გიორგი გუგავა: “უსუფაშვილის კარზე შეიქმნა სასიყვარულო პოლიტიკური სამკუთხედი”

“ამას ვპირდებით და აუცილებლად გავაკეთებთ”

მორიგი “მიჭირხვნის შეხვედრაზე” პრემიერ-მინისტრი ბიძინა ივანიშვილი ოპოზიციური პარტიების აქამდეც მოძულებულ ლიდერებს დაესხა და ზოგს მოღალატე უწოდა, ზოგს კი _ მასხარა. ქართველი ლეიბორისტების მამა, შალვა ნათელაშვილი, მისი თქმით, 20 წელია, ხალხს დაპირებებით ატყუებს, თუმცა 1-2 პროცენტს ძლივს, მაგრამ მაინც აგროვებს, რის გამოც ლამის მასხარა გახდესო. ფსიქოლოგების აზრით, ბოლო პერიოდში, ივანიშვილის ასეთი გაბრაზების მიზეზი პოლიტწარუმატებლობა და არშემდგარი ფურორია, რომელსაც ის ბიზნესებში ხშირად აღწევდა. თუმცა პოლიტიკა რომ ბიზნესი არ არის, ის ამაში დღემდე ვერ დარწმუნდა. ჰგონია, ყველას შეაშინებს და ბიზნესქვემდგომებივით დაიმორჩილებსო. დაიმორჩილებს კი არა, “ქრისტიან-დემოკრატების” ლიდერი, გიორგი თარგამაძე, რომელზეც პრემიერმა განაცხადა, რომ მისთვის ის მოღალატის ეტალონია, უკვე სასამართლოში უჩივის და მორალური ზარალის საკომპენსაციოდ, იმ მილიარდს სთხოვს, რომლითაც ის ივანიშვილობს. ლეიბორისტები კი დარწმუნებულნი არიან, რომ ბიძინას ხელისუფლება არჩევნებს გააყალბებს, ამიტომ პრემიერს ქუჩის აქციებით ემუქრებიან. “ლეიბორისტული პარტიის” ერთ-ერთმა ლიდერმა, გიორგი გუგავამ “პრემიერს” ხელისუფლებისგან არჩევნების გაყალბების წინასწარ დაგეგმილი ის სცენარიც გააცნო, რომელიც მათ მოიპოვეს.   

გიორგი გუგავა:

