თაკო მელიქიშვილი შეყვარებულია

_ მოგესალმები, ჩვენი საუბარი ისრაელით დავიწყოთ. რა ხდებოდა ისრაელში და რა მიზნით იყავი ჩასული?

_ ისრაელში ქართული დღეები ჩატარდა. მართლაც ძალიან წარმატებულად. ამ პროექტის ფარგლებში ვიყავი ისრაელში, როგორც ჩვენი დელეგაციის წევრი _ მომღერალი. ძალიან ბედნიერი ვარ, რომ ამ საოცარი ქვეყნის ნახვისა და წმინდა მიწის მოლოცვის შესაძლებლობა მომეცა. ჯერაც ემოციების ქვეშ ვარ, იყო არაჩვეულებრივი გარემო და რაც მთავარია, სასიამოვნო მომღერლებთან ერთად ჩატარებული ნამდვილად წარმატებული კონცერტები.

_ თაკო, 2012 წლის “საუკეთესო რადიოწამყვანის” წოდება მიიღე, რას ნიშნავს ეს აღიარება შენთვის?

_ პირველ რიგში, ძალიან გამიხარდა, რომ ეს პრიზი მერგო.  ეს იყო “მეგას” დაჯილდოება. “მეგა” ჩემთვის ძალიან შინაური თემაა.  ძალიან დიდ პატივს ვცემ პროექტის ორგანიზატორს _ ბესო ჩუბინიძეს, რომელიც, მიუხედავად მცირე ფინანსებისა, მაინც ახერხებს ყოველ წელს წარმატებული პროექტის ორგანიზებას.

_ რას ნიშნავს შენთვის რადიო? როგორც ვიცი, რადიო “საქართველოს ხმა” იყო პირველი რადიო, საიდანაც დაიწყო შენი საქმიანობა.  

_ რადიო ჩემთვის ყველაფერია, თამამად შემიძლია ვთქვა, რომ ეს არის ჩემი ცხოვრების განუყოფელი ნაწილი. რაც შეეხება “საქართველოს ხმას”, როგორც სხვა დანარჩენი ჩემი კოლეგისთვის, ასევე ჩემთვის ეს რადიო იყო უდიდესი სკოლა, რომელიც მთელი ცხოვრება მემახსოვრება.

_ შეუძლებელია, თაკო მელიქიშვილთან ინტერვიუ ჩაწერო და არ ახსენო რადიო “არ დაიდარდო”, რთულია ყველაზე რეიტინგული რადიოს ყველაზე რეიტინგული წამყვანი იყო?

 _ პირველ რიგში, ძალიან დიდი მადლობა თბილი სიტყვებისთვის, მე ასე არ ვიტყოდი, უფრო საინტერესოა, ვიდრე რთული, ვინაიდან მე მიყვარს ჩემი მსმენელი და ყოველთვის ვგრძნობ მათგან უდიდეს სითბოს, რისთვისაც ძალიან დიდი მადლობა თითოეულ მათგანს.

_ რა სიახლეებს უნდა ველოდოთ “არ დაიდარდოში” ახალი სეზონიდან?

_ რადიო “არ დაიდარდო” იყო, არის და რჩება ინოვატორი ახალი პროექტებისა, ვერ დავკონკრეტდები, თუმცა შემიძლია, გითხრათ, რომ ახალი სეზონიც ისეთივე წარმატებული და საინტერესო იქნება, როგორც სხვა ყველა დანარჩენი, უფრო დეტალურად კი ამას ჩვენი ერთგული მსმენელი ჩვენი უდარდელი ეთერის მეშვეობით გაიგებს.

_ პირველი ნაბიჯები როდის გადადგი და ვისი იდეა იყო, რომ მუსიკით დაინტერესებულიყავი?

_ იდეა ვისი იყო, კონკრეტულად არ მახსოვს. თუმცა მუსიკა ჩემს ცხოვრებაში იმ დროს გაჩნდა, როცა ცეკვა დავიწყე.

_ საკმაოდ მოთხოვნადი და რეიტინგულია დუეტი გია სურამელაშვილთან. ახალი სიმღერის ჩაწერას ხომ არ გეგმავთ?

_ ნამდვილად რეიტინგული აღმოჩნდა ოთხივე დუეტი გია სურამელაშვილთან, რაც ძალიან მიხარია. თუმცა ამ ეტაპზე, ამ მხრივ, რაიმე ახალი არ იგეგმება.

_ გია სურამელაშვილს თუ გულშემატკივრობდი “ცეკვავენ ვარსკვლავებში”? მოგწონდა გია, როგორც მოცეკვავე? 

_ რა თქმა უნდა, ვგულშემატკივრობდი, და გული დამწყდა, რომ პირველივე საკონკურსო ტურიდან გამოეთიშა პროექტს, ვინაიდან მგონია, რომ გიას უფრო მეტის გაკეთება შეეძლო, უბრალოდ, ვერ მოასწრო.

_ მუსიკალურ გეგმებზე რას გვეტყვი?

_ მუსიკალური კუთხით დიდი სიახლე მაქვს და “პრემიერს” ექსკლუზიურად გეტყვით, რომ ვმუშაობ ბენდ “ბლაცკ სეა”-სთან ერთად და შემოგთავაზებთ ძალიან ბევრ საინტერესო და ლამაზ მუსიკალურ ნომერს.

_ “ფეისბუკის” სტატუსებიდან გამომდინარე, შეიძლება ვივარაუდოთ, რომ შეყვარებული ხარ?

_ ამასაც ექსკლუზიურად გეტყვით, რომ კი, ნამდვილად, თაკო მელიქიშვილი შეყვარებულია, თუმცა ვფიქრობ, რომ ამ ეტაპზე დაკონკრეტება საჭირო არ არის.

_ შენი ბოლო სტატუსი (თქვენს ცხოვრებას მიხედეთ) ვის ეხება? ეტყობა, გაგაბრაზეს?

_ კონკრეტულად არავის ეხება, უბრალოდ, ჩემს “ფეისბუკში” გაჩნდნენ ადამიანები, რომელთა წარმომავლობა დაუდგენელია და ცდილობენ ჩემი ცხოვრების გამოქექვას. მე პირადად არასოდეს მიცხოვრია სხვისი ცხოვრებით და არ მაქვს სურვილი, რომ ვინმემ იცხოვროს ჩემი ცხოვრებით, მით უფრო, როცა ამით მე ზიანს მაყენებენ.

_ თაკო, ტელევიზიაში მუშაობის გაგრძელებაზე ხომ არ ფიქრობ?

_ სხვათა შორის, მე ჟურნალისტური კარიერა ტელევიზიიდან დავიწყე, და მოგატყუებ, რომ გითხრა, არ მიფიქრია-მეთქი. იყო გარკვეული შემოთავაზებები, თუმცა იმ დროს რატომღაც ვერ მოხერხდა, ამ ეტაპზე არანაირი შემოთავაზება არ მიმიღია და თუ იქნება საინტერესო წინადადება, რატომაც არა, სიამოვნებით განვიხილავდი ამ საკითხს.

_ წარმატებებს გისურვებ.

_ ასევე.

ირაკლი ყურაშვილი, გაზეთი „პრემიერი“, 23-29 ოქტომბერი

FaceBook