დავით საგანელიძე: ეს იყო ახირება და ამაში უზარმაზარი ფული დაიხარჯა

“პრემიერი” საპარლამენტო უმრავლესობის ლიდერს დავით საგანელიძეს ესაუბრა.

_ ბ-ნო დავით, ახლა, როდესაც აღმასრულებელ და საკანონმდებლო ხელისუფლებასთან ერთად საპრეზიდენტო მმართველობის ბერკეტიც კოალიცია “ქართულ ოცნებას” ეკუთვნის, რა იქნება თქვენი ხელისუფლებისთვის პრიორიტეტული უახლოესი პერიოდის განმავლობაში?

_ ჩემი პოზიციაა, მას შემდეგ, რაც პრეზიდენტს, პარლამენტსა და მთავრობას შორის აღარ იქნება ისეთი დამოკიდებულება, როგორიც იყო, ორი ძირითადი მიმართულება გამოიკვეთება: სერიოზული გარღვევა საგარეო ურთიერთობებში იმ მხრივ, რომ, ასე თუ ისე, დაბრკოლებული პროცედურები აღარ იარსებებს. მაგალითად, ელჩების დანიშვნა, საგარეო პოლიტიკაში განსხვავებული პოზიციების დაფიქსირება, ის რასაც ხანდახან მიხეილ სააკაშვილი და მისი გუნდი გარკვეულწილად ხელს უშლიდნენ და წამლავდნენ სიტუაციას უცხოეთში, ეს ფაქტორები არ იარსებებს და მეორე უმნიშვნელოვანესი პრიორიტეტი იქნება ქვეყანაში ინვესტიციების მოზიდვა. ის პოლიტიკური რისკები, რაც მიხეილ სააკაშვილის მმართველობის პირობებში ქვეყანაში არსებობდა და ბიზნესისთვის დამაბრკოლებელ ფაქტორს წარმოადგენდა, ხელს უშლიდა, რომ გარედან შემოსულ სერიოზულ ინვესტიციებზე ყოფილიყო საუბარი, იმედი მაქვს, აღარ იქნება. საქართველო ძალიან სწრაფი ტემპით, ძალიან დიდი ნაბიჯებით უნდა წავიყვანოთ ეკონომიკური აღმავლობისკენ. ამას, ბუნებრივია, სჭირდება სერიოზული პროგრამების განვითარება და ინვესტიციების მოზიდვა.

_ რაც შეეხება პრემიერ-მინისტრის შემცვლელის საკითხს, ბიძინა ივანიშვილმა განაცხადა, რომ მის ვინაობას შაბათს დაასახელებს, თუმცა მანამ კონსულტაციებს პოლიტიკურ გუნდთან გაივლის. თქვენ, როგორც უმრავლესობის ლიდერს, თუ გაქვთ ინფორმაცია, ვინ შეიძლება შეცვალოს ბიძინა ივანიშვილი და იყო თუ არა აღნიშნული საკითხის პირველადი განხილვა?

_ ამ კითხვას ძალიან მოკლედ ვუპასუხებ. ნამდვილად არ შემიძლია, დეტალური ინფორმაცია მოგცეთ. მინდა დავადასტურო, რომ ჩვენ გვქონდა საუბარი, რომ ეს თემა სამშაბათს განგვეხილა, თუმცა იმის გამო, რომ ამ კვირაში პარლამენტს ქუთაისში მოუწევს მუშაობა, ეს საკითხი კვირის ბოლოსთვის გადაიდო. შესაბამისად, როდესაც იქიდან დავბრუნდებით, პარასკევს ან შაბათს არის დაგეგმილი ამ თემაზე კონსულტაციები და ყველაფერ ამის შემდეგ გაირკვევა. ჩემგან წინასწარ ამაზე ვარაუდებით საუბარი მართებული არ იქნება, რადგან გადაწყვეტილება ბოლომდე არ არის მიღებული.

_ პარლამენტი უბრუნდება სამუშაო რეჟიმს. რა იქნება უმაღლესი საკანონმდებლო ორგანოს დღის წესრიგში გათვალისწინებული უპირველესი საკითხები, რადგან პრეზიდენტმა მიხეილ სააკაშვილმა განაცხადა, რომ საპრეზიდენტო არჩევნების დასრულებისთანავე პარლამენტის თბილისში გადატანის საკითხს უყრიან კენჭს, ადასტურებთ თუ არა ამ ინფორმაციას?