_ ჩვენ არ ვაპირებთ სასამართლოში ჩივილს. ივანიშვილისგან ეს პირველი უწმაწური გამოხდომა არ არის ნათელაშვილის მიმართ. პირველ უსტარში, რომელიც მან გამოაქვეყნა, პოლიტიკაში რომ მოდიოდა, პირდაპირ გინება დაწერა ჩვენზე, “ქართუ ჯგუფის” სახელით. საშინლად უწმაწური სიტყვები ეწერა. მიუხედავად იმისა, რომ ხელისუფლებაში მისი მოსვლიდან ერთი წელი გავიდა, მან დღემდე მაინც ვერ შეიგნო, რომ სახელმწიფოს მეთაურს ასეთი ურთიერთობები პოლიტიკურ ოპონენტებთან, მედიასთან, ექსპერტებთან და ნებისმიერ ადამიანთან, არ შეშვენის. არც ის იცის, დაპირებებით ამომრჩეველს რომ ატყუებდე, ხელისუფლებაში უნდა იყო, ნათელაშვილი კი ხელისუფლებაში ჯერ არ ყოფილა. ნათელაშვილი ხალხს დაპირებებს მაშინ შეუსრულებს, როცა მას აირჩევენ და ხელისუფლებაში მოვა. თუმცა იმ წლების განმავლობაში, როცა ივანიშვილი მილიარდებს ქაფავდა, აფინანსებდა შევარდნაძის, სააკაშვილის ძალადობრივ რეჟიმებს, 9 აპრილის სისხლიანი კალოს ერთ-ერთ ავტორს, ლებედს, ნათელაშვილი ამ ძალადობრივი რეჟიმების წინააღმდეგ იბრძოდა. ამ ბრძოლის შედეგად იძულებული გახადა ხელისუფლება, რომ ქვეყანაში ყოფილიყო უფასო საშუალო განათლება, განახევრებულიყო კომუნალური გადასახადები, საბავშვო ბაღები ბოლომდე არ გაეყიდათ, საკასო აპარატებზე მცირე მეწარმეებს აცდენოდათ წნეხი და ვალდებულება, არ მომხდარიყო ვაზის აჩეხვა კახეთში და ა.შ. ამოიღეთ კადრები, გადახედეთ ისტორიას, ეს ყველაფერი ხომ განსაჯაროებული იყო და ყველა ხედავდა, მაგრამ ისიც ამოიღეთ და ნახეთ, როცა ჩვენ ამას ვაკეთებდით, იმ დროს ბიძინა მილიარდებს როგორ ქაფავდა, როგორ აძლიერებდა იმ დამღუპველ რეჟიმებს, რომლებმაც ქვეყანა დაშალეს, ხალხი გაძარცვეს და უამრავი ადამიანის სიცოცხლე შეიწირეს. მის ამ გამოხდომაზე ჩვენი პასუხი ასეთია: ბატონო პრემიერო, ზურგსუკან ლანძღვა-გინება კაცური საქციელი არ არის, არც ეთიკური და არანაირ მორალურ-ზნეობრივ კატეგორიებშიც არ ჯდება. თუ რაიმე გაქვთ სათქმელი, გამოდით, დაჯექით ნათელაშვილთან პირდაპირ ეთერში და იქ უთხარით, რა გინდათ. ღიად გაირჩეს, ვინ რაშია მართალი, ან მტყუანი.

_ ივანიშვილი პოლიტიკაში გამოჩენიდან გებრძვით და ასეთი მართლა რა დაუშავეთ?

_ ერთ-ორ პროცენტიან პოლიტიკურ ლიდერზე ასეთი გაღიზიანებით არ ლაპარაკობენ და ლანძღვის ტირადებს არ უძღვნიან. ის შეაშფოთა და გადარია ჩვენმა რეიტინგებმა. გასული წლის პირველი ოქტომბრის არჩევნებში ნათელაშვილს მან გაუთხარა პოლიტიკური სამარე და დაასაფლავა, მაგრამ, რასაც მაშინ ვამბობდით, გამართლდა და ხალხის რეიტინგიც დაგვიბრუნდა. ნათელაშვილმა ახლახან შემოიარა 550 სოფელი და ეს განწყობები ადგილზე ნახა. ყოველკვირა თავადაც ვატარებთ რეიტინგებს და თბილისში 33 პროცენტი გვაქვს, რეგიონებში უფრო მეტი. ეს რეალობა მანაც იცის და ამით შეშფოთებული აკეთებს ასეთ პროპაგანდისტულ ილეთს, რა თქმა უნდა, პირადი მოძღვრების _ ყანდიაშვილის, რამიშვილისა და ხუხუშვილის რჩევით.

_ თარგამაძე ითხოვს, პრემიერმა განმარტოს, რაში უღალატა მან ქვეყანასა და ხალხს, თქვენ კი არ ითხოვთ განმარტებას, კონკრეტულად როდის და როგორ ატყუებდით საქართველოს მოქალაქეებს?

