“სააკაშვილმა” და ღარიბაშვილმა მინისტრებს ერთგულებაზე ტესტირება ჩაუტარეს

საქართველოს პრეზიდენტმა მიხეილ სააკაშვილმა შინაგან საქმეთა მინისტრისა და მომავალი პრემიერ-მინისტრის, ირაკლი ღარიბაშვილის თანდასწრებით მიიღო გარანტია, რომ მას არ დაიჭერენ.

მართალია, თანამდებობაზე ნომინალურად მყოფ მთავარ პროკურორს ამ გარანტიის გაცემას არც არავინ ეკითხებოდა, მაგრამ კბილაშვილმა თავად მოახსენა პრეზიდენტ სააკაშვილს, რომ მისი დაჭერის თემა პროკურატურის კომპეტენციაში არ შედის და ეს თავად მიხეილ სააკაშვილსაც კარგად უნდა ესმოდეს.

მართალია, როდესაც კბილაშვილი ამ პირობას იძლეოდა, შს მინისტრი სიცილით იგუდებოდა, მაგრამ ამ სიცილის მიზეზებზე ცოტა ქვემოთ მოგახსენებთ.

ისე, ცოდვა გამხელილი სჯობს და ბიძინა ივანიშვილის მთავრობაში ლამის არ დარჩა მინისტრი, გარემოს დაცვის თავქალიდან და სპორტის სამინისტროს თავკაციდან დაწყებული, რომელმაც ამ რამდენიმე დღის წინ საქართველოს პრეზიდენტს თავისი პატივისცემა არ დაუდასტურა და ცალკეული ქმედებების გამო ან ბოდიში არ მოუხადა, ან კიდევ კედელს არ გაეკრო. ერთადერთი პერსონა, ვინც პრეზიდენტს არაფერი დაუთმო, ვიცე-პრემიერი, ენერგეტიკის მინისტრი კახა კალაძე იყო.

როგორ შეეძლო “თავზე დაეხურა” მინისტრებისთვის სააკაშვილს, ეს, ალბათ, ადვილი წარმოსადგენია, თუმცა მაინც ყველაზე საინტერესო მთავარი პროკურორისა და პრეზიდენტის საუბარი იყო.

ურთიერთმოკითხვის შემდეგ პრეზიდენტმა არც აცია, არც აცხელა და მთავარ პროკურორს უთხრა:

_ ჩემს დაჭერაზე რომ ბჟუტურობ რაღაცებს, შენ რამე ხომ არ გეშლება. შენ მე ვინ გგონივარ. ფიქრობ, რომ რამე შეგრჩება? სად წახვალ, სულ მალე რომ დავბრუნდები? აი, მაშინ ვნახოთ, ვინ იქნება დასაჭერი და ვინ _ არა.

კბილაშვილი პასუხობს: ბატონო პრეზიდენტო, ხომ იცით, რომ ეს არ არის პირადად ჩემი თემა. არა, როგორ გეკადრებათ...

_ კიდევ მე მეკადრება? მე მეკადრება?

_ ბატონო პრეზიდენტო, მართლა არაა ეს ჩემი თემა და თქვენც ხომ ხვდებით, რომ ეს პიარია.

_ პიარს განახვებთ მე თქვენ ყველას. განახვებთ, რაა პიარი და რაა დაჭერა.

ამ ყველაფერს ისმენს შს მინისტრი ირაკლი ღარიბაშვილი და სიცილით იგუდება. ნუ, სხვა მინისტრებისა და პრეზიდენტის საუბარზე უკვე მართლაც არ ღირს ყურადღების შეჩერება.

და მაინც, რატომ იცინოდა, იცინოდა კი არა, ხარხარებდა ირაკლი ღარიბაშვილი? იმიტომ, რომ რეალურად საქართველოს პრეზიდენტს მიხეილ სააკაშვილს კი არა, საქართველოს პრეზიდენტის მიხეილ სააკაშვილის იმიტატორს, ქართლოს ნატროშვილს უდასტურებდა ყველა საკუთარ პატივისცემას.