_ მინდა გითხრათ, რომ პარლამენტს საკმაოდ ბევრი თემა აქვს დასამუშავებელი. გამომდინარე ორი ფაქტორიდან: პირველი, იმის გამო, რომ არჩევნებამდე თითქმის 1 თვის განმავლობაში პარლამენტი არ მუშაობდა, ბევრი მიმდინარე პრობლემა დაგროვდა და მეორე, ის, რომ პრეზიდენტის ინაუგურაციის შემდგომ ძალაში შედის ახალი კონსტიტუცია, რომელსაც გარკვეული ადაპტირება სჭირდება ბევრ კანონთან, ეს დამატებით პრობლემებსა და საქმეებს აჩენს. რაც შეეხება ერთ-ერთ თემას, რაც პარლამენტის თბილისში გადატანასთანაა დაკავშირებული, ბუნებრივია, ეს აქტუალური საკითხია, თუმცა არ მგონია, ამ თემით დავიწყოთ, რადგან ეს არ არის ის, რაც უნდა უსწრებდეს ყველაფერს სხვას. ეს თავისთავად ძალიან საჭირო და აუცილებელი თემაა, მაგრამ მე ვფიქრობ, რომ პარლამენტის გადატანა მომავალი წლის თებერვლიდან მოხდება. ასე რომ, მანამდე დიდი დროა და ამით არ დავიწყებთ მუშაობას.

_ თებერვლიდან პარლამენტის თბილისში გადატანის საკითხზე მსჯელობა დაიწყება თუ თებერვლიდან უკვე შეიცვლის მდებარეობას ქვეყნის უმაღლესი საკანონმდებლო ორგანო?

_ თებერვლიდან განხილვა არ დაიწყება, ფიზიკურად გადმოსვლას ვგულისხმობ. მანამდე მოხდება კანონის მიღება და ეს კანონი ნოემბერში იქნება მიღებული თუ დეკემბერში, არაფერს შეცვლის. ეს საკითხი იმდენად საჩქარო არ არის, რომ ასე უცბად ინაუგურაციისთვის ან ახალი კონსტიტუციისთვის იყოს საჭირო. ჩვენ ამ საკითხს, ალბათ, წლის ბოლომდე დავაყენებთ და არა _ უახლოეს კვირებში.

_ გასული თვეების განმავლობაში ექსპერტები და რიგი პოლიტიკოსები აცხადებდნენ, რომ “ნაციონალური მოძრაობა” არ არის ძლიერი ოპოზიციური პარტია და  პარლამენტში ამ პარტიის 40%-იანი წარმომადგენლობა არ ასახავს საზოგადოების განწყობას. რეალურად ამ არჩევნებში “ნაცმოძრაობამ” მეორე ადგილი დაიკავა და გაკეთდა განცხადებები, რომ ამ მაჩვენებლით აღნიშნულმა პარტიამ შეძლო ნეგატიური სტერეოტიპის გაქარწყლება. ამის შემდეგ თქვენ თუ მიიჩნევთ ამ პარტიას #1 ოპოზიციურ ძალად  და მის საპარლამენტო წარმომადგენლობას ლეგიტიმურად?

_ ნამდვილად არ ვეთანხმები, რომ ამ შედეგით “ნაციონალურმა მოძრაობამ” 40%-იანი საპარლამენტო წარმომადგენლობა გაიმყარა. ამ არჩევნებმა კიდევ ერთხელ დაარწმუნა საზოგადოება იმაში, რომ ეს პარტია ნამდვილად არ იმსახურებს ამ წარმომადგენლობას. “ნაციონალურმა მოძრაობამ” რომ ასეთი შედეგი დაიმსახურა, აქ ორი თემაა მნიშვნელოვანი. პირველია ის, რომ,  სამწუხაროდ, დღეს საქართველოში არ არის ძლიერი ოპოზიცია და მე “ნაციონალურ მოძრაობაზე” ნამდვილად ვერ ვიტყვი, რომ ოპოზიციური ძალაა, ეს არის ძალა, რომელიც ჯერ კიდევ ინერციით მოდის. ამ პარტიას ადგილობრივი თვითმმართველობის არჩევნებამდე ჯერ კიდევ აქვს სერიოზული სახელისუფლებო ბერკეტები _ საკრებულოები, გამგეობები, შორს რომ არ წავიდეთ დედაქალაქის მერია და მისდამი დაქვემდებარებული სამსახურები ჯერ კიდევ “ნაციონალური მოძრაობის” ხელშია და შესაბამისად, ეს ბერკეტი მათ მაქსიმალურად გამოიყენეს. მეორე საკითხი, რის გამოც მათ ეს მაჩვენებელი მიიღეს, იყო ის, რომ, სამწუხაროდ, მოსახლეობის რაღაც ნაწილმა არ ჩათვალა, რომ აუცილებელი იყო საარჩევნო ყუთთან მისვლა, რადგან ფიქრობდნენ, რომ ისედაც მარგველაშვილი გაიმარჯვებდა და ამ შედარებით დაბალმა აქტიურობამ “ნაციონალური მოძრაობის” პროცენტი აწია. ეს არის პოლიტიკური ძალა, რომელიც ყოველდღე უკან-უკან წავა. სააკაშვილმა განაცხადა, რომ 20%-იანი სტარტი მათთვის არის წინაპირობა, რომ მომავალში გაძლიერდებიან, მაგრამ აქ მინდა შევახსენო, რომ მათ 99%-იანი სტარტი ჰქონდათ 9 წლის წინათ და ის გაანადგურეს და დაამთავრეს იმით, რომ ხალხი ბედნიერია მათი პოლიტიკიდან მოცილებით და 20%-იანი მაჩვენებლისთვის მობღაუჭება არის ნარჩენისთვის მობღაუჭება. ეს მაჩვენებელი ინერციითაა წამოსული და არა პოლიტიკური პარტიის მიერ დამსახურებული.

