

|
ავთანდილ ვარსიმაშვილი: “გენიალური მოცეკვავის ნინო ანანიაშვილისა და არაჩვეულებრივი მომღერლის ნინო ქათამაძის ბრწყინვალე დებიუტია მხატვრულ კინოში”
თბილისის კინოეკრანებზე 7 ნოემბრიდან ავთანდილ ვარსიმაშვილის ახალი ფილმი გავა. ფილმი “სახლი, რომელიც ფანჯრიდან გაიპარა”, აბსურდული შავი კომედიაა “იდიოტოკრატიისა” და “ყველაფერი კარგად იქნებას” შემქმნელებისგან. სცენარის ავტორი და რეჟისორი: ავთო ვარსიმაშვილი. ოპერატორები: გიორგი შანიძე, მიხეილ მაღალაშვილი. მხატვარი თეო კუხიანიძე. ფილმში, თავისუფალი თეატრის მსახიობებთან ერთად, ნინო ქათამაძე და ნინო ანანიაშვილი მონაწილეობენ. ფილმი აბსურდული კომედიაა ერთი სახლის მაცხოვრებლებზე, მასში ქაოსური სცენებია ასახული.
“პრემიერს” ფილმის რეჟისორი ავთანდილ ვარსიმაშვილი ესაუბრა.
_ ახლახან დაასრულეთ მუშაობა აბსურდულ კომედიაზე _ “სახლი, რომელიც ფანჯრიდან გაიპარა”, რას გვეტყვით ფილმის სიუჟეტზე?
_ რატომ უჩნდებათ ადამიანებს ქვეყნიდან გაქცევის სურვილი? რას გააკეთებ, თუ ხარ საკრებულოს ბუფეტის მიმტანი და შემთხვევით ერთ მილიონ დოლარს იპოვი? აახვევ ამ ქვეყნიდან? აახვიე, ოღონდ გახსოვდეს, რომ შენთან ერთად ძალიან ბევრი ადამიანი მოინდომებს გაპარვას... გენიალური მოცეკვავის ნინო ანანიაშვილისა და არაჩვეულებრივი მომღერლის ნინო ქათამაძის ბრწყინვალე დებიუტია მხატვრულ კინოში, გოგა ბარბაქაძის ფანტასტიკური აქტიორული გარდასახვა, თანამედროვე ქართული თეატრისა და კინოს უპირველესი ვარსკვლავების შესანიშნავი თამაში. კომედია ტრაგიკული დასასრულით! გადაღებები თბილისში მიმდინარეობდა.
_ თეატრისა და კინოს ვარსკვლავებიდან ვინ მონაწილეობს?
_ ნინო ანანიაშვილი, გოგა ბარბაქაძე, ჯაბა კილაძე, აპოლონ კუბლაშვილი, მარიამ ნადირაძე, კახა მიქიაშვილი, სანდრო მარგალიტაშვილი, ნინო ქათამაძე, ნიკოლოზ სვენტიცკი, სალომე ჭულუხაძე, ხატია ბრაჭული, სლავა ნათენაძე, ვიოლეტა სეზანი, ლაშა გურგენიძე, ნინო დუმბაძე, ნიკოლოზ წულუკიძე და სხვ.
_ “თავისუფალ თეატრში” სეზონი გაიხსნა, ახალ სეზონზე რომელი სპექტაკლების პრემიერას შესთავაზებთ მაყურებელს?
_ უახლოესი პრემიერა იქნება “ჰეი ჯულიეტა”, რომელსაც დგამს მაია დობორჯგინიძე და მთავარ როლშია გოგა ბარბაქაძე, ხოლო შემდეგ იქნება ჩემი სპექტაკლი “რიჩარდ მესამე”.
ანჟელა ბუცხრიკიძე, გაზეთი „პრემიერი“, 23-29 ოქტომბერი
![]() |
04-01-2016, 16:00
ლია მუხაშავრია: მურუსიძის სასამართლოში დარჩენა პირადად ბიძინა ივანიშვილთან იყო შეთანხმებული |
![]() |
14-12-2015, 17:00
თამარ კორძაია: „რესპუბლიკურ პარტიას“ საკუთარი ძალის და წონის შესაბამისი მოთხოვნები ექნება |
![]() |
22-12-2015, 17:00
ზურაბ აბაშიძე: რაც ვლადიმერ პუტინმა განაცხადა, ვფიქრობ, საყურადღებოა |
სხვა |