიანებს, ვინც ითხოვდა რიგგარეშე საპარლამენტო არჩევნების ჩატარებას, გაუჭირდებათ დასაბუთება, რატომ უნდა ჩატარდეს ვადამდელი საპარლამენტო არჩევნები. 

_ როგორ ფიქრობთ, რატომ გამოიჩინა ამომრჩეველმა პასიურობა?

_ ამომრჩეველმა პასიურობა რამდენიმე ასპექტის გამო გამოიჩინა. პირველი არის ის, რომ 2010 წელს კონსტიტუციაში განხორციელდა ცვლილება, რომლის თანახმადაც 2013 წლის საპრეზიდენტო არჩევნების შემდეგ ახლად არჩეული პრეზიდენტის უფლებების შეზღუდვის შესახებ 2010 წლიდან მოყოლებული მიმდინარეობდა კამპანია, რომ ახალ პრეზიდენტს უფლებამოსილება აღარ ექნება. ეს რიტორიკა “ქართულმა ოცნებამაც” გააგრძელა ხელისუფლებაში მოსვლის შემდეგ. გახსოვთ, როგორ მსჯელობდნენ, პირდაპირი წესით აერჩიათ პრეზიდენტი, თუ მისი არჩევა პარლამენტის საშუალებით მომხდარიყო. ბუნებრივია, ამ ყველაფერმა ხალხში შექმნა განწყობა, პრეზიდენტი მაინცდამაინც დიდი უფლებამოსილებით არ ისარგებლებსო და შესაბამისად, ალბათ, ამიტომ გამოიჩინა ამომრჩეველმა პასიურობა. მეორე მიზეზი გახლავთ ის, რომ არსებული არჩევნების დროს საშიშროება არ არსებობდა, რომ “ნაციონალური მოძრაობის” კანდიდატი გაიმარჯვებდა, ხოლო მესამე ასპექტი გახლავთ ის, რომ საარჩევნო ყუთთან არ გამოცხადდა ის ამომრჩეველი, რომელიც “ქართული ოცნების” მხარდამჭერი იყო, მაგრამ გარკვეული გადაწყვეტილების გამო მათზე განაწყენებულია, თუმცა “ნაციონალების” მხარდამჭერი არასოდეს გახდება, თუმცა მისი ნდობა ვერც არასაპარლამენტო ოპოზიციამ მოიპოვა. ფაქტია, რომ 2013 წლის საპრეზიდენტო არჩევნებში მონაწილეობა მიიღო მოტივირებულმა ამომრჩეველმა.

მირანდა ნაბახტეველი, გაზეთი „პრემიერი“ 30 ოქტომბერი -5 ნოემბერი

FaceBook