ზაზა მარჯანიშვილი: “ამ კონცერტით მაინც დავაბრუნებ იმ მადლს, რაც ბათუმმა წლების განმავლობაში მაჩუქა”

“საჩუქარი ბათუმს”  

 ამერიკაში აღიარებული ქართველი მუსიკოსი ზაზა მარჯანიშვილი 20 წლის შემდეგ, პირველ საავტორო კონცერტს “საჩუქარი ბათუმს” 2 ნოემბერს გამართავს. ბათუმის მუსიკალურ ცენტრში კონცერტი ფესტივალ “ბათუმური შემოდგომის” ფარგლებში ჩატარდება. მუსიკოსის, კომპოზიტორის, ჯაზმენის პირველი სოლო ალბომი 1993 წელს გამოვიდა. ცნობილი კომპოზიტორის ბეგრაუნდშია 9 ალბომი განსხვავებული მუსიკალური სტილისტიკით. 1994 წლიდან მოღვაწეობს აშშ-ში. 1996-2002 წწ. მუშაობდა ჰოლივუდში და შექმნა  კინომუსიკა ფილმებისთვის Shadow of Doubt, Fallen Angel, Outer Limits, Stargates, North Africa, Egypt, Fang Sui, Telephone, Samuel.. “პრემიერი” მუსიკოს ზაზა მარჯანიშვილს ესაუბრა.

_ ეს არის თქვენი პირველი კონცერტი 20 წლის შემდეგ ბათუმში, თქვენს მშობლიურ კუთხეში, რა გრძნობაა ეს თქვენთვის?

_ უპირველეს ყოვლისა, უდიდესი პასუხისმგებლობა. მთელი ჩემი შეგნებული ცხოვრების მანძილზე ვამაყობ იმით, რომ ბათუმში ვარ დაბადებული. ყოველ ზაფხულს ჩამოვდიოდი აქ ბებიასთან და საოცრად ტკბილი მოგონებები მაკავშირებს ამ ქალაქთან. იმედია, ამ კონცერტით მაინც დავაბრუნებ იმ მადლს, რაც ბათუმმა წლების  განმავლობაში მაჩუქა.

_ როგორია საკონცერტო პროგრამა, რა რეპერტუარით წარდგებით მსმენელის წინაშე?

_ რეპერტუარი მრავალფეროვანია. არის კომპოზიციები, რომლებიც 90-იან წლებშია დაწერილი და არის ახლებიც, რომელიც არავის მოუსმენია. მუსიკალური სიურპრიზებიც უხვად  გვექნება.

_ საავტორო კონცერტისთვის  “საჩუქარი თბილისს” ახალი ორლეანიდან ჩამოვიდნენ სტივ მასაკოვსკი, მარკ ბრაუ, როლანდ გუერინი და დაგ ბელოუტი, ამ კონცერტში თუ მიიღებენ მონაწილეობას საზღვარგარეთიდან ჩამოსული ჯაზმომღერლები?

_ ორი წელია, რაც საქართველოში ვცხოვრობ. ამ პერიოდის განმავლობაში მოვახერხე და ვიპოვე საუკეთესო მუსიკოსები. შეიქმნა ჯგუფი, რომელსაც ჩემს მუსიკალურ ოჯახსაც კი ვეძახი. ასე რომ, ამჯერად ამერიკული “ძალები” არ დაგვჭირდება.

_ თქვენ საქართველოდან 90-იანი წლების დასაწყისში წახვედით ნიუ-ორლეანში, როგორ მოგეწონათ  განახლებული ბათუმი?

_ ამ კითხვაზე შევეცდები, მაქსიმალურად დელიკატური ვიყო.... მე მაინც სადა ბათუმის მომხრე  ვიყავი ყოველთვის.

_ სამომავლო გეგმებზე რას გვეტყვით?

_ ახალ ალბომზე ვმუშაობ, ალბათ, ამერიკაში გავემგზავრები ორიოდ თვით ალბომის ჩასაწერად. ასევე მაქვს რამდენიმე კინომუსიკის პროექტი. მოკლედ, საქმე ბევრია, იმედია, მაქსიმუმის გაკეთებას  შევძლებ.

ანჟელა ბუცხრიკიძე, გაზეთი „პრემიერი“ 30 ოქტომბერი -5 ნოემბერი

FaceBook