_ ჩვენ ვითხოვთ, თუ კაცია ივანიშვილი, სიმართლეს ამბობს და ზურგსუკან არ ჭორიკნობს დედაკაცივით, გამოვიდეს, დაუჯდეს ნათელაშვილს პირდაპირ ეთერში და იქ გაირკვეს ყველაფერი _ ვინ არის დამნაშავე და ვინ ჭორიკანა. ქვეყნის პირველ პირს ხომ უნდა ჰქონდეს წონა, მისი სიტყვების უკან ხომ უნდა იყოს არგუმენტები და მტკიცებულებები. როცა ეს არ გაქვს და ადამიანს დამალული ეუბნები, რაც თავში მოგივა, ან დაგარიგებენ, ვერ ჯდები მასთან პირდაპირ დებატებში, მაშინ ხარ ჭორიკანა, ცრუპენტელა და გამოძრავებს სხვა ქვენაგრძნობები. ფულისა და მდგომარეობის გამო ივანიშვილს წლების მანძილზე ახვევია მლიქვნელების არმია, რომლებიც მხოლოდ აქებენ, ადიდებენ და მესიად რაცხავენ. მისთვის უცხო აღმოჩნდა კრიტიკული აზრი. ვისგანაც ამას ისმენს, მისი აუტანლობა ემართება და მის ლანძღვა-გინებასა და ჭორიკნობაზე გადადის. ხალხს ისიც კი უთხრა, თუ მარგველაშვილი არჩევნებში 60-70 პროცენტს არ მიიღებს, მე წავალ აქედანო. ალბათ, ხვდებით, რამხელა ამბიცია და განდიდების მანია აწუხებს თავისი მილიარდის გამო ამ ადამიანს. გაიხსენეთ, უცხოური გამოცემებისთვის მიცემულ ინტერვიუებში როგორ აყენებდა მთელ ერს შეურაცხყოფას. ამბობდა, ქართველები პოლიტიკურად უკულტურო ერიაო. ილია ჭავჭავაძე თავის დროზე თბილისის სათათბიროში იყრიდა კენჭს და ფულიან სოვდაგართან წააგო არჩევნები. აკაკი წერეთელსაც აქვს არჩევნები წაგებული საჩხერეში მუშა შვანგირაძესთან, მაგრამ ამ ღმერთის ტოლ ადამიანებს ერი არ ულანძღავთ ამის გამო. ეს ვინ არის ამისთანა?!  

რამდენიმე დღის წინ პარლამენტის თავმჯდომარემ, დავით უსუფაშვილმა განაცხადა, რომ მას ხშირი შეხვედრები აქვს ნინო ბურჯანაძესთან და დავით ბაქრაძესთან. როგორც აღმოჩნდა, უსუფაშვილის კარზე შეიქმნა სასიყვარულო პოლიტიკური სამკუთხედი. მიდის გარიგებები, ვინ გაიყვანონ მეორე. ბურჯანაძე და ბაქრაძე, როგორც ჩანს, ეჭვიანობენ ერთმანეთზე, მაგრამ უსუფაშვილმა დაამშვიდათ, ერთნაირად მიყვარხართ და ვალაგებ თქვენს სიტუაციებსო. იგივე ხდება კომისიებშიც. იქ მხოლოდ “ნაცმოძრაობა” და “ოცნებაა” წარმოდგენილი, რომლებიც ერთმანეთში რიგდებიან. ივანიშვილის განცხადება, რომ მეორე ტური არ ჩატარდება და მეორე ადგილზე გავა ბაქრაძე, პირდაპირი დირექტივა გახლავთ კომისიებისთვის, რომ მას ასეთი შედეგი სჭირდება, ანუ პირდაპირ გასცა ბრძანება გაყალბებაზე. როცა ასეთ განცხადებას აკეთებს სახელმწიფოს მეთაური, ეს არის ზეპირი ბრძანება და სხვა არაფერი.

