სოსო ჯაჭვლიანი: “საპარლამენტო უმცირესობაზე შეტევას საპრეზიდენტო არჩევნების შემდეგ ნახავთ”

“27 ოქტომბრის შემდეგ უფრო ავლაპარაკდებით” 

 საქართველოს პრემიერ-მინისტრმა ბიძინა ივანიშვილმა კიდევ ერთხელ გამოხატა გულისტკივილი, რომ საპარლამენტო წარმომადგენლობა ძირითადად საზოგადოებისთვის ცნობილი სახეებით დააკომპლექტა და არა მათი საპარლამენტო მუშაობის გამოცდილების მიხედვით, რის გამოც ბევრი დეპუტატი ეფექტური ვერაა. ,,ნაკლებს ვმონაწილეობ საპარლამენტო უმრავლესობის მუშაობაში, უსუფაშვილია პარლამენტის სპიკერი, თუმცა პრინციპულ საკითხებში საკმაოდ ვაქტიურობ და პრინციპში, კარგად ვიცი, ვის რა შეუძლია. იცით, არჩევნები როგორც ჩავატარეთ, სახელოვანი, ღირსეული და ძირითადად ცნობილი ხალხი გამოვიყვანეთ წინა პლანზე და არა ის, რომ საპარლამენტო მუშაობის გამოცდილება ჰქონდათ მათ. რა თქმა უნდა, საპარლამენტო მუშაობაში ძალიან ბევრი ეფექტური ვერაა. ზოგიერთები ჩემზე განაწყენდნენ, როცა ვთქვი, რომ ზოგიერთი მსახიობია. მსახიობიც ძალიან მიყვარს, სოსოც ძალიან მიყვარს და იქ ძალიან ბევრი რეჟისორიცაა და ყველა ძალიან მიყვარს, მაგრამ საპარლამენტო მუშაობას თავისი გამოცდილება უნდა და სოსო ჯაჭვლიანიც და სხვებიც ცდილობენ, როგორც ახერხებენ, გამოცდილება უნდა, ცოდნა უნდა. მომავალში ისინი კიდევ უფრო ეფექტურები იქნებიან”, _ განაცხადა ბიძინა ივანიშვილმა. საკითხის ირგვლივ “პრემიერი” მსახიობს, საპარლამენტო უმრავლესობის ერთ-ერთ ლიდერს სოსო ჯაჭვლიანს ესაუბრა.

_ ბატონო სოსო, ფიქრობთ, რომ საპარლამენტო უმრავლესობის დეპუტატების მუშაობა არაეფექტურია?

_ ბიძინა ივანიშვილის განცხადება არ მომისმენია, მაგრამ გადმომცეს და მითხრეს, თუმცა  პრემიერს ეს ამ კუთხით არ უთქვამს. აუცილებლად ცოტა ნამუსგარეცხილი უნდა იყო, როგორც ნაციონალები გამოდიან და ყველა თემაზე უსირცხვილოდ  საუბრობენ, ისე გამოხვიდე და ისაუბრო. საპარლამენტო მუშაობას თქვენ რას ეძახით? 

_ როგორც პრემიერი აცხადებს, საპარლამენტო უმრავლესობის მუშაობა არაეფექტურია?

_ ვიქნებით, ვიქნებით, 27 ოქტომბრის შემდეგ გვნახეთ და ვიქნებით. ახლა ნაციონალების ბოლო ბანაობაა. დარწმუნებული ვარ, საპრეზიდენტო არჩევნებში ისინი მეორე ადგილზე ვერ გავლენ და თუ ეს მოხდება, მაშინ ქართული საზოგადოება თანხმობას აძლევს ცოცხებსა და დუბინკებს. ახლანდელი პარლამენტი ერთ-ერთი გამორჩეულია თავისი ზომიერებითა და იმ ადამიანებით, ვინც საკანონმდებლო ორგანოშია. საპარლამენტო მუშაობას გამოცდილება უნდა და ნელ-ნელა ეს ყველაფერი დალაგდება. 27 ოქტომბრის შემდეგ უფრო ავლაპარაკდებით, რადგან ყველაფერი ბოლომდეა მისაყვანი. იმდენი რომ ვილაპარაკოთ, რაც ჩვენ გვაქვს ბოლო ცხრა წლის უბედურების შედეგად დაგროვებული, მაშინ პარლამენტი დაემსგავსება ცირკს. ამიტომ პარლამენტი ცირკს არ უნდა დავამსგავსოთ. სამართალდამცავი ორგანოები, ვისაც ეს ხელეწიფება, სიტუაციას ალაგებენ და ყველა დამნაშავე დაისჯება. ხალხს ჩვენზე ასეთი განცდა იცით, რატომ აქვს? რადგან საპარლამენტო უმცირესობას არ ვუტევთ. შეტევას ნახავთ საპრეზიდენტო არჩევნების შემდეგ.

_ თქვენი აზრით, საპარლამენტო უმრავლესობა ეფექტურად მუშაობს?

_ ჩვენი მუშაობა ზომიერია. ზომიერი იმიტომ, რომ წინ საპრეზიდენტო არჩევნები გვაქვს, მერე ადგილობრივი არჩევნები გველოდება და წივილ-კივილით საქმე არ კეთდება. საქმე ბოლომდე უნდა მიიყვანო ისე, როგორც ბიძინა ივანიშვილმა ბრძანა, რომ ჩვენი დემოკრატიით ევროპა უნდა გავაკვირვოთ.  ევროპელების გაკვირვება უკვე მოხდა, როცა პრემიერმა თქვა, თუ არ გჭირდებით, ჩემი ნებით წავალო. საქართველოს პოლიტიკურ ისტორიაში პირველი შემთხვევაა, როცა პირველი პირმა თქვა, თუ არ გინდათ, წავალო. ეს რა, ევროპელების გაკვირვება არ არის? ამაზე დიდი დემოკრატია რაღა გინდათ? დანარჩენი ვნახოთ, საპრეზიდენტო არჩევნების შემდეგ როგორ განვითარება პროცესები.

მირანდა ნაბახტეველი, გაზეთი „პრემიერი“, 23-29 ოქტომბერი

FaceBook