დიახ, დიახ, სააკაშვილის სათაყვანებელი ანაკლიიდან რეკავდა პაროდისტი ქართლოს ნატროშვილი, ირაკლი ღარიბაშვილის თანდასწრებით, მინისტრებთან. “ქართული ოცნების” რიხიანი მინისტრების სუნს რომ არ შეეწუხებინა ირგვლივ მყოფნი, ალბათ, დილამდე ივანიშვილის მაგიდაზე თითოეული მათგანის გადადგომის განცხადება იდებოდა და “ნაციონალურ მოძრაობაში” ერთობლივი გაწევრიანების სენსაციურ ექსკლუზივსაც გვამცნობდა “რუსთავი 2”.

ვიღაცა იტყვის, ეს რა “ანგლობააო” და ირაკლი ღარიბაშვილს, ალბათ, საქციელსაც დაუწუნებს, თუმცა ღარიბაშვილის მიერ მინისტრებისთვის ჩატარებულმა “ქართული ოცნებისგან” ორსულობის ტესტმა მეტწილად უარყოფითი შედეგი აჩვენა. ეს უწყინარი ხუმრობა ქვეყნის მომავალი პრემიერ-მინისტრისთვის – გიორგი კვირიკაშვილისა და პრემიერის ფავორით ირაკლი ღარიბაშვილისთვის ფრიად დამაფიქრებელი უნდა იყოს. კვირიკაშვილის და ღარიბაშვილიც ახალგაზრდა, გონიერი ადამიანები არიან და მათთვის მნიშვნელობა უნდა ჰქონდეს, ვის ჩასვამენ იმ გემში, რომლიც თავად უნდა მართონ. მით უფრო, რომ ივანიშვილის წასვლის შემდეგ მოცემულობა იცვლება და ერთ მშვენიერ დღეს ისე არ აღმოჩნდეს, რომ ივანიშვილის ფავორიტების გემი ეკიპაჟის გარეშე დარჩეს.

პოლიტიკა ოხერია, ქართული პოლიტიკა _ მით უფრო. ის ბოლომდე არც ავტორიტეტებს აღიარებს, შევარდნაძის სახით, არც პატრიოტებს _ გამსახურდიას სახით, არც ავტოკრატებს _ სააკაშვილის სახით და არც პოლიტიკაში დროებით მოსულ ფილანტროპებს _ ივანიშვილის სახით. ქართულ პოლიტიკას სხვა რამ სჭირდება და ღმერთმა ქნას, ქართული სახელმწიფოს რომელიმე მეთაური მიხვდეს ამას.

ქართლოს ნატროშვილმა ჩვენთან სატელეფონო საუბარში დაადასტურა, რომ მართლაც ესაუბრა მინისტრებს, თუმცა აღნიშნა, რომ ეს იყო კეთილი ხუმრობა და მას საუბრის დეტალები არ ახსოვს.

“კი ვესაუბრე... ცოტა ნასვამი ვიყავი... თუმცა დეტალები, რაზე ვესაუბრე, არც კი მახსოვს”, _ განაცხადა ნატროშვილმა.

მესმის მისი, გარკვეული უხერხულობა მაინც ახლავს მინისტრების “გაშაყირებას”, თუ ეს ფაქტი საჯარო ხდება, მაგრამ დროთა განმავლობაში ეს თავად მისთვისაც ფრიად სასიამოვნოდ და ნამდვილად იუმორით გასახსენებელი იქნება. ვადასტურებთ, რომ მის ტელეფონზე ზარით ნამდვილად არ გვიცდია ამ ნიჭიერი ადამიანის შარში გახვევა. მით უფრო, რომ ეს ინფორმაცია საჯარო მას არ გაუხდია.

ისე, ძალიან კარგია, რომ მან ქართველი მინისტრების “ოფსილა” თავადაც შეიგრძნო და თუ სწორად გააანალიზებს მომხდარს, პრემიერ-მინისტრის ფავორიტს, შს მინისტრს ბევრ რამეზე დააფიქრებს.

გეგა სილაგავა, გაზეთი, "პრემიერი", 18-24 სექტემბერი

FaceBook