დეპუტატებს თანაშემწეები დაენიშნებათ

2014 წლიდან პარლამენტარებს საკანონმდებლო საქმიანობის განხორციელებაში თანაშემწეები დაეხმარებიან

 “პრემიერის” ინფორმაციით, 2014 წლიდან პარლამენტარებს საკანონმდებლო საქმიანობის განხორციელებაში თანაშემწეები დაეხმარებიან. “პრემიერი” პარლამენტის საფინანსო-საბიუჯეტო კომიტეტის თავმჯდომარე დავით ონოფრიშვილს დაუკავშირდა, რომელიც დეპუტატებისთვის თანაშემწეების დანიშვნის მიზეზებსა და იმ ხარვეზებზე საუბრობს, რომელიც წინა წლების ბიუჯეტში არსებობდა.

_ რატომ გახდა აუცილებელი დეპუტატებისთვის თანაშემწეების დანიშვნა?

_ საქართველოს გარდა, ყველა ქვეყანაში არსებობს თანაშემწეების ინსტიტუტი. ამ ეტაპზე თანაშემწეები ჰყავთ მხოლოდ მაჟორიტარებს, რომლებსაც საკუთარ რაიონებში ოფისები აქვთ, კომიტეტის თავმჯდომარეებსა და სხვა ხელმძღვანელ პირებს. თუმცა, ახალ ბიუჯეტში გათვალისწინებულია, რომ დანარჩენ პარლამენტარებსაც ჰყავდეთ თანაშემწეები. თუმცა ეს არ შეეხება ყველა დეპუტატს, 150 დეპუტატიდან შეეხება მხოლოდ 77-ს, რადგან დანარჩენებს უკავიათ ამა თუ იმ სახის თანამდებობა, ან კომიტეტის თავმჯდომარეები არიან, ან მოადგილეები, ან მაჟორიტარები და ა.შ. ამ კატეგორიის დეპუტატებს უკვე აქვთ თავისი აპარატი, რომელიც მუშაობაში ეხმარებათ. თუმცა არიან დეპუტატები, რომლებიც არც ერთ თანამდებობაზე არ არიან, მაგრამ ყოველდღიურ მუშაობაში სჭირდებათ დახმარება, თანაშემწე, რომელიც ორგანიზაციულ საკითხებს მოაგვარებს. ამ ყველაფერში გასაკვირი არაფერია, ეს მსოფლიოში მიღებული ფორმაა.

_ თითო დეპუტატს ერთი დამხმარე ეყოლება თუ რამდენიმე?

_ ერთ დეპუტატს ერთი დამხმარე ეყოლება, იმისთვის რომ უფრო პროდუქტიულად შეასრულოს თავისი უფლებამოსილება. შესაბამისად, პარლამენტის თანამშრომლების რაოდენობას 77 ადამიანი დაემატება. ეს ადამიანები პარლამენტარებს დაეხმარებიან საორგანიზაციო საკითხების მოგვარებაში, ამომრჩეველთან ურთიერთობაში და ზოგადად, საპარლამენტო საქმიანობაში.

_ კონკრეტულად როდის დაინიშნებიან თანაშემწეები?

_ მომავალი წლიდან. ჯერჯერობით ზუსტი თარიღი განსაზღვრული არ არის, ალბათ, 2014 წლის პირველი კვარტალიდან.

_ დეპუტატების თანაშემწეებისთვის რამდენი ლარია ბიუჯეტში გათვალისწინებული?

_ მთლიანობაში, შარშანდელთან შედარებით, 2014 წელს საკანონმდებლო ორგანო დაფინანსებას იმცირებს, ასევე მცირდება თანამშრომლების რაოდენობა, რადგან შტატები ხელოვნურად იყო გაბერილი და რეალურად ამდენი ადამიანი პარლამენტის აპარატში არ მუშაობდა. ამიტომ მკვდარი სულები პარლამენტში აღარ იმუშავებენ. თუ არ ვცდები, მილიონ-ნახევარი ლარი გამოიყოფა დეპუტატების თანაშემწეებისთვის ბიუჯეტიდან.

მირანდა ნაბახტეველი, გაზეთი „პრემიერი“ 30 ოქტომბერი -5 ნოემბერი

FaceBook