ახლა გეტყვით ექსკლუზიურ ინფორმაციას, თითოეულ რაიონში ყალიბდება 50-კაციანი ჯგუფები, რომლებმაც უნდა დაატრიალონ ე.წ. სომხური კარუსელი. ამ ჯგუფის თითოეულ წევრს უხდიან 1000 ლარს და აძლევენ გაყალბებულ პირადობის მოწმობებს. ამ ჯგუფში შემავალ ადამიანებს ექნებათ სხვადასხვა სახელისა და გვარის, გაყალბებული მოწმობები და არჩევნების დღეს ისინი შეისეირნებენ ამ მოწმობებით რამდენიმე საარჩევნო უბანში და მისცემენ გაყალბებულ ხმას. ანუ არჩევნები იმავე სქემით ჩატარდება, როგორც ნაციონალები ატარებდნენ. გეუბნებით დაზუსტებულ ინფორმაციას, რომელიც “ოცნების” შტაბიდან არის გამოსული. იქ არიან ადამიანები, რომელთაც გული შესტკივათ ქვეყანაზე და ეს ინფორმაციაც ამიტომ გამოაქვთ. ერთ-ერთი რაიონის შტაბის ხელმძღვანელმა მოგვაწოდა ეს ინფორმაცია, რომელიც თავადაც ქმნის ასეთ ჯგუფს. გახსოვთ, ალბათ, სანამ “ოცნება” ხელისუფლებაში მოვიდოდა, 20 ათასი ყალბი პირადობის მოწმობა რომ იყო დაბეჭდილი ნაციონალების მიერ იუსტიციის სამინისტროში. ეს ბრალდება ადეიშვილს წაყენებულიც კი ჰქონდა, მაგრამ სად წავიდა ეს ყალბი საბუთები, არავინ იცის. ამის გამო არავის პასუხიც არ უგია. სახელმწიფო დოკუმენტის გაყალბება კი სისხლის სამართლის კოდექსით კვალიფიცირდება, როგორც მძიმე სამოხელეო დანაშაული, მაგრამ ივანიშვილი ამის შემოქმედ ადეიშვილს აქებს, საუკეთესო სისტემა შექმნაო. სამწუხაროდ, ეს ყალბი მოწმობები ისევ მოქმედებს და ამიტომ არ შეცვალეს საარჩევნო კოდექსიც, არ დაადგინეს ამომრჩეველთა რაოდენობა, რასაც ახალი ხელისუფლება გვპირდებოდა. თავად ამბობდნენ, სამ თვეშია ეს შესაძლებელიო და რეალურად ხალხს ვინ ატყუებს, ამ ერთი ფაქტითაც ჩანს. გადამფრენი ფრინველების რაოდენობას ითვლიან, ოკეანეში რამდენი თევზია, იმას იგებენ და რა გახდა საქართველოში ამომრჩეველთა ზუსტი რაოდენობის დადგენა?! ეს სპეციალურად არ კეთდება, რომ საარჩევნო მანიპულაციები ადვილად მოახდინონ. ამომრჩეველთა მოსყიდვაზეც უკვე იხარჯება ფული და ესეც ცნობილია ჩვენთვის.

ივანიშვილს რუსეთში მეტსახელად “მახრჩობელა” ტყუილად არ შეარქვეს. ის ჩაიგდებდა ხოლმე ხელში ბიზნესს, მერე გადასცემდა მენეჯმენტს და მართავდა მათი ხელით. ახლა ცდილობს, მართვის ეს მეთოდები მოარგოს ჩვენს სახელმწიფოს. გვერდში იყენებს მართვად და უსახურ ტიპებს და ცდილობს, მათ მიაბაროს ფორმალურად ძალაუფლება.  მას პირადი პასუხისმგებლობა არ ექნება საზოგადოების წინაშე, მაგრამ ფარდის უკნიდან წარმართავს ყველა პროცესს და იქიდან გაუკეთებს რეჟისურას. ჩინეთში ასე იქცეოდა დენ სიაოპინი. მას არანაირი თანამდებობა არ ეკავა, მაგრამ ჩინეთის არაფორმალური მმართველი გახლდათ. ასე იყო ლიბიაში კადაფიც. ბოლოს ამბობდა კიდეც, რა თანამდებობიდან გადავდგე, რას მთხოვთო?! რეალურად მას არანაირი თანამდებობა არ ეკავა და ამასაც ასე უნდა, მართოს ქვეყანა. ჩრდილში იყოს და დანაპირების შესრულებაზე არანაირი პასუხისმგებლობა არ აიღოს. მოსახლეობის დიდი რაოდენობა უკვე იმედგაცრუებულია ივანიშვილით და “ოცნებით”. რაც უნდა ივანიშვილს, ეს საქართველოში არ გამოუვა.

_ რატომ არ გამოუვა? ვინ და როგორ შეუშლის ამაში ხელს?