_ კოალიცია “ქართული ოცნების” ხელისუფლებაში მოსვლისას კეთდებოდა განცხადებები, რომ შესაძლოა, გუბერნატორის ინსტიტუტი გაუქმებულიყო. ამჯერად როგორია თქვენი პოზიცია, გეგმავთ თუ არა ამ მხრივ ცვლილებებს?

_ ეს საკითხი პრეზიდენტის გადასაწყვეტია, მაგრამ, ჩემი აზრით, ან  გაუქმებაზე უნდა იყოს საუბარი, ან ძირფესვიანად რესტრუქტურიზაციაზე. იმიტომ, რომ ასეთი გადაბერილი შტატი და ასეთი ძლიერი აპარატი არ არის საჭირო რეგიონის გუბერნატორისთვის.

_ თითქმის ყველა მოქმედმა გუბერნატორმა დატოვა თანამდებობა. ვინ შეიძლება მოიაზრებოდნენ რეგიონებში ახალი პრეზიდენტის რწმუნებულებად. სრულიად ახალი პოლიტიკური ფიგურების შერჩევა მოხდება თუ შესაძლოა, სხვადასხვა მაჟორიტარი დეპუტატების საკანონმდებლოდან აღმასრულებელ ხელისუფლებაში გადანაცვლება ვიხილოთ?

_ ჯერჯერობით არ გვქონია ამაზე მსჯელობა და ამაზე ახალი პრეზიდენტის ადმინისტრაცია კონსულტაციების შემდეგ ჩამოაყალიბებს პოზიციას.

_ უკვე ცნობილია, რომ ახალი პრეზიდენტი ავლაბრის რეზიდენციაში არ იმუშავებს. რა დატვირთვა მიეცემა ამ შენობას მომავალში? თავდაპირველად გავრცელდა ინფორმაცია, რომ იქ საგარეო საქმეთა სამინისტრო განთავსდებოდა, თუმცა შემდეგ ეს ინფორმაცია უარყოფილ იქნა.

_ ვნახოთ, ეს მომავლის საკითხია, მაგრამ ცხადია, რომ საქართველოსნაირ პატარა ქვეყანას ამხელა საპრეზიდენტო აპარტამენტი ნამდვილად არ სჭირდება. ეს იყო ახირება და ამაში უზარმაზარი ფული დაიხარჯა. შესაბამისად, ხალხის ფულით აგებულ შენობასთან დაკავშირებით გადაწყვეტილება ხალხმა უნდა მიიღოს და გადაწყვიტოს, რა განთავსდება მასში. ჩემი აზრით, ეს იქნება შენობა, სადაც სახალხო ღონისძიებები მოეწყობა. ეს შეიძლება იყოს გარკვეული პრეზენტაციები, გამოფენები, მიღებები და ასე შემდეგ. ფაქტია, რომ გიორგი მარგველაშვილი იმ შენობაში არ იქნება, ეს უკვე გადაწყვეტილია.

_ გიორგი მარგველაშვილის წინასაარჩევნო სლოგანი იყო, რომ მისი გაპრეზიდენტების შემთხვევაში კოაბიტაცია დასრულდებოდა. რა იქნება ამის პირველადი გამოვლინება უახლოეს მომავალში?

_ კოაბიტაციის დასრულება თავისთავად გულისხმობს იმას, რომ პრეზიდენტი, მთავრობა და პარლამენტი სხვადასხვა მხარეს არ იქნებიან. იყო პრეზიდენტი და პარლამენტი, რომლებიც სხვადასხვა მხარეს იდგნენ და გინდოდა თუ არა, უნდა შეგეთანხმებინა თემა და ან შეათანხმებდი, ან ვერა. ამ შემთხვევაში ეს დაბრკოლება მოხსნილია, ერთი გუნდია და ეს კოაბიტაციაც არავის არაფერში სჭირდება. ის, რომ ერთი მხარე რაღაცას აკეთებდა და მეორე ამას ბლოკავდა, თუნდაც ელჩების დანიშვნის საკითხი რომ გავიხსენოთ, მსგავსი დაბრკოლებები აღარ იქნება.

_ სამართლიანობის აღდგენა საზოგადოების ერთ-ერთ მთავარ მოთხოვნად დღემდე რჩება. ამ მხრივ, ახალი მთავრობა და ერთიანი სახელისუფლებო შტოები აპირებთ თუ არა ქმედითი ნაბიჯების გადადგმას?

_ სასამართლო სისტემა არის თემა, რომელიც ჩემთვის ახლა ნამდვილად აქილევსის ქუსლია. აქ სერიოზული რეფორმებია გასატარებელი და ეს რეფორმები ძალიან სწრაფად თუ არა, ნელი ნაბიჯებით წავა წინ.

გიორგი ხუხია, გაზეთი „პრემიერი“ 30 ოქტომბერი -5 ნოემბერი

FaceBook