_ ხალხი აუცილებლად დაუპირისპირდება. სოფელ-სოფელ შემოიარა ნათელაშვილმა მთელი საქართველო. რეგიონებში უკიდურესი სიღატაკე და საშინელი იმედგაცრუებაა. ამას ემატება ისიც,  რომ რეგიონებში ერთმანეთში არიან შერწყმული ნაციონალები და “ოცნების” წარმომადგენლები. ვინც გუშინ ნაციონალი იყო, დღეს ოცნებისტად არის ქცეული და კვლავ ძარცვავს ხალხს და აუბედურებს. შანსი იმისა, რომ სოციალური მდგომარეობა გამოსწორდეს, მიიღონ დახმარებები ამ ადამიანებმა, არ არსებობს. დღითი დღე უარესდება მათი მდგომარეობა, არადა ერთი წლის წინათ ეს საცოდავი ადამიანები “ოცნებას” მხარში ედგნენ და ხელისუფლებაში მოიყვანეს. სრული აპათიაა ხალხში. ივანიშვილი გრძნობს ამას და ცდილობს, თავი აარიდოს პასუხისმგებლობას, მარიონეტებითა და თოჯინებით მართოს ქვეყანა და ეს მართლა არ  გამოუვა. იძულებული გახდება, გასული წლის ხიბლიდან გამოვიდეს.

_ ზოგი ფიქრობს, რომ ხალხის რეალური მდგომარეობა ივანიშვილმა არ იცის და მისი წრე ლამაზად უფუთავს ყველაფერს. ამას გამორიცხავთ?

_ ზოგი ბრიყვი იმასაც აცხადებს, რომ, როგორი გახსნილობაც ახლა არის, ასეთი სააკაშვილის დროს არ ყოფილაო. მათ რატომღაც ავიწყდებათ, რომ თავიდან სააკაშვილიც ჟურნალისტებთან ათენ-აღამებდა და საკმაოდ გახსნილიც იყო, მაგრამ ერთი წლის მერე დაიწყო მათი კრიტიკა და ჟურნალისტებს მოყიყინეები ეძახა (სხვათა შორის, ეს სიტყვა ახლა ენერგეტიკის მინისტრმა, ფეხბურთელმა კალაძემაც გამოიყენა “ხუდონჰესის” მშენებლობაზე ხალხის პროტესტთან  მიმართებაში. _ ნ.ვ.). აცხადებდა, რომ არ კითხულობდა გაზეთებს და აკრძალა კიდეც სახელმწიფო დაწესებულებებში მისი შეტანა. ბოიკოტი გამოუცხადა მასმედიას და მერე მისი დახურვაც დაიწყო. იგივე გზას ადგას ივანიშვილიც, რაც ძალიან ცუდად დაუმთავრდებათ “ოცნებასა” და ივანიშვილს. თანაც ეს უფრო მალე მოხდება, ვიდრე სააკაშვილს დაემართა. ამას 9 წელი უკვე აღარ დასჭირდება და ეს სეზონიც საკმარისი აღმოჩნდება.

_ ივანიშვილი წინასაარჩევნო დაპირებების გაცემისას აცხადებდა, რომ მყისიერად შეიცვლებოდა ყველაფერი. რატომღაც ახლა არც ეს ახსოვთ და არც არავინ ახსენებთ. მასთან შეხვედრის დროს ჩემს კოლეგებსაც არ დასცდენიათ ამაზე არაფერი...

_ ბუნებრივია, რომ ერთ დღეში ქვეყანა ვერ აშენდება, მაგრამ ახლა გეტყვით, მყისიერად რის გაკეთება შეიძლებოდა, მაგრამ არ გააკეთა. “ნაცმოძრაობამ” და განსაკუთრებით მიხეილ სააკაშვილმა ივანიშვილის ბიუსტი უნდა დადგას საპრეზიდენტო რეზიდენციაში, რადგან ივანიშვილს შეეძლო, მისთვის გამოეცხადებინა პოლიტიკური იმპიჩმენტი პარლამენტში და სააკაშვილიც ამით დასრულდებოდა, პოლიტიკურად მკვდარი იქნებოდა. ამ იმპიჩმენტის საფუძველზე კი რეჟიმის გასამართლება გახდებოდა შესაძლებელი, მაგრამ ეს არ გააკეთა. იცით, სამედიცინო დაზღვევაზე რა თანხა წავიდა?! ნახევარ მილიონზე მეტი, არადა ამ თანხის ნახევრით სრულიად შესაძლებელი იყო, ყველა რაიონში მუნიციპალური, უფასო საავადმყოფოს გახსნა, მაგრამ ივანიშვილმა სადაზღვევო მაფია შეინარჩუნა, გადაინაწილა მისმა ხალხმა ეს ბიზნესი და ბიუჯეტის კოლოსალური ფულიც იქით გაუშვა. ყველამ კარგად იცის, რომ დღეს არც ჯანდაცვა მუშაობს და არც დაზღვევა ისე, როგორც ეს ხალხს სჭირდება. საწვავზეც შენარჩუნდა იგივე მონოპოლია და ეს ბიზნესიც გადაინაწილეს სააკაშვილისა და ივანიშვილის ოჯახებმა. ამიტომ დარჩა იგივე ფასები, არადა ფასების შემცირება შეიძლებოდა. სოფლის მეურნეობაში თითქოს ინვესტიცია განხორციელდა, მაგრამ მისი მარგიქმედების კოეფიციენტი არის ნული. არადა ხალხს როგორც ჰპირდებოდა, მილიარდს ჩავდებო, ეს რომ მართლა გაეკეთებინა, დღეს უხვი პროდუქცია უნდა იყოს სოფლის მეურნეობაში, მაგრამ მაღაზიის დახლებზე, 85 პროცენტი კვლავ უცხოურ პროდუქციას უკავია. თუ ყველაფერი ააყვავა, მაშინ რატომ არის დაქცეული სოფელი, ან ხალხი იქიდან კვლავ რატომ გამორბის?! ამის გაკეთება მყისიერად ხომ შეიძლებოდა არა?! იცით, რატომ სჭირდება “ოცნებას” “ნაცმოძრაობა” ერთადერთ ოპოზიციად? “სამ დურაკის” პრინციპით რომ იკოჰაბიტაციონ. თუ ნაციონალები რაიმეზე ხმას ამოიღებენ, მივარდებიან და ეტყვიან, გაჩუმდით, თქვენს დროს ასე არ იყოო?! სხვას კი ამას ვერ ეტყვიან და ის მდგომარეობა, რომელიც ორივეს უკავია, ათწლეულობით გახანგრძლივდება.

მოკლედ, თუ იქნება მცდელობა არჩევნებზე იმ სქემების დატრიალების, რომელზეც უკვე გითხარით, ჩვენ ხალხს აუცილებლად დავუძახებთ ქუჩაში და მერე თვალოს ივანიშვილმა, რუსთაველზე რამდენი ადამიანი იდგება. ამას ვპირდებით და აუცილებლად გავაკეთებთ, თავზე ჩამოვამხობთ საარჩევნო ურნებს.

_ ამბობენ, რომ ქუჩაში სხვა ოპოზიციური პარტიებიც აპირებენ გამოსვლას და ასეთ შემთხვევაში თქვენი გაერთიანება შესაძლებელია?

_ როცა აქციები იწყება, ქუჩაში იმ ძალების კოორდინაცია ხდება, ვისაც შედეგები გაუყალბეს, სულში ჩააფურთხეს, მოატყუეს და არჩევანი წაართვეს. შეიძლება სამარადჟამო გაერთიანება არ მოხდეს, მაგრამ შეთანხმებებსა და ერთობლივი ძალით არჩევანის დაცვას არ გამოვრიცხავთ. ყველაფერი მიდის იქით, რომ ერთი კვირის მერე ხალხი უკვე ქუჩაში დადგეს.     

ანკა ბაზერაშვილი, გაზეთი „პრემიერი“, 23-29 ოქტომბერი

FaceBook